قال ايمو قال استرجل ياواد انت وهو

شوفو بقى مفيش حاجة تغيظنى وتنرفزنى قد البنت اللى معندهاش حياء
والولد اللى مش راجل كده وجدع ويعتمد عليه

قال ايه فى عيال اسمهم جماعة الايمو
قال العيال دى حزينة ومكتئبة وتميل للحزن
تلبس الاسود تعبير عن الحزن
بيطولو شعرهم من قدام ويدارو عنيهم
يا حلاوه
وقال ايه عددهم بالالاف
وقال ايه بيقطعو ايدهم او وجوههم للخروج من الالم النفسى للالم الجسدى
ركزو معايا
ويميلون للعزلة والبكاء
وقال ايه هما اللى رسمو رسومات وسط البلد
تعبير عن الغضب علشان الامن بيطاردهم
علشان فى مذيع وحش قال عليهم بيعملو حاجات مش كويسه
وهما مش كده خالص دول مسالمين وعايزين يعيشو حياتهم
زى ما هما عايزين دول لسه محتفظين بتعاليم الدين
يا حالولى يا ولاد
وبيقولو احنا كتير ومنتشرين فى كل المحافظات
وانهم مش جماعة لا سياسية ولا دينية
وانهم لا يمثلون اى خطر للامن العام

اف قرفت والله جدا جدا من الحاجات الغريبة اللى بتظهر فى بلدنا دى
قرفت جدا مش دى بلدنا يا جدعان
مش دول ناسها خالص
بلدنا كنا كلنا عايشين فيها لينا اسم واحد مصرى الجنسية
مسلم او مسيحى عادى مش فارقة لان الاخلاق واحدة
الروح واحدة جدعان وطيبين
صفات الشهامة والاحترام هى اللى كانت جامعانا

دلوقتى ازى الحال
الحمد لله فى السراء والضراء

فوقو بقى ايموز ايه
انت راجل عارف يعنى ايه راجل
يعنى انسان محترم اخلاق دين
فين الدين عندك
انت خليت شيطانك يتغلب عليك
المفروض تحاربه وتبقى اقوى منه
فين انت من الحياة بتعمل ايه بتقعد على الكافيه
تبكى حالك
قوم اتلحلح
سيبك من الغم اللى انت عامله ده

المفروض انك فرد منتج والحمد لله سليم معندكش اعاقة
والله ان فى ناس معاقة فاتحة بيوت زى الفل

يا دى المصيبة لو الحرب قامت هتقعد تعيط وتقول اصل انا ايموز

العيال الايموز دول مش عايزين غير اب وام
فين اهاليهم العيال دى
يعنى فين ابوه وفين امه
يادى النيله دا انا خليت الموضوع كبير دول يا دوب كام الف فى وسط ملايين

دا الدكتور احمد زايد دكتور علم الاجتماع وعميد اداب القاهر قال للمصرى اليوم
انهم منتشرين فى العالم كله ووجودهم هنا يدل على اننا مجتمع طبيعى رغم اعتراضنا عليهم
وان مطاردة الامن لهم ستحول الموضوع الى قضية راى عام وستجذب تعاطف الكثيرين
وان رسوماتهم وشعاراتهم من باب الرغبة فى التميزوانهم ينتشرون فى شرائح معينة من المجتمع تتسم بالثراء

يا ناس يا ناس الدين والاخلاق
الترابط الاسرى
الحب
يارب نور بصيرتى وبصيرة اولادى وكل مسلم
وكل من عاش تحت سماكى يا مصر

الورد جميل جميل الورد

خلينا نتامل شوية فى بديع صنع الله ولو فى وردة صغيرة

هنلاقى كل همومنا دابت لوحدها

سؤال من البراءة

الاطفال هما البراءة

ولما البراءة دى تسألك سؤال

لازم ترد رد منطقى لانك فى ردك ده

بتشكل جواه حاجة ولازم تبقى صح

يعنى لو سألك ربنا فين واللا الملائكة فين

واللا ايه الجنة وايه النار

لازم تجاوب اجابه منطقية وصحيحة على قد ما تقدر

ولو سألك ده معمول ازاى لازم برضه تجاوبوه

ولو مش عارف قوله مش عارف بس هقرأ واعرف واقولك

وفعلا تقرا وتعرف وتقوله علشان فعلا بيبقى مستنى الرد

وكمان علشان صورتك ما تتهزش قدامه

انا بقى اتسالت سؤال من بنتى

وكنا وقتها بنشوف اعادة لفيلم احنا بتوع الاوتوبيس

فى فترة بعد الظهر على احدى القنوات

بنتى ماما هوالفيلم ده عن مصر واللا بلد تانية

رديت لا يا حبيبتى دا فيلم مصرى والناس دول ممثلين مصريين

بنتى طب هما بيضربو الراجل ليه وبيعذبوه كدا

دا باين عليه طيب وبيحب بلده وحتى بيقول شعر فيها اهو

طب هو الراجل العجوز ده ضربوه ليه

طب واللى عامل شيخ ده ضربوه ليه كمان

ماما هو الحاجات دى كانت زمان بس واللا بيعملو كده دلوقتى

احوليت طبعا من السؤال

اصلى قولت لباباها غير الفيلم قالى عايز اشوفه

انا كنت عارفة انها هتسئل سؤال زى ده

طب ايه العمل قولتلها

بصى يا حبيبتى مصر احسن بلد وناسها احسن ناس

وبنحبها علشان دى بلدنا وملناش بلد غيرها ومش عايزين بلد غيرها

والحاجات دى كانت زمان وبصيت لزوجى وقولت له مش كده يا بابا(علشان يأكد معايا)

قالها طبعا ياميرو ياعسل

البنت بصت لعنينا وكانها بتدور على تاكيد

يعنى يا بابا اطمن عليك دايما ان مش هيحصلك زى الناس دى(علشان باباها بيركب مواصلات كتير من و الى الشغل)

حضنها وقالها متخافيش يا حبيبتى دايما ادعيلى ربنا يسترها معايا ومع كل الناس

خدت نفس عميق اننا طلعنا من المطب ده

وقدرنا نضحك عليها دلوقتى

بس بعد عشر سنين لو كان الحال هو الحال هينفع نضحك عليها برضه ؟

بنتى حبيبتى

بنتى حبيبتى ميرو

احلى حاجة فى حياتى

شبهى وشبه باباها

يعنى قمر من الاخر

بنت شاطرة فى المدرسة تلميذتى النجيبة

واخلاقها ممتازة مطيعة وهادية

لكن ساعات شعنونة ولذيذة

نور عين ابوها

غاوية قراءة ومبتفوتش عدد للعربى الصغير

بتفكرنا اخر الشهر بعدد الشهر اللى بعده

الحمد لله علمناها الصلاة وبتصلى ربنا يهديها

محافظة على الصلاة من يوم ما علمناها

لقيتها فى يوم جاتلى المطبخ وهى بتعيط

وقالتلى ماما انا حاسة ان ربنا مبيحبنيش وانى هدخل النار

سيبت اللى فى ايدى مخضوضة وسالتها ليه ياحبيبتى بتقولى كده

قالتلى علشان مش ب اصلى

قولتلها يا حبيبتى معلش

اكمنك لسه صغيرة بس احنا مش بنكلمك على الصلاة

رسول الله صلى الله عليه وسلم امرنا نعلم اولادنا عند سبع سنين

وانتى خلاص فاضل شهر وتكمليهم

وعلى العموم يلا بينا تعالى اعرفك الوضوء ازاى

وكمان الصلاة ولما المغرب ياذن نقوم نصلى سوا وزى ما هعمل اعملى

فرحت جدا جداوتغير وجهها الجميل بابتسامة حلوة

وقلت يا رب بارك فيها وابعد عنها الشيطان والحسد

درجاتها ممتازة دايما ويوم ما خدت شهادة التقدير من المدرسة

كنت فرحانة جدا جدا وهى كمان كانت طايرة من السعادة

هى حبيبتى وصديقتى ونور عينى

بتحب اللون الروز جدا لدرجة ان الدنيا كلها روز اللبس

الكراريس و الاقلام

كل حاجة عندها روز بنحاول نغير شوية دلوقتى

بتحب الرسم والالوان جدا

بتحب تكتب قوى ممكن تكتب قصة جميلة اوشوية شعركده

كتبت مثلا زهورى و يا عصفورى

وكتبت قصة شوشو اللطيفة وحاجات كتير حلوة

هى فى تانية ابتدائى دخلت صغار سن

بس غاوية قوى الحاجات دى

طالبة مكافئة الوان ماء لما تنجح فى الترم الثانى

وفى الترم الاول كانت طالبة خرز تعمل عقد وانسيال

جبناهم لها طبعا وكانو على شكل نجوم ملونة

احنا اتفقنا معاها ان كل واحد فى البيت له شغل

بابا شغله برا البيت وانا جوه البيت

وهى المذاكرة ومازن اللعب

ربنا يحميهم لى ويخليهم ليا

انا من غيرهم ولا حاجة

لو كنت درست اقتصاد

فى فيلم الانسة حنفى كان سليمان نجيب صاحب الدم الخفيف الباشا ابن البلد



طول الفيلم يندم نفسه ويقول لو كنت خدت الوصل



انا بقى بقول لوكنت درست اقتصاد



اصل انا معتقدة اعتقاد اهبل كده ان بتوع الاقتصاد دول ناس ميه ميه



ليه بقول كده علشان المرتب بتاع جوزى



عايزين حد يظبطه يشوف هيركب مواصلات بكام لانه بيشتغل فى محافظة تانية



وهنصرف فى البيت كام والمفروض نشيل للزمن



وكمان لو حد فينا تعب والعياذ بالله ولو حتى دور برد بسيط



وكمان اللبس مش هنبعذق ونغير موضات بس يعنى نكون مرتبين



طب والعيال بيبقى نفسهم يتفسحو مش معقول نحرمهم



و فواتير الكهربا والميه والتليفون وانابيب الغاز



دا كمان بعد سنين الازمة ماعدت وابتدى الموضوع يريح



يعنى ما كانش فى تلاجة ولا غسالة ولا تليفزيون



وطبعا ولا كمبيوتر ولا رسيفر ولا سراير للاولاد



وكمان نصيبنا اولد قيصرى يعنى مرتين وطبعا معروفة تكاليفها



طبعا ربنا سترها معانا وكتب لنا الستر ومحوجناش لحد



وكرمنا اخر كرم وبرضه ساعدنا حكاية الجمعية ام 50 جنيه فى الشهر



اللى هى اختراع مصرى بحت على ما اعتقد



بس انا برضه لا اعتقد ان بتوع الاقتصاد هيعرفو يظبطو الموضوع


طب ولو يعرفو ايه المانع يعنى يسلفونا اتنين تلاتة من اصحاب الاقتصاد دول


يعنى اربعة خمسة كده فى كل حى وليهم الاجر والثواب عند الله

قال 0900 قال

مش فاهمة خالص حكاية 0900 دى
حل مسابقة اكسب مش عارفة كام
خط الجمال خط الرشاقة
اهو كله عبط وخلاص
ماشى رزق الهبل على المجانين
لكن اللى مش فاهماه خالص بقى
خط لحل المشاكل الزوجية
بسمع اعلانه على الراديو
يعنى ايه بيقولك اى حاجة
هنساعدك فى حلها
طب ازاى
مشاكل الزواج معروفة
يا اما اجتماعية او نفسية او مادية او طبية
طب يعنى ايه اتصل وهتلاقى الحل
يعنى احنا خلاص لا لينا مخ نحل مشاكلنا
ولا اهل ولااصحاب لاحاجة
طب دا احنا مبنرضاش ندخل اهلنا بينا وبنحل مشاكلنا بنفسنا
نقوم نتصل بناس منعرفهمش ولا حتى هما مؤهلين
وليه اصلا نتصل بخط0900

حاجات كتيرقوى جدا خالص غريبة
بتحصل فى الدنيا
من ضمنها0900 بكل انواعه
واغربهم بالنسبة ليا هو
خط المشاكل الزوجية
ماشى يا بنى آدمين

هل فعلا ده صحيح

الحمد لله رب العالمين

الحمد لله خلق الانسان اجتماعى بطبعه محب للحياة

يستمتع بالجلوس مع الاهل والاصدقاء

يستمتع بالجلوس بين احضان الطبيعة

ولكن مجرد هذه الاشياء البسيطة التى نفعلها بصورة طبيعية فى احداث يومنا العادى قد تؤثر بالسلب والايجاب علينا

كيف هذا

انه علم الطاقة

فى حاجات كتير بعتبرها تخاريف بس مش من ضمنها علم الطاقة ده ابدا

ايه اللى خلانى احاول اعرف معلومات عن الموضوع ده هى معلومات عادية

لكنى فهمت منها حاجات كتير

لينا حد من الاقارب عنده سلبيه جامدة لا الدنيا عاجباه ولا وظيقتة المرموقة عاجباه ولا الاقارب عاجبينه ولا الجيران عاجبينه ولاحتى رزقه عاجبه ولا البلد عاجباه ولا حاجات كتير ولا ناس كتير كويسه عاجبينه

مجرد القعدة معاه بتعمل احباط ممكن نكون عشرة قاعدين مع بعض من اعمار مختلفة وشخصيات مختلفة كلنا بنحس ان احنا متضايقين عندنا احباط وفى ناس مننا يا عينى بيتدمرو نفسيا خالص

مكنتش مصدقة انه بياثر علينا كده انا قلت دا بيقلب المواجع بس فبنحس كده

لكن لانها قرابه كبيرة فمفيش مفر هنشوفه كتير طيب ايه العمل افهم الحالة دى ازاى

من كام سنه شوفت برنامج بيتكلم فى الموضوع ده انتبهت للكلام ولقيت انه ممكن ينطبق على اخينا ده

هناك فعلا طاقة ايجابية وطاقة سلبية

وهذه الطاقة لها مسارات للتبادل بين طاقة الجسم الداخلية وطاقة الكون

واننا فى توجهنا للقبلة نتجه لاكبر مصدر للطاقة الايجابية فى الكون كله بشهادة علماء الغرب

واننا فى رفع كفينا ممدودة الاصابع للتكبير نجمع الطاقة فى كفينا

وان هذا يحدث فى الركوع والاعتدال والسجود والتى تفضل اساتذة كبار فى شرحها على مواقع كثيرة

الطاقة السلبية كمان كبيرة جدا وممكن ترويضها وتوجيهها

ولقيت ان فعلا لو انت قاعد مع واحد بالطريقة اللى وصفتها فعلا طاقته السلبية بتوصلك غصب عنك

طب ياجدعان ايه العمل

العلماء بيقولو ان التفكير الايجابى والحياة المستقيمة والغذاء الصحى وطبعا الحب بيرفع طاقة الانسان

وان الافكار السلبية وقلة النوم والاخلاق الفاسدة وتتبع وسوسة الشيطان وكمان التدخين والعادات السيئة بتقلل من طاقة الانسان

وان الطاقة تزيد وتنقص وكلما حطمت القناعات السلبية كلما كنت محبوبا

وان هناك سبع مراكز للطاقة متوزعة على جسم الانسان ولها الوان هى الوان الطيف لكل مركز لون

ويقال ان لبس لون مركز معين يقوى هذا المركز

محتاجة اقتنع شوية بحكاية المراكز والالوان دى وحكاية الاحجار الكريمة اللى بتاثر على الطاقة

اهم حاجة ان طلع احساسى صح ان الانسان ده طاقته سلبية واحنا بنستقبلها منه

يادى المصيبة لو شفتو ازاى بيملا الجو نكد هو طيب ومبيفوتش فرض ابدا

لكن حكاية الكره الزيادة اللى عنده دى معذبانا ويا ما قولناله مفيش فايده

المهم انى طلعت صح مش بفترى عليه

همسة عتاب

زمان كان فى برنامج بيتذاع فى الفترة الصباحية على البرنامج العام اسمه همسة عتاب انا حقيقى مش عارفة لسه بيتذاع واللا ايه انما المهم انه كان بيذيع شكاوى الناس وتوسولاتهم للمسئولين لعل وعسى قلبهم يرق لهذا المواطن المطحون المسكين زى مثلا ارملة اتاخر معاشها واللا واحد مقدم على تليفون من خمس سنين واكتر ولسه مجاش واللا واحد مسافر بره مصر وتجيلى الفاتورة الف جنيه وهكذا
كنت بسمع الحاجات دى وانا صغيرة ويصعبو عليا الناس دول قوى مع انى مكنتش فاهمة ابعاد المشاكل دى.

المهم بقى ايه اللى فكرنى اه هى حاجة مهمة

معنديش مشاكل خالص ان منهج تانية ابتدائى كبير وتقيل على العيال عادى ربنا يسهل والعيال دلوقتى مخهم احسن مننا وهيفهمو وبعدين دى فايدتى بقى وقتى دلوقتى
طبعا انجليزى وحساب وعربى ودين كله ماشى
طيب ايه المشكله فين
المشكلة يا سادة فى المدرسين مع احترامى الشديد جدا دول برده فى سن اهلنا الاحترام واجب
لكن اللى مضايقنى انهم حتى مبيقروش للعيال جدول الضرب بيكتبوا الاجابة على السبورة وخلاص لا قوم يابنى حل المسالة دى ولا اى حاجة وتلاقيهم خايفين العيال يذنقوهم فى مسالة واللاحاجة
مفيش مثلا دورة فى المنهج الجديد اللى كسر الجمود بتاع السنين اللى فاتت لا ابدا
طيب يعنى مخليين الناس اللى خدت دبلوم معلمين زمان خالص لسه فى اماكنهم وآلاف غيرهم خريجين تربية قاعدين ع القهوة واللا شغالين فى حاجة ملهاش علاقة بالتربية والتعليم خالص
طيب يا اما ندى الناس دى دورات ونجدد نشاطهم يا اما كفاية كده ومعاش على 55 ونشوف الشباب التعبان ده اللى كله حماس ونعينه
بجد حرام دى مش همسة عتاب دا عتاب بصوت جهورى ليه دايما اما بنعمل حاجة صح مبتبقاش صح قوى بجد يا ريت نظرة للاجيال الصغيرة اللى طالعة دى
دول اكيد لو كان لسه فى حياة فى الدنيا هما دول المستقبل مينفعش ابدا نهملهم.

الشنط الهاند باج البورتفى التوتى

سميها زى ما تسميها لكن تفضل من احب الحاجات بالنسبة ليا

هى المفروض من الاكسسوار بس انا بحبها جدا

اسعارها غاليه يعنى وماله بقى هو يعنى هشتريها كل يوم

يلا بقى

الشنطة ايه سر حبى ليها مش عارفة يمكن حاجة فى اللاوعى

بس انا بيجيلى انبهار كده من الشنط

ويا عينى بنتى الصغننة دى ورثت نفس الهوس مسكينة

معلش ماهى اشكالها تحفة والالوان والاستعمال وهتليق على ايه وهكذا بقى.......

كل واحدة ليها حاجة كده مستعده تصرف فلوسها عليها

بس ايه بقى اهم حاجة اننا مننساش حق ربنا علينا وان فلوسنا دى ربنا مش هيبارك فيها الا لما يخرج منها لابتغاء مرضاة الله.

طيب دول شوية شنط كده بس مش بتوعى اللى عندى كفايه وبحبهم جدا.

دول طبعا مش بتوعى بس هما مثل لاختلاف ذوقى فى الموضوع ده

وصفة سهلة

من اسهل طرق عمل الدجاج هى صينية الدجاج

فرخة غلبانة عادية جدا

عصير طماطم من النوع العال

بصلة كبيرة مكلبظة

قرن فلفل اخضر مفترى

جزرة حلوة مسمسمة

شوية بسلة محترمين

بطاطساية صغنونة

هنضرب الطماطم والبصل والفلفل علقة حلوة فى الخلاط

وبعدين هنقطع الجزرة وشوية البسلة والبطاطساية

ونحطهم فى صينيةوعليهم الفراخ ونعومهم فى الصلصةاللى ضربناها

وبعدين نرش شوية فلفل اسمر وحبهان وورق لورى

وبعدين ملعقة سمن وشوية ملح

ونحطهم على النار

هيتم نضجهم بسرعة ونهدى النار شوية

وبعدين نحطها فى الفرن

نعمل جمبها مكرونة مظبطة كده وسلطة

او شوية ملوخية ولاد ناس كده وارز

ياسلام بالهنا والشفا

اكلة تتعمل فى ساعة واحدة

وانا كمان مدياكو براح

اللى هتزود عن كده يبقى لازم تتمرن زيادة

يلا بقى بالهنا والشفا.

مقارنة بسيطة بينى وبين امى وبين جدتى

جدتى حبيبتى وامى حبيبتى
ابتدى انا وجدتى وامى اتعلمنا
جدتى خدت الابتدائية وامى الثانوية وانا معايا ليسانس
جدتى عارفة ربنا كويس وعملت عمرة وحج وامى كذلك بس عمرة بس وانا بحاول اكون احسن بس لاعمرة لسه ولاحج
جدتى كافحت مع جدى واتغربت من محافظتها لمحافظة تانية علشان الرزق ولقمة العيش وبعد الحال ما اتعدل رجعت تانى وكذلك بالظبط امى اما انا الحمد لله ربنا ستر ومحصلش غربة
جدتى خلفت7 وامى 4 وانا 2 ومش ناوية تانى خالص
جدتى كانت ست بيت وامى موظفة اما انا بقى فست بيت برضه
طيب ايه الفرق بينى وبينهم هل فرق السنين والتقدم ده غير فيا حاجات
واللا انا اقل منهم
اعتقد ان جدتى ربت اولادها كويس جدا والحمد لله
وكذلك امى برضه الحمد لله
طيب
فكرت كتير لما كانت لسه حكاية انى مش بشتغل دى بتضايقنى
لقيت انى تعليمى ده كان وهيفضل فايدة كبيرة جدا طبعا انا غيرهم مش احسن منهم بس مخى تانى تفكيرى تانى اولوياتى تانية جدتى عاشت فى زمن الامان مكنتش خايفة من حاجة الدنيا سهلة بسيطة الفلوس ليها قيمة الانسان له قيمة
امى لحقت برضه الدنيا لما كانت لسه بخيرها اتعينت واشتغلت وساعدت فى بناء هذا البلد


طيب بقى انا دورى فين انا دورى ابتدى فى الحياة فعلا لما اتجوزت وبقى عندى ولاد
حسيت انى مش لازم امر فى الدنيا مرور الكرام
لا دا انا لازم اسيب ورايا علامة
العلامة دى ولادى
لازم يبقو صح لازم اعرفهم من دلوقتى دينهم
لازم اعرفهم من دلوقتى الصح والغلط
لازم يبقو هما وابوهم كل همى لازم يبقو عنوانى
لازم يبقو احسن عيال سلوكياتهم احسن حاجة وسلوكهم كمان
حاجات كتير قوى مرصوصة فى دماغى
محفورة جوايا
عايزاهم يبقو مثل الناس تربى ولادهم زيه
يمكن اشقيا وبيتعبونى بس بيجى منهم
والحمد لله من اصحابنابيحاولو يقلدونا دلوقتى
اهو يمكن نحاول نخليهم جدعان واقوياء فى وش الدنيا


المقارنة دى مش باى غرض ولكن بفكر نفسى بس انى اه ست بيت زى جدتى
اه مبشتغلش ولكن تعليمى ما راحش ابدا ابدا على الارض

الحب هو

الحب هو
الحب هو اخلاص
الحب هو احترام
الحب هو تفاهم
الحب هو مسئولية
الحب هو تحمل
الحب هو عزة نفس
الحب هو رحمة
الحب هو حنان
الحب هو تفانى
الحب هو جدعنة
الحب هو صبر
الحب هو انى ابتدى ونيتى كلها خير
الحب هو انى اتقى الله
يعنى ما ينفعش نحب واحنا بنجرب
الحب يعنى زواج
الحب هو الحاجة اللى بتبتدى ببداية الزواج
يعنى اى شوق اى لهفة اى احساس او معنى تانى للحب لا ينضج ولا يحلى الا بالزواج
ازاى يعنى
هو كده
بتحبها اه طبعا بحبها طيب حاولت تشتغل علشان تعرف تخطبها لا انا لسه طالب طيب ايه يمنع مفيش وقت يعنى ايه مفيش اجازة دى الفترة اللى بريح فيها
من ايه هو انت بتفحت يعنى بقى يعنى ايه حاول اجتهد دى معتمدة عليك ظروف الكل ملغبطة
لا معلش ملكش دعوة بالكل اللى عايز يعمل حاجة بيعمل حتى لو بسيطة هتلاقى ربنا يسهلو ويسخرلو المساعدة
على العموم لسه بدرى بدرى ايه بدرى من عمرك
ده حوار اكيد كتير مننا اتكلمه مع حد
الحب مسئولية يا شباب مش يومين حلوين
الحب مسئولية يا بنوتة مش اى حد يقول بحبك نصدقه
لازم احس انه بيعمل حاجة علشانى لازم احس انه محافظ عليا
مش يلا نتقابل اروح من ورا اهلى
حطى ربنا قدامك
حطى صورة بابا قدامك
عمرك ما هتعملى غلط
مش معنى كلامى انى ضد الحب بالعكس انا اتجوزت عن حب وكان زميلى كمان
لكن كنا بنتقى ربنا وبنخاف على اهلنا وتعب علشانى وانا رضيت بالقليل علشانه
هو ده الحب هى دى الدنيا