سهل وبسيط

----------------------------السلام عليكم ورحمة الله وبركاته -------------------------------

كل عام أنتم بخير

ربنا يبلغنا رمضان جميعا ويعينا على الطاعات

ربنا يقدرنا جميعا ويقوينا ونقدر نستغل كل وقت فى الطاعةوالعبادة يارب

شهر القرآن

اللهم انى اسالك بكل اسم هو لك انزلته فى كتابك او علمته احدا من خلقك او استاثرت به فى علم الغيب عندك ان تجعل القرآن الكريم ربيع قلبى و نور بصرى وذهاب حزنى وجلاء همى يارب العالمين

مواضيع كتير قوى حلوة كتبها ناس نحسبهم على خير لكن عند ماما نور وشجرة الدر وعند بسنت موضوعات حلوة هتعجبكم مقترحاتهم باذن الله

رمضان مش شهر الاكل المفروض انه شهر صيام يعنى اقل شهر نستهلك فيه مش العكس سبحان الله

طيب هقولكم شوية حاجات كده خبرات شخصية يعنى

طيب يعنى كوب البلح باللبن ده ازاى اصلا يبقى بعده اكل ده هو وجبة لوحده طب نكتفى بثلاث تمرات وخلاص

وبعدين نقوم لصلاةالمغرب حتى تكون المعدة خدت انذار ان جاى لها اكل والاولاد الصغيرين يقوموا كمان يبتدوا الصلاة مع والديهم حتى ولوكان تقليد وكمان علشان يتعلموا الصبر

طيب ياريت نخلى فى كوب حاجة دافئة وخاصة للناس اللى القولون عندها بعافية شوية ربنا يشفى كل مريض يارب

ولو فى شوربة يكون كويس سواء بخضار او سادة كده تدفى المعدة وتاخد مساحة فمتتمليش معدتنا اكل ونتعب

طيب الناس اللى بتحب المخللات ماهو لازم مخلل حاجة تفتح نفسنا ما انتو عارفين سدة النفس لاحقانا اول باول بقى ههههههههههه ان كان من كذا واللا كذا الحمد لله فبلاش نشتريها من بره مش ضامنين النضافة خالص ومش ضامنين ان مفيش حشرات وقفت عليها وامراض الصيف والعياذ بالله وحشة

طب نعمل ايه بسيطة خالص

نعمل مخلل بيتى سهل وسريع التحضير

مخلل باذنجان: كيلو با ذنجان صغير زى اللى فى الصورة ده وفى اصغر من كده برضه وارفع

هنشيل الطربوش الجميل الاخضر ده زمن الطرابيش راح وراحت ايامه هههههههههه

وهنغسل الكمية كويس وبعدين نحطه فى حله ونسلقه لحد ما يطرى ويستوى

وبعدين هنشيله فى مصفى يتصفى هنكون فى الوقت ده قشرنا ثوم ودقيناه مع ملح وليمون وفلفلايه خضرا اوحمرا مش هتفرق

هيبرد البتشينجان ونقوم فاتحينه من الجنب بالطول بس اوعى يفصل يعنى يبقى شريحتين لا عايزينه ماسك فى بعضه وبعدين نحشيه بالخلطة دى ونرصه فى علبة تلاجة وبعدن نحط عليه شوية خل سيبيه يبات ليلة فى التلاجة ودوقى وادعيلى

مخلل الطماطم

هنجيب طمطم ناشفة زى الحلوة اللى فى الصورة دى ونشيل الباروكه الخضرا بتاعتها دى وبعدين نغسلها وطبعا نجيب كيلو اونص على حسب ما عاوزين وبعدين ننيمها على جنبها ونفطعها شرائح طوليه بس مش للآخر خليهم برضه ماسكين فى جسم الطمطماية وبعدين نجيب نفس الخلطة اللى فوق ونحشى بيها وبرضه نحطها فى علبه ونرش عليها شوية خل صغيرين وفى التلاجة على طول

مخلل الخيار السريع

هنجيب كيلوخيار ونغسله ونقطعة طرنشات عادى خالص وهنجيب برطمان وندوب فيه ماء وملح وبعدين نقشر فصين ثوم تخان كده ونقطعهم حلقات ونحطهم فى البرطمان وبعدين نحط الخيار بيتخلل فى نص يوم يعنى لواتعمل الصبح الساعة 9 يتاكل المغرب عادى وبيبقى احسن طبعا تانى يوم

طيب فى طريقة تانية حلوة برضه وبتعجب الاولاد الصغيرين هنجيب الخيار ونقسمه بالطول ونشيل البذر مع انه مفيد والقشركمان مفيد جدا بس نكتفى باننا نشيل القلب ونخلى القشر وبعدين مكان القلب ده نضع جبن ابيض الاولاد بيحبوا الحاجات الغريبة واهى طريقةعلشان اللى مبياكلوش الجبنه اوالخيار نضحك عليهم يعنى

طيب دى محاولات كده يعنى والكويس فيها ان نتيجتها بتبان فى نفس اليوم غير اى انواع تانية وكمان تكليفتها بسيطة لما بتتعمل فى البيت وكمان لو فى عزومه بتنفع قوى

ربنا يكتر احبابكم يارب

طيب هناكل بقى بس منكتمش نفسنا الاكل فى الصيف بيكبس على النفس واكيد هتحصل ازمة فى علب الفوار فبلاش اصلا نكتر من الهم النم

رمضان شهر جميل كله بركه وخير

لكم منى كل احترام وتقدير.

عناكل طليانى النهاردة

المطبخ الايطالى من وجهة نظرى فيه كنوز انواع واصناف تخليك تعيش طعم الاكل ده فعلا تحس بكل مكون من مكونات الطبخة دى بجد حتى لما تتابع برنامج لشيف ايطالى تحس انه حابب الموضوع قوى وحاسس بحب للطماطم اللى بيقطعها واللمونة اللى بيعصرها والزيتونة الخضرا والسمرا ناس حكاية.

الكانيلونى ده صنف بحبه جدا وبعمله من زمان ماما هى اللى علمتنا طريقته ماهى اصلها شاطرة وبتحب تجرب ربنا يديها الصحة.

المهم طريقته هكتبهالكم مع صور هتفتح نفسكم وبرضه مش صورى معلش بقى (من مواقع اجنبية)

وعلشان فى هوس باللهجة الصعيدى فى المسلسلات وحاسة ان اصلا الصعايدة مبقوش يتكلموا كده ف من باب احياء التراث برضه خلينا نوصفه على طريقة المسلسلات دى

المجادييير:

كوباية ونوص دجيج---------كوبااية لبن----تلات بيضاات-------ملح وفولفول-----------شوية زييت زغيرين--لحمة مفرونة معصجة لاجل نحشى بيها----جبنه رومى مبشوره -----وصلصة طماطم

الطريجة:

نحط الدجيج فى صحن ومعاه اللبن وبعدين عليه البيض والملح والفولفول واضربيهم يا بنيه بالمضرب بيدك باى حاجة وبعدين هتلاجيها بجت عجينة سايلة ولو كانت تخينة خفيها بشوية لبن مايضرش بردك

وبعدين عنجيب طاسة تفال ونحط فيها ملعجة زيت زغيرة ونسخنه وبعدين عنجيب كبشه زغيرة وناخد شوية من الخلطة اللى خلطناها ركز معاى وحياة ابوك وبعدين نمسك الطاسة باليد الشمال والكبشة فى اليمين ايون كده الله يرضى عليك يا ولدى وبعدين نحط العجينة فى الطاسة ونلف الطاسة علشان العجينه تملا جعر الطاسة وهتسبها على النار مفيش دجيجة واللا نص دجيجة هتلاجيها مسكت وبجت جرص هتجوم منزله واللا مزحلجه على صينية وهكذا تكمل بنفس الطريجة باجى المجدار كلاته لحد ما يوخلص

وبعدين يا ولدى واللا يا بنيتى اى كان ناخد الاجراص دى جرص جرص ونحشى كل واحد شوية لحمة مفرونة معصجة ونلفها كانك بتلف صباع محشى كرنب كيده ايون براوه عليكم والله ايه الشطارة دى وبعدين تجيبو صينية الامونيه وترصوه صباع صباع جمب اخوه وبعدين تسجوه بشوية صلصلة الطماطم دى اللى جولنا عليها فى لاول وبعدين ترشوا عليها شوية جبن رومى دى واللا ما ادرك ايه وتدخلوه الفرن شوية كده وتطلعوه قيمة ربع تلت ساعة اكده

فى ناس بتحشية جبنة وبقدونس او جبنه رومى وسبانخ بس الطريقة دى بتاعة اللحم المفروم هى دى احسنهم من وجهة نظرى

طبعا ما فهمتوش حاجة شكلكوا باين اهوه ع العموم اللى مش فاهمه ممكن انزلها فى التعليقات الطريقة تانى اوضح من كده

المهم قربوا كده يا بنات اما اقولكم سر الاكلة دى بتعمل مود حلو قوى معايا بتعمل جو فى البيت اصلى مرة عملتها وخدتها معايا الكلية فقام جوزى ساعتها كان لسه زميلى بقى داق البتاع ده ولقيته تنح وادى العيال كل اتنين واحدة وخد العلبة لنفسه لدرجة انى شاكة ان البتاع ده هو اللى خلاه يتجوزنى اصلا اصله كان بيطلبه فى الخطوبة وبعد الجواز ولما اقعد شوية ما اعملوش يقول يا سلام فين ايام الكانيلونى تفتكروا أشك واللا ايه..

اى اكله فى الدنيا لو حتى جبنة قديمة (مش)عارفين المش بيبقى احلى من احلى حاجة لو بتاكله وانت مع اهلك واخواتك واصحابك واللى بتحبه وقاعد سعيد ومفيش حد منهم تعبان وبصحة وخير يبقى المش ده احلى من الكافيار الاصحيح حد فيكو كل كافيار مش بطروخ رنجة لا كافيار من اللى بيقولو عليه ع العموم اللى كله يقولى طعمه ايه اه والنبى اللى كل المرونج لاسيه برضه يقولنا طعمه ايه يكسب فينا ثواب

(على فكره مش قصدى خالص اتريق على لهجة الصعايدة بس بتوع المسلسلات متخيلين ان الصعايدة كلهم كده والناس اللى عايشة فى القرى لسه بيلبسوا جلاليب بكرانيش وبنات اسكندرية كلها لابسة محزق وعاملين معلمين فقولت حفاظا على التراث برضه وامشى مع الموضه تبقى اكله طوليانى صعيدى).

عيش وملح

علشان احنا اجدع ناس وكلنا اسرة واحدة

وكاننا بالضبط اكلنا عيش وملح مع بعض

يبقى نعمل سوا اسهل عيش فى التنفيذ والذ وابسط حاجة تفرح البيت

ويبقى عيش وملح - ملح بكمون- ملح بزعتر- ملح بشطه زى ما انتو عايزين

هنجيب كيلو دقيق وننخله احسن الصيف بقى طلع وممكن تكون فى كائنات( يع)

وهنجيب خميرة من الفرن سيبوكو من الفورية مش تمام بتفلح مع كل الناس ماعدا اتنين امى وانا

بصو بقى علشان الخميرة تبقى تمام هندوبها بملعقة سكر وشوية ميه فاترة

مش سقعة ولا سخنه علشان منموتش الخميرة على راى ماما

ونولع فى الفرن قصدى نشعل النار شوية ونطفيه

ونحط فيه الاناء اللى عملنا فيه الخميرة

قولو مثلا عشر دقائق كده وبعدين طلعوه حطوه على الدقيق ومعاه شوية ملح صغيرين ومعلقتين زيت بس

وشوية زعتر ناعم او كمون حسب الرغبة بس اؤكد لكم الزعتر ممتاز

ونعجن المكونات دى وممكن نحط شوية بيكنج بودر علشان سرعة التخمير

ولو احتاجت ميه يبقى ماء دافىء

ركزو معايا متضحكوش علينا الناس

وبعدين نسيب العجينة ترتاح فى مكان دافىء

وبعدين بعد ربع ساعة نجيبها بقى نشكلها كور صغيرة فى حجم كرة التنس او اكبر شوية

ونرص فى صينية الكيلو بيعمل حوالى من 12 ل15 واحدة

بعد ما نخلص المقدار نسيبه يهدى كده ويخمر كده وينفش اه مش طلسقه هى الحكاية

قبل ما ندخلة الفرن نرش الوش بتاع كل واحده بماء مذاب فيه ملح علشان الوجه يحمر

وممكن ترشو عليه سمسم او حبة البركة براحتكو

هتولعو الفرن شوية يسخن وبعدين تدخلو صينية وتاخدو بالكم مش لازم مهند ونور دلوقتى

الله يقطعهم

المهم هيطلع تحفه ان شاء الله

الحياة تجارب والمطبخ كمان

على فكرة دى طريقة الشيف اسامه اللى ربنا كرمه من القناة التالتة بقى دلوقتى على تليفزيون دبى

لو طلع حلو يبقى الحمد لله عرفت اوصفه ولو يعنى نص نص يبقى العيب فى عم اسامه

على فكرة الصورة استغفر الله العظيم منقولة من ع النت يلا بقى معنديش كاميرا

المهم هنستفيد ايه من الموضوع ده

1- توطيد العلاقات البلوجرية

2-مراعاة حقوق الجوار ع البلوجر

3- اعزمكم على حاجة من ايديكم

4- نسيبنا بقى من شراء كل حاجة

5- هيعجبكو قوى بيقولو الخبز بيصلح الحالة الميزاجية فعلا جربوا بس هتحسو ان الكلام صح

6- فرصة للبنات تتعلم هه سامعانى يا بسنت انتى وغادة ونونا ونهى وميمى وندا مش كله مذاكرة يعنى

بجد اشكركم شكرا جزيلا على الاخوة والطيبة وكرم الاخلاق ربنا يكرمكم جميعا ويعزكم

وتكونو دائما فى احسن حال يارب ويبارك لكم ويجعل الفلاح حليفكم ان شاء الله

ويلا بقى باسم الله عيش وملح.

وصفة سهلة

من اسهل طرق عمل الدجاج هى صينية الدجاج

فرخة غلبانة عادية جدا

عصير طماطم من النوع العال

بصلة كبيرة مكلبظة

قرن فلفل اخضر مفترى

جزرة حلوة مسمسمة

شوية بسلة محترمين

بطاطساية صغنونة

هنضرب الطماطم والبصل والفلفل علقة حلوة فى الخلاط

وبعدين هنقطع الجزرة وشوية البسلة والبطاطساية

ونحطهم فى صينيةوعليهم الفراخ ونعومهم فى الصلصةاللى ضربناها

وبعدين نرش شوية فلفل اسمر وحبهان وورق لورى

وبعدين ملعقة سمن وشوية ملح

ونحطهم على النار

هيتم نضجهم بسرعة ونهدى النار شوية

وبعدين نحطها فى الفرن

نعمل جمبها مكرونة مظبطة كده وسلطة

او شوية ملوخية ولاد ناس كده وارز

ياسلام بالهنا والشفا

اكلة تتعمل فى ساعة واحدة

وانا كمان مدياكو براح

اللى هتزود عن كده يبقى لازم تتمرن زيادة

يلا بقى بالهنا والشفا.

اسهل واشهى المخبوزات

بسكوت السكر
المقادير:2كوب سكر 6كوب دقيق 6 بيضات ملعقة صغيرة فانيليا ونصف معلقة صغيرة ملح 2 ملعقة صغيرة بيكنج بودر 2 كوب سمن .
الطريقة: تعجن بطريقتك ثم تثلج لمدة ساعتين ويمكن التقليل من السكر والسمن .
تشكل قطع صغيرة تكور وتضغط بالابهام وترص فى صينية ةتخبز لمدة 8 دقائق على 375 درجة
تزين بالسكر البودرة او عمل ربع كوب زبد ناعم على كوب ونصسكر بودرة ونصف ملعقة فانيلياعلى جبن كريمة يخفق الكل جيدا ويزين البسكوت(طبعا هيبقى دسم ولازم بعده شوية رياضة لحرق كل هذه الدهون)
بالهنا والشفا
عن تجربة ناجحة هيعجب الاولاد.