الثلاثاء، 30 يونيو 2009

اخويا شقيقى يا ابن امى وابويا


اخواتى واصحابى ازيكم ازيكم شكرا ليكم على الود والمحبة فى الله

عقبى لكم اخويا هيتجووووووووووووووووووز لولولولوى وكمان لولولولوى

يوم 2\7 ان شاء الله فى حفل عائلى بهيج يارب باذن الله

فانا بقى وعيالى واخواتى وعيالهم هنهجم النهاردة على بابا قصدى بيت بابا وهنتاكد الاول ان دوا الضغط بتاع ماما موجود وفى شريطين احتياطى كمان كده نبقى فى التمام ونتاكد ان فى مسكن للصداع والآلام متوفر لبابا فكده يبقى فله خالص ونبدأ الاحتلال على طول قصدى الاحتفال هههههههههه

دا احنا هنتهرى شغل ما اصل العائلة من الناحيتين ماشاء الله كتييييييييييير واصدقاء بابا كتييييييييير وزمايل ماما كتيييييير واصحاب اخويا كتييييييييير والمعارف والاحباب كتييييييييير دا انا تعبت من دلوقتى يلا بقى الله المستعان

ربنا يكتر الافراح والليالى الملاح فرصة بقى نضحك من الودن دى للودن دى فرصة بقى يا افراحك الحلوة يا مصر

هروح هناك بقى وهاجى الاسبوع الجاى لما نمحى آثار الاحتلال ونسيب البيت فله زى ما كان


سلام مؤقت بقى والكلمات دى مش شعر ولا نثر ولا ليها مسمى خالص مالص دى كارت جميل كده هحطه لاخويا فى جيب البدلة يوم الفرح هو هيعرف انه مش شعر ولا نثر دا كلامى العادى جدا معاه اقروه معانا


اخويا شقيقى يا ابن امى وابويا:

مبروك يا غالى فرحك دا فرحنا كلنا

مبروك يا سيدى يا عينى ع الهنا

بس لسه صغير فى نظرى

مهما تكبر ويقولوا فرحه هفضل فاكرة يوم ميلادك

يوم ما شيلتك فى حضنى وبوست ايدك الصغننة

يفرق ما بينا تسع سنين

بس كانهم التسعين

كانك ابنى ولدته من بطنى

بخاف عليك ونفسى تتهنى

صغير ع الجواز والمسئولية

حاجة وعشرين مهماش الثلاتين

اه يا نونو الحب غلاب

حب واتحب وعيش حياتك

بس نصيحتى احترمها هتشيلك ف عينها

ونصيحتى ليك خلى عينك على ابوك وامك

واسال عليا متنسنيش انا واخواتك

وانا يا حبيبى هفضل شايلاك فى قلبى زى ما شيلتك يوم ولادتك

اوعى تكون زعلت منى مش عاملة وصية عليك

دى نصيحة من تجربة السنين


اخويا شقيقى حبيبى الغالى

فرحك فرحنا يا غالى

الأحد، 28 يونيو 2009

ماشى الحال

السلام عليكم ورحمة الله وبركاته




ساعات تقوم من النوم




شكلك كده بالظبط



وتقعد تهرش فى ودنك علشان تفوق






وتبقى قرفان كده مش عارف ليه










وتبقى مش طايق تسمع اى صوت




ويبقى عندك استعداد تبقى غلس النهاردة


فتقول ايه طب ما اقوم كده اخد دوش يمكن افوق


وبعدين تصلى وتفطر وتفتح الكمبيوتر علشان تقرا الاخبار










وبعدين الاخبار تسد نفسك وتبقى عايز تطلع لسانك لكل التصريحات





ويبقى نفسك حد يعلقك من كتافك على حبل الغسيل يمكن تنتعش شوية





ويبقى نفسك فى الرضا ده





او فى حضن امك تحس بالامان فيه






او ان حتى تروح تقعد على جزيرة وترتاح شوية




وبعدين تروح تبص على النتيجة علشان تقرا حكمة اليوم



وتلاقى يوم متعلم عليه مع انك اللى مش معلم عليه



وبعدين تفكر مين اللى معلم ع اليوم ده بقى.. ما خلاص لازم تفكرونا





يا نجاتى انفخ البلالين

وتقوم تحضر عصير وتورته وحلويات




وبعدين تقول ايه ده هو مش عارفين يعملوه هما حتى فى اليوم ده انا اللى بعمل برضه يلا الحمد لله برضه انى واقف على رجلى وبعمل






دى علشانى وماتسئلوش باقيتها فين



ودى ليكم





والمصاصات دول فى ناس هتتخانق عليهم دلوقت












وتجيلك حالة انبساط برضه ما هو المفروض يوم سعيد




وبعدين تقول ايه الحمد لله ان السنة دى عدت بخير رغم كل شىء وعقبال اللى فاضل من عمرى


كده بقى عديت الثلاثين عااااااااااااااااا ماهو احنا بنات حواء بيصعب علينا قوى حكاية عديت الثلاثين دى بس برضه ولا يهمنى ثلاثين ولاغيره انا بعيش طفولتى من جديد مع ولادى يعنى انا دلوقتى عندى 7 سنين زى مريم واللا اقولكم 4 زى مازن حبيب ماما بلا 31 بلا بتاع


كل سنة والدنيا كلها بخير وسلام

الأربعاء، 24 يونيو 2009

خيط ضعيف


ليه نسينا بعض وخدتنا قوى قوى العنجهية والغرور وافتكرنا اننا مش محتاجين بعض
ليه دوسنا على بعض و دوسنا على كل حلو فينا وكل حلو حوالينا.
وليه بقت علاقتنا ببعض زى خيط ضعيف.

ليه فى ناس عندها جحود وعاقة لوالديها
ليه نسيت ان أمك هى اللى حملتك فى بطنها واستحملت الآلآم علشان انت تعيش
ليه لا تراعى حقها عليك رغم انهاعمرها ما نسيت حقك انت عليها
ليه بتنسى تحضنها وتبوسها على جبينها او ايديها وتقولها ربنا يخليكى يا امى
ليه نسيت حبها وحنانها عليك

ليه بتنسى ابوك وانه ضحى براحته علشان يجيبلك اللى نفسك فيه
وانه شال البيت على كتافه التعبانه علشان تحس انت بالامان
وان اول حرف اتعلمته منه وان اول سجدة كانت معاه
وليه نسيت حبه وحنانه عليك

وليه فى ناس بتنسى المودة والرحمة
ليه نسيتى حق زوجك عليكى ونسيتى ان احترام اهله من احترامك له
ليه نسيتى الحب اللى جمعكم اصلا

وليه نسيت حق زوجتك عليك وانها مهما كانت مقدرة تعبك الا انها عايزه تحس بتقديرك لها
وليه نسيت الحب اللى جمعكم

ليه فى ناس بتنسى الأخوة
وبتنسى اصدقائها وتتحول لما ربنا يكرمها ويديها قرشين
فينسى صاحبه عشرة العمر
ليه نسى الحب فى الله اللى جمعهم اصلا

ليه فى ناس بتنسى الرحمة
وينسى يعطف على اولاده
وتنسى تعطف على ولادها
وليه فاكر ان ابوتك ليهم فى الفلوس اللى بتجيبها
وليه فاكرة ان امومتك فى انك تعملي لهم الاكل واى احتياجات مادية تانية
ليه نسيتوا الحنان ونسيتوا احتضانهم والعطف عليهم واحتوائهم

ليه فى ناس مبتستحملش شوية
ليه بترموا الاطفال تحت رجليكم وتدوسوا عليهم
ليه بتتكسفوا تبينوا الحب قدامهم وعطفكم على بعض
ولا تجدوا اى حرج فى انكم تتخانقوا وتعلوا صوتكم قدامهم
لو تعرفوا الرعب وانعدام الامان اللى بيحسوا بيه يمكن كان قلبكم رق
ليه نسيتوا الحب ومعنى كلمة بيت ومعنى كلمة حنان

ليه فى ناس مبتفكرش قبل ما تتكلم
ليه بتتسرع فى كلامها وتقول كلام يجرح ويزعل
ليه بتتسرع فى قرارك فكر فيه كويس هياثر عليك وعلى اللى حواليك


ليه نسيت الانسان جواك ،الانسان الطيب
نسينا ليه الرحمة والمودة والحنان
ليه بقت الكلمات دى بتاعة اغانى وبس
وليه(افشوا السلام بينكم)مبنعملهاش

ليه مبترققش قلبك
ممكن ترققه تفكر فى نعم ربنا عليك تشكره عليها

فكر فى انك ليك أم وأب لم تولد يتيم
فكر فى ان ليك اخوات ناسى حقهم عليك
حق الحب والسؤال عنهم والعطف عليهم
صلة الرحم يعنى.

فكر فكر فكر
وبعدين قرر عايز تقطع الخيط اللى بينك وبينهم
عايز تهد الجزء ده من حياتك عايز تمحى كل شىء حلو فى حياتك
اعتقد انه لا ابدا


معلش يمكن طولت قوى بس معلش
اطمع كمان ممكن فى 3دقائق وحوالى 35 ثانية تتفرجوا معايا على الفيديو ده بعد اذنكم
هو باحساسى الخاص يمكن مش مظبوط مش حلو بس حسيته وحاسة الاغنية تنفع قوى لاى علاقة انسانية فكروا من فضلكم وهفكر معاكم وقبلكم فى اى خيط ضعيف فى حياتنا علشان نقويه.


يارب يكون وضح وجهة نظرى
فكروا فكروا ان ربنا بيدينا فرصة تانية وفرص كتير نستغفر فيها ونجدد التوبة
ووعدنا سبحانه وتعالى انه يغفر ذنوبنا على ان نعمل صالحا يرضاه ولا نشرك به احدا
يبقى ربنا بعزته وجلاله سبحانه وتعالى بيسامحنا ويغفر لنا ويرحمنا واحنا مش عايزين نرحم بعض
لا كده كتير شطحنا قوى لازم نربى الرحمة اللى قلوبنا ونسقيها بالحنان علشان تبقى ظل كبير نرتاح تحته ويجمعنا الحب فى الله.

معلش ممكن استئذنكم تقرأوا اول تعليق.لكم جزيل الشكر.

الاثنين، 22 يونيو 2009

أنا اصلا مليش فى الكورة

السلام عليكم ورحمة الله وبركاته
من زمان خالص كنت بحب الكورة وكنت بتفرج عليها وبتابعها وكان السبب فى كده جدو الله يرحمه كان كروى جدا واهلاوى جدا جدا


وكان اى ماتش بيتذاع يوم الجمعة كان بيبقى احلى ماتش لاننا كلنا كنا بنتجمع عند جدو ونتابع ونفرح وننفعل ونهيص وكان بيبقى تجمع عائلى ولا اروع منه ولا احلى.مش حبا فى الكورة اد ما هو حب لجدو واللى بيحبه جدو.

ومرت الايام وبدات اهتم بالعاب تانية لقيت الكورة فى انهيار فقلت هو اشمعنى يعنى الكورة(كرة القدم)طب مافى كرة سلة وكرة يد واسكواش وتنس (كلها كور برضه) وبعدين لقيت ان الباليه المائى ممتع وان السباحة هايلة وان العاب القوى مش ممكن جمالها وان الجمباز مفيش احلى من كده وان رفع الاثقال حكاية وان الجودو والكاراتية والمصارعة الرومانى والملاكمة بتشدك معاها .

فبدات اهتم بالوان وانواع تانية من الرياضات الجميلة الممتعة فى لعبها وفيها روح منافسة كما ينبغى ان تكون المنافسة الشريفة القائمة على المذاكرة الرياضية ان جاز التعبير يعنى تدريب واهتمام من كافة النواحى وعرفت بلدان ومعلومات عنها وعن شكل الحياة فيها وعواصم البلاد دى واهم مواردها ووووو كل ده من اهتمامى بالرياضات دى.

وكانت سعادتى لا توصف وانا باتفرج على الاوليمبياد العالمية واقعد حفلة الافتتاح اتفرج على الوفود بتاعة الدول ولما ييجى الوفد المصرى افرح وانشكح واقوم نص قومة وانا قاعدة وكأن حد مثلا اعرفه واللاحد قريبى هيكون معاهم وكانت فرحتى لا توصف وعلمنا بيرفرف كان قلبى بيرفرف معاه.

مقدرش اقول انى رياضية ولا بفهم فى الرياضة لكن بفهم اللعب الحلو اللى يخليك تتحمس معاه وصحيح لا اتابع الرياضات دى دلوقتى لان مفيش اهتمام اعلامى بيها مركزين قوى قوى مع كرة القدم واللاعب الفلانى مين اشتراه ومين عايز يشتريه ومين ومين ومين والدورى والكاس والاهلى والزمالك والاسماعيلى وووووو

بفرح جدا لما اسمع خبر حلو عن المنتخب وبزعل جدا لما اسمع خبر وحش ولاحظوا كلمة اسمع لانى فى اغلب الاحوال ان مكانش كلها مبتفرجش على الماتشات لان جدو حبيبى الله يرحمه مات من 3 سنين وماتت معاه اى فرحة باى ماتش او اى لعب.



كفاية رغى بقى واقولكم زعلت ليه امبارح والنهاردة وهزعل ايام كتير جاية
مزعلتش ابدا على نتيجة الماتش ما انا قولتلكم انا مليش فى الكورة انا زعلت على المصريين اللى بيهللوا ويرفعوا الناس اقصد المدرب واللاعبين لفوق قوى قوىلما يكسبوا ماتش ويهبدوهم على ضهرهم لو خسروا ماتش
هى مش الكورة اجوان برضه ومش الكورة لعب وفن ومش الرياضة عموما منافسة شريفة يعنى ليه نسينا كل الاخلاقيات الحلوة دى وليه فى تعصب وليه مفيش اعتدال فى الحكم على الاشياء

طب ليه الاهتمام الفظيع ده بالكورة لدرجة ان اللى عنده عيل يتمنى انه يطلع لاعب كورة مش سباح ولا لاعب تنس ولا لاعب جمباز ولاولاولا....
وليه مفيش ميزانيات ضخمة لاى لعبة تانية ليه بنصرف قوى على الكورة ولا نهتم باى لعبة تانية
اعتقد اننا فى امس الحاجة لاعادة ترتيب اهتماماتنا واعادة ترتيب بيتنا الرياضى المصرى واعادة تنفيض دماغنا واخراج الافكار اللى كركبت هذا البيت الاصيل الجميل.

السبت، 20 يونيو 2009

بناء على دعوة دعاء



نظرا لحالة الاحباط والاكتئاب اللى بنواجهها يوميا وبنحاول نغلبها ونكسرها وبنحاول ننساها ونعمل نفسنا نسيناها


دعاء عملت دعوة كده اننا نفكر فى عشر حاجات بنشكر ربنا عليها طبعا نعم الله لاتحصى ولا تعد بس اللى فهمته منها اننا لو فكرنا فى عشر حاجات بس مش هنحس باى احباط وهنحس اننا مقصرين فى الشكر لله واننا مش شايفين اللى فى ايدينا واد ايه كتير قوى قوى وياريتنا نقدر نوفى حق الشكر لله


دا اللى فهمته يا دعاء واعتقد هو ده قصدك


دعاء العسولة دى ام احمد ونور وزوجة المحترم استاذ ادهم صاحب مدونة مالك الحزين ربنا يوفقهم ويسعدهم فى اولادهم يارب


أذكر10 أشياء في حياتك أنت شاكر لله عليها ولا ترغب بتبديلها لأي شيء اخر؟


نعم الله علينا لا تعد ولا تحصى وان كان لازم ولابد اختار عشر حاجات بس يبقى:


1-انى والحمد لله مسلمة نعمة عسى انى اوفيها قدرها من الشكر والعبادة.


2-انى مصرية بحب مصر جدا ولازلت شايفاها فى مرتبة عالية جدا رغم كل اللى بيحصل.


3-ابى وامى واخوتى بحمد ربنا انهم هما دول مش اى ناس تانية.


4-ولادى نعمة كبيرة وفضل من ربنا عليا.


5-زوجى حب عمرى الغالى.


6-قدرتى على التحمل .


7-الحمد لله الذى عافانا مما ابتلى به غيرنا فاحمد الله على نعمة البصر فأرى ابنائى وتمتع بالنظر لعيونهم الصغننة الجميلة


احمد الله على انى اسمع صوتهم الجميل اللى شبه اصوات الشخصيات الكرتونية واحمد الله على ذراعى الذى يضمهم ويحتضنهم.


8-الحمد لله على انى أم نالت حظا جيدا من التعليم فهيساعدنى كتير قوى فى تربيتهم.


9-احمد ربنا على مدونتى واصدقائى اللى عرفتهم عن طريقها واعتبرهم اصدقائى بالمراسلة وهم اعزاء جدا على قلبى.


10-احمد ربنا على كل لحظة سعيدة مرت عليا وتذكرت شكره فيه وكل لحظة حزينة ثبتنى فيها واجرنى على صبرى عليها وكل لحظة دعوت الله فيها واستجاب دعائى فيها او اجل استجابتها لاجل ولسبب يعلمه وحده.


ربنا لك الحمد والشكر كما ينبغى لجلال وجهك وعظيم سلطانك

الموضوع لينكه ده




فكرة حلوة ودعوة كريمة منها ياريت لو اى حد عاوز يعمله بوست عنده يبقى يحط نفس الصورة ولينك موضوعها الاصلى بناء على رغبتها الخاصة.


كان فى سؤال كمان منها ما الذي تتوقع حدوثه بعد 5 سنوات من الآن؟


والله يا دعاء يا اختى هو هيكون ان شاء الله كده بيتهيئلى يعنى


زوجى يا اما اترقى فى شغله يا اما فتح مشروعه الخاص قولى يا رب


مريم هتكون ان شاء الله فى اعدادى وهتكون شاطرة وهتدخل مسابقات رسم وكتابة قصة وهتاخد جوايز كتير


مازن افندى هيكون فى تالته ابتدائى وهيكون مطلع عينى اكتر ماهى طالعة دلوقتى حبيب ماما الصغنن ده


وانا يا ستى هكون لسه بحبهم وبموت فيهم وهيبقى عندى 35 سنة والا باين 36 ويارب افضل حلوة هههاى


بس عارفة ان صحتى هتبقى مش تمام حاسة بكده


الاكيد ان شاء الله وباذن الله انه خير عندى دائما امل فى الله وعمر املى ما خاب الحمد لله





كله بالمناسبة الظريفة دى يمد ايده وياخد واحدة كريز واحدة بس علشان يقضى اصله كيلو واحد ههههههههههههه

الثلاثاء، 16 يونيو 2009

عناكل طليانى النهاردة








المطبخ الايطالى من وجهة نظرى فيه كنوز انواع واصناف تخليك تعيش طعم الاكل ده فعلا تحس بكل مكون من مكونات الطبخة دى بجد حتى لما تتابع برنامج لشيف ايطالى تحس انه حابب الموضوع قوى وحاسس بحب للطماطم اللى بيقطعها واللمونة اللى بيعصرها والزيتونة الخضرا والسمرا ناس حكاية.



الكانيلونى ده صنف بحبه جدا وبعمله من زمان ماما هى اللى علمتنا طريقته ماهى اصلها شاطرة وبتحب تجرب ربنا يديها الصحة.



المهم طريقته هكتبهالكم مع صور هتفتح نفسكم وبرضه مش صورى معلش بقى (من مواقع اجنبية)



وعلشان فى هوس باللهجة الصعيدى فى المسلسلات وحاسة ان اصلا الصعايدة مبقوش يتكلموا كده ف من باب احياء التراث برضه خلينا نوصفه على طريقة المسلسلات دى



المجادييير:



كوباية ونوص دجيج---------كوبااية لبن----تلات بيضاات-------ملح وفولفول-----------شوية زييت زغيرين--لحمة مفرونة معصجة لاجل نحشى بيها----جبنه رومى مبشوره -----وصلصة طماطم



الطريجة:



نحط الدجيج فى صحن ومعاه اللبن وبعدين عليه البيض والملح والفولفول واضربيهم يا بنيه بالمضرب بيدك باى حاجة وبعدين هتلاجيها بجت عجينة سايلة ولو كانت تخينة خفيها بشوية لبن مايضرش بردك



وبعدين عنجيب طاسة تفال ونحط فيها ملعجة زيت زغيرة ونسخنه وبعدين عنجيب كبشه زغيرة وناخد شوية من الخلطة اللى خلطناها ركز معاى وحياة ابوك وبعدين نمسك الطاسة باليد الشمال والكبشة فى اليمين ايون كده الله يرضى عليك يا ولدى وبعدين نحط العجينة فى الطاسة ونلف الطاسة علشان العجينه تملا جعر الطاسة وهتسبها على النار مفيش دجيجة واللا نص دجيجة هتلاجيها مسكت وبجت جرص هتجوم منزله واللا مزحلجه على صينية وهكذا تكمل بنفس الطريجة باجى المجدار كلاته لحد ما يوخلص



وبعدين يا ولدى واللا يا بنيتى اى كان ناخد الاجراص دى جرص جرص ونحشى كل واحد شوية لحمة مفرونة معصجة ونلفها كانك بتلف صباع محشى كرنب كيده ايون براوه عليكم والله ايه الشطارة دى وبعدين تجيبو صينية الامونيه وترصوه صباع صباع جمب اخوه وبعدين تسجوه بشوية صلصلة الطماطم دى اللى جولنا عليها فى لاول وبعدين ترشوا عليها شوية جبن رومى دى واللا ما ادرك ايه وتدخلوه الفرن شوية كده وتطلعوه قيمة ربع تلت ساعة اكده

فى ناس بتحشية جبنة وبقدونس او جبنه رومى وسبانخ بس الطريقة دى بتاعة اللحم المفروم هى دى احسنهم من وجهة نظرى

طبعا ما فهمتوش حاجة شكلكوا باين اهوه ع العموم اللى مش فاهمه ممكن انزلها فى التعليقات الطريقة تانى اوضح من كده



المهم قربوا كده يا بنات اما اقولكم سر الاكلة دى بتعمل مود حلو قوى معايا بتعمل جو فى البيت اصلى مرة عملتها وخدتها معايا الكلية فقام جوزى ساعتها كان لسه زميلى بقى داق البتاع ده ولقيته تنح وادى العيال كل اتنين واحدة وخد العلبة لنفسه لدرجة انى شاكة ان البتاع ده هو اللى خلاه يتجوزنى اصلا اصله كان بيطلبه فى الخطوبة وبعد الجواز ولما اقعد شوية ما اعملوش يقول يا سلام فين ايام الكانيلونى تفتكروا أشك واللا ايه..

اى اكله فى الدنيا لو حتى جبنة قديمة (مش)عارفين المش بيبقى احلى من احلى حاجة لو بتاكله وانت مع اهلك واخواتك واصحابك واللى بتحبه وقاعد سعيد ومفيش حد منهم تعبان وبصحة وخير يبقى المش ده احلى من الكافيار الاصحيح حد فيكو كل كافيار مش بطروخ رنجة لا كافيار من اللى بيقولو عليه ع العموم اللى كله يقولى طعمه ايه اه والنبى اللى كل المرونج لاسيه برضه يقولنا طعمه ايه يكسب فينا ثواب



(على فكره مش قصدى خالص اتريق على لهجة الصعايدة بس بتوع المسلسلات متخيلين ان الصعايدة كلهم كده والناس اللى عايشة فى القرى لسه بيلبسوا جلاليب بكرانيش وبنات اسكندرية كلها لابسة محزق وعاملين معلمين فقولت حفاظا على التراث برضه وامشى مع الموضه تبقى اكله طوليانى صعيدى).

السبت، 13 يونيو 2009

تاج واجاباته فعلا من قلبى



هذه المجموعة من الاسئلة الطيبة مررتها لى اختى الطيبة الفقيرة الى الله ام البنات نسال الله ان يشفى والدها لانه يمر بازمة صحية شفاه الله وعافاه

هى مجموعة اسئلة تخص احلامنا وطموحاتنا وممكن تبين كتير قوى من شخصيتنا

وعلشان احنا اسرة مع بعضينا يبقى بسم الله الرحمن الرحيم ابتدى



- أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟

اممممممممممم

1-كان نفسى جدا اسافر مكان بعيد ببعد عن ايه وليه معرفش وكنت بشجع زوجى كتير على السعى فى الموضوع ده لكن الحمد لله انه محصلش لحد دلوقتى بس لو ينفع واحنا معاه موافقة طبعا

2-كان نفسى جدا يبقى عندى بيت لوحدى بيت من دورين او ثلاثة علشان ولادى واحفادى ان شاء الله يعيشوا فيه لكن محصلش لحد دلوقتى والامل فى الله موجود ونفسى حقيقى يتحقق الحلم ده.

3- كنت ارى دموع امى المستمرة شوقا للقيام بحج او عمره فكبرت وفى نفسى هذه الامنية اسال الله ان يمن علينا بها جميعا.

4-كان نفسى زوجى يبقى عنده مشروعه الخاص فى مدينتنا بدل سفره اليومى وعمله فى محافظة تانية انا بشفق عليه من التعب اللى هو فيه لكن ما بيدى حيلة املك له الدعاء بالستر فى الدنيا والآخرة وان يبارك لنا فى رزقنا واولادنا وان نرى فيهم ما يقر اعيننا واملك ان اراعيه فى عرضه وماله وبيته والحمد لله هذا مبدئى وما وصانا عليه ديننا الحنيف.

5- امنيات كتير واحلام كتير كان نفسى ومازال نفسى احققها والله اعلم هعيش لما اشوفها حقيقة واللا ايه




أذكر خمس أحلام على الأقل ..تخص مستقبلك .?

امممممممممممممم

1- نفسى كل ما اكبر تفكيرى يكبر معايا نفسى ما ابقاش محدودة فى تفكيرى نفسى دايما عقلى يسبق احساسى يعنى ما ازعلش الاول وبعدين افكر لا افكر الاول وبعدين اشوف اللى حصل ده يزعل واللا يفرح واللا عادى يعنى دى حاجة مش مضيقانى بس نفسى عقلى يسبق قلبى فى الحكم على الاشياء.

2- نفسى كل يوم يعدى وكل ثانية فى عمرى ابقى ايمانيا احسن نفسى اصوم دايما كده زى امى مش مجرد رمضان وايام القضاء وبالكتير قوى نص شعبان سته من شوال لا نفسى ابقى زيها عندها قدرة على الصيام ماشاء الله وناس كتير جدا ربنا مقدرهم اعتقد علشان نيتهم قوية فربنا مقدرهم قوى

نفسى اواظب على صلاة الفجر نفسى قوى بجد نفسى نفسى ربنا يرضى عنى ويقبلنى ويقبل اعمالى


3- نفسى ربنا يساعدنى ويقدرنى اربى ولادى كويس مش عايزة حاجة من الدنيا غير انى اشوفهم بخير نفسى يكونو محترمين وعندهم دين واخلاق نفسى تعبى معاهم يكون له نتيجة طيبة نفسى يقدرونى ويقدروا ابوهم ويشيلونا لما نكبر ويبقى فى قلبهم خير لينا يارب ساعدنى


4- صيدلية النور لصاحبتها د\ مريم احمد

مهندس\ مازن احمد


يافطتين نفسى اشوفهم قوى

5-نفسى اشوف دنيا هادئة-نفسى اشوف ناس بتبتسم من قلبها- نفسى اشوف صلة الرحم موصولة بجد مش كانه حبل فاضل منه شعرة-نفسى الحياء ميضعش للابد احسن دى تبقى مصيبة كبيرة لو ضاع سواء من الرجل او المرأة تبقى مصيبة وخراب للبشر
أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن ?


من غير تفكير زوجى ومريم ومازن دول كده ثلاثة لا هما اصلا بقيتى يعنى كلهم واحد


مدونتى هى انا و مجموعة اشخاص يتفضلون بقرائتها والتعليق فيها ويسعدنى جدا لغة التواصل والحوار والود بيننا



- أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا ..


-كان نفسى اشخاص كتير قوى يبقوا موجودين فى حياتى دلوقتى وحياة اولادى كان نفسى يبقى جدهم حماى العزيز الله يرحمه موجود فى حياتهم اكيد كان هيبقى له دور كبير فى تربيتهم واكيد كانو هيتعلمو منه الطيبة والتسامح وكان نفسى جدى انا يبقى عايش يتعلمو منه الكفاح


- نفسى مستقبلا فى حد يشيل هم بلدى وهم ولادى وولاد البلد كلها نفسى غدا يكون افضل فعلا خايفة جدا يكون مش زى ما بتوقع خايفة نحلم ونتمنى ويكون اللى احنا فيه احسن من المستقبل ودى تبقى حاجة مش تمام مش تمام خالص.




اجابات من قلبى وكأنكم قراتم صفحة من مذكراتى احلامى انى اشوف زوجى وولادى بخير حلمى ان حياتى تنجح حلمى انى اعدى من الدنيا بخير حلمى ان ربنا يكرمنى فى ولادى حلمى هو حياتى انى انجح ان ولادى يطلبولى الرحمة لما اموت مفيش عندى حلم غيره يمكن كان نفسى اشتغل معلمة واربى اجيال ويطلع من تحت ايدى ناس يبنو البلد لكن خلاص مليش حلم غير ده وهعمل كل اللى فى وسعى علشان احققه.

الاسئلة جميلة هتبينا لبعض اكتر علشان كده اسمحولى امررها ليكم كلكم يعنى كل اللى هيعلق ومحدش يهرب وعلشان فى ناس هيهربوا اسمائكم اهى:

بسنت يا نساء العالم اتحدن

نونا صاحبة مدونة بلاش فضايح

نهى تأثير الفراشة

غادة قلب ارهقته الاحلام

منى ASPACE OF MY OWN

ميمايه

بقول اللى اعرفه شباب راقى مفكر

احساس طفلة محبة للرومانسية بس واقعية

ياسمين ليتنى اعود تلك الصغيرة

دعاء day to day life

ندا
ذكرى رحيل قلم

sweet violet

مونى الشريف عيش احلى ما فى اللحظة

الأحد، 7 يونيو 2009

اللا قولولى


اللا صحيح قولولى اخبار توشكى ايه

توشكى الحلم توشكى الامل

يعنى وصلنا لايه

فشل واللا نجاح

الفلوس اللى اتصرفت جابت نتيجة



المفروض ان المشروع ده هيوفر فرص عمل كتير

والمفروض انه هيساعد على سد الفجوة الغذائية

وانه كمان هيبقى فى تصدير منتجات غذائية منه

وانه هيشجع على تعمير واسكان المكان ده فسيقل الضغط البشرى على وادى ودلتا النيل


هو بصراحة انا بقعد اقرأ وبحس بجهل وان زى ما يكون حد عايزنى اتوه
يعنى فلحنا واللا ايه
مش باين حاجة يقولك فى موقع وزارة الموارد المائية والرى ان المشروع ابتدى يؤتى ثماره
وان فى اكتر من 7 الاف و800 عامل شغالين و ان فى فعلا فواكه وخضروات وحاجات حلوة طلعت
طب ما احنا شوفنا الكلام ده زمان على التلفاز بامارة الوليد بن طلال لما كان ماشى جنب الريس
طب يعنى ايه اللى حصل كله تمام وميه ميه واللا ايه

طب ليه مفيش تقرير صريح من الجهة المسئولة تقولنا احنا وصلنا لفين

طب مشروعات الشباب لاستصلاح الاراضى عاملة ايه

طب مشروع تنمية سيناء عامل ايه

طب انتو قارفينا بانفلونزا الطيور والخنازير ومواجهة الارهاب والعلاقات الدولية وووووووو

حاجات كتير حاشيين حياتنا بيها وناسيين اخبار بلدنا احنا ايه

زمان كنت بحلم اعيش فى سيناء آه والله كان نفسى جدا يبقى عندى ارض هناك اعيش فيها

كان نفسى يبقى زى فكرة مزرعة.. البيت وسط الارض واربى معزة ويبقى عندى جاموسة

كان نفسى تبقى عيشة فل، ولادى فى المدرسة القريبة، مستشفى قريبة ،وزوجى يشتغل فى الارض دى

كان نفسى تبقى ارضى جنب ارض اخويا جنب ارض ناس تانية طيبة وبتشقى علشان حياة افضل

لكن فشل بعض المشروعات دى فى اماكن تانية سنه ورا سنه خوفنى
يمكن ميكونش الفشل منهم وده الاكيد
يعنى لما يبقى مفيش خدمات تساعدهم وفى نفس الوقت عليهم ديون يبقى النجاح بتقدير البشر العادى ضعيف جدا



طب يعنى مفيش صراحة ليه مفيش حد يقولنا الصراحة ليه مفيش متحدث رسمى زى اى بلد محترم باسم وزارة الزراعة او وزارة الرى او وزارة اى حاجة ليها علاقة بالموضوع

طب يعنى مستقبل العيال ولادنا شكله ايه
حد يفهمنى لما احنا رقعة الارض الزراعية بتقل والناس بتكتر ومفيش بديل
ولما صرفنا مليارات على مشروع مش باين له اى نتيجة يبقى ايه العمل

بيضحكو علينا وبيقولو الشباب مش عايز يشتغل وعايز يقعد ع القهوة يستنى التعيين
الاغنية دى موضتها بطلت بطلوها انتو كمان بقى
لو فى صخر هيفحتوه ويجيب دخل هيعملو كده بس مش تقولو دخل قليل واللا ملوش تأمين لو حصلوا حاجة بالسلامة نشوف غيره
طمنه على نفسه واديله تمن تعبه وشوفه هيعمل ايه اديله سكن وقوله اتجوز هنا جنب المشروع
قوله مواصلاتك موجوده لو حبيت تشوف اهلك
مدرسة ابنك هنا ومدرسينه جاهزين
قوله المستشفى هنا وفيها علاجك موجود ومتوفر

قوله اتعب فى الارض وهتلاقى نتيجة تعبك قوله احنا مقدرينك مش مستخفين بيك
قوله اعرق فى الارض دى عرقك هيطلع خير
قوله انت ابنى مش هبهدلك بس اتعب علشانى شوية علشان نفسك علشان اخواتك

ياترى ياولادى مصر هيكون شكلها ايه لما تكونوا فى سن الشباب
ياترى يا مازن هيبقى كلك امل واللا هيبقى عندك احباط
يا ترى يا مريم هتقدرى تحققى حلمك واللا يا بنتى هتبقى برضه مثلنا دلوقتى

يارب يا حنان يا منان اصلح حالنا وحال ولادى وحال كل مسلم وكل من عاش تحت سماكى يا مصر

الأربعاء، 3 يونيو 2009

آداب الطريق


الأدب مع الله


الأدب مع الوالدين


آداب العمل


آداب المساجد


آداب الذكر


آداب النوم


آداب الاكل والشرب


وغيرها الكثير والكثير من الآداب الاسلامية تحسن اخلاق المسلم وتهذب سلوكه


ومن هذه الآداب : آداب الطريق


هناك اشياء وصى عليها الله ورسوله اشياء كثير من الناس يتغافل عنها يتناساها ونحن بأمس الحاجة اليها


نسينا آدابنا وسلوكنا يوما بعد يوم فوصل الحال لما هو عليه


نسأل انفسنا (هو الناس عاملة كده ليه ،هو البنات لابسه كده ليه هو الشباب عامل ليه كده)


الناس تركت الآداب تركت آداب الاسلام و نسيتها


سوف احاول ان اذكر نفسى بها واذكر من نسيها فهى حقيقة كنوز ينبغى الحفاظ عليها


وحقيقة ليس معى كتاب معين استقى منه مباشرة كتاب وضع ايدينا على هذه القيم واخرجها لنا محددة من القرآن والسنة


ولكن حمدا لله على التكنولوجيا الحديثة فالانترنت يحتوى على كثير من المواقع الاسلامية الكثيرة فهى منجم لكثيرمنا فى المعرفة والعلم


من آداب الطريق:

1- غض البصر (مش معاكسة بنات وقلة قيمة وقلة تربية)


2-اماطة الاذى فقد قال رسول الله صلوات ربى وسلامه عليه اماطة الاذى عن الطريق صدقة


(يعنى لو لقيت حجر ،طوبة ،سلك، زجاج فى نصف الشارع شيله ما تتكسفش دا انت هتاخد ثواب حسنة يعنى والحسنة بعشر امثالها يا بختك)


3-لا يضيق على المارة ويفسح لهم المجال(ياسلام يعنى ملوش لزوم نقف فى وسط الرصيف مثلا اقف على جنب بعيد عن الناس الرايحة والجاية اديهم مساحة يمشوا فيها)

4-الاعتدال والتواضع فى المشى(يعنى مش ببطء قاتل ولاسرعة هبلة يعنى متتلكعش ولاتبقى اهوج و كمان متبقاش انت واللا هى فرحانين بنفسكم)

وقال تعالى: {ولا تمش في الأرض مرحًا إنك لن تخرق الأرض و لن تبلغ الجبال طولاً} [الإسراء: 37].

5-السير فى جانب الطريق (هو صحيح جانب الطريق بقى للباعة بس نشوف برضه جنب الطريق ونمشى فيه اسلم واحسن لنا)

6-عدم الاكل اثناء السير(لما تلاقى واحد مثلا عمال يلحس فى الايس كريم وهو ماشى واللا فرحان بالكان بتاعة الحاجة الساقعة تعرف انه ميعرفش المعلومة دى )

7-الالتزام باداب المرور (يعنى السائق يحترم اللى ماشى واللى ماشى يحترم نفسه وميعديش بلطجة)

8-الامر با لمعروف والنهى عن المنكر(يعنى لو شفت حد بيرمى حاجة فى الشارع قولتله بلاش كده من فضلك او لقيت اتنين مختلفين تقولهم صلوا كده على النبى الحقيقة انا بخاف جدا اعمل كده وكمان بوصى اخويا الصغير انه عمره ما يدخل فى فض نزاع بخاف جدا عليه وحيدنا بقى وحتى لو مائة واحد هقولهم نفس الكلام اخاف جدا حد يقوله كلمه وحشة يغير لشرفه ويتخانق وممكن يروح فيها ربنا يستر بس لو مقدرتش تغير بالايد او باللسان فبقلبك عاهد ربنا ان عمرك ما هتعمل كده وهذا اضعف الايمان)

9-عدم رفع الصوت فى الطريق (يعنى ملوش لزوم كركرمرمر بتاعة البنات واللا الهزار السخيف بتاع الشباب والاسماء اللى بينادو بعض بيها واللا واحدة ماشية تشتكى من حماتها لصاحبتها فى الشارع هو ايه مفيش بيت تتكلمو فيه بدل ما تسمعونا قصة حياتكم)

10-الادب عند السير مع الكبير(يعنى لو ماشى مع والديك او عمك او جدك مثلا امشى على شماله علشان يدخل هو الاول يطلع الرصيف الاول ويتسند عليك ما تقدمش ويبقى هو وراك عيب و استمع اليه لو كلمك ورد بادب بلاش جفا)


ذات يوم قال النبي صلى الله عليه وسلم لأصحابه: (إياكم والجلوسَ على الطرقات) فقالوا: ما لنا بد، إنما هي مجالسنا نتحدث فيها. قال صلى الله عليه وسلم: (فإذا أبيتم إلا المجالس؛ فأعطوا الطريق حقها). قالوا: وما حق الطريق؟قال صلى الله عليه وسلم: (غض البصر، وكف الأذى، ورد السلام، وأمر بالمعروف، ونهى عن المنكر) [متفق عليه].


اعتقد اننى لم أذكر آداب الطريق كلها ولكن هذا بعض مما قرأت

الآداب تربية وتنشئة يربى الأهل اولادهم عليها ويدخل فى عملية التربية المدرسة والمؤسسات الدينية

ولك دور اجتماعى نتيجة لقرابتك بطفل ما سواء كنت أخ اكبر اوخال او خالة عم او جد اوعمة او جدة اذا استطعت ان تزرع فى طفل صغير طبع ما او خصلة ما فافعل لك ثوابها واجرها يجب الا نتخاذل فنحن ان لم نصلح طفل اليوم فلا صلاح لرجل الغد وان لم نصلح طفلة اليوم فلا صلاح لأم الغد وعندها لن يكون صلاح للدنيا.

الاثنين، 1 يونيو 2009

يا سلااام

الورود والزهور ممكن تكون تعبير عن حاجات كتير قوى
ممكن تعبر عن الفرحة والسعادة
الحزن والوجع
تعبر عن فرحتنا بمولود جديد
نتمنى بيها الشفاء لانسان
ممكن تعبر عن النجاح
ممكن تكون الامل بعد الفشل
الزهرة دى ممكن تدخل فرحة كبيرة لقلب انسان
ممكن تخليه يبتسم فى عز المحنة


ممكن تقوم من نومك فرحان سعيد حاسس برضا من غير سبب يعنى اليوم اللى قبله كان عادى وممكن يكون كان شاق نفسيا وجسمانيا
لكن تلاقى نفسك صاحى مبسوط عندك استعداد لاى شىء جميل بتتمنى ان ميجيش خبر وحش ولا حد من اللى بتحبهم يتعب او يحصله حاجة
تتمنى انك تشوف كل اهلك وقرايبك يبقى نفسك فى طائرة هليكوبتر تلف بيها عليهم علشان اليوم يقضى تشوفهم كلهم
بتحمد ربنا على انك ليك عمر النهاردة
انك ليك عمر اللحظة دى والنفس ده مكتوبلك تتنفسه
تتمنى انه سبحانه وتعالى يتقبلك ويحبك
تتمنى لو معاك وردة لكل حد بتحبه
صحيح احنا معندناش لغة الزهور دى
لكن الوردة كتعبير عن الود والاحترام ليها معنى كبير


دائما بنبحث عن الورود والزهور على الانترنت
صحيح بنهتم بشكلها اكثر شىء
لكن اكيد هتبتدى ميرو تقرا عنهم والاقيها جاية تقولى على اللى قراته
واحنا بندور كده عثرنا على موقع تسويق للورود www.canadaroses.com

لقينا عليه زهور سبحان الخالق العظيم روعة فى الجمال
نسقوها بطريقة فنية عالية
شكلها مفرح جدا
هى غالية صحيح بس كفاية اننا نتفرج على الجمال ده
قولت احاول اعملهم فيديو كده معاه اغنية بحبها
الاغنية دى لو كانت موجودة فى اول يوم شفت جوزى فيه
كنت اكيد هبعتهاله هدية
ولوكانت موجودة ساعة ولادة مريم ومازن كنت اكيد هعيط وانا بسمعها
بحس انها معبرة قوى
وبهديهالكم كمان تعبير عن احترامى لكم وانكم بحسكم اصحابى كده من غير ما اشوفكم
كنت لوحدى صحيح وبعدين ربنا كرمنى بحبى الغالى وولادى
وكرمنى بيكم كمان بعد الوحدة بقى لى اصحاب من جديد

اسيبكم مع الفيديو البسيط ده بس متضحكوش عليا


ها عجبكم
اتمنى دا تعبير بسيط منى وشكر كبير