أنا اصلا مليش فى الكورة

السلام عليكم ورحمة الله وبركاته
من زمان خالص كنت بحب الكورة وكنت بتفرج عليها وبتابعها وكان السبب فى كده جدو الله يرحمه كان كروى جدا واهلاوى جدا جدا

وكان اى ماتش بيتذاع يوم الجمعة كان بيبقى احلى ماتش لاننا كلنا كنا بنتجمع عند جدو ونتابع ونفرح وننفعل ونهيص وكان بيبقى تجمع عائلى ولا اروع منه ولا احلى.مش حبا فى الكورة اد ما هو حب لجدو واللى بيحبه جدو.

ومرت الايام وبدات اهتم بالعاب تانية لقيت الكورة فى انهيار فقلت هو اشمعنى يعنى الكورة(كرة القدم)طب مافى كرة سلة وكرة يد واسكواش وتنس (كلها كور برضه) وبعدين لقيت ان الباليه المائى ممتع وان السباحة هايلة وان العاب القوى مش ممكن جمالها وان الجمباز مفيش احلى من كده وان رفع الاثقال حكاية وان الجودو والكاراتية والمصارعة الرومانى والملاكمة بتشدك معاها .

فبدات اهتم بالوان وانواع تانية من الرياضات الجميلة الممتعة فى لعبها وفيها روح منافسة كما ينبغى ان تكون المنافسة الشريفة القائمة على المذاكرة الرياضية ان جاز التعبير يعنى تدريب واهتمام من كافة النواحى وعرفت بلدان ومعلومات عنها وعن شكل الحياة فيها وعواصم البلاد دى واهم مواردها ووووو كل ده من اهتمامى بالرياضات دى.

وكانت سعادتى لا توصف وانا باتفرج على الاوليمبياد العالمية واقعد حفلة الافتتاح اتفرج على الوفود بتاعة الدول ولما ييجى الوفد المصرى افرح وانشكح واقوم نص قومة وانا قاعدة وكأن حد مثلا اعرفه واللاحد قريبى هيكون معاهم وكانت فرحتى لا توصف وعلمنا بيرفرف كان قلبى بيرفرف معاه.

مقدرش اقول انى رياضية ولا بفهم فى الرياضة لكن بفهم اللعب الحلو اللى يخليك تتحمس معاه وصحيح لا اتابع الرياضات دى دلوقتى لان مفيش اهتمام اعلامى بيها مركزين قوى قوى مع كرة القدم واللاعب الفلانى مين اشتراه ومين عايز يشتريه ومين ومين ومين والدورى والكاس والاهلى والزمالك والاسماعيلى وووووو

بفرح جدا لما اسمع خبر حلو عن المنتخب وبزعل جدا لما اسمع خبر وحش ولاحظوا كلمة اسمع لانى فى اغلب الاحوال ان مكانش كلها مبتفرجش على الماتشات لان جدو حبيبى الله يرحمه مات من 3 سنين وماتت معاه اى فرحة باى ماتش او اى لعب.



كفاية رغى بقى واقولكم زعلت ليه امبارح والنهاردة وهزعل ايام كتير جاية
مزعلتش ابدا على نتيجة الماتش ما انا قولتلكم انا مليش فى الكورة انا زعلت على المصريين اللى بيهللوا ويرفعوا الناس اقصد المدرب واللاعبين لفوق قوى قوىلما يكسبوا ماتش ويهبدوهم على ضهرهم لو خسروا ماتش
هى مش الكورة اجوان برضه ومش الكورة لعب وفن ومش الرياضة عموما منافسة شريفة يعنى ليه نسينا كل الاخلاقيات الحلوة دى وليه فى تعصب وليه مفيش اعتدال فى الحكم على الاشياء

طب ليه الاهتمام الفظيع ده بالكورة لدرجة ان اللى عنده عيل يتمنى انه يطلع لاعب كورة مش سباح ولا لاعب تنس ولا لاعب جمباز ولاولاولا....
وليه مفيش ميزانيات ضخمة لاى لعبة تانية ليه بنصرف قوى على الكورة ولا نهتم باى لعبة تانية
اعتقد اننا فى امس الحاجة لاعادة ترتيب اهتماماتنا واعادة ترتيب بيتنا الرياضى المصرى واعادة تنفيض دماغنا واخراج الافكار اللى كركبت هذا البيت الاصيل الجميل.

لو فى اكتر من الدموع

ملحوظه الموضوع ده لاعلاقة بينه وبين الخبر الاخير ربنا يصبر اهله ويلهم امه الثبات ويؤجرها فى مصيبتها ويخلف لها خيرا منها





دموعى دى علشان حاجة تانية بعيدة تماما عن الموضوع ده

دموعى فى الاحسن منها يا ترى ايه

انى اقول ونقول كل يوم وكل وقت ونجعلها دائما مع اذكارنا


(حسبنا الله ونعم الوكيل)

احسن كلمات ممكن نقولها قصاد كل اللى بيحصل


يارب يارب يارب


اعز الاسلام والمسلمين


يارب احنا بنرجوك وبنبكى فى سجودنا وانفنا وجبهتنا لامسين التراب


انك تدافع عننا عن اسلامنا عن رسولنا


يارب ان كان يرضيك ما نحن فيه فزدنا منه وان كان لايرضيك فارفعه عنا


يارب دموعنا كمسلمين لن تغسل الحروف اللى كتبوها بايديهم تسبنا وتسب اسلامنا وقبل ده كله تسىء لحبيبنا صلوات ربى وسلامه عليه


يارب دموعنا مش هتنضف قلوبهم وتقولهم ان الدين عند الله الاسلام


يارب دموعنا مش هتخليهم يعرفو انهم اقرب لنا


دموعنا مش هتقولهم انتو مسئولين مننا


دموعنا مش هتعرفهم ان اركان الايمان( الايمان بالله وملائكته وكتبه ورسله واليوم الاخر و القدر خيره وشره)


دموعنا مش هتقولهم بلاش دا احنا بنحب عيسى ومريم بلاش كده


مش عارفة اعمل ايه اروح لمين دموعى حرقت وجهى ياريتها كانت تمسح اللى كتبوه وقالوه

بلجألك انت يارب يارب


وليه ياللى كنت مسلم تبقى غير كده قال رب العزة فى كتابه الكريم (الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الإِسْلامَ دِيناً )[المائدة:3].


رغم ان اللى بيقولوه بره وجعنا قوى لكن الوجع كل الوجع لما يكون الكلام ممن يكتبون بالعربية ممن يحملون لقب عربى


يا ايها العربى الم تقرأ وتتعلم حتى فى كتب التاريخ من محمد صلى الله عليه وسلم ماذا فعل و ما رسالته


حاول تقرأ اى حاجة تشيل الغشاوة من على عينك مش قصدى انك تبقى مسلم لا دى حاجة تخصك انت وتخص علاقتك بربنا لا املك اكفرك ولا املك احكم عليك بس نفسى تاخد كتاب عن السيرة النبوية عن الاسلام اختار اى كتاب براحتك واقعد فى مكان لوحدك اقراه


فكر فيه بانسانيتك المجردة من اى اهواء وبعدين شوف هل هتقدر تسىء له تانى وارجع افكرك مش قصدى اسلامك( ان الله يهدى من يشاء)


اخر آيه نزلت على الحبيب المصطفى صلوات ربى وسلامه عليه يقول الله تعالى: "وَاتَّقُوا يَوْماً تُرْجَعُونَ فِيهِ إِلَى اللَّهِ ثُمَّ تُوَفَّى كُلُّ نَفْسٍ مَا كَسَبَتْ وَهُمْ لا يُظْلَمُونَ" (البقرة:281)


انا مجرد انسانة عادية جدا جدا بحاول احافظ على تعاليم دينى بحاول احافظ على اركان الاسلام


بحاول اكون مسلمة صالحة بحاول اكون زوجة صالحة بحاول اكون ام صالحة بحاول اكون انسانة صالحة


افتكرت التدوين شىء محترم وراقى قولت بعد ما استاذنت زوجى انى اعمل مدونة اعبر عن نفسى فيها عن امرأة شبه كتيييير قوى على ارض مصر


لكن هالنى ما قرأت وروعنى الخوف من غد لا اعرف ما يخبئه لى او ما يخبئه لاولادى


هل هؤلاء شرف للانسانية


هل هؤلاء شرف للكلمة


هل هؤلاء شرف للمدونين


هل هذه هى الحرية


هل حريتى ان اسب رسول من عند الله


هل اكمل التدوين واكون رقم ضمن مجموعة يكون فيها هؤلاء


ماذا افعل هل اكمل فى مدونتى ام اغلقها احتجاجا على ما قرأت


هل يستحق هؤلاء ذلك


ولماذا يلجأ البعض لافظع الالفاظ ونحن ندافع عنه هل هذا دفاعا


كيف ادافع عنه هل اكتب تدوينات لذلك


ام اركز فى دينى وعبادتى وفى طلب الرحمة والمغفرة من الله واركز فى بحثى عن سنته واتباعها


هل سيكون لاى شىء فى الدنيا اهمية


هل كلامى له معنى هل دموعى تمحى ما قد كان



اشكركم جدا لانكم كنتم صفعة على وجهى زادت من سعيي واصرارى على ان اكون مسلمة افضل مما انا عليه

اشكركم لانكم ستزيدون فى ميزان حسناتى فمن يومنا هذا الى ما شاء الله لى ان اكون على وجه الارض

سأصلى بعد صلاة العشاءركعتين لقضاء الحاجة بأن يغفر لى وللمسلمين يوم يقوم الحساب وأن يعز الاسلام والمسلمين

واعلمو ان الله يمهل ولا يهمل

استغفر الله العظيم

لما ادخل مدونة جميلة ومحترمة
صاحبها او صاحبتها ناس بسم الله ما شاء الله
اصحاب عقول وافكار جيدة جدا ولا نزكى على الله احدا

وأجد موضوعات جميلة ما شاء الله تنم عن فكر راقى
واسلوب شيق ماشاء الله

ولانى بحب ألم باطراف الموضوع ككل اقرا التعليقات
لانها توجه الضوء ناحية جزء اخر من الموضوع يخرج به
لمضمون أوسع وقد يعطى رد احدهم فكرة او ايضاح لامر ما

وفجأة وانا اقرأ اجد تعليق فيه سب وشتائم فظيعة
فى وسط التعليقات ويكون واضح ان صاحب المدونة مثلا لم يتابع الموضوع لانشغاله
بامور الحياة ولم يكتشف هذا التعليق بعد
او قرات قبل ذلك انه ممكن يتسرق الباس وورد بتاع المدونة وتبقى انت نفسك مش عارف تدخل مدونتك
الصراحة مش عارفة ازاى.

يادى المصيبة طب انت أيها البنى آدم
عندك فراغ وقلة دين وقلة حياء وقلة كل حاجة
لدرجة انك تضيع من وقتك ووقتنا اللى المفروض انه ثمين عند كل الناس
وتدخل تقول تعليق كوكتيل من الالفاظ المنحطة
وكمان ايه الفائدة اللى هتعود عليكو من سرقة الباس وورد
هو ده الانجاز الى عايزيين تعملوه فى حياتكو ان كانت تستحق لقب حياة

بحمد ربنا ان لسه الحمد لله محصلش معايا كده
بس مين عارف بكره ممكن يحصل ايه
مش عارفه خالص ليه
ليه بقت الشتيمة البديل بتاع بعض الناس للنقاش
ليه مثلا عاوز تقول رايك فتشتم ده مش رأى
انا اصادرك حقك ده حق السب بتاعك ده
الحرية انك لا تؤذى نفسك ولا تؤذينى
لو عايز تأذى نفسك وتاخد سيئات انت حر
لكن متاذنيش وتاذى غيرى ونقرا اللى يجرح شعورنا

احتمال كبير يكون حد من العالم دىبيتسكع فى المدونات يقرا الموضوع ده
يقوم يعمل حاجة من اثنين يا يعلق تعليق فظيع والحمد لله هلغيه
او يسرقو الباسوورد وتبقى دى اخر مرة اكتب هنا
سلامى وتحياتى لكم جميعا