رمضان كريم

رمضان كريم

كل عام أنتم بخير

آه صحيح .... أنا خلصت الicdl

بسم الله الرحمن الرحيم
*****************
الحمد لله خلصتها ونجحت من غير اعادة اى حاجة
مية% تلات مرات
سبعة وتسعين% مرتين
اربعة وتسعين % مرة
واخر موديول امتحنته itجبت فيه 86الحمد لله
المهم هو مفيش درجات فيها يعنى بتطلع الشهادة انه عديت وخلاص
خلصتها من 3اسابيع الحمد لله
ربنا ينفعنا بيها باذن الله

icdl

بسم الله الرحمن الرحيم
*****************************
انطلاقا من حاجات كتيييييييير قوى
قررت الحصول على الicdlوالحمد لله امتحنت 4موديول والخامس يوم الخميس باذن الله دعواتكم بقى
بقالى حوالى شهرونصف فيها تدريب واختبار والحمد لله ماشى الحال عال العال
دعواتكم
اما بقى الحاجات الكتيير دى ليها بوست خاص بيها
سلام مؤقت

اليابان ☼

بسم الله الرحمن الرحيم

اليابان معجزة حقيقية ودلالة على الارادة البشرية وان الانسان فيه من العزم والتصميم على انه يكون ويعمل حاجات صح فى حياته

علميا واخلاقيا وماديا واجتماعيا وثقافيا وووو

وكدولة وبلد دلالة على ان ممكن من تحت الرماد تطلع شجرة ويطلع عملاق

بعد ما ضربت بالقنابل النووية فى هيروشيما ونجازاكى من اكتر من 60 سنة شوفوا دلوقتى ايه هى بلد ليها كل الاحترام والحب بلد ممكن تبقى المثل الاعلى اللى نتحاول نتعلم منه

دى فيديوهات حلقة المعجزة اليابانية للدكتور \مصطفى محمود (رحمة الله عليه) وطبعا هى حلقة قديمة بقالها سنييييييييييييييييييين طويلة لكن تحسه بيتكلم بلسان حالنا اليوم

احنا يمكن فاكرينه كويس لكن كتيييييييير من شبابنا المصرى والعربى مش عارفينه اتمنى تعرفوا عنه وتقرأوا له وحتى دوروا على حلقات برنامجه القيم على الانترنت وتشوفوها وقتكم مش هيروح هدر☺

ساعات قليلة على عام جديد

السلام عليكم ورحمة الله وبركاته


تحية طيبة وسلام من القلب


اخباركم ايه جميعا يارب تكون احوالكم كلها بخير واحوال اسركم الكريمة كلها فى احسن حال يارب





اشكر جدا سؤالكم وتساؤلكم عن غيابى وعدم تواجدى بين صحبتكم الكريمة فترة طويلة


بعتبر من احسن الحاجات اللى حصلت فى حياتى عموما وبالاخص 2009 هى المدونة دى اللى خلتنى قرأت لناس وعرفت ناس وحاسة انى عشت مع ناس اصبحوا هم كل اصدقائى الان ويكفينى حتى انها تكون صداقة بالمراسلة على صفحات المدونة .


احلى ورد ابيض ليكم كلكم



صراحة كنت كاتبة كلام تانى فى البوست ده بس مسحته لان كان كلام كئيب ومكتئب ويجيب اكتئاب فخلاص ما علينا احنا ولاد النهاردة .

2009 عادى زى اى سنة مليانة احداث حلوة ع المستوى الشخصى واحداث مش ولابد
وعلى مستوى الوطن مش فاكرة الصراحة حاجة تسر وتعمل بهجة عالية واهو الحمد لله لسه عايشين ومصرين نعيش شعب معندوش دم
وعلى المستوى الدولى فى ايه يسر يا حسرة
ما علينا احنا مش قولنا مش عايزين اكتئاب
2010 اتمنى واتعشم وارجو من الله انه يكون عام جديد وهادى وتنصلح الاحوال وتتغير المفاهيم للصح واتمنى وادعو الله ان ينصر الاسلام والمسلمين فى كل مكان وان يرفع البلاء عن فلسطين وعن العراق وعن مسلمى الصين وعن كل مسلم موحد واقع تحت ضغط حرب او اضطهاد فى اى مكان على ارض الله الواسعة

حبايبى واخواتى اللى موجودين عندى هنا وبقرالكم دايما وكل الناس اللى بتزورنى من آن لآخر وكل الناس اللى مقصرة معاهم اشكركم جزيلا لانكم بكل هذه المصرية وبكل هذه الجدعنة وبكل هذه الانسانية اشكركم لانكم أنتم.


ده كان آخر بوست فى 2009 ولى عودة معاكم فى اول بوست فى سنة 2010 باذن الله
نفسى من زمان اكلمكم على حباية عينى مازن
وده اول بوست باذن الله فى السنة الجديدة

ياااه ما احلى الرجوع اليكم

اسيبكم فى رعاية الله

اهداء

السلام عليكم ورحمة الله وبركاته

شكرا لدعمكم الطيب جدا شكرا جزيلا

ربنا يخليكم ويبارك فيكم

تعالوا شوفوا حاجة من ذكرياتى فى مرحلة الجامعة واسمحولى اهديها للى يحبها وكمان عندى اهداء خاص

اهداء لك يا أغلى الناس عندى

الاغنية دى ظهرت وكنا لسه فى الجامعة وكنت ومازلت بحبها جدا لانها معبرة قوى عن احساسى بحبيبى وقتها واللى هو حبيبى برضه دلوقتى وزوجى وابو عيالى ربنا يخليه ويبعد عنه اى شر ويحفظه لينا ويبارك فى كل خطوة يمشيها

ومن هنا برضه بحذره الاكياس والسواطير مفيش اكتر منها بصه يمين شمال ها اوعى ههههههههههههههه

لا ابدا بهزر ربنا يحميه يارب ويبارك فيه وفى اولاده وفى زوجته اللى هى انا واللا بلاش

هى دى الحكاية ودعواتكم بقى

بسم الله الرحمن الرحيم

اخوتى الكرام اشكر جدا سؤالكم علىّ شكرا جزيلا حقيقة افتقدكم واشعر كأنما شىء من أصل نفسى او شىء من طاقتى الوجدانية مفقود بسبب تغيبى عنكم ولكن لى عذرى.

حقيقة انا فى حالة نفسية سيئة من حوالى شهرين احداث كثيرة حدثت لى ولمن حولى اثرت كثيرا على لاننا تربينا على ان نتحمل ونكتم ما بنا حتى يقضى الله امرا كان مفعولا.ولكن كل هذا يؤثر فينا وفى اجسامنا وعلى حتى مجرد تقبل فكرة الحياة نفسها ومدى اهميتها وما الذى نفعله بالضبط فى هذه الدنيا.

ولكن ما ان يتستعيذ الانسان بالله من الشيطان الرجيم ويتستغفر الله ويلجأاليه ويتستغفره من اى فكرة سيئة قد جالت بنفسه حتى يبدل الله السحابة السوداء بشمس ساطعة تملا نفسه بالايمان والثقة بالله وحاشا الله ان اكون غير ذلك ولكن احيانا قد يتسلل اليأس والحزن الى نفسى فيصيبنى بتلك الخيبة وهى (وماذا بعد ما جدوى كل شىء وهل سينصلح حال تلك الدنيا وهل سأمن على نفسى واولادى فيها)

حتى مشكلة حدثت لاحدى اقربائى سيدة صغيرة تراها تحسبها مازالت فتاة صغيرة تلهو بدميتها ولكنها فى الحقيقة ام لطفلتين لم تفعل فى حياتها ما قد يؤدى بها لتلك المشكلة ولكنها ارادة الله وكلها اختبارات الاهية ليرى فعل الصابرين ولكى يزيدنا الله حسنات بامره سبحانه وتعالى.

اما اولادى فلديهم نزلة برد شديدة عليهم جدا ويزيدها سوء تلك الادخنة اليومية الليلية ولاننا من اهل دلتا مصر فنشعر بها مكثفة تخنقنا فى نومنا واصبحنا اسرى داخل بيوتنا نغلق النوافذ والابواب حتى تهدا قليلا ونعاود فتحها لمجرد حتى تهوية المنزل والغريب اننى اسمع ان وزارة البيئة مثلا تقول ان هناك غرامات وانهم سيجمعون تلك المخلفات من الفلاحين لاستغلالها بدل من حرقها ولكن هيهات كل عام اعتبر شهر اكتوبر هذا شهر النكسة والخيبة لا شهر الفرحة والانتصارات لاننى اعلم جيدا ما سيحدث فيه وما سيحدث لاولادى واولاد الجيران ونحن الكبار معهم من ضيق تنفس ونوبات السعال ونسأل الله ان يشفى كل مريض وحسبنا الله ونعم الوكيل فى كل من يقصر فى مصلحة اولاد هذا البلد.

وزوجى سندى فى هذه الدنيا الصابر القوى الايمان (ما شاء الله لا قوة الا بالله) سيسافر لمدة اسبوعين اسوان لظروف طارئة فاشعر وكان روحى ستسلب منى تلك المدة اشعر اننى لن اقوى حتى على التنفس ولا الكلام ولكن انا ذراعه الايمن كما يقولون وانا مسئولة عن الاولاد وعن هذا البيت فلهذا سأكون بفضل الله اقوى من نفسى حتى يرجعه الله لنا بالف الف سلامه



وايضا بدات مشروع جديد حيث اعمل فى تجارة الملابس الجاهزة والمفروشات من المنزل منذ حوالى 10 ايام وحقيقة الموضوع متعب جدا والمبلغ بسيط حوالى 2000 جنيه ولكن العجلة تدور صحيح انها بطيئة ولكنها تدور بفضل الله ولكنه حقيقة مرهق ومتعب ومطلوب له الصبر ايضا على طلبات الناس التى قد تجدها احيانا عجيبة وغريبة المهم دعواتكم بالتوفيق لان ان كان الموضوع يفوق التحمل سنضطر لتصفيته لغرابة ما نراه فيه ولكننا سنمهل الامر فترة طويلة وليست بقصيرة مع العلم اننا لا ناخذ من ربحه شيئا بل نضيفه على اصل راس المال ومعروف ان هذا النوع من المشروعات يلزمه عام كامل حتى تشعر به وبربحه ودخله اسالكم الدعاء بظهر الغيب بالتوفيق.



احداث كثيرة مرت علىّ انهكت نفسيتى وجسمى حتى اصبح ضغطى ينخفض فجأة واسرع لتناول دوائى حتى استطيع ان اقف على قدمى مرة اخرى او قد تنتابنى نوبة من القىء حتى انهك ويتبدل لونى للاصفر ولا املك الا ان ادعو الله ان يلهمنا الصبر والثبات ويقوى ايماننا ويهيىء لنا من امرنا رشدا وان يتقبلنا فى عباده الصالحين الصابرين وان يعفو عنا ويتقبلنا وان يفرج كرب كل من كان ذا كرب يارب العالمين



سامحونى فكل منا يحمل هما فوق عنقه يسير به اينما كان ولا تنقصكم شكوتى ومشاكلى ولكن الله قادر يخفف عنا ويسدد خطاناويلهمنا الصبر وقوة الايمان.

نشرة اخبار صغننة

********************* بسم الله الرحمن الرحيم**********************

فى عالم مليىء بالاحباطات المستمرة والتى تكاد تكون يومية

قرر السيد\ محسن والدى الغالى

انه من تاريخ 15 يوليو اجبارى على جميع اعضاء الاسرة الكريمة وازواجهم واولادهم

التجمع عند سيادته من اجل القيام بالرحلة السنوية لمدينة الاسكندرية

وجدير بالذكر ان سيادته يتكفل بالحجز وكل ما لزم من اجل رحلة هنية

وقد نما الى علمنا ان من سيقوم باحضار اى مأكولات او مشروبات يلغى اسمه فورا من كشف الرحلة

وانه يعفينا من تلك الاعباء عملا بمقولته الشهيرة( المليان يدى الفاضى)

وقد صدر الفرمان العائلى الطيب مع تحذيرات شديدة اللهجة( ان البلد هتبقى زحمة وعينكم ع العيال)

ومرفق بالبيان المواعيد الرسمية لبدء الرحلة الميمونة:

التجمع: الثلاثاء

السفر: فجر الاربعاء

العودة: تقريبا الاثنين او الثلاثاء

وممنوع منعا باتا التخلف عن تلك المواعيد والا الرحلة مش هيبقى لها طعم

أنا-----هتوحشينى يا مدونتى العزيزة وهيوحشنى جدا كل اصدقائى اللى عرفتهم عن طريقك خلى بالك منهم كلهم واللى ييجى ترحبى بيه ده بيته هه بلاش بخل وتكسفينى قدام الناس آه خليكى طيبة وأموره كده.

مدونتى----طب ينفع كده تسيبينى ده كده يعنى حوالى 10 ايام طب ما تاخدينى معاكى.

أنا------ما كانش يتعز يا حبيبتشى ما هو لوعندى لاب توب كنت اكيد خدتك معايا خليكى هنا انتى وخلى بالك من نفسك انتى فى قلبى دايما دايما.

اه كمان ابقى نضفى كده متخليييش تراب ولا تاكلى شيكولاته وترمى ورق احسن ازعل واللى جاى بمثاثة هه عارفين نفسكوا يبقى يخلى الورقى فى جيبه محدش يرمى حاجة اه انا بقولكم اهوه.

وبعدين معلش يا مدونتى العزيزة بقى مفيش وقت يا دوبك اوضب البيت قبل ما امشى واحضر الشنط وكده ويارب ما انسى حاجة وآخد الحاجات اللى فى الكشف كلها .

مواااااه يا مدونتى العزيزة تعالى فى حضنى تعالى مواااه.

هو صحيح فرحانه جدا لانى بحب اسكندرية جدا جدا جدا ليها ذكريات طيبة جدا فى قلبى لكن هتوحشونى يا اخواتى واصحابى جدا

معلش هعتبر نفسى مشيت من النهاردة لانى لازم اوضب البيت قبل ما امشى وارتب الشنط وبتاع.

فسلام بقى واقابلكم اكيد اكيد لما نرجع بالسلامة يارب باذن الله .

ملحوظة كمان احنا جدعان قوى ومش هيهون علينا نسيب بابا يعمل كل ده لوحده وان كان حبيبك عسل ما تلهطوش كله ههههههههههههههه

معلش ملحوظة صغننة كمان الاغانى بتاعت المدونة دى اللى مش حاببها ممكن يعملها pause عادى جدا يوقفها واللى نفسها فى غنوة معينة وطلعت حلوة ممكن اضيفها للقائمة ولما تدخل المدونة تختارها وتشغلها عادى فى اكرم من كده بقى انا مش بفرض رايى ولا ذوقى على حد وممكن جدا اللى يعجبنى ميعجبكوش عادى والاختلاف فى الرأى والذوق لا يفسد للود قضية .

كنت عاوزة تقولى ايه يا بت يا ام مازن كنتى عاوزة تقولى ايه .......آه

لا اله الا الله محمد رسول الله

قال رسول الله صلى الله عليه وسلم من قالها اول نهاره لم تصبه مصيبة حتى يمسى ومن قالها اخر نهاره لم تصبه مصيبة حتى يصبح:

(اللهم انت ربى لا اله الا انت عليك توكلت وانت رب العرش العظيم ما شاء الله كان وما لم يشأ لم يكن ولا حول ولا قوة الا بالله العلى العظيم

اعلم ان الله على كل شىء عظيم وان الله احاط بكل شىء علما اللهم انى اعوذ بك من شر نفسى ومن شر كل دابة انت آخذ بناصيتها)

استودعتكم عند من لا تضيع ودائعه استودعتكم عند الله جل وعلا

مع السلامة

عاشت الاسامى

كيف حالكم جميعا يارب تكونوا دائما بخير وصحة وسعادة

اشكركم شكر خاص على مشاركتى فى جميع الاوقات ودعواتكم الطيبة التى اشعرها من القلب فتصل الى القلب مباشرة.

الحمد لله اتبسطنا جدا فى فرح اخويا( عقبى لكم يارب )وكنا فرحانيين جدا وسعداء سعادة غير عادية فهو اخونا الوحيد(الحلوة خوخة جت بعد دوخة)

احنا الحمد لله 3 بنات عسسسسسسسسل:) واخ واحد وحيد ربنا يخليه ويبارك فيه ويطول فى عمره ويوسع فى رزقه يارب

\\\ ستى(ام بابا) زمان كان مش عاجبها ان امى بتجيب بنات (كأن الامر بايدها سبحان الله)ورغم كده كنا بنحبها جدا ولم تهدأ الا لما جه اخويا حبيبى للدنيا ساعتها بس رضيت على امى (هبقى احكيلكم على ستى بعدين اصلها حكاية)\\\

نرجع بقى لموضوعنا أخى الغالى اسمه عمرو عاشت الاسامى يا عموره

اسم عمرو هو :اسم علم تلحق به الواو رفعاً وجراً للتفريق عن عُمَر

ف عمر معناه جمع عُمْرَة : قصد المكان العامر ، والحجّ الأصغر .

اما عمرو فهو مدة الحياة********** ربنا يبارك فى عمرك اخى الصغيير

--------التمرة الجيدة ***********فيك من حلاوة التمر وفيك فوائده على قلوبنا

--------الشجر الطوال********** يارب يا حبيبى دائما فى اعلى المراتب الايمانية

--------المنديل تغطى به الحرة راسها ******ربنا يجعلك ستر وغطا على عروسك يارب

بابا حبيبى شكرا ليك يا غالى على كل حاجة بتعملها معنا جميعا شكرا يا بابا لانك بابا

بابا حبيبى اسمه محسن معنى اسمه واضح كثير الاحسان والاخلاص***** وهو ده بابا

بابا هو ميزان البيت هو الروح الطيبة والعقل والعاطفة مجتمعين كلهم فى انسان واحد(برضه لازم احكيلكم عليه)

احمد زوجى الغالى من الحمد فهو محمود ******وهو فعلا كثير الحمد والشكر لله ربنا يباركله ويكرمه ويعزه.

مازن حبيبى النونو الجميل معنى اسمه سحاب ممطر *****وهو فعلا كان ميلاده خير علينا كلنا

وايضا مشرق الوجه *****و فعلا النظرة لوجهه وعينيه الجميلتين وابتسامته الهادئة حتى شقاوته الجميلة تشرق بها الحياة كلها ليس وجهه فقط.

المسرع والمادح والمتملق واخيرا بيض النمل هههههههههههههه( هو بيتمحلس لى لما يكون عايز حاجة وبيثبتنى جدا بس ساعات كتير مبتثبتش برضه ههههههههههه)
مريم حبيبتى معنى اسمها عابدة الرب ***** بحس فعلا رغم سنها الصغير الا انها تخاف الله وتحبه اتمنى يارب كل ما تكبر تفهم وتبقى احسن ربنا يجعلها يارب فى اعلى المراتب الايمانية آمين.

مقتنعة جدا بان للمرء من اسمه نصيب وزى ما اسلامنا وصانا لازم نحسن اختيار الاسماء لاولادنا .

***********************************عاشت الاسامى واصحاب الاسامى*************************

ماشى الحال

السلام عليكم ورحمة الله وبركاته

ساعات تقوم من النوم

شكلك كده بالظبط

وتقعد تهرش فى ودنك علشان تفوق

وتبقى قرفان كده مش عارف ليه

وتبقى مش طايق تسمع اى صوت

ويبقى عندك استعداد تبقى غلس النهاردة

فتقول ايه طب ما اقوم كده اخد دوش يمكن افوق


وبعدين تصلى وتفطر وتفتح الكمبيوتر علشان تقرا الاخبار

وبعدين الاخبار تسد نفسك وتبقى عايز تطلع لسانك لكل التصريحات

ويبقى نفسك حد يعلقك من كتافك على حبل الغسيل يمكن تنتعش شوية

ويبقى نفسك فى الرضا ده





او فى حضن امك تحس بالامان فيه

او ان حتى تروح تقعد على جزيرة وترتاح شوية

وبعدين تروح تبص على النتيجة علشان تقرا حكمة اليوم

وتلاقى يوم متعلم عليه مع انك اللى مش معلم عليه

وبعدين تفكر مين اللى معلم ع اليوم ده بقى.. ما خلاص لازم تفكرونا

يا نجاتى انفخ البلالين

وتقوم تحضر عصير وتورته وحلويات

وبعدين تقول ايه ده هو مش عارفين يعملوه هما حتى فى اليوم ده انا اللى بعمل برضه يلا الحمد لله برضه انى واقف على رجلى وبعمل

دى علشانى وماتسئلوش باقيتها فين

ودى ليكم

والمصاصات دول فى ناس هتتخانق عليهم دلوقت

وتجيلك حالة انبساط برضه ما هو المفروض يوم سعيد

وبعدين تقول ايه الحمد لله ان السنة دى عدت بخير رغم كل شىء وعقبال اللى فاضل من عمرى

كده بقى عديت الثلاثين عااااااااااااااااا ماهو احنا بنات حواء بيصعب علينا قوى حكاية عديت الثلاثين دى بس برضه ولا يهمنى ثلاثين ولاغيره انا بعيش طفولتى من جديد مع ولادى يعنى انا دلوقتى عندى 7 سنين زى مريم واللا اقولكم 4 زى مازن حبيب ماما بلا 31 بلا بتاع

كل سنة والدنيا كلها بخير وسلام

بناء على دعوة دعاء

نظرا لحالة الاحباط والاكتئاب اللى بنواجهها يوميا وبنحاول نغلبها ونكسرها وبنحاول ننساها ونعمل نفسنا نسيناها

دعاء عملت دعوة كده اننا نفكر فى عشر حاجات بنشكر ربنا عليها طبعا نعم الله لاتحصى ولا تعد بس اللى فهمته منها اننا لو فكرنا فى عشر حاجات بس مش هنحس باى احباط وهنحس اننا مقصرين فى الشكر لله واننا مش شايفين اللى فى ايدينا واد ايه كتير قوى قوى وياريتنا نقدر نوفى حق الشكر لله

دا اللى فهمته يا دعاء واعتقد هو ده قصدك

دعاء العسولة دى ام احمد ونور وزوجة المحترم استاذ ادهم صاحب مدونة مالك الحزين ربنا يوفقهم ويسعدهم فى اولادهم يارب

أذكر10 أشياء في حياتك أنت شاكر لله عليها ولا ترغب بتبديلها لأي شيء اخر؟

نعم الله علينا لا تعد ولا تحصى وان كان لازم ولابد اختار عشر حاجات بس يبقى:

1-انى والحمد لله مسلمة نعمة عسى انى اوفيها قدرها من الشكر والعبادة.

2-انى مصرية بحب مصر جدا ولازلت شايفاها فى مرتبة عالية جدا رغم كل اللى بيحصل.

3-ابى وامى واخوتى بحمد ربنا انهم هما دول مش اى ناس تانية.

4-ولادى نعمة كبيرة وفضل من ربنا عليا.

5-زوجى حب عمرى الغالى.

6-قدرتى على التحمل .

7-الحمد لله الذى عافانا مما ابتلى به غيرنا فاحمد الله على نعمة البصر فأرى ابنائى وتمتع بالنظر لعيونهم الصغننة الجميلة

احمد الله على انى اسمع صوتهم الجميل اللى شبه اصوات الشخصيات الكرتونية واحمد الله على ذراعى الذى يضمهم ويحتضنهم.

8-الحمد لله على انى أم نالت حظا جيدا من التعليم فهيساعدنى كتير قوى فى تربيتهم.

9-احمد ربنا على مدونتى واصدقائى اللى عرفتهم عن طريقها واعتبرهم اصدقائى بالمراسلة وهم اعزاء جدا على قلبى.

10-احمد ربنا على كل لحظة سعيدة مرت عليا وتذكرت شكره فيه وكل لحظة حزينة ثبتنى فيها واجرنى على صبرى عليها وكل لحظة دعوت الله فيها واستجاب دعائى فيها او اجل استجابتها لاجل ولسبب يعلمه وحده.

ربنا لك الحمد والشكر كما ينبغى لجلال وجهك وعظيم سلطانك

الموضوع لينكه ده

http://doaa30.blogspot.com/2009/06/5.html

فكرة حلوة ودعوة كريمة منها ياريت لو اى حد عاوز يعمله بوست عنده يبقى يحط نفس الصورة ولينك موضوعها الاصلى بناء على رغبتها الخاصة.


كان فى سؤال كمان منها ما الذي تتوقع حدوثه بعد 5 سنوات من الآن؟


والله يا دعاء يا اختى هو هيكون ان شاء الله كده بيتهيئلى يعنى


زوجى يا اما اترقى فى شغله يا اما فتح مشروعه الخاص قولى يا رب


مريم هتكون ان شاء الله فى اعدادى وهتكون شاطرة وهتدخل مسابقات رسم وكتابة قصة وهتاخد جوايز كتير


مازن افندى هيكون فى تالته ابتدائى وهيكون مطلع عينى اكتر ماهى طالعة دلوقتى حبيب ماما الصغنن ده


وانا يا ستى هكون لسه بحبهم وبموت فيهم وهيبقى عندى 35 سنة والا باين 36 ويارب افضل حلوة هههاى


بس عارفة ان صحتى هتبقى مش تمام حاسة بكده


الاكيد ان شاء الله وباذن الله انه خير عندى دائما امل فى الله وعمر املى ما خاب الحمد لله

كله بالمناسبة الظريفة دى يمد ايده وياخد واحدة كريز واحدة بس علشان يقضى اصله كيلو واحد ههههههههههههه

مدونتى العزيزة

متزعليش يا مدونتى انى فكرت اقفلك واقفل باب بتنفس منه

متزعليش انى فى لحظة ضيق ضاقت الدنيا فى وجهى

متزعليش انى قلت عليكى ملكيش لزوم

لا ليكى لزوم

انتى مدونة مصرية محترمة

انتى مدونة واحدة أم وست بيت متعلمة وليها دماغ وفكر

صحيح ممكن دماغها تكون على قدها او فكرها مش عالمى

لكن استحملينى شويه مضطرين نبقى مع بعض كمان شويه

مدونتى العزيزة انتى سبب ان بقى لى اصحاب من جديد

حتى ولو كانو على صفحاتك بس

بس فعلا حاسة باحساس الاخوة والطيبة منهم

مش سميناهم سوا اصحاب الحياة وزملاء الكفاح فى الدنيا

بصى يا مدونتى انتى هتبقى زى ما انتى نفس موضوعاتك هى هى

نفس افكارك هى كل كلمة فيكى كان قصدى منها انى افيد واستفيد

يمكن كلمة منى توضح لحد حاجة او كلمة من حد توضح لى حاجة

احنا زى ما احنا قصدنا وجه الله الكريم

علشان كده اللى كان فى خطتنا هنعمله

ونحاول نكون احسن دائما

هنستمر طبعا فى زيارة المدونات المحترمة اللى بنتابعها

وطبعا لو امكن وفى وقت هنزور ناس تانية طيبة برضه

ملناش دعوة بالناس الكخه دول تانى اوعى نقرا عندهم حاجة

شوفتى ابو مازن زعل ازاى وقال بقى ده اسمه كلام

اقرى قرآن واللا كملى كتاب بتقرأيه واللا حتى اقرى قصص اطفال للعيال

شوفتى بقى زعل منى وانتى استخبيتى يا وحشة علشان ميزعلش منك

ماشى ربنا يسامحك

ع العموم متزعليش خلاص خليكى قارفه الناس وعماله لوك لوك لوك

ايه ده مبتتعبيش من الرغى

30 موضوع يا مفتريه فى4 شهور ايه ده رغى رغى رغى

مليتو البلد

ع العموم بما انك بت محترمة قصدى مدونة محترمة

خلاص خليكى

يلا مع السلامة شوفى راحة فين

وانا هروح اشوف العيال واتفرج ع الكارتون معاهم

ومتنسيش دائما قولى حسبى الله ونعم الوكيل

اللهم صلى وسلم وبارك عليك يارسول الله

يارب اللهم اعز الاسلام والمسلمين انت ولى ذلك والقادر عليه

التاج التاج التاج حيرنى التاج التاج

بناء على رغبة نونا صاحبة مدونة بلاش فضايح ومن قبلها غادة صاحبة مدونة قلب ارهقته الاحلام
قررنا نحن مامة مازن اننا نجاوب على التاج والله هو الموفق الى سواء السبيل
امضاء\مامة مازن

س\ اسمك ؟
اسمى رغم معناه الجميل الا ان مامة مازن احلى بكتير

س\ المشهور به وسط اصحابك؟
زمان كانو العيال بيقولولى محسن على اسم بابا
ودلوقتى يا اما ام مريم يا ام مازن يا ام احمد

س\ سنك؟
يا دى الاحراج ليه كده بس ع العموم يلا 30 وامرى الى الله
بس لعلمكم بعد 20 سنة هما 30 برضه اه محدش يحسبلى بأه

س\ اسم مدونتك
حياة بكل ما فيها معنديش غيرها الحمد لله

س\مجال دراستك
ليسانس آداب لغة عربية بس كان نفسى جدا ادرس لغة فرنسية
او لغة انجليزية لكن التنسيق الداخلى للكلية عملها معايا
يلا الحمد لله اللغة العربية لغة القرآن ودرست حاجات عمرى ما كنت هعرفها ابدا
لو مكنتش درستها وحسيت انه حب من ربنا برضه
وسجلت فى دبلومة تربوى بس مكملتش الامتحانات لظروف صحية

س\ الصورة الرمزية لمدونتك بتعبر عن ايه
طبعا واضح انى لسه مليش صورة رمزية
لكن صورة التعريف بتاعتى بتعبر عن حبى الشديد للاطفال انا بعشقهم
وكمان التلاتة الحلوين دول هما بنتى وابنى وبباهم علشان هو كمان بعتبره ابنى الكبير ربنا يخليهم لى

س\هل فكرت فى اغلاق مدونتك

لا لسه بدرى شوية يمكن ابدا عمرى مهقفلها ويمكن يحصل العلم عند الله بس انا نفسى متتقفلش خالص

س\ايه رد فعلك لو حد قل ادبه عليك

لا يقل ادبه ايه يختلف ماشى لكن قلة ادب لا طبعا الغاء فورى

س\اسوأ مدونة

لا مش لدرجة اسوأ هو فى مدونة صاحبتها واضح جدا انها نفسيتها مدمرة ومفيش حد يساعدها ربنا معاها ومحطتهاش عندى رغم انى رديت عليها وحاولت اشجعها لان اى حد هيقراها هيجيلو اكتئاب زى ما حصلى

وفى مدونة تانية لما دخلتها قولت اللهم اعز الاسلام والمسلمين واكفينا شر الفتن يا رب

س\ هيحصل ايه للا يميل لما تموت

هسيبه للورثه هينفعهم عليه ايميلات اخواتى وزوجى وعليه اشتراكات فى مواقع تهتم بشئون البيت والحياة حلو يعنى هيفيدهم اكيد

س\ اديت الباس ووردبتاعتك لحد

طبعا لزوجى وميرو حبيبتى

س\السفر بالنسبة لك

تغيير اعادة شحن طاقة فرحه

بس الفرحة مش هتكمل من غير دوا الغثيان عندى دوار من المواصلات

ونفسى فى رحلة حج انا وزوجى وكل من احبه نكون سوا كلنا ويتقبلها مننا ربنا

س\المود بتاعك

كنت زمان ايام الدلع فى بيت بابا كنت متسرعة وعندى شوية عصبية دى حقيقة

لكن المسئولية بعد الجواز عملت منى انسان احسن غيرتنى كتير بقيت افكر فى الكلام قبل ما اقوله علشان ميبقاش غلط لانه هياثر على ولادى وبيتى و كمان اخاف ازعل ابو العيال برتب افكارى ودماغى ولو هحس بضيق باستغفر واستعيذ بالله من الشيطان الرجيم

س\بتعمل ايه فى وقت فراغك

بلعب مع ولادى بحب اخليهم يضحكو الذ حاجة فى الدنيا ضحكتهم

وكمان بحب اشتغل حاجات بايدى اعمل حاجة من ولا حاجة يعنى شوية خيط ممكن يبقو شنطة او بوك وممكن يبقى بلوفر وممكن يبقو جراب موبايل وكده يعنى

س\الاكلة المفضلة لك

بحب الباشميل علشان ميرو بتحبه واحب صينية الفراخ علشان ميزو بيحبها واحب المحشى علشان بباهم بيحبه اما بالنسبه لى فساندوتش جبن رومى مع كوب شاى هو المزاج الكبير

س\الصفات التى ورثتها عن والدك

بابا ربنا يخليه طيب جدا بس اهم صفة خدتها منه انه مش بيدى حكم على الناس من اول مرة بيديهم فرصة وعشرة وميه انا بقى علشان مش طيبة زيه بديهم عشرة بس لحد ما يثبت ان كانو كده و الللا كده

س\الصفات التى ورثتها عن والدتك

اه ماما نبع الحنان

ورثت عنها التصميم على النجاح فى الحياة مع التوكل على الله

طول عمرها تحب تنجح فى حياتها وفى تربيتها لنا

نفسى قوى انجح انا كمان فى حياتى نفسى اسيب الدنيا وانا حاسة ان ولادى هيقدرو عليها نفسى اعرف اربيهم نفسى اسيبهم على راى ونيس اب عظيم وام فاضلةيارب استجب دعائى

س\اكتر ست حاجات بتكرهها

اه بكره قلة التربية اللى يقصر فى تربية اولاده وتوجيههم للخطا والصواب

بكره المرض وبخاف جدا على ولادى لما بيتعبو وببقى نفسى اخد تعبهم ده احطه فى عينى ولا يتعبو ابدا وبحس بالضعف وبلجا للدعاء لله لهم بالشفاء هما وابناء المسلمين لان الشافى هو الله الدواء والطبيب مجرد سبب ناخد به لكن الشفاء من عند الله

بكره اللى بيدعى الفقر احنا مش عايزين نعرف عنك حاجة بس كمان متقعدش تشتكى وخلاص وعمرك ما تقول الحمد لله الناس دى بيضايقونى جدا

بكره اللى يكره اسلامى ويقول عنى ارهابى بس علشان مسلم

بكره اللى يعيب فى بلدى وخاصة لما تيجى من اخوك يعنى من بلد عربى تانى يعنى على راى المثل:

انا ادعى على ولدى واكره اللى يقول آمين

بكره اى سياسة تظلم الضعيف وتقوى المفترى

وشعبولا باشا قالها انا بكره اسرائيل واقولها لو اتسئل ان شاالله اموت قتيل او اخش المعتقل وايييييييه مش هنراجعه فى دى

اكتر ست حاجات بتحبهم

بحبك قوى يارب نعمك علينا كتير وعسى ان نكون من الشاكرين ويا رب اختم بالصالحات اعمالنا

بحبك يا رسول الله يا خير البشر يا خاتم الانبياء والمرسلين سيرتك وحياتك وكلامك دروس لنا ومتزعلش منى يا رسول الله انى مقدرتش ادافع عنك لما مسو طرف توبك لكن ليك ولينا رب اسمه المنتقم الجبار اللهم صلى وسلم وبارك عليك يا سيدى يا رسول الله

بحب احمد زوجى جدا افتكرت ان صفاته هى صفات فارس الاحلام لكن كل يوم اتاكد ان فارس الاحلام ده ولاحاجة جمب اخلاقه ودينه وحبه لنا

بحب مريم ومازن فوق حدود الوصف هما نور عينى وضيها هما قلبى ونبضه هما حياتى نعمة كبيرة انعم الله عليا بها وامانة غالية يارب اوفيها حقها

يارب متحرمش حد من النعمة دى

بحب جدا عائلتى كلها و وخاصة اخواتى واخت زوجى علشان هما دول اصحابى المخلصين

بحب السلام ونفسى اشوفه قبل ما اموت و بحب الاخبار الحلوة

شخصيتك نوعها ايه

راضية شخصية راضية راضية بحياتى والحمد لله واقل كلمة تفرحنى وتطيب خاطرى

بس رغم كده عندى طموح كبير ان بكره يبقى احسن

لماذا دخلت عالم التدوين

لا اخفيكم سرا دخلته تجربة لكن عجبنى قوى التدوين لانه طريقة للتواصل مع ابناء بلدى

بصراحة الناس ماشاء الله عقليات حلوة قوى ربنا يعز مصر بيهم وباولادهم ان شاء الله

اجمل كلمة قيلت فى مدونتك

قولو انتم بقى انا عن رايى عجبنى اللى قالو عنها بسيطة انا احب البساطة

اهمية التعليق بالنسبة لك

التعليقات دى مفيدة جدا بتلفت نظرى لحاجات، بتوضح راى، بتنمى المحبة بين الناس

بصراحة بينى وبين نفسى عملتكم اصحاب الحياة وزملاء الكفاح فى الدنيا

احسن بوست كتبته ؟ليه؟

هما 25 كلهم بحبهم لانهم بنات افكارى واسيب الرد لكم

افضل بوست قراته وافضل مدونة

كل المدونات اللى بعلق فيها فى رايي مهمة وكل واحدة ليها طعم باختلاف شخصية صاحبها

بصراحة التفضيل يظلم ميزودش ميزة

الانترنت بالنسبة لك ايه

العالم عند اطراف اصابعك ممكن يبقى خير كبير وممكن يبقى شر اكبر

بالنسبة لى هو فائدة بتعلم عن طريقه كل يوم حاجة جديدة

تمرر التاج لمين

ايه خلاص كده طب الحمد لله

امرره لبيسو بسنت وام البنات وندا المجتهدة و د \نهى تاثير الفراشة

وكل حد عايز يعرفنا عليه شوية صغننه كده

انا عارفة طبعا انى رغايه وقرفتكو بس معلش بقى نونا وغادة بقى مرضتش ازعلهم

بعتذر مرة تانية للاطالة دمتم جميعا بسعادة

معلش اعذرونى الخط بتاع التاج مش عارفة ماله كده

مدونتى العزيزة

مدونتى الغالية افتقدتك انتى بتسمعينى بتفهمينى بتستحملينى فى ضيقى لما بزورك ببقى مبسوطة حتى لو مفيش حد عارفك كفاية انى عارفة انك بتاعتى.
ساعات احب الحياة واقبل عليها وساعات اشوفها مضايقانى ومعاندانى بس بسامحها علشان تبطل عناد كاننا بنهاود طفل صغير علشان ما نزودش عناده.
بس الحياة بكل ما فيها حلوة مغامرة بنعيشها والشاطر اللى يحليها ناجحة من كل النواحى.
اتمنى اكمل مشوار حياتى بنجاح.

بسم الله الرحمن الرحيم
الصلاة والسلام عليك يا حبيبى يارسول الله
اللهم بارك لنا فيما اعطيتنا
اليوم ابتدى خطوة جديدة اتمنى تكون كلها خير
لا اعرف السبب الاساسى لبدايتى هذه المدونة يمكن استكشاف او تغيير.
على العموم بداية اى شىء جديد بيكون شىء مبهج وانا ارحب باى بهجه.
اليوم هو البداية.