خطة وتمويل وتنفيذ

بسم الله الرحمن الرحيم

************

الاستاذ /على الفرماوى

نائب رئيس شركة مايكروسوفت او بالظبط كما وصف نائب رئيس شركة من ضمن 5 شركات تابعة لمايكرو سوفت تنسق بين الاربعة الباقيين على ما فهمت منه فى احدى البرامج

حقيقة كنت شاهدته على احدى القنوات من فترة وافتكر وقتها انه ادانى تفاؤل كبير جدا وعنده طاقة ايجابية هائلة

من كام يوم والصبح شاهدت اعادات لبرامج كان فيها وبرده كان عندى احساس بتفاؤل برده بس كنت حاسه انه شايف سلبيات كتير بس بيحاول يوصف حل

هو قال ان لازم يكون فى خطة لعمل كذا ورؤية وتوجه عام وتمويل للفكرة دى وتنفيذ جيد ليها

هو قصده هنا اللى فهمته ان مفيش مستحيل ممكن جدا نطلع لقدام ممكن جدا

وفى رايه اللى بحترمه جدا وحاسة انه قال اللى عايزة اقوله وحسيت انى انا اللى بتكلم لما قال

ميهمنيش قوى المقرر الدراسى ايه بالظبط امريكا مفيهاش مقررات قوية لكن يهمنى من المدرسة 3حاجات

1/انها تعلمنى ازاى اتعلم

2/انها تعلمنى ازاى اتعامل مع المجتمع المحيط بيا

3/انها هى السبيل الوحيد لتكوين صداقات قوية تعيش معايا العمر

دى وجهة نظرى تماما ان من المفترض انى اعرف اتعلم ازاى ادور على معلومتى فين هستفيد ايه لما اعرف هذه المعلومة او تلك نفسى اعمل ايه بالعلم ده امنياتى ايه طموحى ايه وده محور حديث طويل ليا مع بنتى من اول ما دخلت المدرسة هى دلوقتى فى سنة 5

فكرته التانية هى موجودة فى الوزارة على الورق افتكر انه السنة اللى فاتت زارت مدرسة بنتى لجنة من الوزارة من القاهرة وطلبوا اجتماع مع عينة عشوائية من اولياء الامور يوم ما وصلوا علشان يضمنوا ان مفيش حاجة مترتبة

افسم بالله افكار الناس دى لو اتطبقت فعليا كانت كل مدرسة هتكون غير كانت كل مدرسة هتكون مؤسسة فعلية

يلا الله المستعان

المهم هذا الرجل شخصية مصرية محترمة ومتفوقة وفى غيره كتير

واجب نسلط الضوء عليهم علشان يكونوا قدوة لولادنا ونحسسهم انك ممكن تكون زيه ويمكن احسن و الله أعلم

كل عام أنتم بخير

العام الدراسى الجديد

بسم الله الرحمن الرحيم

وبه نستعين

كانت اخر جملة انهيت بيها البوست اللى فات هى دى:

(انسان يعنى عقل يعنى ايد يعنى قلب يعنى امل جديد لبلده وللانسانية كلها.)

ياترى وزارة التربية والتعليم استعدت ازاى لاول عام دراسى بعد ثورة 25 يناير

اكيد فى استعدادات

اللى يهمنى هنا بصراحة مش الوزارة فى حد ذاتها

التساؤل هنا ياترى السادة المعلمين والمعلمات ومديرين المدارس والوكلاءو الفراشين و الفنيين والاداريين باختصار جحافل الموظفين الخاصين بكل مدرسة هل عملت كل مدرسة اجتماعات على فترات خلال الاجازة يناقشوا خطة عمل جديدة واسلوب جديد لاستقبال التلاميذ وما ينقص المدرسة وما ينقص التلاميذ ويا ترى فى افكار جديدة للارتقاء بالمستوى الفكرى والاخلاقى للتلاميذ وكل مدرسة حسب المرحلة اللى فيها

ياترى فى حد كان قلبه على الاطفال دول حد فكرلهم حد فكر يخلى ساعاتهم فى المدرسة اجمل ساعات يومهم

حد فكر فى اى حاجة جديدة مفيدة للتلاميذ ولنفسهم حتى كمان

بقالى كام يوم عماله بشوف مظاهرة هنا ومظاهرة هناك تخص المعلمين ده غير مجهوداتهم بعد الثورة برضه فى التظاهرات والذى منه

طلباتهم كلها مادية تقريبا( وعايزين كرامة المعلم) وشيلوا الوزير وهنضرب اول العام الدراسى ووو

اى كلام فى اى كلام

يا جدعان فكروا فى مصلحة البلد شوية بلاش مصلحة البلد مصلحة الطلبةالاهم دلوقتى انسوا نفسكم شوية فى مجلس شعب جاى وفى رئيس جديد باذن الله جاى هنشغلهم ونشغلهم بالطلبات دى

خلينا فى العيال اللى مستقبلهم اللى هو مستقبل البلد بين ايديكم

اللى مزعلنى وقاهرنى ان العيال اللى فى المحيط بتاعى فاكرين انهم هيرجعوا المدارس هيلاقوها حاجة تانية الثورة بقى وكده صلحت كل حاجة واهمها التعليم عموما الدراسة لسه 17/9 اتمنى تكون توقعاتى فى غير محلها وانى اكون بهذى بسبب الصيام

بس بجد اتمنى الدراسة الجاية بداية جديدة لمحاولة اعادة بناء الانسان فى بلدى.

45نطرح منهم18يساوى27

السلام عليكم ورحمة الله وبركاته

-----------------------------

مسألة طرح بسيطة خالص يحلها طفل فى سنة اولى ابتدائى

27مليون مواطن لم يشاركوا فى الاستفتاء رقم كبير قوى ولكل اسبابه الخاصة

بس مادام الرقم الكبير ده شارك وانا شوفت بعينى محدش قالى الاقبال الرهيب اللى محصلش قبل كده

يبقى انا المفروض يتاكد شكى فى ان الارقام اللى قبل كده كلها نخع بالبلدى كده

يعنى اعرف انه اخر انتخابات شارك فيها 17مليون امال الزحمة دى لم نراها ليه قبل كده

عجبى بجد فعلا

انا منتظره الاعلان الدستورى او البيان الدستورى اللى هيقوله المجلس العسكرى وباذن الله واثقة انه خير

ربنا معاكى يا مصر

شارك

شارك

بس هو ده البوست

نعم او لا

مش دى القضية

القضية اننا هنشارك يا بشر

هنشارك بجد

لينا صوت لينا راى لينا قيمة

صوتنا هيفرق صحيح

نعم او لا

قول نعم قول لا

انت وقناعاتك

الجميل اننا هنقول وهنسمع لبعض

الجميل اننا هننزل مطمنين حاسين بالامان

وحاسين بالامانة وان محدش باذن الله هيغير رايى لحسابه

ربنا معانا

خير باذن الله

صوت الحرية بينادى

بلدى الود ودى احضن ترابك بيدى واشيلك جوا عينى اصل انتى غالية عندى

الحمد لله اننا خسرنا

بسم الله الرحمن الرحيم

كيف حالكم جميعا اتمنى تكونوا فى احسن حال وتكون النفسية تمام والاعصاب هادية

دى خريطة الوطن العربى

مصر فى قلب الوطن العربى

ودى خريطة مصر

مصر الحلوة ام الدنيا

يمكن نكون مش مقدرين قيمتها كويس يمكن ساعات بنزعل من حاجات فيها لكن مش معنى ذلك انها تبقى عرضه لكل ده

مصر كبيرة كبيرة قوى وعاليه وناسها احسن ناس طيبة وتحمل واخلاص مصر ياما عملت وصانت كل الدول العربية دى كلها مصر سبب انها اقتصاديا ضعيفة دلوقتى هى الحروب اللى دخلتها علشان كل الدول دى مصر الراقية مصر الجميلة يبقى دى اخرة التعامل معاها ومع ولادها

مصر الحرة الابية يقولوا عليها مصرائيل وانها تساوى اسرائيل واننا خونة كده بعد كل كده تساوونا بالعدو الوحيد لنا كده بعد سعينا للسلام نبقى خونة

ماتش كورة يا ناس يعمل كل ده

حسبنا الله ونعم الوكيل فى كل اللى يمس شعرة من مصرى واللا يشتم مصرى

المصرى جدع وطيب وشهم وقادر على التحمل اصعب المواقف والظروف

ولازم يكون فى تصرف دولى يرد لنا حقنا لازم عقوبة دولية او اى حاجة تهدينا

محدش زعلان ع الماتش عادى فينا من العقل اننا نعرف ان الرياضة غالب ومغلوب اللى مزعلنا اللى حصل وبيحصل ليه هى مصر عملت ايه لكل الناس دى بتكرههوها ليه كده يمكن علشان احسن واكيد احسن فعلشان كده بتكرههوها

ربنا يخليكى يا مصر ويعلى مقامك دائما ويبارك فى شعبك المؤمن يارب

يا جمالك يا اسكندرية

***************السلام عليكم ورحمة الله وبركاته**************

كيف حالكم جميعا صحبة الخير اتمنى من الله ان تكونوا جميعا بخير وصحة وسعادة
اشكركم جدا كلكم طبعا على كلماتكم الطيبة وتواصلكم الكريم معى بارك الله فيكم جميعا


طبعا بقى عايزين تعرفوا الرحلة وتفاصيلها وكده
طيب نبتدى من فجرالاربعاء لان طبعا مفيش نوم الاطفال ناموا والكبار هما اللى فضلوا صاحيين تقريبا منتظرين الرحلة اكتر من العيال الصغيرة هههههههههههههههه
الرحلة مكانتش كاملة السنة دى لان اهم ركن فيها كان غير موجود وهى امى العزيزة لان ظروف عملها لم تسمح لانها خلصت الاجازات كلها ايام فرح اخويا معلش تتعوض ان شاء الله وكمان اختى الوسطى مكانتش معانا ، لو كان فى عمرنا بقية اكيد هنتجمع السنة الجاية ان شاء الله.
اولا كده كنا عندنا حماس غير عادى قتل الحماس ده ايه حزروا فزروا ؟؟؟؟؟
هه ايه فكروا......خلاص مش عار فين طيب

الاوتوبيس عطل هههههههههههه مش مرة ولا اتنين لا ابدا تلاتة ههههههههههههه وفى الاخر جابولنا غيره
واصبحت الرحلة اللى بنوصلها فى ساعتين ونص تلاته خدت اكتر من 5 ساعات هههههههههههههه
هم يبكى وهم يضحك وبعدين ايه بعد ده كله لقينا الشقق اللى حجزناها على غير المستوى المعتاد خالص low
low يعنى بس ولا همنا حاولنا نبسط الاولاد على قد ما نقدر .
وكانت مفاجأة جميلة ان اخويا وعروسته انضموا لنا تانى يوم عملوا جو ظريف برضه
واختى التانية انضموا على رابع يوم فجأة الساعة 12 بالليل لقينا الموبايل بيرن :ايوه اهلا
ازيكم وحشتونا
وانتوا كمان والله
انتوا بتعملوا ايه
بنتعشى تعالوا كلوا معانا
طب استنوا بقى احنا فى الطريق
انهو طريق
شارع خالد يا بنتى
خالد مين
خالد بن الوليد هههههههه
يا ليلتكوا بيضه يا مجانين ههههههههههه
طيب يلا فى انتظاركم

عموما يعنى هى مكانتش زى كل سنة علشان ماما مكانتش معانا بس حاولنا نعمل ذكريات حلوة .
المهم شوفوا الصور دى بكاميرا موبايل هى مش واضحة قوى بس حلوة برضه.

آخر صورة دى عند بير مسعود تقريبا بيعملوا حاجة جديدة واللودر الاصفر الجميل ظهر معانا يلا مش اشكال.

أعشق حاجة اسمها اسكندرية بجد كل ذكرياتنا فيها حلوة بنرمى كل همومنا فى بحرها بنستنى نروحها نجدد نشاط ونشحن طاقة .

ليا رأى صغنن كده ان اسكندرية محتاجة مننا محافظة عليها محتاجة دعم مادى قوى محتاجة دعاية سياحية اكتر .

اسكندرية عايزة فلوس تتجمل بيها وتتزين وتمشى كل حاجة فيها زى الساعة واتفرجوا بقى على الجمال اللى ممكن يظهر منها اكتر بكتير من كده.

مصر كلها حلوة بجد اتفرج من شباك عربيتك أو اتوبيسك العطلان أو اتفرج من شباك القطار المخلع

هتلاقى جمال وجمال على جمال لكن محتاج تنظيم ،محتاج حفاظ، محتاج تمويل، محتاج وعى.

مصرنا جميلة جدا جدا لا تقل عن اى بلد فى جمالها لكن عيبها الاهمال وعلى رأى المثل (بيت المهمل يخرب قبل بيت الظالم) دى حقيقة اكيد

حبيبتى الاسكندرية اشكرك جدا على انك بتستضيفى الناس دى كلها وبتستحملى الناس دى كلها كتر خيرك يابلد(بس نفسى اعرف لما كل دول المصيفين امال اهل اسكندرية فين؟!!! ههههههههههه)

اللا قولولى

اللا صحيح قولولى اخبار توشكى ايه

توشكى الحلم توشكى الامل

يعنى وصلنا لايه

فشل واللا نجاح

الفلوس اللى اتصرفت جابت نتيجة



المفروض ان المشروع ده هيوفر فرص عمل كتير

والمفروض انه هيساعد على سد الفجوة الغذائية

وانه كمان هيبقى فى تصدير منتجات غذائية منه

وانه هيشجع على تعمير واسكان المكان ده فسيقل الضغط البشرى على وادى ودلتا النيل


هو بصراحة انا بقعد اقرأ وبحس بجهل وان زى ما يكون حد عايزنى اتوه
يعنى فلحنا واللا ايه
مش باين حاجة يقولك فى موقع وزارة الموارد المائية والرى ان المشروع ابتدى يؤتى ثماره
وان فى اكتر من 7 الاف و800 عامل شغالين و ان فى فعلا فواكه وخضروات وحاجات حلوة طلعت
طب ما احنا شوفنا الكلام ده زمان على التلفاز بامارة الوليد بن طلال لما كان ماشى جنب الريس
طب يعنى ايه اللى حصل كله تمام وميه ميه واللا ايه

طب ليه مفيش تقرير صريح من الجهة المسئولة تقولنا احنا وصلنا لفين

طب مشروعات الشباب لاستصلاح الاراضى عاملة ايه

طب مشروع تنمية سيناء عامل ايه

طب انتو قارفينا بانفلونزا الطيور والخنازير ومواجهة الارهاب والعلاقات الدولية وووووووو

حاجات كتير حاشيين حياتنا بيها وناسيين اخبار بلدنا احنا ايه

زمان كنت بحلم اعيش فى سيناء آه والله كان نفسى جدا يبقى عندى ارض هناك اعيش فيها

كان نفسى يبقى زى فكرة مزرعة.. البيت وسط الارض واربى معزة ويبقى عندى جاموسة

كان نفسى تبقى عيشة فل، ولادى فى المدرسة القريبة، مستشفى قريبة ،وزوجى يشتغل فى الارض دى

كان نفسى تبقى ارضى جنب ارض اخويا جنب ارض ناس تانية طيبة وبتشقى علشان حياة افضل

لكن فشل بعض المشروعات دى فى اماكن تانية سنه ورا سنه خوفنى
يمكن ميكونش الفشل منهم وده الاكيد
يعنى لما يبقى مفيش خدمات تساعدهم وفى نفس الوقت عليهم ديون يبقى النجاح بتقدير البشر العادى ضعيف جدا



طب يعنى مفيش صراحة ليه مفيش حد يقولنا الصراحة ليه مفيش متحدث رسمى زى اى بلد محترم باسم وزارة الزراعة او وزارة الرى او وزارة اى حاجة ليها علاقة بالموضوع

طب يعنى مستقبل العيال ولادنا شكله ايه
حد يفهمنى لما احنا رقعة الارض الزراعية بتقل والناس بتكتر ومفيش بديل
ولما صرفنا مليارات على مشروع مش باين له اى نتيجة يبقى ايه العمل

بيضحكو علينا وبيقولو الشباب مش عايز يشتغل وعايز يقعد ع القهوة يستنى التعيين
الاغنية دى موضتها بطلت بطلوها انتو كمان بقى
لو فى صخر هيفحتوه ويجيب دخل هيعملو كده بس مش تقولو دخل قليل واللا ملوش تأمين لو حصلوا حاجة بالسلامة نشوف غيره
طمنه على نفسه واديله تمن تعبه وشوفه هيعمل ايه اديله سكن وقوله اتجوز هنا جنب المشروع
قوله مواصلاتك موجوده لو حبيت تشوف اهلك
مدرسة ابنك هنا ومدرسينه جاهزين
قوله المستشفى هنا وفيها علاجك موجود ومتوفر

قوله اتعب فى الارض وهتلاقى نتيجة تعبك قوله احنا مقدرينك مش مستخفين بيك
قوله اعرق فى الارض دى عرقك هيطلع خير
قوله انت ابنى مش هبهدلك بس اتعب علشانى شوية علشان نفسك علشان اخواتك

ياترى ياولادى مصر هيكون شكلها ايه لما تكونوا فى سن الشباب
ياترى يا مازن هيبقى كلك امل واللا هيبقى عندك احباط
يا ترى يا مريم هتقدرى تحققى حلمك واللا يا بنتى هتبقى برضه مثلنا دلوقتى

يارب يا حنان يا منان اصلح حالنا وحال ولادى وحال كل مسلم وكل من عاش تحت سماكى يا مصر

رجل من أغلى الرجال

احببته منذ أول مرة رايته فيها

شعرت فى كلماته بالصدق

ورايت فى ملامحه الحنان

وسمعت فى صوته الطيبة

لمست فى نظارته حب العمل

وتابعت بعينى دخان سجائره فوجدت حزنا

ولاننى كنت اعلم سر حزنه

ازددت احتراما له

وبمرور الايام ازددت حبا له وتعلقا به



كنت احس معه بجمال سنين شبابه

ورحلة كفاحه فى الحياة

شعرت منه بمعنى الوفاء والاخلاص

علمنى معنى الصبر والتأنى

شعرت انه من باب التكريم له
ان اذكره هنا فى مدونتى
فهى الان من احب الاماكن لقلبى



هو ليس سياسيا ولا اديبا ولا شاعرا

وهو ليس زوجى ولا هو اخى ولا هو ابى



انه والد زوجى رحمة الله عليه

حماى العزيز الغالى

توفاه الله منذ سنتين وثلاثة اشهر

حزن عليه كل من يعرفه رجال ونساء

شباب واطفال

لا يمر يوم حتى الان دون ان نتذكره

ونترحم عليه نذكر له كلمة طيبة او نكتة اضحكتنا



كان رجلا بكل ما قد تحمله الكلمة من معنى

كان مؤمنا صحيح الايمان

كان طيب القلب وعطوفا

كان كريما جدا

كان المرض متمكنا منه لكنه لم ييأس يوم

كان يعود المريض وهو نفسه مريض

كان يتبع الجنائز وهو لا يقوى على السير

كان يصوم وله رخصة الافطار



اخر ايامه كنا نقوم الليل على صوته وهو يقرأ كتاب الله العزيز

وفى صوته وضوحا وتفسيرا وقوة كابن الثلاثين من عمره

لم يتزوج بعد وفاة زوجته وقد كان فى الخامسة والاربعين او اصغر قليلا

وكان معه من الاولاد ثلاثة على حد قوله(لا هما رجاله ولاهما عيال)

سن حرجة تحمل مشقتها وحده

اخر يوم له على هذه الدنيا حدثنى عن زوجته بانها كانت فى عينه اجمل النساء

واكثرهن اهتماما بعملها وبيتها وكانه يمنى نفسه بلقياها

وكأن نفسه تحدثه بأن لقائه بها قريب



اكتشفت بعد وفاته بأنه قد ذكرنى بكل خير فى كل بيت دخله

وان كل الاقارب يعرفوننى تمام العلم

وكانت نساؤهم تحضننى بكل قوة وتقول كان يحبك فاحببناكى واحببنا اطفالك



كيف لا احبه واعامله بكل ود فهو والد زوجى من رباه وجعله رجل فخر لكل الرجال

كيف لا احبه وهو بمنزلة الاب لى أأرضى لابى ان تعامله زوجة اخى معاملة غير انسانية

أأرضى لابى ان يكون وحيدا لايجد من يؤنس وحدته

أأرضى لابى غير الحب والحنان



أسال نفسى كيف تعامل بعض النساء اهل ازواجهن بفتور وجفاء
كيف تضعين الحدود والمسافات حتى من قبل ان تعرفيهم
اترضين ان يهملك ابنك ولا يسأل عنك بعد كبره وزواجه
كيف ان وجدت من زوجها تقصير ناحية اهله لا تذكره بحقهم عليه

أسأل نفسى وأتعجب

وأسأل المولى عز وجل أن يجعل اولادى من الذرية الصالحة
وان يجعل فى قلبهم الرحمة والحنان
كما كان فى قلب جدهم لوالديه
واباهم لوالديه
وكما افعل انا مع والدى بارك الله لهما

اللهم لاتجعل لى يوم على ارض هذه الدنيا اشعر فيه بغير ذلك
اللهم استجب دعائى

داليا مجاهد

حاجة فرحتنى جدا جدا
داليا مجاهد اول مسلمة عربية مصرية الاصل محجبة فى البيت الابيض
عينها الرئيس الامريكى اوباما ضمن المجلس الاستشارى الخاص بالأديان
ويضم 25 ممثل من اديان وطوائف دينية وشخصيات علمانية
ويكفى ان تكتب اسمها على جوجل لتقرأ وتعرف عنها كل ما تريد
سيعلق الكثيرون امال عليها ولكنا لن نطالبها بما هو اكبر منها
لن نطالبها بتغيير ما ليس لها دخل فيه هى فقط ستكون سفيرة لنا
هناك فى البيت الابيض
لربما ستتغير نظرة الغرب للمرأة العربية والعرب عموما
وجائز ان تتغير نظرتهم للحجاب
وجايز يفهمو حال المسلمين فى غزة
وجايز يفهموا قد ايه بنكره سياستهم
وجايز وجايز وجايز وجايز......

طبعا هى مش عايشه هنا من زماااااااااان

ولكن يكفينا ان اصولها مصرية

ربنا معاها ولا يجعلها سبب الا لكل خير

قال ايمو قال استرجل ياواد انت وهو

شوفو بقى مفيش حاجة تغيظنى وتنرفزنى قد البنت اللى معندهاش حياء
والولد اللى مش راجل كده وجدع ويعتمد عليه

قال ايه فى عيال اسمهم جماعة الايمو
قال العيال دى حزينة ومكتئبة وتميل للحزن
تلبس الاسود تعبير عن الحزن
بيطولو شعرهم من قدام ويدارو عنيهم
يا حلاوه
وقال ايه عددهم بالالاف
وقال ايه بيقطعو ايدهم او وجوههم للخروج من الالم النفسى للالم الجسدى
ركزو معايا
ويميلون للعزلة والبكاء
وقال ايه هما اللى رسمو رسومات وسط البلد
تعبير عن الغضب علشان الامن بيطاردهم
علشان فى مذيع وحش قال عليهم بيعملو حاجات مش كويسه
وهما مش كده خالص دول مسالمين وعايزين يعيشو حياتهم
زى ما هما عايزين دول لسه محتفظين بتعاليم الدين
يا حالولى يا ولاد
وبيقولو احنا كتير ومنتشرين فى كل المحافظات
وانهم مش جماعة لا سياسية ولا دينية
وانهم لا يمثلون اى خطر للامن العام

اف قرفت والله جدا جدا من الحاجات الغريبة اللى بتظهر فى بلدنا دى
قرفت جدا مش دى بلدنا يا جدعان
مش دول ناسها خالص
بلدنا كنا كلنا عايشين فيها لينا اسم واحد مصرى الجنسية
مسلم او مسيحى عادى مش فارقة لان الاخلاق واحدة
الروح واحدة جدعان وطيبين
صفات الشهامة والاحترام هى اللى كانت جامعانا

دلوقتى ازى الحال
الحمد لله فى السراء والضراء

فوقو بقى ايموز ايه
انت راجل عارف يعنى ايه راجل
يعنى انسان محترم اخلاق دين
فين الدين عندك
انت خليت شيطانك يتغلب عليك
المفروض تحاربه وتبقى اقوى منه
فين انت من الحياة بتعمل ايه بتقعد على الكافيه
تبكى حالك
قوم اتلحلح
سيبك من الغم اللى انت عامله ده

المفروض انك فرد منتج والحمد لله سليم معندكش اعاقة
والله ان فى ناس معاقة فاتحة بيوت زى الفل

يا دى المصيبة لو الحرب قامت هتقعد تعيط وتقول اصل انا ايموز

العيال الايموز دول مش عايزين غير اب وام
فين اهاليهم العيال دى
يعنى فين ابوه وفين امه
يادى النيله دا انا خليت الموضوع كبير دول يا دوب كام الف فى وسط ملايين

دا الدكتور احمد زايد دكتور علم الاجتماع وعميد اداب القاهر قال للمصرى اليوم
انهم منتشرين فى العالم كله ووجودهم هنا يدل على اننا مجتمع طبيعى رغم اعتراضنا عليهم
وان مطاردة الامن لهم ستحول الموضوع الى قضية راى عام وستجذب تعاطف الكثيرين
وان رسوماتهم وشعاراتهم من باب الرغبة فى التميزوانهم ينتشرون فى شرائح معينة من المجتمع تتسم بالثراء

يا ناس يا ناس الدين والاخلاق
الترابط الاسرى
الحب
يارب نور بصيرتى وبصيرة اولادى وكل مسلم
وكل من عاش تحت سماكى يا مصر

قال 0900 قال

مش فاهمة خالص حكاية 0900 دى
حل مسابقة اكسب مش عارفة كام
خط الجمال خط الرشاقة
اهو كله عبط وخلاص
ماشى رزق الهبل على المجانين
لكن اللى مش فاهماه خالص بقى
خط لحل المشاكل الزوجية
بسمع اعلانه على الراديو
يعنى ايه بيقولك اى حاجة
هنساعدك فى حلها
طب ازاى
مشاكل الزواج معروفة
يا اما اجتماعية او نفسية او مادية او طبية
طب يعنى ايه اتصل وهتلاقى الحل
يعنى احنا خلاص لا لينا مخ نحل مشاكلنا
ولا اهل ولااصحاب لاحاجة
طب دا احنا مبنرضاش ندخل اهلنا بينا وبنحل مشاكلنا بنفسنا
نقوم نتصل بناس منعرفهمش ولا حتى هما مؤهلين
وليه اصلا نتصل بخط0900

حاجات كتيرقوى جدا خالص غريبة
بتحصل فى الدنيا
من ضمنها0900 بكل انواعه
واغربهم بالنسبة ليا هو
خط المشاكل الزوجية
ماشى يا بنى آدمين

همسة عتاب

زمان كان فى برنامج بيتذاع فى الفترة الصباحية على البرنامج العام اسمه همسة عتاب انا حقيقى مش عارفة لسه بيتذاع واللا ايه انما المهم انه كان بيذيع شكاوى الناس وتوسولاتهم للمسئولين لعل وعسى قلبهم يرق لهذا المواطن المطحون المسكين زى مثلا ارملة اتاخر معاشها واللا واحد مقدم على تليفون من خمس سنين واكتر ولسه مجاش واللا واحد مسافر بره مصر وتجيلى الفاتورة الف جنيه وهكذا
كنت بسمع الحاجات دى وانا صغيرة ويصعبو عليا الناس دول قوى مع انى مكنتش فاهمة ابعاد المشاكل دى.

المهم بقى ايه اللى فكرنى اه هى حاجة مهمة

معنديش مشاكل خالص ان منهج تانية ابتدائى كبير وتقيل على العيال عادى ربنا يسهل والعيال دلوقتى مخهم احسن مننا وهيفهمو وبعدين دى فايدتى بقى وقتى دلوقتى
طبعا انجليزى وحساب وعربى ودين كله ماشى
طيب ايه المشكله فين
المشكلة يا سادة فى المدرسين مع احترامى الشديد جدا دول برده فى سن اهلنا الاحترام واجب
لكن اللى مضايقنى انهم حتى مبيقروش للعيال جدول الضرب بيكتبوا الاجابة على السبورة وخلاص لا قوم يابنى حل المسالة دى ولا اى حاجة وتلاقيهم خايفين العيال يذنقوهم فى مسالة واللاحاجة
مفيش مثلا دورة فى المنهج الجديد اللى كسر الجمود بتاع السنين اللى فاتت لا ابدا
طيب يعنى مخليين الناس اللى خدت دبلوم معلمين زمان خالص لسه فى اماكنهم وآلاف غيرهم خريجين تربية قاعدين ع القهوة واللا شغالين فى حاجة ملهاش علاقة بالتربية والتعليم خالص
طيب يا اما ندى الناس دى دورات ونجدد نشاطهم يا اما كفاية كده ومعاش على 55 ونشوف الشباب التعبان ده اللى كله حماس ونعينه
بجد حرام دى مش همسة عتاب دا عتاب بصوت جهورى ليه دايما اما بنعمل حاجة صح مبتبقاش صح قوى بجد يا ريت نظرة للاجيال الصغيرة اللى طالعة دى
دول اكيد لو كان لسه فى حياة فى الدنيا هما دول المستقبل مينفعش ابدا نهملهم.

كوكب تانى

رفضك يا زمانى يا مكانى يا اوانى انا عايز اعيش فى كوكب تانى
فى عالم تانى فيه لسه امانى فيه الانسان لسه انسان عايش للتانى
عالم طيار ورياحه قوية بتهد كيانى بتكسرفيا من غير مواعيد بتاخدنى بعيد
وده مش بايديا وده مش بايديا

فى سد منيع عالى وفظيع عالى وفظيع بينى وبين نفسى بين روحى ورسمى
بين يومى وامسى واللى اتمنيته وبنيته فى الهوى بيضيع وده مش بايديا وده مش بايديا
مكبوته فى قلبى احلام محصورة وحطام افكار ايتام مبتورة
وامال مطوية بتعافر فيا وكان اوانى كان لسه شويه
وف وسط اناس والزحمة تاه الاحساس والرحمة
ضاع منى سلامى تاه حتى كلامى
ضاق بيا مكانى
كداب يازمانى كداب يازمانى


من احلى ما غنى مدحت صاح سمعناها واحنا اطفال وعلمت فينا وكل ما نكبر نفهمها
زاد فهمنا ليها بمرور الايام
الرحمة تاهت فعلا
لازم نرحم بعض نعذر بعض نراف بحال بعض
لازم نفتكر اننا بشر انسان راقى ومتحضر مش همجى
لازم نراجع نفسنا لازم نعرف فين الغلط
الغلط اننا بعدنا عن تعاليم الدين علشان كده الاخلاق انحدرت
احنا قربنا على جرف كبير لو وصلنا لحافته عليه العوض
لازم لازم نرجع للدين والاصول اللى بيعتبروهم تخلف
زمان فى الافلام لما كانو بيقولو سيادتك وسعيدة ونهارك سعيد
ونينه كنت تحس اننا شعب شيك ومميز
انما دلوقت
يلا مالوش لزوم كلنا عارفين
المهم ولادنا اللى طالعين لازم يكوم عندنا من الوعى والدين والاخلاق والاصول ما يمكننا من تنشئتهم تنشئة سليمة من كل الوجوه
هما دول اكيد اللى هيكونو بيبنو وبيصلحو البلد
ربنا معانا ومعاهم
نرجع بقى للاغنية الرائعة الممتازة من احلى ما غنى المطربين العرب كافة

انا معاه جدا فى كل كلمة قالها
العلم كله غريب ومجنون ولازم نلاقى بر امان ترتاح عليه اشرعة نفوسنا
غنوة لكل زمان
وعمار يا دنيا

هل كده نبقى شعب جاحد

بسم الله الرحمن الرحيم
ربنا لك الحمد والشكر كما ينبغى لجلال وجهك وعظيم سلطانك

بلدى حبيبتى مصر
عندما يولد الانسان تلقائيا ياخذ جنسية وديانة والده
فولدت والحمد لله مسلمة مصرية

وبمرور السنين يعرف الانسان ويتعلم دينه وكذلك يعرف بلده

عرفت بلدى وزادنى شرف انى منها بنت من بناتها

وحمدت ربنا ان ابى وامى مصريين.
مصر غاليتى احبها وادافع عنها لاخر يوم فى عمرى

ولكن عندى سؤال هل ابقى جاحدة لو قولت انى عايزة تغيير
عايزة اشوف وجه جديد فى مقعد الرئاسة
عاوزة حد يساعدنى يكون لاولادى مستقبل احسن منى
انا بصراحة شايفة ان الريس عمل كتير علشان البلد دى
شايفة انه حقق حاجات كتير ما انكرش فعلا عنده وجهة نظر
عمرى ما كنت بفوت خطاب له ابدا
اللى زعلنى بقى مسلسل الانتخابات الرئاسية اللى فات
حرام بجد مين دول مين الناس دى
عمرك عرفتهم قبل كده معرفة اعلاميه مباشرة
كان فيهم الانتيكة القديمة واللى كان واخدها عافية واللى عاوز يرجع مجد قديم
ايه ده مين دول
فين الناس اللى تعبر عنى فين الرجل الاقتصادى فين الرجل السياسى فين
طيب كلنا هنموت مين قدامنا نقول عليه اه
انا احب السيد عمرو موسى لكن ده راجل بتاع سياسة هل هيمشى المركب واللا ايه
وبعدين طب ماهم ممكن يحطوا واحد ويقولك هوده
ياجماعة انا خايفة جدا جدا من اللحظة دى طيب عارفين ان رئيس مجلس الشعب هيمسك مدة 45 يوم لحد ما يمسك حد تانى
ماشى 45 يوم كفاية نعرف مين ده هيقولنا برنامجه ايه هيعمل ايه هيبتدى ب ايه
ولا هو جاهز فعلا دلوقتى ومظبط اموره للحظة دى
طيب ماهو الرئيس الراحل جمال حبيب قلبى رمز الرجولة كان عامل نائب الرئيس السادات رحمة الله عليه والرئيس السادات عامل الريس حسنى مبارك طيب هو مش عامل نائب ليه.
انا والله بس خايفة جدا
خايفة نكون دلوقتى احسن من بكرة وتكون دى الطامة الكبرى
دا انا عايشة على امل ان مستقبل ولادى احسن منا انا وبباهم
على العموم لو عشت وشفت اليوم ده ادينى هعرف ماعشتش ومت الاول اهو بقى ربنا مع ولادى وولاد مصر كلها

حبيبتى مصر
احبك واحب شعبك
صابرين ومستحملين وبالله مؤمنين
نصلى ونصوم ونزكى وبالقليل راضيين
نقول يارب استرنا دنيا ودين
(هذا هو شعاركل مصرى على ما اعتقد اصلنا حاسين ببعض قوى اقصد طبعا عامة الشعب مقصدش غيرهم)
واه يا ليل يا زمن على اللى اتعلمو وخدو الشهادات .
انا بحب بلدى جدا اصل انا شايفاها عالية قوى ناسها طيبين جدا .طبعا هتلاقى ناس ذى اى بلد الاخلاق عندهم مش تمام بس دول نسبة بسيطة بالنسبة للملايين اللى لسة عندهم اخلاق.انا مؤمنة بكده ناس بتقول لا العكس هو الصحيح لكن دى رؤيتى ووجهة نظرى هو صحيح مبقتش ادى امان وبخاف جدا على ولادى بس برضه مؤ منة بقول رسول الله صلى الله عليه وسلم (الخيرفى وفى امتى الى يوم الدين)صدق رسول الله صلى الله عليه وعلى آله و صحبه وسلم.