زمان كان فى برنامج بيتذاع فى الفترة الصباحية على البرنامج العام اسمه همسة عتاب انا حقيقى مش عارفة لسه بيتذاع واللا ايه انما المهم انه كان بيذيع شكاوى الناس وتوسولاتهم للمسئولين لعل وعسى قلبهم يرق لهذا المواطن المطحون المسكين زى مثلا ارملة اتاخر معاشها واللا واحد مقدم على تليفون من خمس سنين واكتر ولسه مجاش واللا واحد مسافر بره مصر وتجيلى الفاتورة الف جنيه وهكذا
كنت بسمع الحاجات دى وانا صغيرة ويصعبو عليا الناس دول قوى مع انى مكنتش فاهمة ابعاد المشاكل دى.
المهم بقى ايه اللى فكرنى اه هى حاجة مهمة
معنديش مشاكل خالص ان منهج تانية ابتدائى كبير وتقيل على العيال عادى ربنا يسهل والعيال دلوقتى مخهم احسن مننا وهيفهمو وبعدين دى فايدتى بقى وقتى دلوقتى
طبعا انجليزى وحساب وعربى ودين كله ماشى
طيب ايه المشكله فين
المشكلة يا سادة فى المدرسين مع احترامى الشديد جدا دول برده فى سن اهلنا الاحترام واجب
لكن اللى مضايقنى انهم حتى مبيقروش للعيال جدول الضرب بيكتبوا الاجابة على السبورة وخلاص لا قوم يابنى حل المسالة دى ولا اى حاجة وتلاقيهم خايفين العيال يذنقوهم فى مسالة واللاحاجة
مفيش مثلا دورة فى المنهج الجديد اللى كسر الجمود بتاع السنين اللى فاتت لا ابدا
طيب يعنى مخليين الناس اللى خدت دبلوم معلمين زمان خالص لسه فى اماكنهم وآلاف غيرهم خريجين تربية قاعدين ع القهوة واللا شغالين فى حاجة ملهاش علاقة بالتربية والتعليم خالص
طيب يا اما ندى الناس دى دورات ونجدد نشاطهم يا اما كفاية كده ومعاش على 55 ونشوف الشباب التعبان ده اللى كله حماس ونعينه
بجد حرام دى مش همسة عتاب دا عتاب بصوت جهورى ليه دايما اما بنعمل حاجة صح مبتبقاش صح قوى بجد يا ريت نظرة للاجيال الصغيرة اللى طالعة دى
دول اكيد لو كان لسه فى حياة فى الدنيا هما دول المستقبل مينفعش ابدا نهملهم.
هناك 8 تعليقات:
هيييه انا أول تعليق :)
والله عندك حق بس مين يسمع ومين ينفذ ...؟؟!!
خلاص بقي الطبيعي إن الشباب قاعدين ع القهاوي
ولما يسرقوا ويشربوا مخدرات أو يهاجروا نلومهم
ياتري من حق مين ساعتها يلوم الشباب ال مش لاقي
مستقبل ؟؟
تحياتي ...
والله ياقلب الواحد تعب من كتر اللغبطة اللى فى البلد بس بلدنا برضه هندافع عنا مهما حصل ملهاش ذنب
اشكرك لاهتمامك
بس اللى هاممنى قوى الولاد الصغيرين احنا مش مهيئين لهم جو تربوى جيد فى المدارس ولا حتى مناخ تعليمى جيد
عمالين بس يطلبو لوح ويلا يا ولاد اعملو نشاط علشان ملف الانجاز ويلا ياولاد امتحان نص الشهر علشان ملف الانجاز وووووووووو
طيب وبعدين فين العلم اللى بياخدوه واللا معتمدين ان العيال بتاخد درس ازاى يعنى هدى بنتى درس من تانيه ابتدائى
انا معنديش مشاكل اشرحلها وبقية الفصل كمان بس الناس دى اللى بتاخد مرتب ومكافاة وكادر اول ومرحلة تانية وغيره هل هما فعلا بيعملو بالفلوس دى
انا مش بحسد والله بس تساؤل بسيط
هم مش واخدين بالهم ان العيال دلوقتى غير عيال زمان
الطفل اللى فى تانية او تالتة ابتدائي يعرف حاجات ميعرفهاش واحد عنده مثلا 40 سنة
مش واخدين بالهم ان الاطفال مش هترتضي بقطتى صغيرة ولا بأن الديك معرفش ماله ومناهج اللغة العربية العقيمة دي
بصراحة انا شوفت مناهج 5 ابتدائي
ورد فعل اخواتى الصغيرين عنها
نفس رد فعلى عنها
يعني احنا الاتنين مستبوخين اوى المناهج والكلام
بيستخفوا بعقولهم اصلا
ده من ناحية المناهج بس
تخيلي بقي من ناحية المدرسين كمان
لما واحد عنده 55 سنة يدرس للاطفال دي
ومفيش اى لغة حوار بينهم
يمكن الشاب الخريج الحديث يبقي عنده قدرة شوية عالتواصل معاهم وعارف المؤثرات اللى عليهم وكدة
لكن العجوز اللى يبقي اكبر من ابوه وامه
هيفهمه ازاى
ربنا يصلح الحال يارب
لان التعليم ده اهم حاجة فى الدنيا
نسيت اقولك انك شرفتيني بزيارتك بجد :)
شكرا شكرا جزيلا لزيارتك
فعلا عندك حق وانا معاكي في كل كلمة
اشكرك ايمان لاهتمامك وربنا يوفقك
إرسال تعليق