براعم

ربنا لك الحمد والشكر كما ينبغى لجلال وجهك وعظيم سلطانك.

احمد الله واشكر فضله ان من على وانعم على من فضله ورزقنى بطفلين هما سبب رغبتى فى الحياة وتمسكى بها.

بحاول اجتهد فى اى شىء يخصهم اى حاجة مهما كانت صغيرة لها اهميتها الكبيرة عندى.

حتى فى متابعتهم لقنوات الاطفال بحاول اكون دائما معاهم واتابع معاهم.

هما بيتفرجو طبعا على التليفزيون بس طبعا مفيش كليبات منيلة بنيلة بتتذاع قدامهم ولا مسلسلات تركى رغم انى مش عارفة محتواها يعنى يتخلله ايه بالظبط بس مبيشوفوهاش وخلاص من باب الاحتياط.

هتقولولى ازاى هو فى اطفال اصلا بيشوفو المسلسلات دى اقولكم من موقعى هذا اينعم فى.

المهم بيتفرجوا على ايه:

1- براعم علشان ميزو بس بتعجبنى انا وميرو جدا. .

2-الجزيرة للاطفال بشجعهم على متابعتها رغم ان فيها مواد صعبة شويةعلى سنهم بس بشجعهم واشرحلهم انا اللى مش مستوعبينه.

3-ام بى سى3 افلامها الكارتونية حلوة رغم وجود بعض المواد اللى فيها عنف طبعا بنقلب علشان ميزو مش ناقص جنان.

4-فى بقى سبيستون ودى فيها اعلانات لعب و حاجات بتتعب العيال نفسيا (عايزين دى وياه دى جميله وياه دى حلوة قوى) فعلشان كده خلاص مبقتش اجيبهالهم يتفرجو عليها العيال حبايبى اجيبلهم الحاجات دى منين وفين وازاى وبكام

ما علينا هما الحمد لله بيرضو بلعبهم والحمد لله.

5- الحقيقة مش متابعين قوى لطيور الجنة رغم ان اخت زوجى بتقول عليها حلوة هنحاول نتابع.

اللى عاوزة اقوله ان حتى الكارتون مينفعش منبقاش متابعينهم فيه

لانه باختصارشديد فيه اخلاقيات مش راضيه عنها

يعنى زى طبعا العنف وان الشخصية الرئيسية لازم تكسب

الحياة مكسب وخسارة وفى حاجة اسمها روح رياضية غايبة عن صناع هذه المواد

وكمان لما بيصورو الملاك والشيطان تلاقى اسئلة الاولاد نازلة زى المطر

وكمان لما تلاقى كارتون قائم على فكرة استدعاء مش عارفة ايه حارس ايه واللا وحش ايه

حاجات غريبة

وفعلا انا ادعم بكل ثقة قناة براعم هى قناة هادفة تعليمية للاولاد من سن 3الى6 سنوات

حقيقى قناة( براعم ) قناة محترمة وجميلة ومعظم ما تعرضه من انتاجها

والباقى منتقى بعناية من شركات انتاج اخرى اجنبية ومدبلج للعربيةويؤكد القائمين عليها عدم رغبتهم او نيتهم فى بث اى اعلانات عليها تفهما منهم لخطورة هذه المواد الاعلانية على الاطفال

قناة براعم من انتاج المؤسسة القطرية للتربية والعلوم وتنمية المجتمع

المهم مينفعش نسيب التليفزيون للولاد من غير ما نعرف بيشوفو ايه بدعوى اننا مشغولين او ماهم ساكتين وخلاص

لا والف لا لازم متابعة حتى وهما بيتفرجو على الكارتون

صراحة عندى احساس بالأمان لقناة براعم من فترة واتمنى تفضل عند حسن ظنى كأم ومشاهد

سؤال من البراءة

الاطفال هما البراءة

ولما البراءة دى تسألك سؤال

لازم ترد رد منطقى لانك فى ردك ده

بتشكل جواه حاجة ولازم تبقى صح

يعنى لو سألك ربنا فين واللا الملائكة فين

واللا ايه الجنة وايه النار

لازم تجاوب اجابه منطقية وصحيحة على قد ما تقدر

ولو سألك ده معمول ازاى لازم برضه تجاوبوه

ولو مش عارف قوله مش عارف بس هقرأ واعرف واقولك

وفعلا تقرا وتعرف وتقوله علشان فعلا بيبقى مستنى الرد

وكمان علشان صورتك ما تتهزش قدامه

انا بقى اتسالت سؤال من بنتى

وكنا وقتها بنشوف اعادة لفيلم احنا بتوع الاوتوبيس

فى فترة بعد الظهر على احدى القنوات

بنتى ماما هوالفيلم ده عن مصر واللا بلد تانية

رديت لا يا حبيبتى دا فيلم مصرى والناس دول ممثلين مصريين

بنتى طب هما بيضربو الراجل ليه وبيعذبوه كدا

دا باين عليه طيب وبيحب بلده وحتى بيقول شعر فيها اهو

طب هو الراجل العجوز ده ضربوه ليه

طب واللى عامل شيخ ده ضربوه ليه كمان

ماما هو الحاجات دى كانت زمان بس واللا بيعملو كده دلوقتى

احوليت طبعا من السؤال

اصلى قولت لباباها غير الفيلم قالى عايز اشوفه

انا كنت عارفة انها هتسئل سؤال زى ده

طب ايه العمل قولتلها

بصى يا حبيبتى مصر احسن بلد وناسها احسن ناس

وبنحبها علشان دى بلدنا وملناش بلد غيرها ومش عايزين بلد غيرها

والحاجات دى كانت زمان وبصيت لزوجى وقولت له مش كده يا بابا(علشان يأكد معايا)

قالها طبعا ياميرو ياعسل

البنت بصت لعنينا وكانها بتدور على تاكيد

يعنى يا بابا اطمن عليك دايما ان مش هيحصلك زى الناس دى(علشان باباها بيركب مواصلات كتير من و الى الشغل)

حضنها وقالها متخافيش يا حبيبتى دايما ادعيلى ربنا يسترها معايا ومع كل الناس

خدت نفس عميق اننا طلعنا من المطب ده

وقدرنا نضحك عليها دلوقتى

بس بعد عشر سنين لو كان الحال هو الحال هينفع نضحك عليها برضه ؟

بنتى حبيبتى

بنتى حبيبتى ميرو

احلى حاجة فى حياتى

شبهى وشبه باباها

يعنى قمر من الاخر

بنت شاطرة فى المدرسة تلميذتى النجيبة

واخلاقها ممتازة مطيعة وهادية

لكن ساعات شعنونة ولذيذة

نور عين ابوها

غاوية قراءة ومبتفوتش عدد للعربى الصغير

بتفكرنا اخر الشهر بعدد الشهر اللى بعده

الحمد لله علمناها الصلاة وبتصلى ربنا يهديها

محافظة على الصلاة من يوم ما علمناها

لقيتها فى يوم جاتلى المطبخ وهى بتعيط

وقالتلى ماما انا حاسة ان ربنا مبيحبنيش وانى هدخل النار

سيبت اللى فى ايدى مخضوضة وسالتها ليه ياحبيبتى بتقولى كده

قالتلى علشان مش ب اصلى

قولتلها يا حبيبتى معلش

اكمنك لسه صغيرة بس احنا مش بنكلمك على الصلاة

رسول الله صلى الله عليه وسلم امرنا نعلم اولادنا عند سبع سنين

وانتى خلاص فاضل شهر وتكمليهم

وعلى العموم يلا بينا تعالى اعرفك الوضوء ازاى

وكمان الصلاة ولما المغرب ياذن نقوم نصلى سوا وزى ما هعمل اعملى

فرحت جدا جداوتغير وجهها الجميل بابتسامة حلوة

وقلت يا رب بارك فيها وابعد عنها الشيطان والحسد

درجاتها ممتازة دايما ويوم ما خدت شهادة التقدير من المدرسة

كنت فرحانة جدا جدا وهى كمان كانت طايرة من السعادة

هى حبيبتى وصديقتى ونور عينى

بتحب اللون الروز جدا لدرجة ان الدنيا كلها روز اللبس

الكراريس و الاقلام

كل حاجة عندها روز بنحاول نغير شوية دلوقتى

بتحب الرسم والالوان جدا

بتحب تكتب قوى ممكن تكتب قصة جميلة اوشوية شعركده

كتبت مثلا زهورى و يا عصفورى

وكتبت قصة شوشو اللطيفة وحاجات كتير حلوة

هى فى تانية ابتدائى دخلت صغار سن

بس غاوية قوى الحاجات دى

طالبة مكافئة الوان ماء لما تنجح فى الترم الثانى

وفى الترم الاول كانت طالبة خرز تعمل عقد وانسيال

جبناهم لها طبعا وكانو على شكل نجوم ملونة

احنا اتفقنا معاها ان كل واحد فى البيت له شغل

بابا شغله برا البيت وانا جوه البيت

وهى المذاكرة ومازن اللعب

ربنا يحميهم لى ويخليهم ليا

انا من غيرهم ولا حاجة

اولادنا

من نعم الله عز وجل نعمة الاولاد يهبها الله لمن يشاء.

اعتقد انه يجب على الانسان( سواء كان الأب أوالأم )ان يكون له رؤية فى كل شىء وخاصة روءيته فى تربية اولاده.

دى حاجة لازم لها استراتيجية لازم نعرف نربى ولادنا واللى ميعرفش يقرأ ،يسأل، يلاحظ، لما يبقى معاك امانة بتحافظ عليها فما بالك بامانة من رب العزة جل شأنه.

مش ممكن نسيب الامور للصدف واهم شىء يكون فى اتفاق بين الام والاب على هذه الاستراتيجية .

تربية الاولاد مسئولية كبيرة جدا جدا لا تتوقف عند الامور المادية الاكل والشرب واللبس لالالالالالا اهمها الامور المعنوية نبتدى نعلم الطفل يعنى ايه غلط يزعل ماما وبابا وغلط يزعل ربنا، يعنى ايه نتعاون، يعنى ايه نظام، يعنى ايه نحافظ على حاجاتنا، يعنى ايه نحافظ على النعمه يعنى ايه ناس معندهاش الاكل ده يعنى ايه نشكر ربنا.

وغيرها كتير المسئولية دى محتاجة أم واعية وأب واعى؛ مش محتاجة فلوس ابدا ياما ناس بسيطة عندها اولاد ما شاء الله فى الاخلاق ؛ومش محتاجة درجة علمية معينه فى ناس مبيعرفوش يكتبو اسمهم واولادهم تبارك الخالق العظيم فى الخلق الحسن .

اهم شىء الوعى ،التيقظ، الحضور، انك تكون موجود فى حياة اولادك متابعهم، معاهم، حاسس بيهم، حنين عليهم.

ربنا يقوينا على المسئولية الكبيرة دى.