الاطفال هما البراءة
ولما البراءة دى تسألك سؤال
لازم ترد رد منطقى لانك فى ردك ده
بتشكل جواه حاجة ولازم تبقى صح
يعنى لو سألك ربنا فين واللا الملائكة فين
واللا ايه الجنة وايه النار
لازم تجاوب اجابه منطقية وصحيحة على قد ما تقدر
ولو سألك ده معمول ازاى لازم برضه تجاوبوه
ولو مش عارف قوله مش عارف بس هقرأ واعرف واقولك
وفعلا تقرا وتعرف وتقوله علشان فعلا بيبقى مستنى الرد
وكمان علشان صورتك ما تتهزش قدامه
انا بقى اتسالت سؤال من بنتى
وكنا وقتها بنشوف اعادة لفيلم احنا بتوع الاوتوبيس
فى فترة بعد الظهر على احدى القنوات
بنتى ماما هوالفيلم ده عن مصر واللا بلد تانية
رديت لا يا حبيبتى دا فيلم مصرى والناس دول ممثلين مصريين
بنتى طب هما بيضربو الراجل ليه وبيعذبوه كدا
دا باين عليه طيب وبيحب بلده وحتى بيقول شعر فيها اهو
طب هو الراجل العجوز ده ضربوه ليه
طب واللى عامل شيخ ده ضربوه ليه كمان
ماما هو الحاجات دى كانت زمان بس واللا بيعملو كده دلوقتى
احوليت طبعا من السؤال
اصلى قولت لباباها غير الفيلم قالى عايز اشوفه
انا كنت عارفة انها هتسئل سؤال زى ده
طب ايه العمل قولتلها
بصى يا حبيبتى مصر احسن بلد وناسها احسن ناس
وبنحبها علشان دى بلدنا وملناش بلد غيرها ومش عايزين بلد غيرها
والحاجات دى كانت زمان وبصيت لزوجى وقولت له مش كده يا بابا(علشان يأكد معايا)
قالها طبعا ياميرو ياعسل
البنت بصت لعنينا وكانها بتدور على تاكيد
يعنى يا بابا اطمن عليك دايما ان مش هيحصلك زى الناس دى(علشان باباها بيركب مواصلات كتير من و الى الشغل)
حضنها وقالها متخافيش يا حبيبتى دايما ادعيلى ربنا يسترها معايا ومع كل الناس
خدت نفس عميق اننا طلعنا من المطب ده
وقدرنا نضحك عليها دلوقتى
بس بعد عشر سنين لو كان الحال هو الحال هينفع نضحك عليها برضه ؟
هناك 18 تعليقًا:
طبعا مش هينفع تضحكى عليها ولو بعد خمس سنين مش عشرة
الحال فى مصر بيسوء كل يوم أكتر من اللى قبله
واحنا النهاردة كدة امال بعد التوريث هنعمل ايه
سترك يارب
شكرا نونا لزيارتك الطيبة دى
وربنا يستر على مصر وولاد مصر
ازيك يامامتي :)
اممممم اولا : أنا مش معاكي بس من غير زعل (:
عشان الاطفال دلوقتي مبقوش زينا واحنا صغيرين زمان
مخهم كبير جداً ومتفتح بطريقة غير عادية
مع كل القنوات والاخبار والافلام والنت ال بيتعرض
عليهم ومكنش متاح لينا فهي اكيد سنتين تلاته
هتفهم كل حاجه وساعتها هتعرف أنكم ضحكتوا
عليها ...؟؟ افرضي ساعتها سألت تاني
وقالتلك امال ياماما ليه انتي يومها قولتيلي
كده ؟؟
رأيي ,, مجرد رأي طبعا
أنك تحكيلها حكايه مبسطه عن الموضوع بشكل عام
وبس :)
معلش بأة اذا كنت تقلت عليكي ياقمر
قلب يا عسل
شكرا ليكى حبيبتى ومفيش اى زعل خالص ابدا
بس دى عندها7سنين وشهرين وكام يوم افهمها ازاى مينفعش خالص لازم تفضل شايفة الدنيا حلوة اكتر وقت ممكن
تحياتى مامة مازن:
لو كان السؤال عن الحال فالحال هايبقى الحال لو احنا فضلنا زى ماحنا و ماغيرناش الوضع هاقولك فى حاجات غصب عنا بس فى حاجات لو بقينا ايجابيين هاتتغير و اكيد لازما و حتما يكون ما ينغص علينا عيشيتنا
هى بنوتك عندها كام سنة؟؟
تحياتى
انا شايفة ان حضرتك صح
على الاقل علشان انتى مسئولة دلوقتي تطلعي جيل
يحب مصر بجد ..ويكون جواه انتماء لارضها
مش جيل طالع يكرها وعايز يسيبها او يسرقها
فهميها ان اي مكان فيه الكويسين والوحشين وهي للازم تكون من الكويسين
ربنا يسترها
اهلا مس رودى منورة يا شيكولاته
اتمنى يا رودى الحال ما يفضلش هو الحال
اختى القمر الساهر ياللى اسمك فكرنى بكاظم الساهر
اشكرك شكرا جزيلا لزيارتك مدونتى المتواضعة
واقتراحك مقبول جدا اشكرك مرة تانية
واهلا بيكى
ازايك يامامة مازن انا معاكي اننا لازم نجاوب علي اسئلة الاطفال لكنهم احيانا بيسألوا اسئلة مش بنعرف نجاوب عليها فطبعا بنزوغ من السؤال وبجد المدونة بتاعتك جمياة جداااااااااا ومضمونها رائع
اهلا ايمان
اشكرك لزيارة مدونتى المتواضعة واتمنى دايما تتابعينى
بجد حاجة فعلا تحير بكرة هيكون شكله ايه
السلام عليكم
موضوع الاسئلة ده مش هاخلص منه طول النهار اده ياماما اده يابابا اصله لسة بيبتدي يفهم الاشياء عنده سنتين ما شاء الله
اما عن بكره هاسيبه يفهم مثلما فهمنا
اشكرك اخ احمد على الزيارة الطيبة دى
واتمنى تكرار الزيارة
ما شاء الله اختى العزيزة ذكرى اسمحى لى اختصره
ربنا يخليهولك وعقبال مايكبر ويبقى راجل كبير وعلى احسن ما يكون
مامة مازن العزيزة
عندي رأي ممكن أقوله؟
أنا لما زوجي بيتفرج عالأفلام دي بابص للأولاد بصة واحدة يفهموا انهم يروحوا غرفتهم وحالا
مينفعش ادمر شخصية الاولاد خاصة في السن داه
متاح لهم الكارتون وبعض الافلام الكوميدية اللي باسمع انها كويسة وخالية من المشاهد المؤذية
هم حيتعقدوا حيتعقدوا كلما يكبروا والحياة في مصر توريهم
طيب ليه اخلي حياتهم قلق وكوابيس وخاصة انها خافت على ابوها زي ما بتقولي
دي صغنتوته قوي يا أم مازن
داه رأيي طبعا ولكي الحرية
بس انا اتبعته مع اخواتهم الكبار و أبويا و "أمي اتبعوه معانا من زمان قوي
والحمدلله
اهلا بيكى ماما نور
نورتى المدونة البسيطة بتاعتى
واشكرك شكرا جزيلا لاهتمامك بالتعليق
وفعلا هذا ما نتبعه مع الاولاد بس حاجة جت غصب عنى
والحمد لله على كل حال
قوليلها دى مصر يا حبيبتى بس متضايقه حبتين، ربنا يفك ضيقتها
بسنت يا مرحبتين والله طولتى الغيبة يا بنية(بالصعيدى)
لا فعلا ماشى يا ستى كده البحر ياخدك مننا كل دى اجازة
ماشى على العموم اشكر اهتمامك بزيارة مدونتى من تانى
وفعلاكلنا بندعى لمصر امنا ربنا يفك ضيقتها
إرسال تعليق