كل عام أنتم بخير

بسم الله الرحمن الرحيم

***********

سنة جديدة

يارب تكون سعيدة *

يا ليتنى كنت ترابا

ياليتنى كنت لا ارى
يا ليتنى كنت لا اسمع
يا ليتنى كنت لا اتكلم


احنا فى هم ما يعلم به الا اللى خلقنا وخلق الكون

هم
هم
هم

يا هم لى رب كبير

الثورة لن تموت

http://thawraneverdie.blogspot.com/

مدونة جديدة تعنى بتوثيق الاحداث من شهود عيان

ياريت اللى عنده مادة يتواصل معهم لنشرها حتى يوثق الشعب بنفسه ويبحث الشعب بنفسه عن الحقيقة

اللهم كن لنا ولا تكن علينا

اللهم آمين

خدنا معاك يا استاذ يوسف

{استاذ يوسف الحسينى كان فى صباح اون اليوم بيقول انا نفسى اروح طرة واضح ان طرة أأمن مكان فى مصر دلوقتى احلى عيشة }

انا حاسيت انه هيبكى
انا فعلا بكيت لما قال كده وقلبى وجعنى جدا

رغم انى شايفه ان توقيت الميدان غلط الا انى مش قادرة ابقى ضدهم كلنا شوفنا بعينا محدش قالنا الناس بتضرب ازاى بتتسحل جثثهم ازاى بتفقأ عينهم ازاى دى طريقة ينفع نتعامل بيها
وافكر ماذا لو كان اخويا مات او فقد نور عينه وماذا لو فقدت زوجى وتيتم اولادى كان هيبقى احساسى ايه
ليه محدش لحق المشكله فى الاول من قبل يوم الجمعة اللى فاتت ومصر كلها عارفة ان المصابين واهالى الشهداء معتصمين طب محدش كلمهم ليه محدش عبرهم ليه
لما انضربوا واتسحلوا الناس ثارت علشانهم ونزلوا تانى الميدان

لو بس يراعوا الآدمية فينا هو ده المطلب الوحيد
احنا مش شوية فراخ بيصطادوهم فى عيونهم
انا فى بنها بعيد عن الميدان حوالى ساعة مواصلات مش بعيد يعنى لكن مينفعش اروح لاسباب كتير مش مجالها دلوقتى
احنا كلمتنا هنقولها فى بنها يوم3يناير لو اتعملت الانتخابات هنورى الاحزاب اللى قرفتنا دى ان كل واحد فينا يفرق قوى وان صوتى مع صوت فلان وفلان ممكن يعمل ايه
انا دورى جاى جاى جاى وسنين اهله سودا اللى هشوفه بيعمل حاجة غلط عند لجنة الانتخاب قف باحترام وادلى بصوتك باحترام ولا تؤثر على حد واللا بالشوز
بالنسبة لمرشحين الرئاسة اصبروا علينا بس احنا الشعب هنعرفكوا شغلكوا يبقى ازاى

دا احنا متغاظين غيظة من بتوع السياسة دخلونا فى دوامات سودة سودة
وادى النتيجة الناس ثارت ثورة ربنا وحدة يعلم نتيجتها ايه
خدوا بالكوا لو اتعمل استفتاء على بقاء المجلس هيطلع بنعم بنسبة كبيييرة جدا المرة دى
الناس خايفة وشايفة المجلس اخر امل ليهم ولو مشى هيتاكلوا علشان كده لو حصل استفتاء لا تتفاجئوا من النتيجة

واخيرا وليس آخرا
الله يخرب بيت اللى مبيقولش الحقيقة
الله ينتقم من اللى بيضلل او بيهول
الله يخرب بيت اللى بيخوفنا او بيخونا
الله ينتقم من اللى عايز يضرنا او يضر بلدنا

يارب

يارب

يارب

الى القائمين على شئون مصر والمصريين

السلام عليكم ورحمة الله وبركاته

تحية طيبة وبعد،

نظرا لما نلاقيه نحن أبناء الشعب المصرى من اهمال وتهميش وتصغير وتجاهل واللعب بمقدراتنا وكأننا لا قيمة لنا ولا وزن ولا حتى احساس

وجب علينا تنبيه سيادتكم الى اننا عكس ذلك تماما

فاننا رجال ونساء قد تعبنا من استهتاركم بنا على كل المستويات

ونخص بالكلام فى خطابنا هذا فى يومنا هذا مسألة عليكم حلها لانها كقنبلة فتيلها مشتعل حاليا وعلى وشك الانفجار

انها مسألة البطالة

من يجد لنا حل فيها ومن يعيننا عليها غيركم يا اولى الامر

من يرد لنا سنوات عمرنا التى اهدرناها فى تعليم لا نفع منه ولا طائل

من يرد لنا أحلامنا التى ضاعت يوما بعد يوم وعاما بعد عام

لماذا تعلنون عن وظائف ونهرول ساعيين للتقديم فيها وتضربوا بنا وبأوراقنا وباحلامنا عرض الحائط

أما كان أكرم لكم ولنا أن تعلنوها أن لا تعيين ولا عقود ولا شىء بدلا عن ان تستهينوا بنا الى هذا الحد

أعتقد فهمتوا محتوى خطابنا هذا

والى خطاب آخر باذن الله نحملكم فيه مسئولية اخرى من مسئولياتكم ونلف حول اعناقكم امانات اخرى ضيعتموها

ولله الامر من قبل ومن بعد

امضاء شابة من شباب مصر العمر بيجرى بيها وحلمها بمستقبل افضل لاولادها بيجرى هو كمان من بين ايديها

هرتلات(2)

الهرتلة جميلة بتعبر فيها عن اللى جواك واللى بيسمعك بيبقى مديلك عذر انك بتهرتل فمبيعلقش قوى ويسيبك تهيس براحتك وممكن فى الآخر يقولك ربنا يصلح الحال ومعلش بقى اصلى محتاج انام بدرى علشان الشغل او اصل ورايا محاضرة دلوقتى او معلش ياااه كنت ناسى مشوار ضرورى معلش مضطر أمشى

بصراحة هو كتر خيره أو كتر خيرها انها سمعت بؤين الهرتلة والتنفيس والتهييس دول

ممكن متلاقيش حد تهرتل معاه هنا بقى وهنا بس ييجى دور البلوجر تهيس براحتك يا معلم وطالما انك مؤدب مبتقولش اى حاجة تستدعى صفارة التشفير اياها تيييييييييت يبقى هيس ومراحب واهلين وهلا وغلا والشاى ع النار

********************************************************************************

الجميل فى الموضوع ان الجهود كلها تضافرت علشان تكره الناس فى نفسها وبعضها

المدهش فى الموضوع ان مفيش جدول زمنى لاى شىء فى البلد دى تصدقوا ان بياع الخضار بيبقى عنده جدول زمنى هيشترى الصنف الفلانى امتى ومنين وفى حدود كام ولو غالى هشترى كذا ولو رخيص هكتر شوية وباذن الله هيخلص على يوم كذا وهجيب غيره يوم كذا ولو ماخلص هدى لفلان يبيع لى وووووهكذا عنده فعلا جدول زمنى

يعنى كله بيبقى واضع خطة معينة 123 طيب خطتنا احنا ايه لو فرضنا جدلا ان الفترة الانتقالية اتمدت لابعد من 2013 ده لانى سمعت انها اتمدت لكده لو فر ضنا انها لحد 2015 طيب جدولنا ايه هنعمل ايه ايه الاولويات هنعمل ايه الاول وايه التانى وهكذا

كنت قبل الثورة حاسة ان الدنيا بتضلم جت الثورة والنور جه النور جه وبعدين ييييييييييه ضلمة وعمالين ندور ع الكشاف مش لاقيينه ولله الحمد

*****************************************************************************

اللذيذ برضه فى الموضوع ان كله عايز يزيد مرتبه حالا بالا والمدرسين البشوات مش عاجبهم ياخى جتكم ستين نيله بقالى 9 سنين بحاول اخد جواب اشتغل مدرسة بالأجر مش عارفة اتكسفوا على دمكوا جاتكوا القرف سورى يا جماعة ان كانت الشتومة دى تستوجب التشفير فاليكم ال تييييييييييت

******************************************************************************

الرائع فى الحكاية ان مدرسين دبلوم المعلمين اللى اتلغى من قرون شغالين وفلة يلا ارزاق هنق بقى هى بلدنا كده مش عايزانا هنخليها تعوزنا بالعافية ناس بطالة صحيح

*******************************************************************************

انتخابات مجلس الشعب الجاية اتوقع واتوقع واتوقع انها هتكون مصيبة سودا وكارثة وصدمة

*******************************************************************************

لما بدخل على مواقع الجرائد واقرأ الخبر واقرأ تعليقات الناس بلاقى الناس عندها كمية فجاجة فى الكلام غير عادية ليه كده ليه الوحاشة دى فى فرق والله العظيم بين الادب وقلة الادب فرق بيّن ليه كده عدم الاحترام ده

ما كل واحد يقول اللى هو عايزه ونحترم نفسنا ونحترم بعض

*******************************************************************************

ليه واحد يقول واحد ملحد كل قطيع الغنم يقول ملحد ايه الغم ده شوفته وهو بيقول انا ملحد

********************************************************************************

عماله اقرأ حفل ماسونيين ونيله هى المشرحه ناقصة قتلة

هو احنا ناقصين طقوس وتعاويذ دا احنا متظبطين

ممكن جدا تحصل بلاوى لو الحفلة دى اتعملت ممكن ممكن واحد مش قابل يحصل كده واللى مش قابلين كتير وانا منهم يعمل حاجة تحصل ازمة تستدعى ضربه بالجزمة علشان خاطر الدبلوماسية وان مصر الحبيبة مزارا سياحيا لكل الناس من كل مكان

سورى بقى نو يا معلم جاميه كده غلط انت دخلت كده فى حته بعيد قوى عن السياحة ومصر هتفضل غالية عليا لا لالا انت دخلت فى حته سودة منقطة بكحلى مزركشة بسوااااااااد أصلى

*********************************************************************************

أسعار ملابس الاطفال ليه عاملة كده ليه بجد ليه الغلو والمغالاة والمبالغة وال... مش عارفة اجيب دلوقتى مرادفات تانية للمعنى

لما الاسعار كده فى بنها امال فى القاهرة عاملة ازاى أف بجد

********************************************************************************

لما اتغيرعدلى حسين محافظ القليوبية اللى فات قولت هييييه هييييييييييييه هيييييييييييه ويل يا ويل ويل يا ويل

وسمعت ان اللى جاى عادل زايد دكتوراة من المريكا شيكا بيكا وراجل جامعى قولت خير يا جودعان اكيد هيكون فى فكر وهيساعد المحافظة وبنها حبيبتى هتبقى أحسن علشان هى تستحق فعلا

لكن فلة يا قلة مش عارفة بصراحة هو عمل ايه أو معملش ايه علشان مكونش كذابة او من مروجى الشائعات

لكن بصراحة احوال بنها مش عجبانى خالص خالص سائقين السوزوكى وهى وسيلة المواصلات الرسمية هنا بيسعروا التوصيلة بمزاجهم اى طريق مشاة مليان بالبائعين الرصيف للبائعين والناس بتمشى فى حضن العربيات عادى

فوضى فى المرور اللى جاى من المخالف عادى مفيش عسكرى حتى مفيش تنظيم رغم ان فى طرق بديلة للكثافة الرهيبة اللى بتحصل وقت خروج الطلبة والموظفين

بنها بصراحة محتاجة صحصحة من مسئولينها شوية بنها مركز تجارى هام فى الدلتا ومركز زراعى وكمان فيها مصانع مهمة جدا دا احنا عندنا جامعة يا جدعان

بنها محتاجة اهتمام بجد

انا فاكرة واحنا عيال كان فى محافظ كل بنها كانت بتحبه كان اسمه عادل الهامى انا مش عارفة توفى الله يرحمه واللا موجود

بس بصراحة هو اللى صلح حال بنها اصلا هو اللى ظبط الطرق والمواصلات والتسعيرة والمخابز

وكان بينزل الاسواق على رجله زى اى مواطن لا تشريفة ولا عربيات ولا غيره يروح المخبز يقف فى الطابور يشوف صاحب المخبز بيتعامل ازاى وعيشه يتاكل واللا لأ وهكذا وكان ثورى فى قراراته كانت مواصلات القرى فظيعة اداهم مهلة 40 يوم يغيروا العربيات دى فورا لتتناسب مع ادمية الناس وغيره وغيره

الناس مازالت فاكراه رغم مرور سنييييييييين كتير علشان كان حاسم وحازم وعادل

يا مسهل يارب

******************************************************************************

رئيس الجمهورية اللى جاى ربنا معاه يوفقه ويهديه لما فيه خير البلاد والعباد

******************************************************************************

مش بهرتل دلوقتى خالص انا بعيدة دلوقتى عن الهرتلة ولكنى أؤيد وبشدة الاستاذ حمدين صباحى لرئاسة الجمهورية

تابعوا مواقفه ومقابلاته التليفزيونية واحاديثه هتلاقوه الاقرب لقلوبكم ليه لانه حاسس بقيمتكم

حاسس بقيمة الانسان فينا القيمة اللى اهدروها سنييييييين طويلة بدعيله ربنا معاه هو هيطلع بينا لقدام لو ربنا اذن مش هيبقى فى جدال كتير وتضييع وقت هتبقى مصر كلها على قلب رجل واحد لانه منهم مصرى وهمه هم البلد والناس مبحسش فى كلامه ان انتخبونى انا وبلاش فلان علشان كخه لا كبير وموزون ربنا معاه

******************************************************************************

البوست ده طويل قوى فممكن تكتفى بتعليق ربنا يصلح الحال زى اخوانا فى اول البوست وتريح نفسك:) ؛)

هتقومى تانى

عارفة انك هتقومى تانى

وقعتى وقعة جامدة واتجرحتى جامد

بس هتقومى تانى

هتلاقى الف والف ايد تتمد وتشيلك يا أمى

هتقومى تانى يا مصر

على قد الاحباط على قد الالم هنعاند ونعاند ولازم تقومى تانى يا مصر

yes we can بعد عمر طويل ان شاء الله

صحيح نقدر

نقدر نعمل حاجات كتيييير قوى

بس مبنعملش ولا حاجة

انشغلنا وشغلونا بحاجات كتير

ناس كتير كرهت الثورة وبتلومها على كل غلط حاصل

الثورة مش غلط الثورة كانت حلم بعيد واتحقق

الثورة ماتت الله يرحمها

اللى احنا فيه دلوقت أزمة سياسية

صحيح نقدر

نقدر نتوافق ونصلح ونحط مصلحة مصر الاول

ونحط مصلحة الفقير الاول

لكن مبنعملش كده

لان المطامع اكبر من مصلحة البلد ومصلحة الناس اللى قامت الثورة فى الاساس علشانهم

هو انا ليه بجمع ليه بحطنا كلنا فى خندق واحد

لاننا فعلا كلنا فى خندق واحد

كلنا اصحاب البلد دى

صحيح نقدر

نقدر نصلح ونبنى ونعمر ونقضى على البطالة

ونقدر نعلى من غير ما نطاطى

لكن مبنعملش كده لان الحكومة حكومة تسيير اعمال حكومة انتقالية ايا كان الاسم بتاعها

ولاننا مش عارفين الحومة الجديدة اللى هتبقى مع ريس جديد ومجلسين جداد نوفى اخر حاجة دى هتبقى امتى

فبيتهيئلى كده احنا هنقعد كمان شهور طويلة مش عارفين نعمل حاجة

اللى هيشلنى شلل اصلى مفاجىء ومش مترتبله كعادة اى شلل بيجى للواحد من كتر ماهو مضغوط

ان الناس قالت نعم علشان على شهر 9 يبقى كله تمام مجلسين متستفين وريس قيمة ماشاء الله وبعدين هنبتدى تانى يوم نرشح بتوع الجمعية التاسيسية ودستور بقى وهنهيص

ولما كنت تقول لواحد قلت لا

يقولك ليه كده بس دى لا دى يعنى هنقعد سنة ونص من غير كل ما سبق ذكره

طب يا حلو اهو فات نصهم اهوه وهيفوت زيهم واحنا محلك سر

فيبقى yes we can بعد عمر طويل ان شاء الله

نعم بالاخضر ولا بالاسود وصوباع فوشيا

مش عارفة ليه حاسة انى شربت مقلب جامد قوى بعد نتيجة الاستفتاء بتاع شهر مارس اللى فات

مش عارفة ليه اعتقدت اعتقاد عبيط ان النتيجة هتكون ب لا هل لانى بعد التدقيق والتفكير وايام معرفتش انام فيها قررت انى ادلى بصوتى واقول لا بعد ما قولت هقول نعم

قلت لا علشان نبتدى من الاول نبنى بلد جديد فنصبر عشر سنين علشان نشوف النتيجة واحنا بنساعد فى بنائها

قلت لا علشان كان فى حاجة غامضة بالنسبة لى وحسيت ان فى توجيه غير مباشر للناس انها تقول نعم وانه هيكون اقصر طريق للحلم

يوم الاستفتاء رحت سعيدة الشمس لسعتنى رغم حجابى الجميل لكن مهمنيش

صوباعى بقى فوشى اللون بس مفركتوش قوى علشان يطلع كنت حاسة كانه حسنة ربانى مينفعش اكرهها

حسيت انه قدر ربنا للبلد دى انها تعلى وتقوم وتبقى عظيمة زى ما بحلم بيها دايما

لقيت دائرة خضرا فيها نعم

وسودا فيها لا

قلت مش مهم سودة سودة بس لو طلعتى انتى النتيجة يا حلوة اؤكد لك هتبقى بيضا(ده كنت بكلم الدايرة) ما علينا

هوب النتيجة طلعت

هوب صدمت صعقت وازبهليت

لكن مش مهم احترمت النتيجة وقلت تمام خلاص يبقى خير باذن الله اتفاق شعبى اهوه بقى

اهم حاجة نتفق ونبقى ايد واحدة فى الظروف اللى ما يعلم بيها الا ربنا وحده سبحانه وتعالى

هووووووووب كل الاختلاف الممكن حصل

اللى كنت مش متخيلاه حصل

وهووووووووب دخلنا فى دوامات

وهوووووووب احنا فى اخر سبتمبر يعنى بعدها ب6 شهور ولسه بنظبط قانون الانتخاب

تقوم ماسك نفسك وتقول هوووووووووووووووووووب

علشان الهوووووووووووب متخليش الدمعة تفر

خطة وتمويل وتنفيذ

بسم الله الرحمن الرحيم

************

الاستاذ /على الفرماوى

نائب رئيس شركة مايكروسوفت او بالظبط كما وصف نائب رئيس شركة من ضمن 5 شركات تابعة لمايكرو سوفت تنسق بين الاربعة الباقيين على ما فهمت منه فى احدى البرامج

حقيقة كنت شاهدته على احدى القنوات من فترة وافتكر وقتها انه ادانى تفاؤل كبير جدا وعنده طاقة ايجابية هائلة

من كام يوم والصبح شاهدت اعادات لبرامج كان فيها وبرده كان عندى احساس بتفاؤل برده بس كنت حاسه انه شايف سلبيات كتير بس بيحاول يوصف حل

هو قال ان لازم يكون فى خطة لعمل كذا ورؤية وتوجه عام وتمويل للفكرة دى وتنفيذ جيد ليها

هو قصده هنا اللى فهمته ان مفيش مستحيل ممكن جدا نطلع لقدام ممكن جدا

وفى رايه اللى بحترمه جدا وحاسة انه قال اللى عايزة اقوله وحسيت انى انا اللى بتكلم لما قال

ميهمنيش قوى المقرر الدراسى ايه بالظبط امريكا مفيهاش مقررات قوية لكن يهمنى من المدرسة 3حاجات

1/انها تعلمنى ازاى اتعلم

2/انها تعلمنى ازاى اتعامل مع المجتمع المحيط بيا

3/انها هى السبيل الوحيد لتكوين صداقات قوية تعيش معايا العمر

دى وجهة نظرى تماما ان من المفترض انى اعرف اتعلم ازاى ادور على معلومتى فين هستفيد ايه لما اعرف هذه المعلومة او تلك نفسى اعمل ايه بالعلم ده امنياتى ايه طموحى ايه وده محور حديث طويل ليا مع بنتى من اول ما دخلت المدرسة هى دلوقتى فى سنة 5

فكرته التانية هى موجودة فى الوزارة على الورق افتكر انه السنة اللى فاتت زارت مدرسة بنتى لجنة من الوزارة من القاهرة وطلبوا اجتماع مع عينة عشوائية من اولياء الامور يوم ما وصلوا علشان يضمنوا ان مفيش حاجة مترتبة

افسم بالله افكار الناس دى لو اتطبقت فعليا كانت كل مدرسة هتكون غير كانت كل مدرسة هتكون مؤسسة فعلية

يلا الله المستعان

المهم هذا الرجل شخصية مصرية محترمة ومتفوقة وفى غيره كتير

واجب نسلط الضوء عليهم علشان يكونوا قدوة لولادنا ونحسسهم انك ممكن تكون زيه ويمكن احسن و الله أعلم

نورت مصر

السيد / رجب طيب اردوغان

مرحبا بيك فى مصر

حقيقى من كل قلبى اهلا وسهلا بحضرتك ونورتنا فعلا .

هرتلات (1)

• يوم الجمعة اللى فات واللى حصل فيه من مشاكل خلانى أتاكد ان فى نسبة كبيرة بينا عندها جهل بقيمة الوطنوخلانى اتاكد ان البلطجة مش انك تمسك سكينة واللا تشرب بلاوى لا البلطجة الفكرية لا تقل خطورة وان اللى قالوا ان فى ناس مش فاهمة يعنى ايه ديمقراطية وانها كلمة ليها معنى تانى مختلف تماما ولا علاقة لها بالبجاحة وقلة الادب دول شافوا المستقبل
• ***************************************************************************
• اتاكدت اكتر ان الامل بقى قليل قوى وان الشمعة دى فى هوا كتير حواليها واننا لو ما اتلفيناش حوالين الشمعة عمرها ما هتتحول لشعلة وفى نفس الوقت هتطفى خالص
• ***************************************************************************
• بصراحة انا بيعجبنى قوى فكرة الحكم بقضاء عدد ساعات كذا فى خدمة المجتمع ودى فكرة كلنا عارفينها عن بلد زى الولايات المتحدة
• والفكرة اللى كانت عجبانى برضه فى فيلم احمد حلمى لما راح لم العيال الصايعين ووداهم الصحرا زرعوها
• اللى عاجبنى من دول بقى ودى فكرة انتقامية بالنسبة لى ان العيال دى كلها تتلم وتتاخد على اقرب صحر ويفضلوا يفحتوا فيها لما يبان لهم اصحاب ويتاخدوا هما كمان يفحتوا فى نفس الحتة هل هيزرعوا هيطلعوا ميه هيطلعوا بترول مش مهم المهم تطلع عنيهم علشان يحترموا الورقة المرمية فى الشارع مش يخربوا عربيات الناس وممتلكات البلد
• ****************************************************************************
• فكرة انى عايزة اشتغل فكرة ما راحتش من بالى ابدا لكن تاجلت لظروف الاولاد وتربيتهم صحيح قدمت فى حاجات كتييير من بعد ما اتخرجت صحيح كلها حكومية بس برضه مفيش فايدة ويبقى الامل
• ***************************************************************************
• هو انا عايزة اشتغل ايه وليه وعلشان ايه وبكام وفين وامتى وازاى
• انا اصلا كان نفسى فى حتة ارض ابنى عليها بيت وازرع جنينتها خضار وفاكهة وبس كده
• حلمى كان فى حياة هادية وحاجة اعملها بايدى
• *******************************************************************************
• هرتلاتى هتبقى كتير من هنا ورايح لانى هطق من حاجات كتير فاهرتل فى مدونتى وخلاص

الحلم

الحلم

المشروع القومى

الهدف

الهوية

الماضى

الحاضر

المستقبل

الأمل

التحضر

انسان

كل عام أنتم بخير

العام الدراسى الجديد

بسم الله الرحمن الرحيم

وبه نستعين

كانت اخر جملة انهيت بيها البوست اللى فات هى دى:

(انسان يعنى عقل يعنى ايد يعنى قلب يعنى امل جديد لبلده وللانسانية كلها.)

ياترى وزارة التربية والتعليم استعدت ازاى لاول عام دراسى بعد ثورة 25 يناير

اكيد فى استعدادات

اللى يهمنى هنا بصراحة مش الوزارة فى حد ذاتها

التساؤل هنا ياترى السادة المعلمين والمعلمات ومديرين المدارس والوكلاءو الفراشين و الفنيين والاداريين باختصار جحافل الموظفين الخاصين بكل مدرسة هل عملت كل مدرسة اجتماعات على فترات خلال الاجازة يناقشوا خطة عمل جديدة واسلوب جديد لاستقبال التلاميذ وما ينقص المدرسة وما ينقص التلاميذ ويا ترى فى افكار جديدة للارتقاء بالمستوى الفكرى والاخلاقى للتلاميذ وكل مدرسة حسب المرحلة اللى فيها

ياترى فى حد كان قلبه على الاطفال دول حد فكرلهم حد فكر يخلى ساعاتهم فى المدرسة اجمل ساعات يومهم

حد فكر فى اى حاجة جديدة مفيدة للتلاميذ ولنفسهم حتى كمان

بقالى كام يوم عماله بشوف مظاهرة هنا ومظاهرة هناك تخص المعلمين ده غير مجهوداتهم بعد الثورة برضه فى التظاهرات والذى منه

طلباتهم كلها مادية تقريبا( وعايزين كرامة المعلم) وشيلوا الوزير وهنضرب اول العام الدراسى ووو

اى كلام فى اى كلام

يا جدعان فكروا فى مصلحة البلد شوية بلاش مصلحة البلد مصلحة الطلبةالاهم دلوقتى انسوا نفسكم شوية فى مجلس شعب جاى وفى رئيس جديد باذن الله جاى هنشغلهم ونشغلهم بالطلبات دى

خلينا فى العيال اللى مستقبلهم اللى هو مستقبل البلد بين ايديكم

اللى مزعلنى وقاهرنى ان العيال اللى فى المحيط بتاعى فاكرين انهم هيرجعوا المدارس هيلاقوها حاجة تانية الثورة بقى وكده صلحت كل حاجة واهمها التعليم عموما الدراسة لسه 17/9 اتمنى تكون توقعاتى فى غير محلها وانى اكون بهذى بسبب الصيام

بس بجد اتمنى الدراسة الجاية بداية جديدة لمحاولة اعادة بناء الانسان فى بلدى.

تقبل الآخر ، التحضر

بسم الله الرحمن الرحيم

------------------------

فكرة تقبل الاخر وعدم توجيه الانتقادات للناس كده وخلاص من غير بيان دى كارثة ممكن اكون شخصيا وقعت فيها قبل كده

مش من المفروض اننا نحكم على الناس من مظهرهم الخارجى او الشكلى او التصرف اللحظى بتاعهم

الموضوع محتاج مننا مجهود اكبر لانك اخيرا تقدر تقول رايك فى فلان او فلانه ولكن برضه بعيدا عن الحكم عليهم وتصنيفهم

يعنى مينفعش تقول ده مش متعلم مثلا فيبقى جاهل وغير واعى ابدا ارتباط قد يكون فى ظاهره لبعض الناس انه منطقى ولكن الحقيقة فعلا غير كده

مينفعش مثلا تقول ده متعلم فبالتالى عكس ما سبق تماما برضه ارتباط مش ضرورى

مينفعش تقول ده غنى يبقى اوتوماتيك ابن ناس ومتربى واخلاقه عاليه

او ان فلان حالته بسيطة يبقى مش ابن ناس ولا متربى وغالبا معندوش ذوق ابدا

التابوهات دى وكتيير كتير غيرها عقلنا البشرى صنفها على انها اساسيات الكون والحياة وان الدنيا ماشيه كده لوجود حالات تنطبق عليها المنطقيات دى اللى احنا عملناها منطقيات ومفيش برهان اكيد على وجوبها.

هحتاج اكتر من بوست للموضوع ده بالذات علشان اقدر اوضح وجهة نظرى انك لما تتعامل مع حد اتعامل معاه مجرد من اى افكار اتعامل معاه كما هو فى هذه اللحظة على ان تلتمس له العذر دائما فيما لاتفهمه منه خلال تعاملك معاه وانك تحاول تتحرر من مظهره الخارجى ولا اقصد هنا شكله بس ولكن ما بدر منه من سلوكيات فى اللحظة دى لانك اكيد مش ملم بكل حاجة تخص الشخص ده فتعامل معاه من قلبك ولكن خلى عقلك يقظ

التحضر بقى مرتبط اكيد بفكرة تقبل الاخر دى

يااااااااااه التحضر ايييييييييييييييه دنيا نفسى اسمع الكلمة دى واحسها فى بلدى نفسى قوى قوى قوى

تصدقوا بالله لا اله الا الله كل يوم بعيط بعد برنامج خواطر كل يوم حتى ولادى زهقوا (انا اصلا حنفيه وطلع لها انسان:))المهم بشوف الدول والتحضر والرقى والتعامل والتفكير والفرق الرهيب اللى بينا وبينهم بعيط نفسى نبقى زيهم فى التحضر ده فى معاملة الانسان فى احترام الانسان فى الرحمة بينهم وبين بعض فى العدل فى المساواة فى الحياة الكريمة مش قصدى هنا المستوى الاقتصادى مش قصدى ابدا قصدى كرم الاخلاق وكرامة الانسان وانه يتعامل على انه انسان وثروة وكنز لبلده انسان يعنى عقل يعنى ايد يعنى قلب يعنى امل جديد لبلده وللانسانية كلها

عشت التاريخ وشوفته وهو بينكتب

بسم الله الرحمن الرحيم

عشت التاريخ اللى هيدرسه احفادى باذن الله

شىء لا يصدقه عقل حاجة من ورا الخيال

كده اقدر اتمسك ببواقى الامل واقول فى امل

بكرة هيبقى احسن لازم هيكون احسن

لو هنبقى دولة قانون يبقى اكيد بكرة احسن

رمضان كريم

رمضان كريم

كل عام أنتم بخير

بجد وبحق وحقيق انا مش فاهمة حاجة

سموا الله وادعوا لمصر

بجد وحياة الغاليين انا مش فاهمة حاجة البلد دى بقت عبارة عن لغز كبير جدا وعاملة زى الشريط بتاع زمان لما كان بيسف ايون شريط البلد دى سافف او عاملة زى بكرة الصوف اللى فكها ابنى وكلكعت واتعقدت ميت عقدة وتشابكت معها بقية بواقى الصوف اللى كانت فى نفس الكيس او عاملة زى التوأم بنات خالتى لما فتحوا المطبخ ورموا الرز على المكرونة على ازازة الزيت وعجنوهم ع البلاط وحموا شعر بعض بيهم اه والله او عاملة زى ....خلاص بقى اكيد عندكم مغامرات من النوع ده اكيد يعنى

المهم ان فى الحالة دى محدش بيعرف يفك كلكيعة الصوف او يعدل الشريط وطبعا مفيش عدله للى حصل فى المطبخ

بس ممكن نوصل لاول الخيط ونحاول نفكه وهنوصل للعقدة الاصلية وممكن قوى نقصها ونرتاح ونوصل الخيط ونكمل لف

وكان فى الغالب بنعرف نعدل الشريط لكن بنضطر نقص حته ونلصق الباقى بالاكلادور رغم ان بتبقى فى حته من الغنوة مش موجودة بس بيشغل تانى عادى

وممكن قوى يكون لك جيران غاويين يربوا فراخ فهتديلهم عجن المطبخ ومتحسش بتانيب ضمير قوى

بس سفة الشريط المرة دى وكلكيعة الخيط وعجنة المطبخ غريبة عليا جدا المرة دى مش عارفة اوصل لاى شىء حاسة ان مساحة الغباء عندى بتزيد منين مودى على فين

لا والعسل بقى القضية بتاع بطلان التنحى دى والله العظيم عسل ايه اسكر ده والعسل ده والتلذيق اللى احنا فيه ده

يا خراشى

رغم كل ده مينفعش ما ارفعش ايدى وادعى للبلد دى واهلها المشكلة انى متاكده اننا نستحق افضل من اللى احنا فيه ده الف مرة

انا متاكدة ان ولادى وولاد اخواتى واصحابهم وولاد الجيران كل العيال الصغيرة دى فلذات اكبادنا دى براعمنا الجميلة دى تستحق افضل وافضل بكثير مما نحن فيه نفسى الحال يتصلح علشانهم نفسى قوى يارب

our deepest fear

بسم الله الرحمن الرحيم

*********

اعجبتنى كثيرا تلك الكلمات التى يقال انها جزء من خطاب نيلسون مانديلا سنة 1994

ولكنها مقطع من كتاب للكاتبة ماريان ويليمسون

واسمحولى ان اضع الترجمة اتمنى انى اكون قدرت اوصل المعنى

Our deepest fear is not that we are inadequate. Our deepest fear is that we are powerful beyond measure. It is our light, not our darkness that most frightens us. We ask ourselves, Who am I to be brilliant, gorgeous, talented, fabulous? Actually, who are you not to be? Your playing small does not serve the world. We were born to make manifest the glory of God that is within us. And as we let our own light shine, we unconsciously give other people

permission to do the same

خوفنا العميق لا يعني أننا غير كافيين(او غير كفؤ). خوف عميق لدينا في أننا أقوياء بطريقة ابعد من المقاييس. إنه نورنا، وليس الظلام الذي يخيفنا أكثر. نسأل أنفسنا، من أنا لكى اكون عبقرى ، رائع ، موهوب، رائع؟ في الواقع ، من نحن لكى لا نكون؟ لعبك الصغير(عملك الصغير)لا يخدم العالم.نحن قد ولدنا لإظهار مجد الله الذي هو في داخلنا. وعندما نتركضوئنا يتالق ، لا ندركأننا نعطي الآخرين الإذن في أن تحذو حذونا.

Listen

Read phonetically

اعادة اعمار مصر

بسم الله الرحمن الرحيم

*****************

الفكرة مش خالص فى انه اعلان ممتاز من وجهة نظرى

الفكرة ان ده احساسى انك ممكن تحاول تخلى بكرة احلى

الفكرة انك بالتفكير وتحمل المسئولية ممكن تعمل كتيييييير

الفكرة كل الفكرة انك تحاول بجد تغير

ولكن لما حاولنا نغير محالفناش الحظ قوى

التغيير مجاش للاحسن

فى حد بيعاندنا وحاجة معندانا

فى حد مش عايزنا نتحدى الغيوم

فى حد مش عايز شمس البلد دى تطلع يوم مش كل يوم

فى جوايا ايمان ان ممكن الحال يتصلح

هو اعتقاد ضعيف بس ممكن يتحقق

نفسى اغمض عين وافتحها الاقى الثورة دى نجحت

مؤشرات الفشل بتزيد

فى حاجة غلط

فى حاجة مش مظبوطة

فى حاجة مش فاهماها

ايه العمل

صلاح حال البلد دى على صناع القرار

الحسم والحزم

اقصد اتخاذ قرار ببداية العمل فى كذا

التنفيذ على طول مفيش تسويف

ابتدوا فى حاجة الهونا فى مشروع خلونا نبنى نعمر نشتغل

ركزنا فى المحاكمات ولهتنونا فى عجلة الانتاج ونسينا البلد واعادة اعمارها

كذا يبقى كذا

وواحد زائد واحد يساوى اتنين مش احتمال لا يساوى اتنين فعلا

انا عارفة ان فى مليونية بكرة

هيحصل ايه الله اعلم

هتيجى نتيجة الله اعلم

غلط واللا صح الله اعلم

البلد دى ما يعلم بحالها غير الله

ربنا يصلح حالك يا بلادى وحال بلاد المسلمين اجمعين

من اجل الامل اللى ضاع كان تدويرى ع الفيديو ده

خرزانة عايزة خرزانة

بسم الله الرحمن الرحيم

-----------------------

كيف الحال الدنيا عاملة معاكوا ايه يارب تكونوا فى احسن حال

اقروا معى ومتنسوش تدلونى على بتاع خرزانات

فى حاجات فى الدنيا غريبة وعجيبة كتير ومن ضمنها الحجاب ابو نفخة ده قرف مش عارفة البنات دى ايه قلة معرفة دى واللا جهل واللا غباء واللا ايه لاحول ولا قوة الا بالله خلوا الواحد خرج عن شعوره اسنمة البخت دى اصلا حرام يا ناس

امها فين ابوها فين دول كمان مفيش معرفة

طيب ناس هتقولى ايه اللى نرفزك كده طب ما هو منتشر بقاله فتره

ماهو منرفزنى جدا والله وامبارح بقى لقيت تلاتة ماشيين مع بعض نفش النفشة بنفس لون الطرحة بنفس التكنى كلر على وشهم بنفس الاسكنى جينز حاجة مقرفة والمهم ان لو فكرت تقولهم انتى زى اختى وبنصحك لوجه الله كده مش زى اسلامى خالص ومينطبقش عليه حاجة واحدة بس تخص الزى الاسلامى للمرأة مش بعيد تسمع الواحد كلام يقشعر له البدن او تقولك ابسط حاجة وانتى مالك وتبصلك من فوق لتحت وتمشى (الحمد لله محاولتش اصلا ولا مرة)

المشكلة مش فى كده المشكلة فيا انا مبقتش اعرف اقول ربنا يهدى بقيت اقول حسبى الله ونعم الوكيل على طول وش كده مبفكرش اقول ربنا يهدى بقيت شريرة خالص।

وتحس انك نفسك فى خرزانة من بتوع زمان اللى كان بيمسكها الناظر ياااااه وإدى॥ لسوع.. ومد ع الرجلين لحد ما يفقفقوا علشان تحرم تخرج كده تانى

انا مش عدوانية ولاعايزة الناس تمشى على مزاجى ولا اى حاجة

مؤمنة جدا بالحرية وان محدش يحجر على اختيارات حد

انا ست عادية جدا حجابى عادى بلبس تايير وفستان وعباية وجيب وبلوزة وطرحتى مش مأزعرة ومبينة قفايا

بس بنادى باننا نصحى لنفسنا شوية نمشى عدل وعلى راى المثل امشى عدل يحتار عدوك فيك

عدوك ده ممكن يكون عدو شخصى وممكن يكون عدو لبلدك وممكن يكون عدو لدينك

عدو بلدك عايزك اهبل ومعندكش علم ولا معرفة ومضيع وقتك فى الهبل

وعدودينك عايز يشوفك بتلوثه بتضيعه مش فاهمه مشوه صورته عايزك انت نفسك تكون عدو لدينك

كونى صورة مشرفة للمرأة المسلمة كونى مهذبة مهندمة منمقة كونى محتشمة كونى خجولة اشعرى بالحياء

اتكسفى على دمك يعنى

آه صحيح .... أنا خلصت الicdl

بسم الله الرحمن الرحيم
*****************
الحمد لله خلصتها ونجحت من غير اعادة اى حاجة
مية% تلات مرات
سبعة وتسعين% مرتين
اربعة وتسعين % مرة
واخر موديول امتحنته itجبت فيه 86الحمد لله
المهم هو مفيش درجات فيها يعنى بتطلع الشهادة انه عديت وخلاص
خلصتها من 3اسابيع الحمد لله
ربنا ينفعنا بيها باذن الله

خبر ب 1200جنية

بسم الله
ما شاء الله كان وما لم يشأ لم يكن

الخبر التحفة ده حقيقى أتحفنى قوى
طب ده بعد 5سنين طب بعد 5شهور هنعمل ايه يعنى اقصد مادام ماشية بالورقة والقلم حد يقولنا بعد كام شهر سنة هيكون الوضع ايه
طب والتشغيل مش ده من اولويات الحكومة بعد الثورة كما قال د/سمير رضوان واكد عليه فى الوزارتين اللى اتشكلوا بعد الثورة وكان عضو فيهم
احنا عارفين ان الحالة جيم بس بلاش توعدوا الناس بحاجة وييجى عكس توقعاتهم الاحباط وحش
اللى مزعلنى انهم لم ينظروا فى طلبى احنا عايزين دكاترة نفسيين فى الوحدات الصحية ومراكز الشباب وكده يعنى روقونا كده
ها متزعلوناش بقى حد نفش معاه يا جدعان متزعلوناش بقى واهى تبقى من منجزات وانجازات الثورة الا وهى القدرة على فش الغل بعيدا عن ميدان التحرير انتوا عارفين بقى المواصلات وقانون تجريم الاعتصام وكده فوحياة الغاليين تنظروا فى طلبنا احسن احنا مخنوقين اخر تلات حاجات

فى عام الحزن

فى عام الحزن يا نبينا دموعك طاهره تسقينا
واهل الكفر فى زمنهم شايفهم لسه وسطينا
ندهت وقلت مولانا يارب الكون لاتنسانا
بيقفوا صفوف و رجمونى ونور الحق ويانا
إلاهى حنن الاحجار وطفل جميل من الكفار
يجرى عليك وخير يديك بإذن الواحد الغفار
ملاك ينزل ويجيلهم و قال من غضبه يا ويلهم
طلبت الرحمة من الرحمان وبدموعك بتدعيلهم
رسول الرحمة بتسامح ولو قالو كلام جارح
تقول يارب نجيهم أكيد فيهم واحد صالح
يطاهر نفسى اكون طاهر من الباطن وم الظاهر
ومهما أشوف غضب أو خوف أكون شفاف ومش ظاهر
من الدعوة ماشاء الله ناخد نفحات رسول الله
ولما ميلنا بيعدلنا ويقبلنا باذن الله

د/ مصعب الشاعر

بسم الله الرحمن الرحيم

*****************

ربنا معاك أحسن من الكل

ربنا يتم شفاك على خير يارب

قلوبنا كلنا معاك بتدعيلك وبترفع معاك توسل لله عز وجل بان يقيم دولة القانون والعدل فى مصر.

مش لاقية جملة او تعبير او كلمة فى اللغة توصف شعورى عند سماعى قصة حضرتك منك شخصيا بالامس على قناة التحرير شعورى بالظبط زى الاستاذ محمود سعد دموع ومفيش كلام .

أنا خوفى ع ولادى

icdl

بسم الله الرحمن الرحيم
*****************************
انطلاقا من حاجات كتيييييييير قوى
قررت الحصول على الicdlوالحمد لله امتحنت 4موديول والخامس يوم الخميس باذن الله دعواتكم بقى
بقالى حوالى شهرونصف فيها تدريب واختبار والحمد لله ماشى الحال عال العال
دعواتكم
اما بقى الحاجات الكتيير دى ليها بوست خاص بيها
سلام مؤقت

يا الله

اللهم يا ولى يا لطيف اللطف الطف بنا بلطفك الغنى

اللهم انا ننتظر فرجك ونراقب لطفك ومنّك وكرمك ونتوكل عليك ففرج عنا والطف بنا

ولا تكلنا الى انفسنا ولا الى غيرك طرفة عين ولا تنفس نفس

واكفنا من كل ذلك يا جبار السموات والارض

لا اله الا الله الكريم

لا اله الا الله الرحمن الرحيم

لا اله الا الله رب السموات والارض ورب العرش العظيم

اخواتى الصغننين طلبة الثانوية العامة

بسم الله الرحمن الرحيم

-------------------------------

اخواتى الصغننين العسولين خالص طلبة الثانوية العامة

ازيكم .. بتذاكروا طبعا مش كده

ربنا معاكم

اعتبرونى زى اختكم الكبيرة بنت خالتكم بنت عمكم اى حاجة

بنصحكم نصيحة لوجه الله

اللى نفسه يدخل كلية الآداب يفكر شوية

اللى فاكر انه هيفوز بالدراسة الاكاديمية للحاجة اللى بيحبها يراجع نفسه شوية

اللى فاكر انه هيخلص آداب من هنا وهيلاقى وظائف الدنيا تطلب رضاه يمخمخ شوية

فطلاب كلية الآداب اخواتى الصغننين يتعذبون فى اثناء الدراسة وبعد التخرج

اى نعم

العذاب نوعان قبل التخرج وبعد التخرج

ممكن قوى تكون مليت استمارات التنسيق بعد الثانوية العامية واخترت اداب علشان تدرس مثلا المانى او انجليزى مثلا تبص تلاقى طلع لك اول حجر التنسيق الداخلى ان ان ان تش وتلاقى نفسك يا مسكين دخلت كلية اداب اه لكن درست اللى بتحبه نو جاميه ابدا

تانى حجر الدكاترة قمرات فعلا يعنى ولا معقدين ولا حاجة وسهلين اسهال يعنى قصدى سهولة رهيبة قمرات بقولكم

غير الاحجار بقى اللى طول الاربع سنين والله المستعان

المهم العذاب التانى

وده له اقسام متعددة فعلى سبيل المثال لا الحصر عزيزى الطالب

1. 
   
   
   
   
   انك ياروحى هتفتكر انك بالعلم اللى درسته ده والعلوم الانسانية الجميلة اللى ملت وجدانك دى هيبقى قدامك اكتر من مجال صحافة بقى وتدريس وترجمة ووظايف ايه وبتاع

• 
  
  
  
  
  اكتر ناس بتتألم قوى من الموضوع ده الناس اللى بيبقى حلمها تشتغل بالتدريس

२- انك هتفتكر انك معاك ليسانس آداب فاذن انت مساوى لبكالوريوس التربية بانواعة عام واساسى ونوعية

• 
  
  
  
  
  نو يا عزيزى انت لست مساوى لهؤلاء فينبغى عليك ضياع سنة اضافية من عمرك فى عمل الدبلومة التربوى حتى تتساوى بهم ويعترف بك مدرسا فى المدارس المصرية





• 
  
  
  
  
  اللى ممكن ينرفزك وينرفز اهلك كلهم فى مدارس ابتدائية وبخاصة فى القرى تعتمد بشكل كبير على خريجين دبلوم معلمين ودبلوم زراعة وغيره لتدريس المناهج التعليمية

******اى انك يا روحى مش مساوى كمان لدبلوم الزراعة وااااااااااااااااااااااو

المهم الكبير بقى

३-انك ملكش نقابة نيهاهاهاهاها (ياريت تقروها بصوت عفاريتى)

بس خلاص فانت بقى يا اخويا ويا اختى ياللى حابين تدرسوا فيها بصراحة الدراسة فيها ممتعة وتحس انك بتشرب تخصصك صافى من غير شوائب عن تجربة انما انصحك خليك عارف مساوئها قبل ما تدخلها

المهم ازيكو دلوقت

العام 2050

فى هذا العام تحديدا سنبدأ فى جنى ثمار الثورة

جملة يقولها المتفائلون منا

ولله الامر من قبل ومن بعد

خلاص بقى خلى التحقيقات تاخد مجراها

بسم الله الرحمن الرحيم

------------------------------------

نفوق بقى خلاص كفاية كده

بلاش اعتصامات بقى وبلاش مظاهرات وحياة الغالى عندكم

تعالوا نمشيها قانون

نخلى التحقيقات والقانون هو الحكم بينا

ورقهم دلوقتى فى ايد أمينة

التحقيقات ورا بعض والنطق بالحكم هيبقى ورا بعض

وهيقروا على بعض

وهيجروا بعض وهتبان لبة المواضيع كلها

صبرا قليلا بس

المهم الخطير ايه

مجلس الشعب اللى جاى

لازم نذاكر كويس ونعرف هنعمل ايه

مرشحنا مين

اصله وفصله ايه

برنامجه ايه

الملفات اللى هنديهاله ايه

عايزين منه ايه

منطقتنا او دائرتنا او محافظتنا

او مصر كلها عايزة ايه

يلا نحضر الاوراق والملفات

يلا نحضر الطلبات

مشاكل الدائرة ايه

نحصرها نعدها نرتب اولوياتها

بالارقام والصور والمستندات

لازم كلنا منكبرش دماغنا المرة دى

سبنا الملعب كتير فاضى واستسلمنا ليأسنا

الملعب بتاعنا والكورة كمان

اللى ييجى يلعب باصول اللعبة يا مش عايزينه

لازم نركز قوى فى مجلس الشعب اللى جاى

مش عايزة اقول انتخابات الرئاسة مقدور عليها

ميصحش اقول كده مينفعش اقول كده

بس المجلس اللى جاى أول واكبر واهم مهمة له

الدستور

العقد

مينفعش العقد يبقى مش تمام

او يذلنى ويهنى ويهمشنى

نو

لا

جاميه

اوكيه

نركز بقى

باقى من الزمن اقل من خمس شهور

التدوينة دى أبكتنى قوى

السلام عليكم ورحمة الله وبركاته

***************************

قلبنا واجعنا ومخنا متاكل وبنفكر ليل ونهار وكرهنا افكارنا السوداوية اللى بتدور جوه نفسنا وبنحاربها

كرهنا الواقع لانه اصبح مرير فعلا

لغبطة بكرهها لانى مبحبش الغموض مش لحبى للفضول ولكن لانى شايفة انى لازم اعرف سكتى ويتنور طريقى علشان اعرف امشى واكمل المشوار

التدوينة دى أبكتنى قوى قوى قوى لان فيها اسئلة بتدور جوانا ومحدش فينا عارفة الاجابة

اؤيد الغاء الدورى

بسم الله الرحمن الرحيم

---------------------------

من تابع مدونتى قبلا يعرف انى اصلا مليش فى الكورة والرياضة عندى مفهومها اهم واكبر من ابعاد المستطيل الاخضر

اللى حصل امبارح مهزلة وخيبة ووكسة كمان خيبة قوية وشتيمة اتشتمناها كمصريين

هل الموضوع مرتب? هل غضب اعمى? ام هى خيبة وحاطة علينا ?

سؤال يطرح نفسه

الدورى لازم وعن كل بد يتلغى ووقفوا كل نشاط كروى ممكن الغاؤه كعقوبة للجماهير على عدم احترامها لبلدها وللشعب مش للرياضة ولا نفسها لان اللى ظاهر انهم معندهمش احترام اصلا اقل واجب كده

سمعت كده فى سركم ان حسام حسن لما واحد من التوانسة نزل الملعب فى مباراة الذهاب قال ايه لازم ناس تنزل رد ع اللى حصل هناك(تحريض ده واللا ايه)

فين اخلاق الرياضة وزغرطى يا ام فاروق

ايه اهم الايجابيات اللى حصلت فى حياتك من بعد25يناير

بسم الله الرحمن الرحيم

-----------------------------------

ايه اهم الايجابيات اللى حصلت فى حياتك من بعد 25يناير؟

لازم يكون فى حياتك شىء ايجابى عملته من بعد اليوم ده الى الان

اوتكون ضفت شىء جديد ايجابى مكنتش عملته قبل كده وعملته بعدها

والسؤال ده انطلاقا من مبدأعام عند المصريين دلوقتى ان مصر قبل 25غير مصر بعدها

ياريت اللى يزور المدونة يترك تعليق يجاوب فيه على السؤال من فضلكم

حقيقة بدور على اكتر احساس ممكن من الامل يدخل قلبى

الامل انا بدور على الامل فى عيون الناس وفى كلامهم وفى قلبهم واحساسهم وعقلهم وفى منطقهم وادراكهم للامور

انا بدور على الأمل

45نطرح منهم18يساوى27

السلام عليكم ورحمة الله وبركاته

-----------------------------

مسألة طرح بسيطة خالص يحلها طفل فى سنة اولى ابتدائى

27مليون مواطن لم يشاركوا فى الاستفتاء رقم كبير قوى ولكل اسبابه الخاصة

بس مادام الرقم الكبير ده شارك وانا شوفت بعينى محدش قالى الاقبال الرهيب اللى محصلش قبل كده

يبقى انا المفروض يتاكد شكى فى ان الارقام اللى قبل كده كلها نخع بالبلدى كده

يعنى اعرف انه اخر انتخابات شارك فيها 17مليون امال الزحمة دى لم نراها ليه قبل كده

عجبى بجد فعلا

انا منتظره الاعلان الدستورى او البيان الدستورى اللى هيقوله المجلس العسكرى وباذن الله واثقة انه خير

ربنا معاكى يا مصر

شارك

شارك

بس هو ده البوست

نعم او لا

مش دى القضية

القضية اننا هنشارك يا بشر

هنشارك بجد

لينا صوت لينا راى لينا قيمة

صوتنا هيفرق صحيح

نعم او لا

قول نعم قول لا

انت وقناعاتك

الجميل اننا هنقول وهنسمع لبعض

الجميل اننا هننزل مطمنين حاسين بالامان

وحاسين بالامانة وان محدش باذن الله هيغير رايى لحسابه

ربنا معانا

خير باذن الله

وطن تايه يا ولاد الحلال - عن التعديلات والاستفتاء بين نعم ولا ومش رايح

بسم الله الرحمن الرحيم

--------------------

وطن تايه يا ولاد الحلال دى حقيقة فعلا مش عنوان مبالغ فيه

من المفترض حسب الكلام الرسمى على شاشات التليفزيون المصرى الرسمى ان 40مليون مواطن مصرى لهم حق الاقتراع والتصويت باستثناء رجال الشرطة والجيش والقضاء تمام كده طيب الآراء ايه:

• 
  
  ناس بتقول ايوه صح احنا هنوافق اكيد دى خطوة على اول السلم واول الطريق


• 
  
  وناس بتقول لا احنا عايزين دستور كامل دلوقتى ننتظر ونعمل دستور وبعدين الانتخابات ووووو


• 
  
  وناس بتقولك لا منروحش اصلا ونقاطع الاستفتاء اصلا

اولا فكرة نقاطع دى فكرة فاشلة ليه لان كده مش مشاركة ومش ديمقراطية يا اما نعم او لا

انما هقاطع ايه هقاطع دى اصلا فى مستقبل بلد يعنى ايه يعنى هو انت بتقاطع مسحوق غسيل واللا زبدة دنماركى دى مستقبل بلد مش موافق قول لا مش هقاطع الكلمة دى بصراحة فى وسط اللى بيحصل ده كله نرفزتنى جدا والله العظيم واللى نرفزنى برضه بيقولك اصل الرئيس السابق اقترح المواد دى يا نهار بلاك مش هى دى المواد اللى كان عليها الاعتراض العام وارفقت بيها مواد تخصها ايه يعنى هو اللى قال ومينفعش يخطط مستقبل مصر انتوا بتقولوا ايه انتو سامعين نفسكوا طب ما الشعب هو اللى اختار ان المواد دى تتغير يعنى احنا اللى اختارنا مش هو فى ايه متصلوا على النبى كده وطسوا وشكوا بشوية ميه

ثانيا اللى بيقول لا احترم رايه مفيش مشاكل عندى عادى هو ممكن يكون مش موافق على التعديلات بالجملة او مش موافق على مادة بعينها فنظرا لان التصويت تقريبا مش مادة مادة انما على بعض فمن هنا معظم الرفض انما لو كان مادة مادة كنا هنشوف الاغلبية معترضة على ايه انما لو كده صحيح يبقى مش هنقدر نفهم معترضين على ايه بالضبط

على اى حال هو بيشارك والمشاركة فى حد ذاتها ايجابية تحترم فى ظروف صعبة بنمر بيها

ثالثا اللى بيقولوا نعم واللى انا منهم شايفين ان التعديلات دى اولا لو كنا حلمنا بتعديلها ففى افضل التخيلات الممكنة عمرها مكانت هتتعدل اصلا وكمان مكنتش هتتعدل كده

وكمان راينا له قيمة لاننا هننزل بالرقم القومى وكمان الرئيس الجاى ملزم بانه يدعو لجمعية تاسيسية لوضع الدستور خلال6شهور والرئيس مدته 4سنوات انتو متخيلين ويجوز اعادته انتخابه مدتين يعنى يوم مهيطول 8 مش30وبقية التعديلات احنا شايفينها كويسة جدا فى المرحلة دى ومادام الدستور هيتغير بعد انتخاب الرئيس القادم او بمعنى اصح هيدعو لجمعية تاسيسية واعضائها بالانتخاب وكمان مواد اتعدلت لصالح الاشراف القضائى والفصل القضائى فى صحة الطعون الانتخابية يا حالولى لولولى ايه الجمال ده وقانون الطوارئ لا يمد اكثر من 6شهور وايه هنستفتى عليه برضه يا سلام

يعنى تعديلات نراها مناسبه فى المرحلة دى

انا مش بقول رايى صح او راى الموافقين صح ومش بقول اللى بيقول لا غلط

استفتى قلبك وان افتوك شوف انت ايه المناسب لبلدنا مصر فى المرحلة دى وقرر اه او لا

التدوينة دى للناس اللى هتقاطع ارحمونا وارحموا اللى خلفونا واللى خلفوا اللى خلفونا لان التلاتة دول القلق بياكل فيهم

المهم ان من اللى هيقاطعوا دول هيترشحوا للرئاسة دقنى اهيه................

اكملوا انتوا بقى مكان النقط باللى يعجبكوا

ربنا معانا

أنا المصرى كريم العنصرين

بسم الله الرحمن الرحيم

-----------------------

كلمات لاغنية من اجمل ما غنى فنان الشعب سيد درويش

هو ايامها كان بيحارب الاحتلال واحنا دلوقتى برضه بنحارب الاحتلال لكن بصورة تانية وان كان لايقل بشاعة عن الاحتلال زمان ماهو زمان كانوا مستوليين على البلد وخيرها وبيموتوا ناسها وبيتهيئلى هما برضه عملوا كده

المهم دعوة لاعادة الروح للغنوة دى وتحفيظها لاولادنا فى المدارس الاغنية دى كنت بسمعها واحس بفخرشديد ودلوقتى بسمعها وببكى فخرا ونشوة وحبا للوطن مصر

مع بعض كلماتها اترككم:

أنا المصرى كريم العنصرين
بنيت المجد بين الاهرمين
جدودى أنشئوا العلم العجيب
ومجرى النيل فى الوادى الخصيب
لهم فى الدنيا آلاف السنين
ويفنى الكون وهم موجودين

أكلم مين لما أحب أخاطب الشعب المصرى

السلام عليكم ورحمة الله وبركاته

--------------------------------

مبقولش غير استرها علينا يارب خليك معانا يارب اصلح حالنا يارب

احنا خايفين جدا احنا دول شريحة كبيرة قوى من مصر الشريحة اللى لو طلبت حاجة دلوقتى تطلب اقراص مهدئة لا غير

رغم حبنا الكبير لوطنا الا اننا حاسين اننا كنا عايشين وطن غريب غير مصر اللى عارفينها فى قلوبنا وعقولنا

احنا خايفين من اللى جوا واللى برا احنا خايفين نتفرم فى وسط كل ده

اى بلد اللى كنا عايشين فيها بلد السلطة واللا راس المال واللا النفوذ واللا الوحشية واللا انسانية بلد التنصت والتلصص واللا بلد الفتن واللا بلد الجوع والحرمان واللا بلد السرقة والسلب البلد اللى كنا فاكرينه فقير وطلع غنى قوى ومسروق بلد ظروفنا كده واللا بلد قتل الطموح انهو بلد كنا عايشين فيها

مين الناس دى مطحونين فعلا فبيدوروا على حقوقهم دلوقت دلوقت حالا فى الظروف الطين دى وفجأة اكتشفوا ان شركتهم او مصنعهم او مؤسستهم او او او وحش وشيطان وعايزين نشيله حالا ولو دى حقوقهم من سنين مقدموش طلب للتذكرة وخلاص ليه وكل حاجة تشتغل وتمشى فين المجدعة يا جدعان ويا جدعات وبتوع الجامعات اللى فجأة مش عاجبهم رئيس الجامعة ولا العمداء طيب اهلا وسهلا وبعدين دا احنا فى ظروف طين والطين الطف شوية

ارحمونا ارحمونا ارحمونا

شوفوا بقى يا كل من عامل مظاهرة واللا قاطع طريق واللا ناصب خيمة وقاعد تحتها

عمر الرحمة مهتجيلكوا من ربنا الا لو رحمتوا انتوا من فى الارض فيرحمكم من فى السماء

واحد زائد واحد يساوى اتنين بالسهولة دى ارحمونا يرحمكم ربنا

النظام وقع خلاص انهار تلاشى فنيتو مش هيرجع تانى البواقى بتفلفص ومحاولات الخراب اللى بتعملها مفقوسة خالص فبلاش نديها فرصة الرئيس السابق تنبأ بفوضى وانتوا ماشاء الله بتحققوا النبؤة والله دا انتوا عسل خالص

ارحموا الجيش اللى ماسك البلد دلوقتى احنا حملنا تقيل احنا بلبلدى كده هم وكبه ادلهوم فرصة ينظموا الصفوف ولما ييجى الرئيس الجديد نشوفه بقى هيعمل ايه فى الطلبات دى كلها مش هنشغله لما ييجى واللا هنحلله كل حاجة قبل ما ييجى لا نصبر على الحلو اللى هيمسك ونشوفه هيعمل ايه

اصبروا يا اهل مصر اعقلوا يا اهل مصر

احنا مستعدين نفحت فى الصخر

بسم الله الرحمن الرحيم

احنا مستعدين نفحت فى الصخر جملة مصرية بحتة بتتقال فى الظروف الصعبة

احنا مستعدين فعلا نفحت فى الصخر ونستصلح ونزرع ونعمر ونبنى

احنا مستعدين فعلا نفحت فى الصخر علشان مصرنا تاخد مكانتها الجديرة بيها

احنا طاقة كبيرة وحلم كبير وهم كبير

احنا المصريين الجدعان قوى

اقتراح صغنن:

اللا هو مينفعش القصور او الفيلات او اى يكن مسمياتها اللى هتتصادر من ناس( تقريبا رجال اعمال او وزرا سابقين ) مينفعش ناخد منها ونعمل فيها دور للايتام اودور للمسنيين ينفع اعتقد انه ممكن ينفع

طيب ممكن نسكن فيها من هم بلا مأوى ممكن صح

طيب ممكن تبقى فى هيئة رسمية فى الدولة تتلقى اقتراحات الناس واحلامهم ونعرف ايه ممكن تحقيقة من اللى محتاج وقت شوية من اللى عايز تبرعات من اللى عايز عمالة من اللى عايز كذا

الخلاصة :

انى بحبك قوى يا مصر نفسى ملقاش فيكى محتاج نفسى مشوفش يتيم محتاج او ست عجوز محتاجة او مريض مش معاه فلوس علاج

الخلاصة:

انى بحبك قوى يا مصر ونفسى تبقى فى مكانة عالية قوى وان الحلم فيكى يبقى مشروع وممكن يتحقق

بحبك قوى يا مصر ونفسى نعدى الايام الصعبة عليكى وعلينا دى بخير

بحبك يا مصر وشايفاكى بتبسميلى وبتقوليلى حلمك واملك فى مستقبل ولادك هيتحقق بس اصبرى شوية

وانا كمان ببتسم لك وبقولك حاضر يا مصر مفيش عندنا أجمل من الصبر

بحبك يا مصر وعمرى ما فقدت ايمانى بيكى زعلت علشانك لكن عمرى ما زعلت منك

مستعدين نفحت فى الصخر علشانك يا مصر

مستعدين نفحت فى الصخر علشانك يا مصر

مستعدين نفحت فى الصخر علشانك يا بلادى