{استاذ يوسف الحسينى كان فى صباح اون اليوم بيقول انا نفسى اروح طرة واضح ان طرة أأمن مكان فى مصر دلوقتى احلى عيشة }
انا حاسيت انه هيبكى
انا فعلا بكيت لما قال كده وقلبى وجعنى جدا
رغم انى شايفه ان توقيت الميدان غلط الا انى مش قادرة ابقى ضدهم كلنا شوفنا بعينا محدش قالنا الناس بتضرب ازاى بتتسحل جثثهم ازاى بتفقأ عينهم ازاى دى طريقة ينفع نتعامل بيها
وافكر ماذا لو كان اخويا مات او فقد نور عينه وماذا لو فقدت زوجى وتيتم اولادى كان هيبقى احساسى ايه
ليه محدش لحق المشكله فى الاول من قبل يوم الجمعة اللى فاتت ومصر كلها عارفة ان المصابين واهالى الشهداء معتصمين طب محدش كلمهم ليه محدش عبرهم ليه
لما انضربوا واتسحلوا الناس ثارت علشانهم ونزلوا تانى الميدان
لو بس يراعوا الآدمية فينا هو ده المطلب الوحيد
احنا مش شوية فراخ بيصطادوهم فى عيونهم
انا فى بنها بعيد عن الميدان حوالى ساعة مواصلات مش بعيد يعنى لكن مينفعش اروح لاسباب كتير مش مجالها دلوقتى
احنا كلمتنا هنقولها فى بنها يوم3يناير لو اتعملت الانتخابات هنورى الاحزاب اللى قرفتنا دى ان كل واحد فينا يفرق قوى وان صوتى مع صوت فلان وفلان ممكن يعمل ايه
انا دورى جاى جاى جاى وسنين اهله سودا اللى هشوفه بيعمل حاجة غلط عند لجنة الانتخاب قف باحترام وادلى بصوتك باحترام ولا تؤثر على حد واللا بالشوز
بالنسبة لمرشحين الرئاسة اصبروا علينا بس احنا الشعب هنعرفكوا شغلكوا يبقى ازاى
دا احنا متغاظين غيظة من بتوع السياسة دخلونا فى دوامات سودة سودة
وادى النتيجة الناس ثارت ثورة ربنا وحدة يعلم نتيجتها ايه
خدوا بالكوا لو اتعمل استفتاء على بقاء المجلس هيطلع بنعم بنسبة كبيييرة جدا المرة دى
الناس خايفة وشايفة المجلس اخر امل ليهم ولو مشى هيتاكلوا علشان كده لو حصل استفتاء لا تتفاجئوا من النتيجة
واخيرا وليس آخرا
الله يخرب بيت اللى مبيقولش الحقيقة
الله ينتقم من اللى بيضلل او بيهول
الله يخرب بيت اللى بيخوفنا او بيخونا
الله ينتقم من اللى عايز يضرنا او يضر بلدنا
هناك تعليقان (2):
يا أم مازن يا حبيبتي الناس عندنا مش حاسين بحرقة قلب أم تفقد ابنها أو زوجها أو أخوها أو أي حد قريب ليها.
الناس بس بتدور على وقف الحال و البلد اللي هاتخرب.
بس و الله البلد دي لو هاتخرب فعلاً يبقى الداخلية و الحكومة هم السبب مش الناس اللي بتتضرب و تتقتل و تتشوه هي السبب.
كله بيصطاد في الميه العكرة زي ما بيقولوا و كله بيدور على مصلحته.
كل سنة وانتي طيبة
يا بنتى يا دعاء فعلا والله الناس كانت حاطة همها فى قلبها ومستنية الانتخابات بفارغ الصبر علشان فعلا نبتدى نهدى واللى له شكوى هيلاقى قناة شرعية يعرضها فيها مادام الحكومة ايدك منها والارض
لكن هى الداخلية اللى ولعت فى البلد تانى منهم لله
اللى بيضربه ويسحله ده مين ده بنى آدم زيك له حق فى البلد دى زيك ترضى حد يرميك واللا يرمى ابوك فى الزبالة لما يموت
احنا مش فى غابة علشان تمشى شغل حيوانات
احنا بنى آدميين ربنا ميزنا عن الحيوان
نتعامل بآدمية مش كده واللا ايه
إرسال تعليق