طول الفيلم يندم نفسه ويقول لو كنت خدت الوصل
انا بقى بقول لوكنت درست اقتصاد
اصل انا معتقدة اعتقاد اهبل كده ان بتوع الاقتصاد دول ناس ميه ميه
ليه بقول كده علشان المرتب بتاع جوزى
عايزين حد يظبطه يشوف هيركب مواصلات بكام لانه بيشتغل فى محافظة تانية
وهنصرف فى البيت كام والمفروض نشيل للزمن
وكمان لو حد فينا تعب والعياذ بالله ولو حتى دور برد بسيط
وكمان اللبس مش هنبعذق ونغير موضات بس يعنى نكون مرتبين
طب والعيال بيبقى نفسهم يتفسحو مش معقول نحرمهم
و فواتير الكهربا والميه والتليفون وانابيب الغاز
دا كمان بعد سنين الازمة ماعدت وابتدى الموضوع يريح
يعنى ما كانش فى تلاجة ولا غسالة ولا تليفزيون
وطبعا ولا كمبيوتر ولا رسيفر ولا سراير للاولاد
وكمان نصيبنا اولد قيصرى يعنى مرتين وطبعا معروفة تكاليفها
طبعا ربنا سترها معانا وكتب لنا الستر ومحوجناش لحد
وكرمنا اخر كرم وبرضه ساعدنا حكاية الجمعية ام 50 جنيه فى الشهر
اللى هى اختراع مصرى بحت على ما اعتقد
بس انا برضه لا اعتقد ان بتوع الاقتصاد هيعرفو يظبطو الموضوع
طب ولو يعرفو ايه المانع يعنى يسلفونا اتنين تلاتة من اصحاب الاقتصاد دول
يعنى اربعة خمسة كده فى كل حى وليهم الاجر والثواب عند الله
هناك 11 تعليقًا:
بصى حأعلق الاول تعليق غير ساخر أنا كنت زيك كده بلميلى أول ما أتجوزت حتة فى موضوع القيصرية ديه الاقتصاد مش حينفعك ولا التدبير أوعى تفكرى ولاتشغلى بالك حتلقيها فرجت من أوسع الابواب طول ماأنت واثقة فى ربنا - أما الساخر بقى فلما بتاع الاقتصاد ينفعك قولى لى أصل أنا نسيت اقولك أنهم ماشونى من الشغل من شهرين لسة على جمعية ياأختى والعيلين فى جامعات خاصة ايه رايك بقى!!!!
انت عارفة أحلى حاجة فى المدونة بتاعتى تعليقاتك المشجعة والحلوة بس تفتكرى ليه مافيش غيرك الى بيعلق ما داهية لا يفتكروا أنى مدياكى رشوة ولا مايكونش فيه غيرك الى بيقرا لى - أوعى تصدقى أنا بهزر- فيه أصحاب قالوا لى أنهم مش عارفين يسيبوا تعليق مش عارفة ليه - ربنا يخليكى يا أم مازن وبرضى تسلم افكارك - بتاعة الاقتصاد ديه 100%
ابعتى لى تانى تعليقك على الاغانى بتاعتى أصلى بكل غباوة مسحته بالغلط وأنا عاوزة أحتفظ به
اشكرك جدا اختى منى بجد شكرا شكرا انك بتقراى كلماتى اللى هى تعبير عنى وعن كتير قوى زيي
فى طبعا اللى هيقرا ويقول ايه الهبل ده دى بتستهبلنا واللا ايه فى حد يكون اتجوز مثلا سنة 2001 من غير الحاجات دى اقولهم اه فى انا والاف غيرى
دى حقيقة يا جدعان مع ان لا اهلى ولا اهله يعنى معدمين لا العكس الحالة كويسة والحمد لله
بس كفاية ان فى شقة من غير ايجار من والده
وجهاز ليا وبعدى بنتين لسه ما اتجوزوش
كده كان فل قوى واتعملنا فرح والكل كان مبسوط وسدينا نص تكاليف الفرح بعد الجواز كمان
ايه رايكو بقى
الحكاية مش فى اللى فات خالص خالص
دا فى الحاضر والمستقبل كمان
كتبت تعليق والبلوجر عمل فصل ومسحه
مش مشكله
بصى بلا علماء اقتصاد يلا اى حد من العالم دى
الرزق والبركه بتيجى من حاجات تانيه ..اصلا انت فاكرة اىمرتب ولا اى ماهيه بتعيش حد
دى بركة من ربنا
عليك بانك تطلعى كل يوم نص جنيه او جينه حسب الظروف صدقه..وربنا هيكرمك جدا
كمان الرزق مش فلوس كتيير
لاء الرزق عيال راضيه وطلباتها قليله
الرزق زوج قنوع مش عاوز خمستلاف صنف على السفرة
الرزق لما نمرض كوباية شاى واسبرينه تخفف المرض
الرزق فى الرضا
ربنا يسترها معانا جميعا دنيا وآخره
عرفت مدونتك من عند ميس رودى بنت اختى
مدونتك جميله
هاتابعها ان شاء ...
اختى فى الانسانية والامومة ام البنات شكرا جدا لاهتمامك
احمد ربنا جدا جدا واشكره اناء الليل واطراف النهار لان ربنا جعل فى ايدى القليل كتير زى ما امى دايما بتدعيلى
لكن غصب عنى بفكر فى بكره طبعا ده برضه زى ماما ما بتقول (قلة ايمان هو يبقى لينا رب كريم كده ونخاف من بكره خافى منه هوبس سبحانه وتعالى مش هتلاقيكى تخافى من بكره يا بت يا خايبة اسمه الرزاق الكريم)
حبيبتى ماما وكلامها الحلو
وانتى كمان كلامك حلو ومريح ربنا يبارك لك فى اولادك
مامة مازن قريت قبل كدة ان قراءة سورة الواقعة كل يوم بتزود فى الرزق فحبيت انصحك بقراءتها والدعاء لله
وعلى فكرة بقى انا خريجة سياسة واقتصاد وقسم اقتصاد كمان
أى خدمة احنا تحت النظر
شكرا يا ندا يا عسل على ردودك الحلوة
خلاص يا ستى لما نتذنق قوى هبعتلك يا بتاعة الاقتصاد انتى يا عسل
يا نهاري حسيت بهم
بجد ربنا يكون فى عون الناس
طيب ما تنقلوا لمحافظة عمل زوجك؟ ولاايه
شوفي لو جبتوا كل علماء الاقتصاد هتلاقيهم في بيتوهم بيعيطوا زيينا ومش عارفين يحلوا حاااجة
اتقوا الله وخلاص وهاتمشي ببركة ربنا :)
شوفى يا قمر طبعا طبعا فكرنا وشجعت زوجى وقلت له معاك فى اى مكان
لكنه بصراحة قال انا طول اليوم هبقى بره البيت برضه يعنى هتفضلو لوحدكو هنا (يقصد مدينتنا) هتبقو فى وسط اهلى واهلك وهبقى مطمئن عليكو اكتر
وبعدين تكاليف السكن اصلا هتبقى اكتر من تكاليف المواصلات
والله انا بحمد ربنا جدا ودايما قدام عينى وفى قلبى وعقلى (ان الله لن يضيعنا) وان هناك كثيركثيركثير جدا على ارض بلدنا من هم اقل بكثير ويعيشون ظروف اسوأ
انا كتبت موضوعى ده لانى حبيت اشارككم باحساسى كأم تخاف على مستقبل اولادها
شكرا جدا قلب واتمنى تكرار الزيارة
سيبك انتى الست المصريه والله اكبر عالمه فى الأقتصاد، ماهى البلد ماليانه علماء و خبراء الأقتصاد و الحمد لله بقينا تحت خط الفقر عملولنا ايه يعنى، انتى بس امسكى ورقه وقلم كدهو مخمخى كده و احذفى كام حاجه ممكن تستغنوا عنها و ربنا يكرم ان شاء الله
اشكرك بسنت على رايك
الورقة والقلم مفيش غنا عنهم لدرجة جدول للوجبات لضمان عدم التخريف
ولكن المشكلة مش دلوقتى خالص ده بعدين فى المستقبل
وده طبعا قلة ايمان منى زى امى ما بتقولى لكن انا انسان وليا تخريفاتى برضه
إرسال تعليق