قبل كده كنت نزلت بوست بسيط تعبير عن حبى لحقائب اليد وانها جميلة ووووالموضوع اليوم له علاقة بالحقائب الجميلة دى
طبعا مختلفة ومتنوعة ومنها ماركات عالمية تحفة زى بيربرى مين ميحبهاش
واللا لوى فيتون يا سلام حاجة واو
واللا فندى ليها محبينها برضه
يعنى امثلة صغننه كده
نرجع بقى للمفيد اللى هو ايه
عنوان الموضوع من حكم فى ماله ما ظلم بس انا رايى انه ممكن يكون بيظلم
يعنى ازاى؟
يعنى لما نقرأ ان العرب بيصرفو 5 مليار دولار على الدجل سنويا يبقى ايه ده ؟ من حكم فى ماله برضه؟
واللا لما نلاقى سويسرا مثلا هذا البلد الجميل تعتبر السائح العربى وخاصة الكويتى اهم سائح بالنسبة لها
ليه ؟ طبعا علشان الصرف اللى بيصرفوه هناك
طيب ولما نلاقى الست ممكن تشترى حقيبة يد بالاسعار الآتية ودى برضه نماذج من على صفحات الويب
او دى
طيب البوك لزوم الدراهم والريالات والجنيهات والدولارات واليورو كمان احسن يزعل
اوكى متفهمة جدا حب الستات للحاجات دى علشان انا نفسى بحبهالكن لما يكون عادة الشراء والشوبينج وصلت لكده يبقى كتير قوى اوفر خالص
يعنى لما مثلا يكون ربنا موسع عليهم قوى وممكن يجيبوا شنطة ب5 الاف درهم واللا ريال واللا مش عارفة ايه
ماشى مالهم وهما احرار فيه وصلو لحد الاسراف ملناش دعوة برضه
لكن
الغريبة والعجيبة ان ممكن تلاقى شاب زى الورد على راى جدتى طالع عينه فى الغربة وبيقبض1300 ريال يعنى اقل من نصف سعر الشنطة دى
طب بلاش دى هل عارفين ان فى 100 مليون فقير عربى منهم 15 مليون يعانون من سوء التغذية وان فى 17 مليون عربى عاطلين عن العمل
طب بلاش دى هل عارفين ان رغم الثروات الطبيعية الكتيرعلى ارض الوطن العربى الا ان نسبة الفقر وصلت20%من سكان المدن الكبيرة فى دول مجلس التعاون الخليجى وان فى مصر 16 مليون فقير ويمكن اكتر لان الارقام دى قراتها على العربية نت من كام شهر وان اليمن والسودان وليبيا الفقر عايش فيها ومقيم
منشور الامم المتحدة لعام 99 يحدد صور عديدة للفقر على انها
التى تتضمن انعدام الدخل والموارد المنتجة الكافية لضمان مستوى معيشي لائق. ومن مظاهره الجوع وسوء التغذية، وسوء الصحة ومحدودية التعليم، وغيره من الخدمات الأساسية. وانتشار الأمراض والوفيات وانعدام السكن غير المناسب، وعدم وجود الأمن. إضافة إلى انعدام المشاركة في صنع القرارات في الحياة المدنية والاجتماعية
يا الله هل ممكن تكون بتؤدى زكاتك ويوصل الموضوع لكده
طب ممكن مظاهر الترف والثراء توصل لكده
طب يعنى مثلا ساعة يد واحدة مش كفاية موبايل واحد مش كفاية علبة مجوهرات واحدة مش كفاية واللا لازم يبقو اتنين تلاتة ايه المانع ماهى شكلها وايد حلو
ماشى يا بنى ادمين.
يعنى الاعتدال مطلوب فى كل شىء ولازم نفكر واحنا بنشترى الحاجة تلزمنا واللا ايه
وصحيح يا بنات قولولى الشنط اللى بنشيلها دى تفرق ايه عن الماركات طب ما احنا بنشترى الشنطة مثلا قولو بخمسين واللا سبعين جنيه وفى ناس ممكن تشترى لحد 200 جنيه ويطلع عينها معانا وبرضه عايشة وشغالة عادى يعنى احنا بقى اللى مش شياكة ومعندناش عشرة عشرين واحدة واللا الشنط حقها حلال فبتعيش واللا علشان معمول بايد ابن بلدك بتعيش
حاسة انى مش عارفة اوصلكم قصدى اصلى اتكلمت عن الشنط والاسراف والفقر والبذخ يعنى لخبطيطة كده
بس يمكن تفهموا وتفهمونى انا كمان.
تحياتى واحترامى وبحبكم وايد.
هناك 31 تعليقًا:
أول حاجة ألف مبروك لنجاح ميرو وبالتوفيق يا رب و عقبال الشهادة الكبيرة
مصر فيها زى مبتقولى 15 مليون فقير واكيد فيها بردو ييجى 15 مليون رجل اعمال زى ابو هشيمة اللى اتجوز هيفاء ب 500 مليون جنية لو العدد دة فكر يدفع زكاته كان زمان مصر مافيهاش فقرا خالص
بس انا بردو بشوف ناس بتصرف فلوس هبل على حاجتها الشخصية اللى متستاهلش نص التمن اللى دفعوه
وانتى عندك حق من حكم فى ماله ممكن يظلم
لان المال دة أمانة ربنا مديهالنا علشان يسألنا عليها بعد كدة
ماله من أين اكتسبه وفيما أنفقه
تاني حاجة ممكن أحجز شنطتين و أدفع لك على 30 أو40 سنة
اما بقى السلطة اللى اتكلمتيها دى كل واحدة منها عاوزالها بوست لوحده
بس الخلاصة زمان قالو اللي معاه قرش محيره يجيب حمام ويطيره...صح
بس نسو يقولو اوعى تعمل حساب فى قرشك ده للناس الغلابة وللا حتى تعمل حساب لبكرة
ياله.انا بردة شكلي عمالة اخرف
تقبلي مروري
دعاء اهلا بيكى منورة يا ام احمد وشكرا جزيلا ربنا يبارك فيكى وعقبال احمد ونور يارب
وبعدين حاضر من عنيا اول ما نلاقى حد يتبنى موضوع القسط ده هحجزلك معايا
العقل كويس يعنى تبان علينا اثر النعمة اه ماشى لكن اسراف ده حرام
دمتى بخير دعاء
اه يا نونا اسكتى فكرتينى ليه دا انا بحاول انسى جاتهم 500 مليون ع ف ر ي ت ينططوهم(اللهم احفظنا)
فعلا فين زكاة الناس دى ياترى بتندفع ماهى لوكانت بتندفع كان بان على الناس كان اكيد حالهم هيبقى احسن على الاقل هنلاقى مستشفيات نضيفة نتعالج فيها مش ياعينى العيال يتبرعو بمصروفهم ودول عمالين يجمعو الفلوس وناسيين الناس دى
نفسى اكون ظالماهم بس اعتقد ان زكاة المال مبتخرجش كما ينبغى لها ان تكون
مبروك لميرو وعقبال الثانويه العامه يارب و يفرحك بيها،انتى لو اخدتى بالك ان الدول الاجنبيه رغم غناها مبتعملش كده، يعنى استحاله تلاقى البذخ ده دول بيشتروا الفاكهه بالواحده،و مفيش البهرجه فى اللبس و الشنط يعنى يكفى انك تقعدى تتفرجى على فيلم اجنبى هاتلاقى البطله لابسه لبس عادى جدا،مش بيدوروا على احدث موبايل نزل وبكاميرا ولا لأ، مش كل البلد شايله موبايلات حتى عم جون بتاع اللبن كده يعنى ،احنا العرب متخصصين فى الصرف عشان كده احنا بنحوش فى ديون وهما بيحوشوا فى اقتصاد وتنميه
ربنا بيقول وﻻ تؤتي السفهاء أموالكم وهما دوووووووول السفهاء
اللهم المستعان
بيسو بسنت اهلا بيكى يا اختى الله يبارك فيكى وعقبال ما نبارك لك على الزفاف ان شاء الله
لا هما فى الغرب بيحسبو حساب كل حاجة يعنى هياكلو امتى وازاى وبكام وهيكفيهم ايه وميفيضش ولو فاض نعمله تانى يوم ايه ولو اشترو لبس ممكن يلبسوه سنين وسنين وسنين عادى شغال برضه لا بيتخنو علشان محافظين على نفسهم ولو زهقو منه يتبرعو بيه مش يركنوه
ولو اشترو شنطة من دول بتبقى فى العمر مش على طول
الوطن العربى سوق كبير للماركات دى
يلا ربنا يسهل لهم احنا شكلنا هنقر واللا ايه
فعلا اخ احمد ده سفه والعياذ بالله
شكرا جزيلا لمرورك
أنا بقي لما هصدق وأتكلم في موضوع الهوس ده ... الشنط دي حبيبتي وكمان الأحذية وكل اكسسوارات الملابس ... بس البنت الشيك تشيل شنطة شيك... مش مهم تكون غالية ... المنتجات الصينية مخلتش للأصلي طعم .. انا عن نفسي أختار يبقي عندي حاجات كتيرة رخيصة بدل حاجة واحدة بس ماركة
ميمى ميمايه نورتى اه هو انتى منهم طب تعالى جمبى تعالى دا احنا هنتجنن قريب تعالى تعالى
كلامك صح والله تصدقى الشنط بتاعة انجرى جيرل شوفتها بعشرة جنيه يا نهار الجماعة الصينيين دول حكاية
يلا نورتى وادينا عرفنا جزء خفى من شخصيتك الظريفة بس خلى بقالك هيبتدوا يقفشو فينا قريب
اصلنا ملينا البلد
أولا مبروك يا ستى على نجاح ميرو وعقبال كل سنة ويارب تشوفى عيالك دايما فى أحسن صحة وحال بأذن الله - بصى موضوعك جميل أنا معنديش مانع الناس تصرف فى مالها زى ما هى عايزة لان اما بنعمة ربك فحدث - بس بالمعقول وكمان شوية صدقة للغلابة لو كل واحد بس من الناس ديه دفع 500 جنيه كل شهر لعيلة غلبانة والله كل الناس حتبقى عال ما تفتكريش ان الفشخرة ديه برة مصر بس لا وفى مصر ياريت أئمة المساجد فى صلاة الجمعة يتكلموا عن الصدقات ويحثوا الناس عليها بدل ما يكلموا فى كلام لا يمت للاسلام بأى صلة!ويارب أهدى الجميع-
مبروك لميرو يا ماما مازن وعقبال كل سنة يارب وأن شاء الله تشوفيهم دايما فى أحسن صحة وحال
اهلا منى ومرحبا نورتى المدونة وكل المدونات اللى حواليها
الله يبارك فيكى وعقبال نجاح اولادك ده الاهم
كلامك مضبوط جدا فقد نسى كثير من الناس الصدقات واهملو فيها ده علاوة على نسيان الذكاة برضو والله اعلم
دمتى اختى بكل خير وسعادة
ده الي معاه قرش محيره او مش تعبان فيه اصلا بصي كلما زاد الفقر قوي اعرفي ان عدد الاغنياء زاد برضو واعرفي ان غناهم غنا فاحش وكبير جدا طبعا دول لا بيطلعوا زكا ولا حاجه لان لو حتى منهم اقل من نصهم بيطلع زكا كان مافيش فقراء يلا ربنا يرحمهم ويرحمنا وبكره ربنا هيحاسبهم على كل ده
ازززيك يامامتي
أنا آسفة والله أتأخرت خالص :(
بس مكنتش دخلت طول النهار ومشفتوش غير من شوية
ألف مبرووك لميروو وعقبال يارب لما تبقي دكتورة
أو أي حاجة جميله هي تتمناها وتكون بتحبها إن شاء الله
ولوسمحتي خديني جنبك كده :)
أصل انا مجننه ماما في حكايه الشنط والشوزات دي ^^
بتقولي أن أنا أم الشنط وال ... شوزات يعني هههههههه
بس بصراحة سفه فعلا الاسعار دي حتي حرام ليه يعني
يعني بتمن طقم كامل أشتري شنطة ياحلاوة طيب ماهي كده كده ليها عمر معين
وبعدين شوية والواحد يزهق ويحب يغير اصلا
وبعدين أنا بحب كل طقم بشنطته دي هتبقي ثروة قومية هههههههه
وحشاني مووووت يامامتي وبوسيلي ميروو كتيير وابقي قوليلي بتدخلي امتي ؟؟
اختى الحاسوباتية اهلا بيكى منورة مدونتى العزيزة
بصى موضوع الذكاة والصدقة ده حاسة انه مش بيحس بيه الا الانسان البسيط او اللى تعب قوى قوى علشان يكبر علشان كده بيكون حريص عليه
اما اللى ربنا فتح عليه من وسع ورزقه كاختبار ليه وفشل فى الاختبار ده اكيد اكيد هيتحاسب
شكرا لكى على مرورك الكريم
قلب يا دودى ايه ده انتى والحاسوباتيه سهرانين لدلوقتى امال كمان شهر لما الحر يزيد هتعملو ايه
ههههههههههههههههه
ربنا يخليكى ويبارك فيكى ويتحقق لميرو وكل البنات ما يتمنوا يا رب
وبعدين يا اختى ردك فى اى وقت له نفس اهميته عندى مفيش اسف ولا حاجة
يهمنى بس تواصلك معى فى اى وقت اختى العزيزة
شوفى يا ستى انتى ادام انتى منهم خلاص يبقى تستخبى اليومين دول بيقفشونا دلوقتى علشان مش مساندين الازمة الاقتصادية ههههههههاى
وبعدين يا دودى مهما اشترينا يا اختشى هنشترى ايه يعنى يا ولداه دا تلاقيهم بيبصولنا باشمقناط على كده
يلا حلال عليهم والف حلال علينا اللى عندنا
ومالها شنطنا اشتكت ماحنا بنهبدها كل هبده وهبده وشغااااااااااااااااااااااااله
اهلا كيارا شكرا لمرورك الطيب
ما هو انا جزء من كلامى هو هل شنطنا دى مش مقضية الغرض برضه ولا لازم تبقى غاليه كده
السلام عليكم
اولا نحن وترف العرب في مقارنة ظالمة احنا فين وطرف العرب فين تعالي شوفي اهل ابوظبي بيجوا مصر عشان يخدوا وحة بشنطة هدومها ويدفعوا فيها شيء وشويات
اما عن الشنط اللي فاتي انا شوفتها كانت شنط هند
وغيرها جميلة والشنط ده بردةحلوة بس انا بعد الزواج ولسة الشنط اللي عندي جديدة من قلة الخروج
باختصار بوفرله ومبخرجش الا كل سنة مرة
تحياتي
مبررررررررررررررررررووووووووووووووووووك ل ابنتك الغالية هي في سنة كام
يارب دائما تشوفيهم في افضل حال
اهلا اختى ذكرى الله يبارك فيكى شكرا جزيلا
هى فى 2 ابتدائى وطالعة تالتة شهادة يا ناس
هو انتى برضه يا ذكرى عندك قلة خروج اه يانى طب تعالى جمبى انتى كمان
ياحبيبة قلبي انت عندك تلاتة ربنا يخلي يارب وبسم الله ما شاء الله
لكن انا معايا واحد وقلت تووووووووووووبة وخلاص
مش عارفة ازي بتجربوا تاني وتالت
ربنا يبارك فيهم
امين
ياريت تخلي بالك ويكونوا نجحيين في المدرسة وفي دروس حفظ القراءن الكريم
بارك الله فيهم
ربنا يخليكى اختى ذكرى بس هما اتنين بس الحمد لله ومفيش اى نية لتكرار التجربة دى تانى ابدا كده حلو قوى نحمد ربنا
بس التالت بتاعهم هو بباهم بعتبره ابنى برضه
ربنا يخليهم لى هما التلاتة
ميرو عندى فى سنة تانية وما شاء الله ربنا يحميها
واستاذ تحفيظ القرآن هيبتدى معاها قريب ان شاء الله
هى عندها استعداد وهى اللى طلبته بنفسها
هى يعنى جت على الشنط العرب بيضيعوا فلوسهم على حجات هبلة
الناس فى الخليج بيسرفوا فلوس ببذخ شديد على حجات ملهاش اى لازمة لو فية تدين بجد مكنش بقى فية فقير فى العالم العربى بس نقول لمين
اخى يوميات شاب منوفى هى بس مجردمثل صغير وما خفى كان اعظم
وفعلا نقول لمين
شكرا جزيلا
بارك الله فيكي يا مامة مازن يا جميلة
جايز ناس كتير بتقول من حكم في ماله ما ظلم وجايز الناس حرة تشتري بيربيري ( صح كده ) او اي حاجه بملايين بس الفقرا دول مين ليهم؟ ربنا حيسألنا عنهم ..... يارب يوفقنا للخير والصلاح
جزاك الله كل خير
اشكر اهتمامك لزيارة الرابط
دمتى بخير
إرسال تعليق