آااااخ يا عمودى الفقرى

السلام عليكم ورحمة الله وبركاته

الحمد لله والشكر لله من قبل ومن بعد

عمودى الفقرى او عمودنا كلنا يعنى متكون من 33 فقرة منها7عنقية و12 فقرة صدرية و5 قطنية و5 عجزية و4 عصعصية

العنقية والصدرية والقطنية متحركة وكل منها يحرك المنطقة الموجودة بها اما العجزية والعصعصية مندمجة وغير متحركة

قوم ايه بقى لو شيلت حاجة تقيلة بطريقة غلط ممكن تعمل اصابة لعمودك الفقرى ده

يعنى فى مزق او التواء او انزلاق غضروفى او انزلاق فقارى

اسالو كل الناس مين هما اجدع ناس هما المصريين

يعنى تلاقينا ميهمناش نشيل تقيل ونغير نظام البيت ونغسل وننضف ونهبد المراتب ونغسل الحيطان والسجاد مش عاجبنى عايز يتغسل وديه مغسلة لا لاممكن

طيب بنعمل تمارين او مهتمين بالرياضة لا رياضة مين دا كفاية شغل البيت والجرى ورا العيال والمناهدة معاهم

آااخ يا عمودى الفقرى الدكتور قال فقرة اتزحزحت وهترجع كل حاجة لوضعها الطبيعى فى خلال 3 شهور امشى ع العلاج وارتاحى وهنعمل علاج طبيعى وكله هيبقى كويس

ممنوع تشيلى تقيل ممنوع تقفى كتير ممنوع توطى ممنوع تزحزحى ممنوع ممنوع ممنوع

ايه العسل ده طب ما عمل بيات شتوى وخلاص

الدكتور ده مش مريحنى اصلا

اااااه افتكرت بابا ربنا يعطيه الصحة وتعبه والعمليتين اللى عملهم فى ضهره ومفيش فايده برضه دائما يرد عليه التعب

هو الموضوع ده وراثة واللا ايه طب ورثت الضغط المنخفض بتاع جدتى ماشى ورثت تعب الاذن والجيوب الانفية بتاعت بابا والعيلة كلها

ماشى بس آااااه يا عمودى الفقرى ربنا يستر احسن العيلة فيها بلاوى والحمد لله

طيب بالبحث البسيط كده ع النت ما اهو لازم افهم و الدكاتره معندهمش وقت يفهمك حالتك كفايه انه بيكشف عليك يعنى هيقطع نفسه

المهم احد المواقع كان فيه رد على استفسار عن الموضوع ده

ما يجب عمله وما لا يجب عمله الجلوس: يجب الجلوس بطريقة مستقيمة مع المحافظة على استقامة الظهر واستخدام وسادة صغيرة خلف الظهر ويجب تجنب الجلوس على أثاث منخفض أو على الأرض فترات طويلة أو الجلوس بشكل منحن.

الانحناء: يجب ثني الركبتين والحفاظ على الظهر مستقيماً عند التقاط الأشياء من الأرض وتجنب الأعمال التي تتطلب الانحناء للأمام لفترات طويلة مثل الكنس والزراعة وغير ذلك.

رفع الأثقال: يجب المحافظة على استقامة الظهر عند الرفع والحمل وتجنب رفع الأشياء الثقيلة وحملها على قدر المستطاع.

النوم: يجب استخدام مرتبة متوسطة الصلابة.

السفر بالسيارة أو الطائرة: يجب المحافظة على استقامة الظهر واستخدام الوسادة الطبية خلف الظهر ومحاولة الوقوف والمشي كل نصف ساعة. من موقع myth-x4ever

للاسف الشديد معندناش ثقافة الرياضة وممارسة الرياضة رغم ان الرسومات والنقوش الفرعونية تبين ان جدودنا كانو رياضيين

وتلاقى فى تاريخنا الاسلامى دائما حث على ممارسة الرياضة ف عمر بن الخطاب رضى الله عنه كمثال قال (علمو اولادكم السباحة والرماية وركوب الخيل )

طيب ليه نسينا وتناسينا الرياضة هل لان المجتمع زمان كان زراعى بحت فكانت كل حياتهم وممارستهم تمت بصلة للرياضة فمبقاش مهم نمارسها منفردة فنسيناها جيل ورا جيل

طب ليه دائما نشجع من بعيد لبعيد ومنحاولش نتعلم

وليه اهلنا رفضو طموحنا فى اننا ننضم لاى لعبة رياضية واحنا صغيرين حتى كانت طلعت اجسامنا وعضلاتنا اقوى

وليه فكرة اننا كبنات وستات نروح الجيم فكرة مش مقبولة يمكن علشان اقرب جيم بعيد قوى واللا علشان بيبقى للستات يومين بس فى الاسبوع واللا علشان المدرب راجل فمينفعش اصلا خالص باى شكل

طيب ليه مبنعملش رياضة فى البيت مش لازم جهاز رياضى ماهى العجلة الرياضية الثابثة معدية ال500 جنيه والمشاية معدية 1500

طيب ما احنا ممكن نعمل رياضة واحنا فى مكانا واكيد على المدى هتجيب نتيجة مش لازم جيم يعنى ولا اجهزة

طيب واللى بتشتغل لازم تحاول تمشى وهى راحة وهى راجعة اى حاجة تطلع السلم مش لازم اسانسير يعنى

يعنى قصدى اننا نحاول نحافظ على جسمنا وصحتنا ومنستهترش ونقول اهى ماشية طيب لما تقف والعياذ بالله هنعمل ايه

قال رسول الله صلى الله عليه وسلم

(يصبح على كل سلامى من احدكم صدقة، فكل تسبيحة صدقة،وكل تحميدة صدقة،وكل تهليلة صدقة ،وكل تكبيرة صدقة،وامر بالمعروف صدقة ،ونهى عن المنكر صدقة، ويجزىء من ذلك ركعتان يركعهما من الضحى)

صدق رسول الله صلى الله عليه وسلم

سبحان الله وبحمده سبحان الله العظيم ربنا لك الحمد والشكر كما ينبغى لجلال وجهك وعظيم سلطانك

متعكم الله بالصحة والعافية جميعا وابعد المرض عنكم وشفى المريض منكم فهو سبحانه وتعالى ولى ذلك والقادر عليه