يااااااارب طمن خوفنا

يارب خليك معانا ملناش غيرك يارب
يارب متنسناش وتم جميلك علينا يارب
يارب بلدى يارب
يارب بلدى يارب
يارب بلدى يارب

صوت الحرية بينادى

علشان بلدنا وولادنا

بسم الله الرحمن الرحيم
***************************
السلام عليكم ورحمة الله وبركاته

السلام والتحية الف الف مرة على كل مصر

حاسة انى مش عارفة اكتب حاسة انى مش عارفة اعبر حاسة انى مش عارفة اكتب كلام يفهمكم اللى جوايا
مش عارفة ابتدى بايه مش عارفة اقول وحشتنى الكتابة هنا واللا وحشنى الناس اللى عرفتهم هنا واللا وحشتنى نفسى اللى بلاقيها هنا

مش عارفه همسح الكلام تانى واللا مخى هينظم الكلام اللى فى قلبى ويطلعه
انا فرحانه وزعلانه انا مطمنه قوى وخايفه عندى امل وبرضه خايفه وبرضه عندى امل كبير كبير جدا

انا فرحت بالثورة جدا وانا مصرة انها ثورة هى مش حركة ولا تظاهرة ولا محتجين ولا مؤيدين ولا معارضين ولا اى مسمى تانى غير ثورة

فرحت بيها لدرجة ان كلمة فرحة نفسها متقدرش توصف احساسى فرحت بيها لدرجة ان كلمة الفرح نفسها بقى ليها طعم ومعنى تانى

عيش حرية كرامة انسانية
حرية كرامة عداله اجتماعيه
ده كان الشعار ده كان الطلب ده كان الهدف ده كان الطموح
هوده بس كان الطلب
طلب عادل طلب انسانى طلب سلمى
طلب مفيهوش عنف طلب مفيش فيه اى خراب بالعكس ده كان طلب بيبنى بيبنى انسان بيبنى كيان
طلب بسيط طلب انك تعاملنى انسان طلب انك تقوم بخدمتى لان موقعك بيؤهلك لكده طلب لمصر جديدة طلب لوطن جديد يقوم على الكفاءة مش المكافأة طلب لوطن يشجعنى يشجع ولادى طلب ينمى مهارات ويفجر طاقات
وطن يكتشف ابنى يكتشف بنتى وطن يحترمنى ويحترم ولادى وطن يعتبرنى مواطن لى حقوق وعليا واجبات مش مجرد رقم فى كام مليون نسمة
وطن تعرف تتنفس فيه

علشان اكون صريحة انا كنت بدعى يوم 25 يعدى على خير استر يارب استر يارب استر يارب
كل يوم كان دعايا بيزيد وكل يوم كنت بقول يارب وحياة حبيبك النبى محمد تسترها مع الناس اللى فى وش المدفع دى كنت خايفة جدا على بلدى قبل كل شىء خايفة قوى
وصحيت على جحيم يوم الجمعة 28 كان يوم جحيم ليه كل ده ليه ليه ليه ايه اللى حصل مين اللى باعنا وباعنا ليه ولصالح مين وتمنا بالنسبه له ايه يا سواد يا سواد يا سواد

كل اللى حصل واللى جرىواللى هيحصل بعد كده مفتاحه يوم الجمعة دى المفتاح الحقيقى للرؤية موجود يوم الجمعة دى
بعد الخطاب الاخيرتعاطفت زى ناس كتير جدا وبكيت كمان خلونى اكون صريحة معاكم
حتى اللى حصل يوم الاربعاء قلت انه ناس عادية اتعاطفوا مع اللى حصل وبعدين مش عاجبهم وقف الحال فقالوا يلا نروح نمشى الناس دى خلاص اللى عايزينه هيتعمل وخلاص

وبعدين قعدت اسمع واشوف البرامج واسمع الناس اللى بتشرح الدستوروبتفهم الناس ده كذا وكذا لقيت ان تعديلات الدستور متفصله لشخص بعينه وان فى ايده انه يصلح ويعدل ويعمل وبتاع ويقولك انه هياخد فى المجلس 70 يوم
هنا بس عرفت انهم مفيهموناش
هنا بس عرفت ان الرسالة موصلتش
هنا بس عرفت ان موت الناس لم يؤثر
هنا بس فهمت ان الناس اللى جرحت وسال دمها دى لم تؤثر
هنا بس تاكدت انهم مش معانا ع الخط

ولقيت ان الثورة بتتشوه بتتصبغ بالخيانة والعماله بتتصبغ بالاسود رغم انه بيضا ومنوره زى نور الشمس
بتتشوه ليه مش مخلينا حتى نستمتع بيها ليه حتى مش عايزنا نتشبث بالامل ان مستقبل ولادنا احسن ليه

ليه مش حاسين اننا بقينا فعلا ناس تانية ليه مش واصلهم انها ثورة على الظلم والروتين والمحسوبية والاهمال والسرقة ثورة حتى ع البلطجية
ليه مش فاهمين انها ثورة من القلب القلب اللى يا ما حزن وشال واستحمل
ليه مش فاهمين انها ثورة حتى على نفسنا ليه مش عارفين ومش مقتنعين بقدرتنا على الحياة وعلى البناء
ليه مش مقدرين الطاقة اللى فينا
ليه بيكبتونا ليه بيحبطونا ليه

ايه الارقام العجيبة اللى انا بسمعها دى ايه الملايين والمليارات والدولارات واليورو والحاجات اللى انا بسمعها دى
فين الفلوس دى عملوها امتى حطوها فين جابوها منين كانت جايه لايه وراحت ازاى باعو ايه وخدوا ده بدالها باعونا لمين وفين وازاى

يا لهوى ده فى بيوت اتخربت بسبب تسريح العمالة وبيع الشركات وحتى ما ادهومش تعويض عليه القيمة
وفى الفلوس دى كلها
يا لهوى ده العيال كانوا بيدفعوا مصروفهم علشان نبنى مستشفى 57357 وفى كل الفلوس دى فى البلد
يالهوى يعنى اتبرع ولو بجنيه وفى كل المليارات دى يا لهوى

انا مش عارفة اقول ايه واللا ايه مش عارفه اعيط واللا اصرخ واللا الطم واللا افرح بالثورة
انا مش عارفة اخاف برضه واللا يزيد الامل واللا اروح فين واللا اعمل ايه
انا حاسة ان دموعى مخنوقة فى زورى انا حاسة انى عيانة انا حاسة انى خفيت من كل حاجة وجعانى

انا جوايا كل لخبطة ممكنه
لكن جوايا يقين واحد
ان دى ثورة مش احتجاج

قالوا

قالوا:

النملة مواطن مثالى ،لأنها تضع مثلا مصلحة الجماعة فوق مصلحة الفرد.

قطرة ماء تساوى حياة

بسم الله الرحمن الرحيم

دائما وابدا من متطلبات الحمد والشكر لله الحفاظ على النعمة

والماء نعمة غالية قوى قوى قوى لانها باختصار تساوى حياة يعنى الانسان ميقدرش يعيش من غيرها اكثر من 3 ايام وطبعا لازرع ولا حرث من غيرها يعنى با ختصار السبب الاول اللى قامت عليه الحضارة وهو الماء لو مش موجود يبقى مفيش حضارة يبقى مفيش حياة.

اتقفنا يبقى انا لما بعلم ولادى انهم يحافظوا على الماء ده ويستخدموه بحرص يبقى كده بحمد ربنا وبشكره على النعمة دى بشكل من اشكال الحمد .
طب مكافأتى على الحمد والشكر عند الله رب العالمين طب ومكافاتى على ترشيد الاستهلاك كمواطن هى ايه انى متبقاش عندى أزمة

طيب دلوقتى الموضوع ربعه فى ايدى وتلات ارباعه فى ايد الحكومة ازاى يعنى انا دلوقتى بطالب الحكومة انها تحافظلى على المياه دى انا قومت بدورى وعملت ترشيد استهلاك علشان انا وغيري وغيرى نحافظ على نسبة الاستهلاك اللى تخلينا نقدر نحافظ على النسبة المقررة لينا كدولة .

طيب دلوقتى انا بقى لما اسمع تصاعد الازمة بين دول المنبع ودولتى المصب المفروض شعورى يبقى ايه وان دول المنبع متكاتلة ضد دول المصب يبقى المفروض برضه اعمل ايه دلوقتى .

ودول المنبع دول مين بقى " بوروندي ورواندا وتنزانيا وكنيا وجمهورية الكونغو الديمقراطية وأوغندا وإثيوبيا وإرتريا " وتتزعمهم اثيوبيا شوف الزمن .

ودول المصب هى( مصر والسودان)

طيب ايه اللى عامل الخلاف هما 3 نقاط:

1-الإخطار المسبق قبل قيام أي مشروعات .


2-توفير الأمن المائي للدول .


3-التصويت على القرارات بالإجماع وليس بالأغلبية.



ورغم انه فى اتفاقات من اوائل القرن الماضى تنظم الموضوع الا ان كل ده تقريبا كده ملوش لازمة فى الازمة دى ومخزوننا من المياه فى بحيرة ناصر يكفى ل3 سنوات


يعنى مش عارفة نخاف على ايه واللا ايه ونقلق من ايه واللا ايه حسبنا الله ونعم الوكيل يعنى احنا سبنا المكان الوحيد اللى المفروض علاقتنا الدبلوماسية فيه تبقى على احسن ما يكون ورحنا عمالين نجرى يمين وشمال وتطبيع ونيلة ونصالح ناس على ناس ونراضى ناس بلا نيلة


المهم دلوقتى اقروا فى الموضوع زى ما انا هقرا فيه ولازم نتابع كويس عايزين نشوف حكومتنا الموقرة هتعمل ايه فى المصيبة دى (قالوا اللحمة غليت قولنا فى داهية الحمد لله اى اكل بيسد الجوع مبيفرقش معانا المصريين رافعين شعار هنعيش يعنى هنعيش بأمر الله لكن الميه بقى هنعمل فيها ايه دى)


شوفوا بقى هنا فى المحيط هتلاقوا مقالات جيدة وفيها ايضاح جيد جدا للموضوع

وربنا يستر

الوحش

السلام عليكم ورحمة الله وبركاته

(دى مخلوقات الله السابحة فى الكون)كانت كلمة حماى الله يرحمه ليا لما كان يلاقينى اخاف من حاجة معينة واقصد بالحاجة دى المرعب والمخيف والعوووووو واليع جدا الفأر لا وايه كنت بحكيله انى بخاف يعنى مكنش موجود فعليا
طيب ايه العمل بقى دلوقتى وهو موجود فعليا↓

ايون الفأر دخل عندى فار يا ناس اروح فين واجى منين اعمل ايه طب اسيب البيت واروح عند ابويا لحد ما يطلعوه من البيت واللا ايه طبعا هو صغير جدا يعنى لسه مولود على حد وصف زوجى هو اكيد دخل من الباب لما ميزو افندى كان بيخرج العجلة علشان يلعب فى الفراندة شوية مش قضيتى دخل منين انا قضيتى يخرج دلوقتى يا خرابى بقاله فى بيتى اكتر من 12ساعة دلوقتى معقول معنى كده انه انتخ هنا

لا وايه تلاقيه بيتمرن ملاكمة دلوقتى وفى اعتقادى انه زمانه كبر دلوقتى ومش هيخرج بالساهل ابدا

طب وايه العمل دلوقتى دول حتى عملوا صلح مع القطط

طب وبعدين واصبحوا اكثر ذكاء ودهاء

شوفوا بقى قفلت عليه الاوضه اللى هو فيها وبعدين اشتريتله لزق فئران وظبطهوله مع قطعة طماطم على كرتون مقوى يعنى اتبعت الارشادات تمام وتخيلوا انى عملت كل ده لو حد حكى لبابا لا يمكن يصدق ابدا لكن الظاهر ان الامومة اللى جوايا تغلبت على احساس الخوف اللى عندى وشجعتنى احمى العيال من هذا الوحش المرعب اليع ده

ونظرا لاننا نمنا كلنا امبارح فى اوضه واحدة يعنى الفار انتصر علينا واحتل حته من الشقة لذلك مش هسكت ابدا على الاحتلال ده وهتصل باخويا ينقذنى او اختى الفدائية الصغيرة وتيجى علشان نحرر بيتنا من هذا المعتدى الوحش المرعب اليع

دعواتكم بالنصر

اليابان ☼

بسم الله الرحمن الرحيم

اليابان معجزة حقيقية ودلالة على الارادة البشرية وان الانسان فيه من العزم والتصميم على انه يكون ويعمل حاجات صح فى حياته

علميا واخلاقيا وماديا واجتماعيا وثقافيا وووو

وكدولة وبلد دلالة على ان ممكن من تحت الرماد تطلع شجرة ويطلع عملاق

بعد ما ضربت بالقنابل النووية فى هيروشيما ونجازاكى من اكتر من 60 سنة شوفوا دلوقتى ايه هى بلد ليها كل الاحترام والحب بلد ممكن تبقى المثل الاعلى اللى نتحاول نتعلم منه

دى فيديوهات حلقة المعجزة اليابانية للدكتور \مصطفى محمود (رحمة الله عليه) وطبعا هى حلقة قديمة بقالها سنييييييييييييييييييين طويلة لكن تحسه بيتكلم بلسان حالنا اليوم

احنا يمكن فاكرينه كويس لكن كتيييييييير من شبابنا المصرى والعربى مش عارفينه اتمنى تعرفوا عنه وتقرأوا له وحتى دوروا على حلقات برنامجه القيم على الانترنت وتشوفوها وقتكم مش هيروح هدر☺

لحظات لا انساها ♥ مازن

السلام عليكم ورحمة الله وبركاته

الحمد لله والشكر لله على نعمه الكتير قوى التى لا تحصى ولا تعد من ضمن نعمه الكتيييييييييييييييييير قوى قوى قوى عليا انه اراد بحوله وقوته انى أكون أم

أم كلمة ونعمة غالية قوى الحمد لله والشكر لله يارب ارزق كل اللى نفسه فى الذرية ومتحرموش ابدا يارب واجعلها ذرية صالحة يارب

اى ألم جسدى او نفسى قد يصاحب الست الحامل او حتى وقت الولادة نفسه يعتبر لا شىء او تمن بخس للسعادة اللى هتحسها لما تشوف وليدها وتلمسه لاول مرة.

أنا كامرأة لم اشعر بشعور اخر فى الدنيا يوازى جمال لحظة رؤيتى لولادى بعد افاقتى من التخدير(اصل حضرتى بجيبهم قيصرى:) ) اول ما بفوق او بتبتدى الافاقة وابتدى اسمع اصوات وبتبقى مجسمه جدا على فكرة فظيعة وابتدى احاول افتح عنيا وبتبقى كأن شبورة او ضباب كده يا دوبك باين منه ضوء بسيط واسمع زوجى وأمى وبابا وأحاول أتكلم واغيب تانى وافوق تانى واسمع صوتها برده بتعيط واحاول اتكلم واحاول واحاول لحد ما اقول بنتى بنتى وكانت اول كلمة اقولها لا حول ولا قوةالا بالله كلهم ضحكوا طبعا عليها وافتكرونى بهلوس قولت حطوا راسها على خدى وساعتها عيطت والجرح وجعنى قوى لكن كنت سعيدة جدا جدا جدا انا قلت ساعتها لا حول ولا قوة الا بالله لانها حاجة تبين مقدرة عظيمة لخالق عظيم ان يعيش بنى آدم انسان جوا بطنى 9 شهور و بعدين يخرج للدنيا و يتنفس ويحس كله بفضل الله

كنت حاسة كأنى شفت معجزة وهى كده صحيح معجزة الهية سبحان الله كانت جميلة قوى وصغننه قوى صحيح كان وزنها مثالى لكن كانت نونو جدا جدا وقرعة جدا جدا جدا ههههههههههههههه

أما يوم ولادة مازن نفس كل حاجة الا انه فى احساس تانى خالص حسيته اول ما شفته فى حب عجيب ربطنى بيه

صحيح ببقى مرتبطة جدا بالجنين اللى فى بطنى ده فى المرتين وبكلم جنينى ده كانه حاضر بين ايديا لدرجة ان امى كانت بتعتبر ان ده نوع من الهبل برضه ههههههههههههه بس لما شوفت حبيبى ده لاول مرة حسيت ان فى حاجات حلوة كتير قوى جايه فى حياتى صحيح فرحت قوى بميرو لما ولدتها ومازالت صديقتى رقم واحد لكن مازن حسيت ساعتها حاجة تانية يمكن علشان تانى مرة فكنت معتادة ع الالم فنسيته وركزت معاه هو بس مش عارفة

على قد تعبى فيه لكن كنت حاسة بسعادة غامرة وساعتها عرفت يعنى ايه سعادة غامرة يعنى ايه السعادة تغمر الانسان

والحنان اللى حسيته فى حضنه غير عادى كنت حاسه انى غير اى أم كنت سعيدة جدا جدا جدا حتى معتمدتش على اخواتى ربنا يخليهم زى ما كنت معتمدة عليهم اعتماد كلى فى مريم خاصة خلال الاسبوع الاول ربنا يجازيهم كل خير .كنت بقوم بالليل لرضاعته او تغيير ملابسه سعيدة جدا مكنش عندى نفس التوتر اللى كان عندى فى مريم يمكن علشان كنت جربت مرة فالتانية سهلة لكن الاكيد لانه كان هادى يعيط بس لما يكون فى سبب يعنى يا جعان يا هيغير الكادليز يا مغص يا صحى وعايز نور هههههههههه يعنى اللمبة تشتغل يسكت هو كده تمام

ومرت الايام كده رغم اى صعوبة الا انها سهلة مش عارفة ليه .

رغم انه مر ب3 مواقف لحد دلوقتى كل واحد اصعب من التانى مرة عمليه فى عينه الجميلة كانت زرقاء اللون وجميلة خالص (هى بالمناسبة دلوقتى بقت رصاصى كده) ومره عمليه فى بطنه الا انى عمرى ما حطيت فى دماغى انه حسد ولا كذا ابدا بحس انه ربنا سبحانه وتعالى بيعرفنى قيمة النعمة دى قوى وبيبعتلى رسالة انه تخيلى انك معندكيش النعمة دى وانك دايما تحمدى ربنا وتدعى للناس كلها ربنا ميحرمهومش من قرة العين يارب .

هو شمس دنيتى

وقمر حياتى

هو الواد صحيح دلوقتى بشد فى شعرى من شقاوته وجنانه الا ان السمة المميزة له هى الحنان والكلام الجميل يعنى يطلب الحاجة بادب يقول ممكن يا ماما كذا صحيح لحوح بس دايما بادب ومثلا عملتله العصير اللى عاوزه مثلا يشربه وييجى يجيبلى الكوب ويقولى شكرا يا ماما ربنا يسعدك قلبى ساعتها يرفرف واقوله ربنا يسعدك انت يا حبيبى واختك وبابا يارب

لما اتولد فى سعادة كبيرة ملت الدنيا وفى مشاكل كتير لناس اتحلت وفى رزق كتير جه لناس بشهادة الناس دول وش خير علينا كلنا

هو فاكهة اى قعدة (مين يشهد للعريس) بس ده صحيح فعلا والله

فى قعدة تهييس ستاتى خطبتله هنا بنت اختى لكن حاسه انه ميال للست اميرة بنت اختى التانية دايما بيشاكلوا بعض وفى نقار ودايما فى اتفاق برده ودى حاجة قلقانى اصل البت شايفه نفسها ومش هعرف اعمل عليها حما ههههههههههههههههه

علشان أكلمكم على مازن بالذات فى حياتى محتاج اكتر من بوست فاسمحولى بين حين واخر هكتب عنه لانه فعلا اكبر حب فى حياتى وبرتاح نفسيا جدا وبتملى البسمة قلبى قبل وجهى لما اتكلم عنه

ربنا يخليه هو واخته وباباه ويملا حياتهم وحياتكم سعادة ولا يحرمكوش ابدا من اللى بتحبوهم آمين يارب العالمين

من سنة وشهر و14 يوم

بسم الله الرحمن الرحيم
بالتأكيد الأكيد انكم جميعا وحشتونى جدا جدا لكن الظروف كلها كانت مش تمام حتى هذا الجهاز الذى اكتب اليكم من خلاله تقريبا عليه عفريت

المهم انا كنت بكتب كتير جدا ومكنتش بعرف ارسل حاجة لكن معلش حتى البوست ده كتبته من يومين لكن برضه معرفتش ارسله لان عفريت الجهاز كان حاضر المهم والاهم انه يارب تكونوا بالف الف خير واسيبكم مع البوست ده

وهو احتفالا بمرور سنه وشهر و14 يوم على بداية حياتى فى حياة بكل ما فيها :

من سنة وشهر و14 يوم بالتمام والكمال كانت بدايتى هنا فى المدونة
كنت بجرب مش اكتر كنت عايزة اكلم نفسى بصوت عالى شوية يعنى اغير شوية فى حياتى وكنت عارفة انه هيبقى تغيير ايجابى اكيد باذن الله
ولما ابتديت اقرا مدونات باللغة العربية (لانى مكنتش بقرا الا مدونات باللغة الانجليزيةلناس فى بلاد تانية بعيدة خالص )حسيت ان الدنيا مش سودة قوى يعنى لسه فى امل لان فى ناس لسه بخير وفى تفكير سليم لسه فى دماغ الناس وان لسه فى ناس تعرف الاصول والواجب والعادات والتقاليد وان لسه فى ناس بتحاول تغير وان كانت بتبدى بنفسها او حتى بتصلح من نفسها بس حتى فده حسسنى بالامان وان ممكن ولادى لما يكبروا متبقاش الدنيا وحشة قوى مش هتبقى سودا فى كحلى لا ممكن تبقى ابيض فى اسود عادى وده شىء مريحنى لان ساعتها بامر الله هيختاروا الابيض وغيرهم هيختار الابيض وساعتها هتبقى مساحة الابيض اكتر من الاسود وده مريحنى اكتر واكتر

من سنة وشهر و14 يوم مكنتش اتخيل انى هبقى متغيبة عن المدونة الفترة دى كلها ومكنتش متخيلة كم اللخبطة واللعبكة والشقلبةوالكلكعة والاحباط والاكتئاب ده هيكون فى حياتى وحياة اللى حواليا وبقصد باللى حواليا عائلتى الكبيرة فتلاقى احباطات على مستوى العمل لفلان وفلان وفلان ومشاكل اجتماعية عند فلان وفلان وفلان ومشاكل صحية عند فلان وفلان وفلان وفلان وفلان وفلان وفلان و............

غير الاكتئاب اللى بيلذق فيا طول فترة الشتا والبكاء اليومى لاقل كلمة حتى لو ابنى قالى انتى حبيبتى قوى بيخلينى اعيط يعنى مش ممكن لدرجة ان العيال بقوا كل يوم يقولوا لبعض تعالى نضحك ماما ويعملوا حركات ويغنولى بحب الناس الرايقة علشان اضحك ربنا يخليهم يارب لانهم برضه اصحابى قوى زى اخواتى البنات هما دول الامان الوحيد فى دنيتى وكل ده جوايا ميعرفش عنه حاجة الا اختى الصغيرة هى بس اللى تعرف ان نفسيتى وحشة خالص لانى مينفعش اقول لامى هتفتكر ان انا وجوزى زعلانين ومينفعش اقول لجوزى او حتى ابين لانه هيفتكرنى باتهمه بالتقصير فى حاجة فبريح نفسى من كل ده واعيش على كنبتى المفضلة ويبقى الشاى صديقى فى المرحلة دى ولان اختى لو قعدت اضحك 30 يوم متواصل علشان متحسش بحاجة برضه هتحس ان فى حاجة مش تمام فبقولها لانها هتبقى متفهمه يعنى ايه الاحساس ده هو احنا كده ربنا خلقنا كده واتمنى نفضل كده لحد آخر يوم فى عمرنا

من سنة وشهر و14يوم بدات افهم حاجات كتير وناس كتير بدات ارجع لنفسى اللى كنت نسيتها من فترة وانشغلت عنها بالبيت والولاد وضغوط الحياة ومحاولات ارضاء جميع الاطراف فلقيت ان مش لازم ارضى جميع الافراد المهم انى ارضى اهم الافراد وارضى نفسى

من سنة وشهر و14 يوم لقيت مكان سحرى بخرج منه لعوالم تانية موازية لعالمى ممكن تتقاطع فى نقطة وممكن تفضل موازية لعالمى لكن فى النهاية كل العوالم دى مشابهه كتير لعالمى وفيها كتير من عالمى وبتكمل عالمى وبتثرى هذا العالم الصغير اللى بعيش فيه


متشكرة جدا جدا لكل اخواتى اللى سألوا عليا ربنا يخليكم للى بتحبوهم ويخلي لكم اللى بتحبوهم ولا يحرمكوش ابدا من راحة البال آمين يارب العالمين

ساعات قليلة على عام جديد

السلام عليكم ورحمة الله وبركاته


تحية طيبة وسلام من القلب


اخباركم ايه جميعا يارب تكون احوالكم كلها بخير واحوال اسركم الكريمة كلها فى احسن حال يارب





اشكر جدا سؤالكم وتساؤلكم عن غيابى وعدم تواجدى بين صحبتكم الكريمة فترة طويلة


بعتبر من احسن الحاجات اللى حصلت فى حياتى عموما وبالاخص 2009 هى المدونة دى اللى خلتنى قرأت لناس وعرفت ناس وحاسة انى عشت مع ناس اصبحوا هم كل اصدقائى الان ويكفينى حتى انها تكون صداقة بالمراسلة على صفحات المدونة .


احلى ورد ابيض ليكم كلكم



صراحة كنت كاتبة كلام تانى فى البوست ده بس مسحته لان كان كلام كئيب ومكتئب ويجيب اكتئاب فخلاص ما علينا احنا ولاد النهاردة .

2009 عادى زى اى سنة مليانة احداث حلوة ع المستوى الشخصى واحداث مش ولابد
وعلى مستوى الوطن مش فاكرة الصراحة حاجة تسر وتعمل بهجة عالية واهو الحمد لله لسه عايشين ومصرين نعيش شعب معندوش دم
وعلى المستوى الدولى فى ايه يسر يا حسرة
ما علينا احنا مش قولنا مش عايزين اكتئاب
2010 اتمنى واتعشم وارجو من الله انه يكون عام جديد وهادى وتنصلح الاحوال وتتغير المفاهيم للصح واتمنى وادعو الله ان ينصر الاسلام والمسلمين فى كل مكان وان يرفع البلاء عن فلسطين وعن العراق وعن مسلمى الصين وعن كل مسلم موحد واقع تحت ضغط حرب او اضطهاد فى اى مكان على ارض الله الواسعة

حبايبى واخواتى اللى موجودين عندى هنا وبقرالكم دايما وكل الناس اللى بتزورنى من آن لآخر وكل الناس اللى مقصرة معاهم اشكركم جزيلا لانكم بكل هذه المصرية وبكل هذه الجدعنة وبكل هذه الانسانية اشكركم لانكم أنتم.


ده كان آخر بوست فى 2009 ولى عودة معاكم فى اول بوست فى سنة 2010 باذن الله
نفسى من زمان اكلمكم على حباية عينى مازن
وده اول بوست باذن الله فى السنة الجديدة

ياااه ما احلى الرجوع اليكم

اسيبكم فى رعاية الله