اليابان ☼

بسم الله الرحمن الرحيم

اليابان معجزة حقيقية ودلالة على الارادة البشرية وان الانسان فيه من العزم والتصميم على انه يكون ويعمل حاجات صح فى حياته

علميا واخلاقيا وماديا واجتماعيا وثقافيا وووو

وكدولة وبلد دلالة على ان ممكن من تحت الرماد تطلع شجرة ويطلع عملاق

بعد ما ضربت بالقنابل النووية فى هيروشيما ونجازاكى من اكتر من 60 سنة شوفوا دلوقتى ايه هى بلد ليها كل الاحترام والحب بلد ممكن تبقى المثل الاعلى اللى نتحاول نتعلم منه

دى فيديوهات حلقة المعجزة اليابانية للدكتور \مصطفى محمود (رحمة الله عليه) وطبعا هى حلقة قديمة بقالها سنييييييييييييييييييين طويلة لكن تحسه بيتكلم بلسان حالنا اليوم

احنا يمكن فاكرينه كويس لكن كتيييييييير من شبابنا المصرى والعربى مش عارفينه اتمنى تعرفوا عنه وتقرأوا له وحتى دوروا على حلقات برنامجه القيم على الانترنت وتشوفوها وقتكم مش هيروح هدر☺

لحظات لا انساها ♥ مازن

السلام عليكم ورحمة الله وبركاته

الحمد لله والشكر لله على نعمه الكتير قوى التى لا تحصى ولا تعد من ضمن نعمه الكتيييييييييييييييييير قوى قوى قوى عليا انه اراد بحوله وقوته انى أكون أم

أم كلمة ونعمة غالية قوى الحمد لله والشكر لله يارب ارزق كل اللى نفسه فى الذرية ومتحرموش ابدا يارب واجعلها ذرية صالحة يارب

اى ألم جسدى او نفسى قد يصاحب الست الحامل او حتى وقت الولادة نفسه يعتبر لا شىء او تمن بخس للسعادة اللى هتحسها لما تشوف وليدها وتلمسه لاول مرة.

أنا كامرأة لم اشعر بشعور اخر فى الدنيا يوازى جمال لحظة رؤيتى لولادى بعد افاقتى من التخدير(اصل حضرتى بجيبهم قيصرى:) ) اول ما بفوق او بتبتدى الافاقة وابتدى اسمع اصوات وبتبقى مجسمه جدا على فكرة فظيعة وابتدى احاول افتح عنيا وبتبقى كأن شبورة او ضباب كده يا دوبك باين منه ضوء بسيط واسمع زوجى وأمى وبابا وأحاول أتكلم واغيب تانى وافوق تانى واسمع صوتها برده بتعيط واحاول اتكلم واحاول واحاول لحد ما اقول بنتى بنتى وكانت اول كلمة اقولها لا حول ولا قوةالا بالله كلهم ضحكوا طبعا عليها وافتكرونى بهلوس قولت حطوا راسها على خدى وساعتها عيطت والجرح وجعنى قوى لكن كنت سعيدة جدا جدا جدا انا قلت ساعتها لا حول ولا قوة الا بالله لانها حاجة تبين مقدرة عظيمة لخالق عظيم ان يعيش بنى آدم انسان جوا بطنى 9 شهور و بعدين يخرج للدنيا و يتنفس ويحس كله بفضل الله

كنت حاسة كأنى شفت معجزة وهى كده صحيح معجزة الهية سبحان الله كانت جميلة قوى وصغننه قوى صحيح كان وزنها مثالى لكن كانت نونو جدا جدا وقرعة جدا جدا جدا ههههههههههههههه

أما يوم ولادة مازن نفس كل حاجة الا انه فى احساس تانى خالص حسيته اول ما شفته فى حب عجيب ربطنى بيه

صحيح ببقى مرتبطة جدا بالجنين اللى فى بطنى ده فى المرتين وبكلم جنينى ده كانه حاضر بين ايديا لدرجة ان امى كانت بتعتبر ان ده نوع من الهبل برضه ههههههههههههه بس لما شوفت حبيبى ده لاول مرة حسيت ان فى حاجات حلوة كتير قوى جايه فى حياتى صحيح فرحت قوى بميرو لما ولدتها ومازالت صديقتى رقم واحد لكن مازن حسيت ساعتها حاجة تانية يمكن علشان تانى مرة فكنت معتادة ع الالم فنسيته وركزت معاه هو بس مش عارفة

على قد تعبى فيه لكن كنت حاسة بسعادة غامرة وساعتها عرفت يعنى ايه سعادة غامرة يعنى ايه السعادة تغمر الانسان

والحنان اللى حسيته فى حضنه غير عادى كنت حاسه انى غير اى أم كنت سعيدة جدا جدا جدا حتى معتمدتش على اخواتى ربنا يخليهم زى ما كنت معتمدة عليهم اعتماد كلى فى مريم خاصة خلال الاسبوع الاول ربنا يجازيهم كل خير .كنت بقوم بالليل لرضاعته او تغيير ملابسه سعيدة جدا مكنش عندى نفس التوتر اللى كان عندى فى مريم يمكن علشان كنت جربت مرة فالتانية سهلة لكن الاكيد لانه كان هادى يعيط بس لما يكون فى سبب يعنى يا جعان يا هيغير الكادليز يا مغص يا صحى وعايز نور هههههههههه يعنى اللمبة تشتغل يسكت هو كده تمام

ومرت الايام كده رغم اى صعوبة الا انها سهلة مش عارفة ليه .

رغم انه مر ب3 مواقف لحد دلوقتى كل واحد اصعب من التانى مرة عمليه فى عينه الجميلة كانت زرقاء اللون وجميلة خالص (هى بالمناسبة دلوقتى بقت رصاصى كده) ومره عمليه فى بطنه الا انى عمرى ما حطيت فى دماغى انه حسد ولا كذا ابدا بحس انه ربنا سبحانه وتعالى بيعرفنى قيمة النعمة دى قوى وبيبعتلى رسالة انه تخيلى انك معندكيش النعمة دى وانك دايما تحمدى ربنا وتدعى للناس كلها ربنا ميحرمهومش من قرة العين يارب .

هو شمس دنيتى

وقمر حياتى

هو الواد صحيح دلوقتى بشد فى شعرى من شقاوته وجنانه الا ان السمة المميزة له هى الحنان والكلام الجميل يعنى يطلب الحاجة بادب يقول ممكن يا ماما كذا صحيح لحوح بس دايما بادب ومثلا عملتله العصير اللى عاوزه مثلا يشربه وييجى يجيبلى الكوب ويقولى شكرا يا ماما ربنا يسعدك قلبى ساعتها يرفرف واقوله ربنا يسعدك انت يا حبيبى واختك وبابا يارب

لما اتولد فى سعادة كبيرة ملت الدنيا وفى مشاكل كتير لناس اتحلت وفى رزق كتير جه لناس بشهادة الناس دول وش خير علينا كلنا

هو فاكهة اى قعدة (مين يشهد للعريس) بس ده صحيح فعلا والله

فى قعدة تهييس ستاتى خطبتله هنا بنت اختى لكن حاسه انه ميال للست اميرة بنت اختى التانية دايما بيشاكلوا بعض وفى نقار ودايما فى اتفاق برده ودى حاجة قلقانى اصل البت شايفه نفسها ومش هعرف اعمل عليها حما ههههههههههههههههه

علشان أكلمكم على مازن بالذات فى حياتى محتاج اكتر من بوست فاسمحولى بين حين واخر هكتب عنه لانه فعلا اكبر حب فى حياتى وبرتاح نفسيا جدا وبتملى البسمة قلبى قبل وجهى لما اتكلم عنه

ربنا يخليه هو واخته وباباه ويملا حياتهم وحياتكم سعادة ولا يحرمكوش ابدا من اللى بتحبوهم آمين يارب العالمين

من سنة وشهر و14 يوم

بسم الله الرحمن الرحيم
بالتأكيد الأكيد انكم جميعا وحشتونى جدا جدا لكن الظروف كلها كانت مش تمام حتى هذا الجهاز الذى اكتب اليكم من خلاله تقريبا عليه عفريت

المهم انا كنت بكتب كتير جدا ومكنتش بعرف ارسل حاجة لكن معلش حتى البوست ده كتبته من يومين لكن برضه معرفتش ارسله لان عفريت الجهاز كان حاضر المهم والاهم انه يارب تكونوا بالف الف خير واسيبكم مع البوست ده

وهو احتفالا بمرور سنه وشهر و14 يوم على بداية حياتى فى حياة بكل ما فيها :

من سنة وشهر و14 يوم بالتمام والكمال كانت بدايتى هنا فى المدونة
كنت بجرب مش اكتر كنت عايزة اكلم نفسى بصوت عالى شوية يعنى اغير شوية فى حياتى وكنت عارفة انه هيبقى تغيير ايجابى اكيد باذن الله
ولما ابتديت اقرا مدونات باللغة العربية (لانى مكنتش بقرا الا مدونات باللغة الانجليزيةلناس فى بلاد تانية بعيدة خالص )حسيت ان الدنيا مش سودة قوى يعنى لسه فى امل لان فى ناس لسه بخير وفى تفكير سليم لسه فى دماغ الناس وان لسه فى ناس تعرف الاصول والواجب والعادات والتقاليد وان لسه فى ناس بتحاول تغير وان كانت بتبدى بنفسها او حتى بتصلح من نفسها بس حتى فده حسسنى بالامان وان ممكن ولادى لما يكبروا متبقاش الدنيا وحشة قوى مش هتبقى سودا فى كحلى لا ممكن تبقى ابيض فى اسود عادى وده شىء مريحنى لان ساعتها بامر الله هيختاروا الابيض وغيرهم هيختار الابيض وساعتها هتبقى مساحة الابيض اكتر من الاسود وده مريحنى اكتر واكتر

من سنة وشهر و14 يوم مكنتش اتخيل انى هبقى متغيبة عن المدونة الفترة دى كلها ومكنتش متخيلة كم اللخبطة واللعبكة والشقلبةوالكلكعة والاحباط والاكتئاب ده هيكون فى حياتى وحياة اللى حواليا وبقصد باللى حواليا عائلتى الكبيرة فتلاقى احباطات على مستوى العمل لفلان وفلان وفلان ومشاكل اجتماعية عند فلان وفلان وفلان ومشاكل صحية عند فلان وفلان وفلان وفلان وفلان وفلان وفلان و............

غير الاكتئاب اللى بيلذق فيا طول فترة الشتا والبكاء اليومى لاقل كلمة حتى لو ابنى قالى انتى حبيبتى قوى بيخلينى اعيط يعنى مش ممكن لدرجة ان العيال بقوا كل يوم يقولوا لبعض تعالى نضحك ماما ويعملوا حركات ويغنولى بحب الناس الرايقة علشان اضحك ربنا يخليهم يارب لانهم برضه اصحابى قوى زى اخواتى البنات هما دول الامان الوحيد فى دنيتى وكل ده جوايا ميعرفش عنه حاجة الا اختى الصغيرة هى بس اللى تعرف ان نفسيتى وحشة خالص لانى مينفعش اقول لامى هتفتكر ان انا وجوزى زعلانين ومينفعش اقول لجوزى او حتى ابين لانه هيفتكرنى باتهمه بالتقصير فى حاجة فبريح نفسى من كل ده واعيش على كنبتى المفضلة ويبقى الشاى صديقى فى المرحلة دى ولان اختى لو قعدت اضحك 30 يوم متواصل علشان متحسش بحاجة برضه هتحس ان فى حاجة مش تمام فبقولها لانها هتبقى متفهمه يعنى ايه الاحساس ده هو احنا كده ربنا خلقنا كده واتمنى نفضل كده لحد آخر يوم فى عمرنا

من سنة وشهر و14يوم بدات افهم حاجات كتير وناس كتير بدات ارجع لنفسى اللى كنت نسيتها من فترة وانشغلت عنها بالبيت والولاد وضغوط الحياة ومحاولات ارضاء جميع الاطراف فلقيت ان مش لازم ارضى جميع الافراد المهم انى ارضى اهم الافراد وارضى نفسى

من سنة وشهر و14 يوم لقيت مكان سحرى بخرج منه لعوالم تانية موازية لعالمى ممكن تتقاطع فى نقطة وممكن تفضل موازية لعالمى لكن فى النهاية كل العوالم دى مشابهه كتير لعالمى وفيها كتير من عالمى وبتكمل عالمى وبتثرى هذا العالم الصغير اللى بعيش فيه


متشكرة جدا جدا لكل اخواتى اللى سألوا عليا ربنا يخليكم للى بتحبوهم ويخلي لكم اللى بتحبوهم ولا يحرمكوش ابدا من راحة البال آمين يارب العالمين

ساعات قليلة على عام جديد

السلام عليكم ورحمة الله وبركاته


تحية طيبة وسلام من القلب


اخباركم ايه جميعا يارب تكون احوالكم كلها بخير واحوال اسركم الكريمة كلها فى احسن حال يارب





اشكر جدا سؤالكم وتساؤلكم عن غيابى وعدم تواجدى بين صحبتكم الكريمة فترة طويلة


بعتبر من احسن الحاجات اللى حصلت فى حياتى عموما وبالاخص 2009 هى المدونة دى اللى خلتنى قرأت لناس وعرفت ناس وحاسة انى عشت مع ناس اصبحوا هم كل اصدقائى الان ويكفينى حتى انها تكون صداقة بالمراسلة على صفحات المدونة .


احلى ورد ابيض ليكم كلكم



صراحة كنت كاتبة كلام تانى فى البوست ده بس مسحته لان كان كلام كئيب ومكتئب ويجيب اكتئاب فخلاص ما علينا احنا ولاد النهاردة .

2009 عادى زى اى سنة مليانة احداث حلوة ع المستوى الشخصى واحداث مش ولابد
وعلى مستوى الوطن مش فاكرة الصراحة حاجة تسر وتعمل بهجة عالية واهو الحمد لله لسه عايشين ومصرين نعيش شعب معندوش دم
وعلى المستوى الدولى فى ايه يسر يا حسرة
ما علينا احنا مش قولنا مش عايزين اكتئاب
2010 اتمنى واتعشم وارجو من الله انه يكون عام جديد وهادى وتنصلح الاحوال وتتغير المفاهيم للصح واتمنى وادعو الله ان ينصر الاسلام والمسلمين فى كل مكان وان يرفع البلاء عن فلسطين وعن العراق وعن مسلمى الصين وعن كل مسلم موحد واقع تحت ضغط حرب او اضطهاد فى اى مكان على ارض الله الواسعة

حبايبى واخواتى اللى موجودين عندى هنا وبقرالكم دايما وكل الناس اللى بتزورنى من آن لآخر وكل الناس اللى مقصرة معاهم اشكركم جزيلا لانكم بكل هذه المصرية وبكل هذه الجدعنة وبكل هذه الانسانية اشكركم لانكم أنتم.


ده كان آخر بوست فى 2009 ولى عودة معاكم فى اول بوست فى سنة 2010 باذن الله
نفسى من زمان اكلمكم على حباية عينى مازن
وده اول بوست باذن الله فى السنة الجديدة

ياااه ما احلى الرجوع اليكم

اسيبكم فى رعاية الله

بلدى الود ودى احضن ترابك بيدى واشيلك جوا عينى اصل انتى غالية عندى

الحمد لله اننا خسرنا

بسم الله الرحمن الرحيم

كيف حالكم جميعا اتمنى تكونوا فى احسن حال وتكون النفسية تمام والاعصاب هادية

دى خريطة الوطن العربى

مصر فى قلب الوطن العربى

ودى خريطة مصر

مصر الحلوة ام الدنيا

يمكن نكون مش مقدرين قيمتها كويس يمكن ساعات بنزعل من حاجات فيها لكن مش معنى ذلك انها تبقى عرضه لكل ده

مصر كبيرة كبيرة قوى وعاليه وناسها احسن ناس طيبة وتحمل واخلاص مصر ياما عملت وصانت كل الدول العربية دى كلها مصر سبب انها اقتصاديا ضعيفة دلوقتى هى الحروب اللى دخلتها علشان كل الدول دى مصر الراقية مصر الجميلة يبقى دى اخرة التعامل معاها ومع ولادها

مصر الحرة الابية يقولوا عليها مصرائيل وانها تساوى اسرائيل واننا خونة كده بعد كل كده تساوونا بالعدو الوحيد لنا كده بعد سعينا للسلام نبقى خونة

ماتش كورة يا ناس يعمل كل ده

حسبنا الله ونعم الوكيل فى كل اللى يمس شعرة من مصرى واللا يشتم مصرى

المصرى جدع وطيب وشهم وقادر على التحمل اصعب المواقف والظروف

ولازم يكون فى تصرف دولى يرد لنا حقنا لازم عقوبة دولية او اى حاجة تهدينا

محدش زعلان ع الماتش عادى فينا من العقل اننا نعرف ان الرياضة غالب ومغلوب اللى مزعلنا اللى حصل وبيحصل ليه هى مصر عملت ايه لكل الناس دى بتكرههوها ليه كده يمكن علشان احسن واكيد احسن فعلشان كده بتكرههوها

ربنا يخليكى يا مصر ويعلى مقامك دائما ويبارك فى شعبك المؤمن يارب

اهداء

السلام عليكم ورحمة الله وبركاته

شكرا لدعمكم الطيب جدا شكرا جزيلا

ربنا يخليكم ويبارك فيكم

تعالوا شوفوا حاجة من ذكرياتى فى مرحلة الجامعة واسمحولى اهديها للى يحبها وكمان عندى اهداء خاص

اهداء لك يا أغلى الناس عندى

الاغنية دى ظهرت وكنا لسه فى الجامعة وكنت ومازلت بحبها جدا لانها معبرة قوى عن احساسى بحبيبى وقتها واللى هو حبيبى برضه دلوقتى وزوجى وابو عيالى ربنا يخليه ويبعد عنه اى شر ويحفظه لينا ويبارك فى كل خطوة يمشيها

ومن هنا برضه بحذره الاكياس والسواطير مفيش اكتر منها بصه يمين شمال ها اوعى ههههههههههههههه

لا ابدا بهزر ربنا يحميه يارب ويبارك فيه وفى اولاده وفى زوجته اللى هى انا واللا بلاش

هى دى الحكاية ودعواتكم بقى

بسم الله الرحمن الرحيم

اخوتى الكرام اشكر جدا سؤالكم علىّ شكرا جزيلا حقيقة افتقدكم واشعر كأنما شىء من أصل نفسى او شىء من طاقتى الوجدانية مفقود بسبب تغيبى عنكم ولكن لى عذرى.

حقيقة انا فى حالة نفسية سيئة من حوالى شهرين احداث كثيرة حدثت لى ولمن حولى اثرت كثيرا على لاننا تربينا على ان نتحمل ونكتم ما بنا حتى يقضى الله امرا كان مفعولا.ولكن كل هذا يؤثر فينا وفى اجسامنا وعلى حتى مجرد تقبل فكرة الحياة نفسها ومدى اهميتها وما الذى نفعله بالضبط فى هذه الدنيا.

ولكن ما ان يتستعيذ الانسان بالله من الشيطان الرجيم ويتستغفر الله ويلجأاليه ويتستغفره من اى فكرة سيئة قد جالت بنفسه حتى يبدل الله السحابة السوداء بشمس ساطعة تملا نفسه بالايمان والثقة بالله وحاشا الله ان اكون غير ذلك ولكن احيانا قد يتسلل اليأس والحزن الى نفسى فيصيبنى بتلك الخيبة وهى (وماذا بعد ما جدوى كل شىء وهل سينصلح حال تلك الدنيا وهل سأمن على نفسى واولادى فيها)

حتى مشكلة حدثت لاحدى اقربائى سيدة صغيرة تراها تحسبها مازالت فتاة صغيرة تلهو بدميتها ولكنها فى الحقيقة ام لطفلتين لم تفعل فى حياتها ما قد يؤدى بها لتلك المشكلة ولكنها ارادة الله وكلها اختبارات الاهية ليرى فعل الصابرين ولكى يزيدنا الله حسنات بامره سبحانه وتعالى.

اما اولادى فلديهم نزلة برد شديدة عليهم جدا ويزيدها سوء تلك الادخنة اليومية الليلية ولاننا من اهل دلتا مصر فنشعر بها مكثفة تخنقنا فى نومنا واصبحنا اسرى داخل بيوتنا نغلق النوافذ والابواب حتى تهدا قليلا ونعاود فتحها لمجرد حتى تهوية المنزل والغريب اننى اسمع ان وزارة البيئة مثلا تقول ان هناك غرامات وانهم سيجمعون تلك المخلفات من الفلاحين لاستغلالها بدل من حرقها ولكن هيهات كل عام اعتبر شهر اكتوبر هذا شهر النكسة والخيبة لا شهر الفرحة والانتصارات لاننى اعلم جيدا ما سيحدث فيه وما سيحدث لاولادى واولاد الجيران ونحن الكبار معهم من ضيق تنفس ونوبات السعال ونسأل الله ان يشفى كل مريض وحسبنا الله ونعم الوكيل فى كل من يقصر فى مصلحة اولاد هذا البلد.

وزوجى سندى فى هذه الدنيا الصابر القوى الايمان (ما شاء الله لا قوة الا بالله) سيسافر لمدة اسبوعين اسوان لظروف طارئة فاشعر وكان روحى ستسلب منى تلك المدة اشعر اننى لن اقوى حتى على التنفس ولا الكلام ولكن انا ذراعه الايمن كما يقولون وانا مسئولة عن الاولاد وعن هذا البيت فلهذا سأكون بفضل الله اقوى من نفسى حتى يرجعه الله لنا بالف الف سلامه



وايضا بدات مشروع جديد حيث اعمل فى تجارة الملابس الجاهزة والمفروشات من المنزل منذ حوالى 10 ايام وحقيقة الموضوع متعب جدا والمبلغ بسيط حوالى 2000 جنيه ولكن العجلة تدور صحيح انها بطيئة ولكنها تدور بفضل الله ولكنه حقيقة مرهق ومتعب ومطلوب له الصبر ايضا على طلبات الناس التى قد تجدها احيانا عجيبة وغريبة المهم دعواتكم بالتوفيق لان ان كان الموضوع يفوق التحمل سنضطر لتصفيته لغرابة ما نراه فيه ولكننا سنمهل الامر فترة طويلة وليست بقصيرة مع العلم اننا لا ناخذ من ربحه شيئا بل نضيفه على اصل راس المال ومعروف ان هذا النوع من المشروعات يلزمه عام كامل حتى تشعر به وبربحه ودخله اسالكم الدعاء بظهر الغيب بالتوفيق.



احداث كثيرة مرت علىّ انهكت نفسيتى وجسمى حتى اصبح ضغطى ينخفض فجأة واسرع لتناول دوائى حتى استطيع ان اقف على قدمى مرة اخرى او قد تنتابنى نوبة من القىء حتى انهك ويتبدل لونى للاصفر ولا املك الا ان ادعو الله ان يلهمنا الصبر والثبات ويقوى ايماننا ويهيىء لنا من امرنا رشدا وان يتقبلنا فى عباده الصالحين الصابرين وان يعفو عنا ويتقبلنا وان يفرج كرب كل من كان ذا كرب يارب العالمين



سامحونى فكل منا يحمل هما فوق عنقه يسير به اينما كان ولا تنقصكم شكوتى ومشاكلى ولكن الله قادر يخفف عنا ويسدد خطاناويلهمنا الصبر وقوة الايمان.

ممكن اطلب منكم طلب

------------------السلام عليكم ورحمة الله وبركاته--------------------------

كنت اخبرتكم اخوتى واحبتى فى الله انى سوف اتناقش معكم فى موضوع احضر له ولكنى احاول القراءة فيه اكثر حتى لا آتى بمعلومة مغلوطة او فيها شك او اكتبها باسلوب قد لا يظهر المعنى جيدا وخاصة وانه موضوع له شق دينى كبير ويعتبر هو اساسه

هو ببساطة شديدة موضوع (القوامة) قد لا يعتبر الكثيرين انه موضوع مهم او انه شىء عادى جدا او هو تكليف من الله بالانفاق من قبل الزوج على زوجته اى ان البعض قد يهون من الامر ويجعله بسيط جدا لايحتاج لكلام فيه وقد يعتبره البعض رخصة لتأديب تلك الزوجة وقد يعتبره البعض انه تصريح الهى بالغاء رأى المرأة وجعلها فى مرتبة ثانية بعد الرجل فى حين ان الخطاب الدينى فى كل الاحوال موجه للذكر والانثى

فصراحة انا كما تعلمون جيدا لست من النوع الذى اكرمه الله تعالى بالقدرة على الكتابة فى الموضوعات الدينية بل اننى ولا اخفيكم علما اخاف من الخطأ الذى قد اقع فيه وانا اكتب آية قرآنية فحقيقة اخاف جدا
ولكن ذلك الموضوع البسيط الذى افهمه جيدا واتقبله واستوعب بامر الله ماهيته قد لا تفهمه بعض النساء بل والاكثر كارثية بالنسبة لى هو نظرة بعض الرجال ودعونى اقول كثير منهم الى القوامة فحقيقة نظرتهم لا تنم باى حال من الاحوال عن فهم حقيقى لذلك التكليف الالهى فهو تكليف لا تشريف.

كثير منكم له تلك الميزة وهو كتابة الموضوعات الدينية بسلاسة ووضوح واجادة وهذه حقيقة فعلا مثل الاستاذAKEED وايضا ماما نور وام البنات والعزيزة ام مالك واختنا العزيزة امة الله(موناليزا)
اطلب منكم ان يتبرع احدكم بوقته ومجهوده ويكتب لنا موضوعا عن القوامة ويسمح لى بان اضع رابطا دائما باذن الله لموضوعه
وشكرا جزيلا مقدما
حفظكم الله

السلام عليكم ورحمة الله وبركاته

--------------------------بسم الله الرحمن الرحيم---------------------------


كيف حالكم جميعا اتمنى ان اموركم كلها تكون بخير
خلصت اجازتى والحمد لله كفاية كده عليا :)
لانى لو سبت نفسى لحالتى اللى مش ولابد ممكن تبقى اجازة على طول وانا مش عايزة كده

المهم اشكركم شكرا جزيلا على كلماتكم الطيبة والمشجعة اللى مش هنشرها لانها كلمات طيبة جدا فى حقى قد لا استحقها فهى كثير جدا على لذلك ساحتفظ بها واشكركم شكرا جزيلا ربنا يرفع معنوياتكم دايما يارب

الدراسة بدأت وبدأ معاها القلق انا قلقانه جدا وواضح ان الدنيا كلها قلقانه ولقيت النهاردة كثير من اولياء امور الطلاب حرصوا على موضوع الكمامة وفرحت جدا لما لقيت فى وعى جامد حتى بين الاولاد الصغيرين دول ولقيت فعلا المدرسات لعبوا ادوارهم كاملة النهاردة من حيث التوجيه والارشاد ولقيت الاطفال دول من باب التقليد اللى مش جايبها هيجيبها لانه حس بخطورة الموضوع فعلا
ربنا يستر ويشفى كل مريض يارب
هو كان لازم الازمة دى يعنى علشان نصحصح فى المدارس يعنى دلوقتى منبهين ع الاولاد محدش يشرب مكان حد هاتوا معاكوا صابونة واغسلوا ايديكم خلوا معاكم دايما مناديل ومتكحوش ولا تعطسوا فى وش حد يعنى كان لازم الازمة دى علشان نراجع نفسنا
كنا زمان عندنا ابلة الحكيمة كانت بتمر ع الفصول ونمد ايدينا وتشوف ضوافرنا وتبص على شعرنا وهدومنا واللى عنده برد تديلة جواب وحدة وياخد علاج ووووو دلوقتى فى تامين صحى وكل حاجة ماشى بس مفيش نفس اهتمام زمان الحكاية بقت هابولى شوية(من ماشية بهبل :))

المهم ربنا معاكى يا مصر ومع ولادك ربنا يعدى الازمة دى على خير احنا ياما عدت علينا ازمات ولان ربنا سبحانه وتعالى واقف جمبنا عدينا كل ده بحوله وقوته

مجرد ما بدات اكتب على الكيبورد الجميل ده( اللى عايز يتغير لان ميزو افندى بوظه من اللعب )ابتديت احس بشوية راحة
لى عودة مرة اخرى باذن الله والمرة اللى جاية هكلمكم عن موضوع غاية فى الاهمية بس سيبونى اقرا اكتر فيه علشان مجبش معلومة مغلوطة او فيها شك
شكرا شكرا لانكم بكل هذه الجدعنة
فى رعاية الله