شوية فضفضة

بما ان جارى تنفيذ سياسة الاستخدام العادل ومحدش يقول لا مش هينفذوها احنا هنعترض وهنبعت ايميلات والناس فى المنصورة عملوا وقفة احتجاجية و هما هيتراجعوا وبتاع وشاى بالنعناع فبقولكم اوكى ممكن قوى ميحصلش دلوقتى ماشى يمكن الرفض الجماعى ده يغير وقت التنفيذ لكن مش هيغير التنفيذ بيتهيئلى يعنى (فاسمحولى افضفض معاكم شوية
يمكن يغلى عليا الاشتراك ومقدرش فعلا اكمل واخسر بسبب الغباء حاجة بحبها وبقضى على صفحاتها اسعد اوقات يومى وعرفت عن طريقها احسن ناس فكر وذوق ودين واخلاق ولقيت حاجات كنت مفتقداها فى حياتى فعلا من اهمها كلمة اصدقاءمعلش استحملوا رغيى اسفة مقدما على الاطالة)




رأيى اللى فوق ده يدل على انى اتغيرت مبقتش متفائلة زى زمان نسبة احساسى بالامل قلت هى ما انعدمتش بس قلت وقلت كتير كمان




كنت بتفائل لدرجة الهبل والعبط لكن خلاص اتغيرت، البراءة دى واللى لسه كتير من اللى حواليا بيقولوا انها فيا لكن بصراحة انا شايفة ان البراءة دى قلت خلاص وفى طريقها انها تتمحى خالص




كنت فاكرة انى اقدر احقق حلمى كنت فاكرة انى اقدر اعمل حاجة كنت فاكرة انى لما احاول هنجح




طب هقولكم على حاجة طبعا من موضوع سابق لى عرفتوا انى نفسى اعمل مشروع يرحم زوجى من السفر كل يوم لمحافظة تانية للعمل بها واساعده فيه وخاصة ان اولادى الى حد ما كبروا يعنى 8 سنين و4 سنين كبروا شويه برضه وممكن يتحملوا غيابى عنهم 4 ساعات حتى فى اليوم




وليه هعمل انا لان مثلا فاضل معايا كام غويشه كده ما بعتهومش قلت ينفعوا وآخد قرض من الصندوق الاجتماعى باسمى علشان لو جت لزوجى فرصة عمل احسن متبقاش فى حاجة تعرقله وقلت هتبقى فله ونعيش يا ولاد المهم لقيت ايجارات المحلات على شارع رئيسى من 5الاف وطالع وفى الشوارع الجانبية من الف وطالع برضه طيب وهتوضب بكام وهنعمل ايه واذا كان لازم تروح جاهز من كله للصندوق يعنى مش هيدوك قرض علشان مشروع تجارى الا لما تكون مأجر محل ومعاك عقد ب5 سنين ايجار وعامل بطاقة ضريبية وموضب المحل ده تمام وبعد كده يبعتولك حد يعاين ويقدر قيمة المبلغ اللى هيدوهولك وبعدين لازم يكون فى ضمان يعنى عقد بيت حتة ارض وموظفين يضمنوك




لولولولوللولولولولللولى طب ما هو انا لو عندى كل الكلام ده كنت غلبت يعنى انا لو معايا 20 الف مثلا كنت رحت شحت منكوا باسم قرض لا كنت هأجر محل واوضبه واجيب بضاعة كمبيالات واللا شيكات كنت هتصرف يعنى وابتدى بدايه بسيطة واكبر لكن مفيش انى ابتدى يعنى انت بتعجزنى بتقولى هنديكوا قروض تبتدوا بيها تروح تلاقى لازم انت تبتدى واحنا نديك




الكلام ده حصل قبل كده برضه من حوالى 6 سنين روحنا ولقينا كده قلنا خلاص مش مشكلة بكره خير وهييجى التعيين ومش هنرمى الشهادات اكيد هتنفع مرت الايام ونقدم يمين وشمال وملناش نصيب عادى الحمد لله كده فل قوى فى غيرنا حالتهم ضنك والحمد لله ربنا كرمنا فوق الوصف طيب مع تكرار المحاولة اليومين دول هى هى نفس الطريقة ونفس الكلام وطبعا القرض ده مش لله وللوطن ده عليه فوائد لكن متشكرين قوى جدا وميرسى لكل حد عايز يريح الشباب فى مصر




مش قادرين يفهمونا ليه او يحسوا بينا احنا مش عايزين نبقى زى الناس دى ناكل ناكل لما نورم وفى الاخر نرمى الاكل فى الصحرا

ومش عايزين نركب عربيات اخر موديل

حلوة العجلة ام بدال جميلة بتقضى مشاويرنا القريبة احنا عايزين مواصلات آدمية عايزين امان ع الطريق

مش عايزه الرفاهية تبقى للدرجة دى ولو انه من حقنا وعندنا الامكانيات اللى تعيشنا كده وتخلينا البلد الحلم

بس عايزة انى كأم اطمن على مستقبل ولادى نفسى مبقاش خايفة انهم يبيعوا بلدى وكل واحد يبقى حر فى اسهمه يبيع ميبيعش ايه ده فى حد يعمل كده دى بلد تاريخ ناس حضارة فى حد يبيع بلده

نفسى انى مصحاش الصبح الاقى واحد جاى يقولى انا صاحب المنطقة دى انا اشتريتها وفاضل انتى وجيرانك ويكون فى واحد مترجم معاه بيترجملى من العبرية مثلا للعربيه واللا من الفرنسية واللا من الاسبانية

نفسى يعرفوا انى مش عايزة البس حرير واللا مجوهراتى تبقى ماس وزمرد

رغم ان ده من حقى بس انا مش عايزه كده انا عايزه لما انزل اشترى حاجة تلزم بيتى واولادى فلوسى تكفى ملاقيش بنتى نفسها فى فستان مثلا وميزانيتنا لا تسمح رغم انها قنوعة وبسيطة فى اختياراتها واللى بتطلبه

عايزة الاقى اسعار الحاجات على قد الفلوس يعنى مثلا المرتب عشر قروش تبقى الاسعار قريبة ويفيض قر شين للزمن لا ازاى ودى تيجى الاسعار عماله ترتفع والمرتب الحمد لله زى ما هو وطبعا مبيفيضش حاجة فتلاقينى بقى تجيلى حالات اكتئاب واحباط

الرزق على الله اكيد ورزقنا زى ظلنا وزى الموت بيتابعنا فى كل مكان وعندنا ايمان بكده ولله الحمد وعايشين فى فضل الله وكرمه وربنا فعلا صلح حالنا كتير من لاننا صبرنا وقولنا الحمد لله

بخاف افكر فى بكره لانى مش شايفاه

عليه ضباب حاجب رؤيتى

بخاف احلم ببكره لانى مش لاقياه

في حاجة مكتفة خطوتى

مش عارفة اشوف ولا عارفة امشى

طب ايه العمل

ممكن شمسك يا بلدى تطلع تمحى الضباب

طب ولوممكن يا بلدى تفكى خطوتى

عايزة اشوف سكتى وانا ماشية بالعيال

خايفة اتكعبل يا بلدى ويتعوروا العيال

دول هما اللى ليا علشانهم بفتح عيونى

طب ممكن بس شوية نور فى طريقهم

ادينى بس امل لاجل اموت

ادينى بس امل لاجل اموت وانا مطمنة ع العيال