ليه نسينا بعض وخدتنا قوى قوى العنجهية والغرور وافتكرنا اننا مش محتاجين بعض
ليه دوسنا على بعض و دوسنا على كل حلو فينا وكل حلو حوالينا.
وليه بقت علاقتنا ببعض زى خيط ضعيف.
ليه فى ناس عندها جحود وعاقة لوالديها
ليه نسيت ان أمك هى اللى حملتك فى بطنها واستحملت الآلآم علشان انت تعيش
ليه لا تراعى حقها عليك رغم انهاعمرها ما نسيت حقك انت عليها
ليه بتنسى تحضنها وتبوسها على جبينها او ايديها وتقولها ربنا يخليكى يا امى
ليه نسيت حبها وحنانها عليك
ليه بتنسى ابوك وانه ضحى براحته علشان يجيبلك اللى نفسك فيه
وانه شال البيت على كتافه التعبانه علشان تحس انت بالامان
وان اول حرف اتعلمته منه وان اول سجدة كانت معاه
وليه نسيت حبه وحنانه عليك
وليه فى ناس بتنسى المودة والرحمة
ليه نسيتى حق زوجك عليكى ونسيتى ان احترام اهله من احترامك له
ليه نسيتى الحب اللى جمعكم اصلا
وليه نسيت حق زوجتك عليك وانها مهما كانت مقدرة تعبك الا انها عايزه تحس بتقديرك لها
وليه نسيت الحب اللى جمعكم
ليه فى ناس بتنسى الأخوة
وبتنسى اصدقائها وتتحول لما ربنا يكرمها ويديها قرشين
فينسى صاحبه عشرة العمر
ليه نسى الحب فى الله اللى جمعهم اصلا
ليه فى ناس بتنسى الرحمة
وينسى يعطف على اولاده
وتنسى تعطف على ولادها
وليه فاكر ان ابوتك ليهم فى الفلوس اللى بتجيبها
وليه فاكرة ان امومتك فى انك تعملي لهم الاكل واى احتياجات مادية تانية
ليه نسيتوا الحنان ونسيتوا احتضانهم والعطف عليهم واحتوائهم
ليه فى ناس مبتستحملش شوية
ليه بترموا الاطفال تحت رجليكم وتدوسوا عليهم
ليه بتتكسفوا تبينوا الحب قدامهم وعطفكم على بعض
ولا تجدوا اى حرج فى انكم تتخانقوا وتعلوا صوتكم قدامهم
لو تعرفوا الرعب وانعدام الامان اللى بيحسوا بيه يمكن كان قلبكم رق
ليه نسيتوا الحب ومعنى كلمة بيت ومعنى كلمة حنان
ليه فى ناس مبتفكرش قبل ما تتكلم
ليه بتتسرع فى كلامها وتقول كلام يجرح ويزعل
ليه بتتسرع فى قرارك فكر فيه كويس هياثر عليك وعلى اللى حواليك
ليه نسيت الانسان جواك ،الانسان الطيب
نسينا ليه الرحمة والمودة والحنان
ليه بقت الكلمات دى بتاعة اغانى وبس
وليه(افشوا السلام بينكم)مبنعملهاش
ليه مبترققش قلبك
ممكن ترققه تفكر فى نعم ربنا عليك تشكره عليها
فكر فى انك ليك أم وأب لم تولد يتيم
فكر فى ان ليك اخوات ناسى حقهم عليك
حق الحب والسؤال عنهم والعطف عليهم
صلة الرحم يعنى.
فكر فكر فكر
وبعدين قرر عايز تقطع الخيط اللى بينك وبينهم
عايز تهد الجزء ده من حياتك عايز تمحى كل شىء حلو فى حياتك
اعتقد انه لا ابدا
معلش يمكن طولت قوى بس معلش
اطمع كمان ممكن فى 3دقائق وحوالى 35 ثانية تتفرجوا معايا على الفيديو ده بعد اذنكم
هو باحساسى الخاص يمكن مش مظبوط مش حلو بس حسيته وحاسة الاغنية تنفع قوى لاى علاقة انسانية فكروا من فضلكم وهفكر معاكم وقبلكم فى اى خيط ضعيف فى حياتنا علشان نقويه.
يارب يكون وضح وجهة نظرى
فكروا فكروا ان ربنا بيدينا فرصة تانية وفرص كتير نستغفر فيها ونجدد التوبة
ووعدنا سبحانه وتعالى انه يغفر ذنوبنا على ان نعمل صالحا يرضاه ولا نشرك به احدا
يبقى ربنا بعزته وجلاله سبحانه وتعالى بيسامحنا ويغفر لنا ويرحمنا واحنا مش عايزين نرحم بعض
لا كده كتير شطحنا قوى لازم نربى الرحمة اللى قلوبنا ونسقيها بالحنان علشان تبقى ظل كبير نرتاح تحته ويجمعنا الحب فى الله.
معلش ممكن استئذنكم تقرأوا اول تعليق.لكم جزيل الشكر.
هناك 52 تعليقًا:
شكرا ليكم جدا انكم بتستحملوا تجاربى فى موضوع الفيديو ده بالذات تانى تجربة واتمنى تكون افضل من اللى قبلها
ثانيا الموضوع ده بتاع خيط ضعيف هتسب هسيب ده مش مؤيداه
انا رايى تمسك جامد وتلضم الخيط جامد وتوصله بكل حد بتحبه
شجعه واعطف عليه وحسسه بالحنان علشان يمسك هو كمان جامد ويلضم خيط ويوصله بيك
كن ابن بار لامك وابوك
كن اخ حنين مع اخواتك
كن رئيس عمل جيد انسانيا
كن عامل جيد فى ايا كان مجال عملك
حب اصدقائك ممكن يكونوا اخواتك اللى لم تلدهم امك
حب زوجتك حبيبتك حلالك
حبى زوجك واطلبى رضاه علشان ده ممكن يكون سبب لدخولك الجنة
استحملوا علشان ولادكم متهدوش البيت علشان عنجهية ومين يمشى رايى مين
ابغض الحلال عند الله الطلاق وبيتم عند استحالة العشرة
معنى ان الطلاق كتر ان الناس مش طايقة بعض
غلط ننسى انسانيتنا غلط
غلط تنسى الرحمة اللى ربنا خلقها فى قلوبنا
ده ربنا قال فى معنى الايه اكريمة موجها خطابه لرسول الله محمد صلى الله عليه وسلم
انه لو كان فظ غليظ القلب يعنى مفيش عنده حنان ولاحب ولا رحمة مكانتش الناس اتجمعت حواليه وانفضوا من حوله
غلط تنسى امك واللى عملته علشانك وتتجوز وتعيش مع مراتك وتنسى الست دى اللى جابتك من بطنها وكانت بتموت وهى بتولدك
اقول ايه واللا ايه
اكيد فهمتونى اكيد اللى فى قلبى وصلكم
اكيد هنحاول كلنا نصلح من نفسنا ونمسك جامد فى الخيط ونقويه
اشكركم جدا على وقتكم شكلكم كده عدى ربع ساعة قراءة وان امكن تعليق
شكرا جدا ليكم
معلش بقى ردودكم مش هتظهر لمدة 3 ايام علشان هكون عند بابا اخويا كتب كتابه غدا ان شاء الله دعواتكم بالتوفيق والهداية
وأول تعليق
دايما النسان بينسى
وده من طبع النسان
بس انا سمعت كلمة كده
ان علاقة الانسان مع الناس اللى حواليه واللى علقته بيهم تركمية
بتكون عاملة زى الميزان كل يوم بتحط شوية حاجات لصالحك وشوية حاجلت عليك
والانطباع الإجمالى اللى بياخده الناس عليك على حسب اى كفة رجحت وكسبت هل كفة اللى ليك ولا كفة اللى عليك
بعضنا بيكون انفعالى وبيحكم بأخر موقف بس
وده أكيد شىء غلط ومش مظبوط
وربنا يصلح الحال ونعرف ندى لكل زى حق حقه
رهيبة انتى يا أم مازن
انتي اتكلمتي فى حاجات جامدة جدا جدا
والله فيها حاجات بتمس كل واحد حتى لو في نقطة واحدة .و أنا شخصيا فيها جمل حسيت انك بتكلميني أنا و الله.
ربنا يبارك لك يا رب .
آه ألف مبروك لأخوكى ويا رب يتمم ليهم على خير
متتأخريش قوى بقى مع انى عارفة انك اساسا مش هتقرأي التعليقات إلا لما ترجعي, بس أهو مقدما بقى انتى وحشتينى.
السلام عليكم
يمكن فعلا الناس نسيت بعضعا بس مش عشان انهم معاهم فلوس لكن هموم الحياة كتيرة مثلا شخص بيشتغل اكتر من 13 ساعة في اليوم فين الوقت اللي هيلاقيه عشان يعش في تجمع اسري فقط في بيته
وانت عارفة الشغل الخاص مش بيرحم حد
تاني حاجة الزوجة لما بتزوج من الطبيعي انها تسمع كلام زوجها وانه هو بيبرمجها علي حياته هو وليس حياتها هي يعني ممنوع الزيارات غير لما نكون مع بعض استني الوقت لما يبقي فاضي
وتعالي قبليني لما يفضي
طيب صديقاتي
ممنوع الزيارات اللي عايزك يجي اهلا وسهلا
الخ
من الاخر في ناس مغلوبة علي امرها
وفي ناس هتعمل شيء من المذكور في رسالتك بس عصب عنها عشان ده المفروض يحصل
اه علي فكرة المدونات ديه فكرة جميلة لولاها كنت اتجننت من عدم كلامي مع حد
غير ابنب وزوجي والناس الموجودة كلامي وافكاري يعني مش الرغي المتعارف عليه
كدة انا طولت
سمحيني
علي فكرة الفيديو حولت معاه اكتر من مرة مشتغلش
كان موضوعه عن ايه
لك كل تحياتي واحترامي لموضيعك الشيقة
الدنياوية والانسانية
دمنا بحب وسعادة
السلام عليكم
موفقة في اختيار الاغنية والصور المعبرة عن اقترابهم من محطة الفراق
مشكورة اختي
علي تنبيهك لنا جميعا
تحياتي
بجد كلام حضرتك رائع فعلا بقينا بننسى كتير او بنتناسا ياريت كلنا نفتكر فعلا والفيديو جميل جدا تسلم ايدك
احنا فى زمن بقى السمة الاساسية فيه هى الانانية و كل واحد منشغل بنفسه وبس
والمبرر مشاغل الحياة مع ان بردو زمان كان فى مشاغل للحياة
للأسف اصبح مفهوم الانسانية عندنا مقتصر فى "انا " وبس
كلامك قلب مواجع بجد
v_v
الف مبروك لاخوك ربنا يتمم له بخيرأسأل الله أن يرزقه السعادة ويرزقه بالذرية الصالحة
^_^
الأخت الفُضلى أم مازن
أحييك علىهذا الموضوع والله لقد مسست جراحا لم تعد خاصة وإنما تحولت إلى أمراض اجتماعية سببها البعد عن جوهر الدين وتعلقنا بمظاهره دون لبه والله لو التزمنا ديننا ما كان هذا حالنا والفيديو جميل ورائع واختيار موفق جدا يثير الشجون المرتبطة بالموضوع
حاسة اني لازم أعلق كمان مرة
الأغنية حلوة والشغل اللى انتى عاملاه معاها جميل ومميز حقيقي.
كمان التعليق بتاعك بوست لوحده فى المعانى الجميلة والكلام الى لازم نفكر فيه عشان أحوالنا تتصلح.
مش قلت لك وحشتيني
والله يامامتي كل ده من بعدنا عن ربنا
والله لو احنا ماشيين ع سنه الرسول عليه الصلاه والسلامه ماكنش كل ده يحصل
ببعدنا عن ربنا بعدنا عن بعضنا وعن كل حاجه
الفيديو جميل اوي تسلم ايدك
ربنا يتمم لاخوكي ع خير يااارب
دعواتك ليا انا كمان :D
ما اجمل التشبية بصلة الرحم بالخيط فهذا النداء يجب ان يصل لكل ابن عاق لوالدية و وكل خ متخاصم مع اخية وبصفة عامة كل من هو متخاصم مع اى احد فهى دعوة عامة للخير و الترابط
تحياتى على البوست الرائع
ياستى ألف مبروك لاخوكى أن شاء الله دايما أيامك وأيام عائلتك الكريمة كلها أفراح يا رب وعقبال ما تشوفى أولادك - أنا معاكى فى كل كلمة ولو سامحتيلى عايزة أزود حاجة كمان أن الناس بقت عنيفة زيادة عن اللزوم تحت راية الدين وتتدخل فيما لا يعنيها برضة وتعمل أوصياء على الاخرين بدون وجه حق وهذا يزود جرعة الحنق جامد جدا يعنى الحنية والعطف غير متواجد وده برضة يؤدى الى عدم الترابط الاسرى والصداقات تتفكك وكمان العلاقات الزوجية وحاجات كتيرة جدا وبلاوى أكتر من الى أنت كتبها وربنا يستر - والفيديو جميل الاختيار لاغنية جنات حلو - ربنا يحفظك أنت وأسرتك الكريمة -
الف مبروك لأخوكى و ربنا يتمم بخير ان شاء الله ،اللهم بارك لهم و بارك عليهم و اجمع بينهم بالخير،ثانيا عارفه يا قمر لو كل واحد فكر ان ده اخر يوم ليه فى الدنيا او اخر يوم فى عمر الشخص اللى هو مقصر معاه كانت حاجات كتير هاتتغير،كان فكر الف مره قبل مايجرحه،كان هايقوله الف مره انا بحبك و تزعلش منى ،عشان يمكن بكره حد فينا ميكونش موجود
مامة مازن
ازيك وحشتينى
يارب ترجعيلنا بالسلامة
والف مبروك لأخوكى وعقبال متفرحى بأولادك
الدنيا لهت الكل
وخلت الناس متفكرش غير فى نفسها وبس
واكيد فى خيوط بتتقطع خالص مش بتبقى ضعيفة وبس
دى دعوة رائعة منك
لكل الناس
انها تدور فى حياتها وترجع تربط العلاقات من تانى بينها وبين كل اللى حواليها وبينها وبين نفسها أولا
تقبلى مرورى
فعلا فرص كثير بس الواحد بيضيعها بغباءه
شكرا أختي
اهلا بك اخ د\ عرفه
فعلا كلام حضرتك مضبوط جدا
هى العلاقات الانسانية من المفترض انها تراكمية يعنى فعلا زى ما حضرتك شبهتها بالميزان يا ترى اى كفة هى اللى هترجح
وفعلا فى ناس بتحكم باخر موقف مش بالحكاية كلها من زمان
شكرا جزيلا لحضرتك ربنا يوفقك وتكسب مصر طبيب ناجح
وانتى كمان يا دعاء وحشتنى حروفك وكلامك وعقبال ولادك يارب وانتى بخير وصحة وسعادة
اختى اللى باين عليها شبهى
كلامك يا اختى متكرر فى حياتى
بس كان قصدى فى النقطة دى اكتر موجه للرجل لانهم بطبيعة الحال ولكل الاسباب اللى قولتيها بيشوفوا بعض وعندهم حرية اكتر منننا فى موضوع الصداقات والزيارات
كلامك كله فهماه ومصدقاه بالحرف لانى عايشة شبهه والحمد لله والشكر لله
بصى المدونة دى عيشتنى من جديد مش هقولك اختى اكتر من كده
ذكرى العزيزة التعليق اللى قبل ده مباشرة ليكى برضه
شكرا يا حبيبتى لذوقك
اهلا بالباشمهندسة الحاسوباتية منورة يا اختى
شكرا جزيلا ليكى ولذوقك
اهلا بيكى اختى سويت فايوليت منورة هنا
الله يبارك فيكى اختى وعقبالك يارب
تعليقك منطقى جدا كله بيقول مشاغل الحياة طب هو زمان مكانش فى مشاغل حياة
والانسانية بقت الانا منطقى جدا كلامك
اهلا وسهلا بحضرتك غير معرف
شكرا لحضرتك على التعليق
فعلا تحولت لامراض اجتماعية سببها البعد عن الدين ربنا يعافينا واياكم
شكرا ليكى او شكرا لك لو امكن توقيع باسم علشان بس اعرف اوجه حديثى بصيغة مؤنث او مذكر ولو ان فى الحالتين الاحترام واضح شكرا جزيلا
دعاء والله كمان وحشتينى ووحشتنى رسائلك على صفحات المدونة والحمد لله انه عجبك بوسيلى نور واحمد
مونى الصغنونة العزيزة ازيك يا مونى يارب يا اختى تكون امورك كلها بخير وتكون امتحاناتك ماشية كويس
رايك سليم ميه%ميه
دعواتى ليكى بالتوفيق يانونو
اهلا بحضرتك اخ اكيد شكرا لك وهى دعوة فعلا للتصالح والتسامح مع نفسنا ومع من حولنا
منى الغالية اهلا بيكى اختى ربنا يبارك فيكى وعقبال اولادك تقلى جيبك بقى دول عرسان ماشاء الله دلوقتى ربنا يخليهم ويبارك فيهم
فعلا عندك حق والله الناس فعلا بقت عنيفة زيادة عن اللزوم
بصراحة رغم انى مش متابعة قوى الاغانى وكده بس الاغنية دى روعة واحساسها فيه غاية فى الانسانية وكلمات فيها عتاب راقى فعلا
شكرا ليكى اختى
يا حبيبتى يا بسنت كلامك جميييل لو فكرنا فعلاكده ان ده اخر يوم تشوف فيه امك واللا ابوك واللا اخوك واللا واللا ووووووو يااااه كانت حاجات كتير كتير اتغيرت
الله يبارك فيكى يا يسو وعقبالك عن قريب ان شاء الله
نونا يا مراحب خلصتو اللجان والمراقبة وووووو يارب تكون عدت على خير وعقبال بقى ما تدخلى مناقشة الرسالة بتاعتك يارب اوعى تكسلى.
هو فعلا يا اختى لهو الدنيا فعلا لهت الناس بس عايزين ناخد هدنة شوية نفكر حبة مش معقول بنجرى كده على طول
شكرا لك اخ احمد
هو حضرتك مش غباء قد ماهو عدم تقدير للنعمة اللى فى ايدى
يعنى مثلا مثلا اللى ربنا اعطاه اطفال وكلنا عارفين قد ايه نعمة كبيرة وفى ناس محرومة منها بس تلاقى الناس دى بتهمل فى ولادها اهمال جسيم تربويا ونفسيا وممكن كمان صحيا يعنى مش مقدر النعمة دى ومش صاينها قيس على كده حاجات كتير
السلامـ عليكمـ
جزاك الله خيرا وبارك فيك رب العباد ..
الرحمون يرحمهم الرحمن .. وارحموا من في الارض يرحمكمـ من في السماء
معاني كثيره تحس علي الحب والرحمه وديننا دين المحبه والالفه والنقاء والصفاء بس لما بعدنا عنه تهنا واخذتنا الدنيا وضع احلي ما فيها من معاني الاخاء والحب في الاسره وفي المجتمع اجمع ..
ربنا يصلح الاحوال وييسر لنا الامور وترجع في بيوتنا من تاني الموده والرحمه ونرجع من تاني ( رحماء بينهمـ ) ونرجع من تاني ( ويؤثرون علي انفسهمـ ولو كان بهـ خصاصه ) هذا هو المجتمع الاسلامي المتكامل اسما وفعلا ,,
دمت بكل خير ..
اهلا وسهلا بيكى اختى غربتى نورتى مدونتى البسيطة وااتمنى الا تكون الاخيرة ان شاء الله
اسمحيلى اقتبس من تعليقك:
ربنا يصلح الاحوال وييسر لنا الامور وترجع في بيوتنا من تاني الموده والرحمه ونرجع من تاني ( رحماء بينهمـ ) ونرجع من تاني ( ويؤثرون علي انفسهمـ ولو كان بهـ خصاصه ) هذا هو المجتمع الاسلامي المتكامل اسما وفعلا ,,
يارب يا اختى آمين يارب العالمين
سبحان الله النسيان طبع متأصل فى الانسان
لاسباب مختلفة
تكلمتى عن مواضيع تمر بنا بجمال ورقى
سلمت اناملك
الله عليكي
البوست بيلامس واقعنا واتكلمتي عنه بطريقة رائعة
عنجد انتي رااااااائعة جدا
والمقطع يجنن ماشاء الله عليكي عمل مبدع والاغنية واااااو جاية تمام مع الصور وكل حاجة
ربي يعطيكي الف عافيي عالدعوة الطيبة
والف الف مبروووووووك لاخوكي الله يوفقه ويسعده ياررررب
تحياتي ليكي
اهلا وسهلا بيكى اخت نوارة الله يبارك فيكى وعقبال عندكم
فعلا هو يلامس الواقع المؤسف الذى نعيشه
شكرا لرايك وهذه اول زيارة ليكى اتمنى انها متكونش الاخيرة ان شاء الله شكرا ليكى
انا جيت اجاوب على السؤال
لان اعتقد و انا بعمل التجديد للمدونة
شلت التحديث بتاع تغيير اسم المدونة
ضد التيار كان اسمى و اسم المدونة
حتى لو هتشوفى عند بعض المدونين فى الريدر
كاتبينى لسه لحد الان ضد التيار ^_^
مش عايزين يعترفوا بالاسم الجديد
والصراحة انا نفسى مش معترفه بيه v_v
بس هنقول ايه .. حكم النيولوك بقى v_v
ميرسى قوى يا حبيبتى سويت فايوليت على اهتمامك بالتوضيح بس اسم المدونة الحالى حلو ورقيق رغم ان ضد التيار قوى وواضح احترت اهوه بقى على العموم اى اسم ليكى هو حلو بحلاوة مدونتك وموضوعاتها الجميلة اسمحيلى اقول سويت فايوليت بحبه اكتر
دمتى بالف خير
عاجبنى موضوعك جدا
لعله يكون تذكرة للجميع
اولا بقى الخلفية بتاعت المدونة جميلة جداااااااااااا
هى لسه جديدة ولا انا متهيألى ؟؟؟
و طبعا مدام بتحبى سويت يبقى سويت
لكن يعنى علشان بردو احتياطى لان الحلو اوقات النفس بتزهق منه انا عارفة هتقولى ضد فى يوم ههههههههههههههههه
موضوع جميييل اوي كالعادة يامامتي
بجد تسلم ايديكي وفعلا لو كلنا حافظنا علي بعض كل الخيوط هتقوي
محلشي انا أتأخرت عليكي كنت تحبانه :(
انفلونزا خنازيري ههههههههه
وحشااااانيييي بجد
ايه رأيك ف السهر ده بأة :)
بس الجو اصله حررررر اوي ^^
انا قولت لازم اجيلك قبل ما انام واسلم عليكي
بس مش عارفه اقولك دلوقتي صباح الخير ولا تصبحي علي خيرر ..؟؟
هههههههه هو ممكن صباح الخير بالليل (:
اهلا وسهلا اختى موناليزا
نورتى وشكرا لرايك الطيب وشكرا لمرورك
واتمنى انها لا تكون الاخيرة ان شاء الله
هههههههههههههه سويت سويت يعنى هههههه
والخلفية فعلا متغيرة بقالها اسبوع او اكتر شكرا ليكى
ازيك يا غادة عاملة ايه الف سلامة عليكى يا حبيبتى ربنا يتم لك الشفاء يارب وتنورى فى اى وقت الحر مجنن الدنيا معلش :)
وصباح النور بالليل برضه عادى:)
كلماتك رائعة سيدتي
فغالبا ما نتسائل عن انسانية الانسان
نسينا اننا من طين خلقنا
ومن رحم الام ولدنا
وبحنان الاب تدفينا
اهلا بيكى اسماء وبكل اهل فلسطين الحبيبة
فعلا نتسائل عن انسانية الانسان
انا علقت على الموضوع السابق ولكن بغير معرف لأني على مايبدو نسيت أن أسجل دخولي لمدونتي لذا لزم التنويه
اهلا بحضرتك استاذ ادهم وتحياتى لاسرتك الجميلة
ماشاء الله
أسئلة كتيرة ياريتنا نجيب عليها بصدق خاصة ونحن على أعتاب الشهر الكريم ...رمضان ..ياريتنا كلنا نجاوب ونعيد حساباتنا و نستقبل رمضان بصفحة بيضا في حياتنا قوامها حب الله ورسوله والتعامل بدينه الحنيف
بارك الله فيكي يا مامة مازن
سبحان الله على توارد الخواطر
تعرفى يا ام مازن الحبيبه
انا كتبت البوست بتاعى قبل مرض أبى..ولم تسمح لى الظروف ان اضعه على المدونه..ولما قرأت البوست بتاعك عرفت ليه انا بحبك كده
علشان يمكن بحس انى شبهك شويه..انت الأحسن طبعا
يعنى دايما لما تلاقى نفسك منجذب لحد تكتشف ان روحه قريبه من روحك.. وطبعا ياريت اكون مثلك بجد
ولا ازكيك على الله واحسبك على خير
بجد بوستك رائع رائع وصحيح نفس الفكرة بس التناول مختلف وجميل وبسيط ويصل إلى القلب ...ربنا يسعد أيامك برضاه ويمن عليك وعلى اسرتك بالسكينه
اهلا وسهلا بحضرتك ماما نور
دائما بنفكر فى رمضان فى وقته ويمكن بعد ما ينتهى لكن ان نفكر قبله ونهيىء انفسنا له هذاما يغيب عنا
اللهم بلغنا رمضان واختم بالصالحات اعمالنا
شكرا لكى اختى
اختى العزيزة ام البنات اهلا بيكى دائما ويارب دائما تنورى المدونة وتسعدينى بتواجدك معى
العفو يا اختى انتى الاحسن باذن الله وياريتنى انا اللى زيك يا حبيبتى وعندى نفس القلب الكبير اللى عندك
الحمد لله ان الموضوع عجبك يهمنى هذا
اشكر لكى تواجدك رغم الظروف الصعبة التى تمرين بها اسال الله ان يريح قلبك ويلهمك الصبر والثبات ويؤجرك فى ما مر بكى
ربنا يباركلك فى بناتك ويجعلهم قرة عين لكى ولوالدهم ودمتم جميعا بخير
إرسال تعليق