الخميس، 9 يوليو 2009

احتمال تكون دى الخواطر اللى بيقولوا عليها



احتمال
احتمال انى احبك
واحتمال برضه اكرهك


احتمال
احتمال اشتاق اليكى
واحتمال ولا حتى اذكرك
واحتمال يحتار امرى فيكى


احتمال
احتمال اشوفك جميلة وحرة وأبية
واحتمال اشوفك قبيحة وعبدة و رديه

احتمال
احتمال ابقى فخورة
واحتمال ابقى مقهورة
واحتمال اتكلم وملقاش لصوتى صدى



احتمال

احتمال تهملى الانسان فيا
واحتمال تقتلى الامل فيا
واحتمال برضه تحنى عليا

احتمال
احتمال اجرى فيكى جرى الوحوش فى البرية
احتمال اجرى واجرى لاجل عيشه انسانية
واحتمال اكون بجرى ورا سراب
واحتمال يكون نفسك فى التراب
يلمنى وترتاحى من همى وشكوتى


احتمال
احتمال يضيع فيكى حلمى
واحتمال يموت فيكى املى
واحتمال يمر عمرى ولسه بحبك انا


احتمال
احتمال أفخر بأمسى
واحتمال ابكى عليه
واحتمال احلم ببكره
واحتمال اخاف منه وعليه

احتمال
واحتمال
واحتمال
مليون احتمال واحتمال واحتمال



لكن الاكيد
انى عمرى ما انكرك او ارفضك او حتى ابيع حقى فيكى

والاكيد
انى احبك واعلم ولادى حبك وارسم معاهم خطوطك يا بلدى


سمعناكى زمان والآن

لكن اسمعينا انتى كمان

بامرنا احنا الشعب الصبور

هنملى عليكى منشور

بامرنا احنا الشعب الطيب اللى لا بلطجى ولا رجل اعمال ولا حتى سياسى:

فوقى يا بلدى
انفضى عنك ترابك ارحمينا اسمعينا خلى خيرك لينا
مستعدين نضحى دلوقتى لاجل العيال
مستعدين ناكلها بدقه لاجل العيال
مستعدين تعذبينا وتبهدلينا لاجل العيال
مستعدين نرمى شهاداتنا وتعب السنين لاجل العيال
مستعدين نستحمل ونستحمل لاجل العيال

فهمتينى يا بلدى

كل همى العيال


فهمتنى يا بلدى


كل املى العيال




راجعى نفسك يا بلدى يمكن عندك اعتذار لينا لسه ما سمعناهوش

راجعى نفسك يا بلدى يمكن تلاقى امل موجود لسه ما عشناهوش

هناك 64 تعليقًا:

Somaya Kamal El Din يقول...

حلوة اووووووى بجد

احساس طفلة محبة للرومانسية بس واقعية يقول...

اى حاجة تكونى حساها وتكتبيها
تكون خاطرة
بس دى خاطرة جميلة عبرتى فيها ببرائة عن كل حاجة جوانا زى اللى كتبتيها لاخوكى بالضبط
حسيت انها لمستنى اوى او شفت فيها كل بنوتة وست مصرية
نفسهم يقولوا لبلدهم كدا
بس انتى تقريبا لخصتى فى النص
بجملة واحدة احنا الشعب العادى مش البلطجى ولا رجل الاعمال والسياسى
احنا الشعب اللى مش بأيدنا حاجة
وبلدنا برضو مبقاش بين ايدها حاجة

وربنا يتولانا برحمتة
تسلم ايدك
وبجد الف شكر على سؤالك
ربنا يديم الود
تقبلى مرورى

مامة مازن يقول...

اشكرك شكرا جزيلا سوميه على الزيارة وعلى رايك
ياريت تكررى الزيارة الطيبة دى
مع السلامة

مامة مازن يقول...

احساس طفلة ام سومه الجميلة
كيف حالك يارب دائما بخير
شكرا لذوقك انتى اختى وربنا يديم الود
فعلا احنا الشعب العادى لا البلطجى ولا رجال الاعمال ولا السياسى واسمحيلى استخدم كلمة السياسى واضيفها شكرا ليكى
فعلا ربنا يتولانا برحمته
شكرا ليكى مرة تانية

قلب ارهقته الاحلام يقول...

اززيك ياماما وحشتيني والله

جمييلة اوي بجد والله الخاطرة الحماسيةوالثايرة دي

ومش أحتمال تكون خاطرة هي كده فعلا :)

بس تفتكري هتراجع نفسها ..؟؟

أو هتتنازل وممكن تعتذر ..؟؟

بجد تسلم ايديكي وقلمك ال كتب

ويارب تكوني بألف خيرر وصحة وسلامة دايما

مامة مازن يقول...

ازيك يا غادة عاملة ايه ربنا يطمنا على بنت خالتك يارب
متشكرة جدا لرأيك الطيب ده
تفتكرى يا غادة
نفسى نفسى نفسى
نورتى يا غدغود(ايه غدغود ديه ههههه)
ربنا يخليكى ولا اتحرم من سؤالك

دعاء يقول...

ايه الجانب الجديد ده منك
بجد حلوة و أحلى ما فيها ان هي من القلب

"احتمال اشوفك جميلة وحرة وأبية
واحتمال اشوفك قبيحة وعبدة و رديه"

فعلا ساعات الواحد بيكون فخور و فرحان انه مصري وساعات يلعن اليوم اللى اتولد فيه مصري.

ابقي كرريها طالما بتعرفي وللا مخبية
يا لئيمة هههههه

مامة مازن يقول...

دعاء يا عسولة
اكيد حستيها زيى ما انتى كل همك العيال وكل املك العيال
مش كده
ربنا يحقق املنا فيهم يارب
تسلمى يا دودى الجميلة

MǿиY El-Shreef يقول...

ماشاء الله عليكي

احساسك بجد واضح فيها يامامتي

عجبتني اووووووي

وبالذات الجزء الاخير

بجد عجبني ربنا يحميكي

وان شاء الله مصر هتبقى احسن واحسن بينا :)

اخر يوم فالجنه يقول...

على اسم مصر التاريخ يقدر يقول ما شاء
أنا مصر عندي أحب وأجمل الأشياء

بحبها وهي مالكة الأرض شرق وغرب

وبحبها وهي مرمية جريحة حرب

بحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلاقيني جنبها في الكرب

والنبض ينفض عروقي بألف نغمة وضرب

صلاح جاهين

Mona يقول...

ايه الحلاوة ديه كانت مستخبية فين - ده غزل وعتاب فى البلد على هيئة زجل جميلة عارفة طول ما فى البلد لسة ناس جميلة زيك قلبها أبيض تتكلم حلو وماتجرحش حد وما تحكمش على حد ولا تفكر تأذى حد أن شاء الله حتعمر وتبقى أحلى وأحلى وأحلى هى البلد ايه غير ناسها الحلويين - مع أنى قلت مش حأقرأ لكن الا أصدقائى

بلاش فضايح يقول...

مامة مازن يا قمر

ازيك وازى مريم ومازن
يارب تكونوا بكل الخير

موضوعك حلو
احتمال تكون هى دى الخواطر ^-^

كلامك جميل
استمر يا بطل

mohamed ghalia يقول...

إحتمال
احتمال تسمعك وإحتمال لا
يبقى مجرد إحتمال
جميلة أوى بجد

جحا المصرى يقول...

وتبقى مجرد إحتمالات
أسعد الله أيامك

Mo2M3N-MiLo يقول...

ماما مع انى معرفش حضرتك بس انا بحب كلمت ماما اوى
ربنا بجد يقدرك الكل بيحترمك
و ده لكلامك يا امى اللى ملين مشاعر و احسايس بجد يا امى
مش عارف كلامك بجد روعه
مع انو ذواد عليا همومى بس بجد
يا امى جميل جدا

Mo2M3N-MiLo يقول...

ماما انا معرفش حضرتك بس انا بحب الكلمة دى اوى
عارفه يا امى بجد
كلامك ده غاية فى الروعه و الجمال بجد
مع انو زواد شوية عندى الهموم بس يلاه عادى
ادينى اه عايش والحمد لله
بجد يا امى كلامك انا حسيته من جويا
شكرا على الخواطر يا امى

ذكرى رحيل قلم يقول...

السلام عليكم

ياجمال الخواطر الا بيقولوا عليها

طيب هي حلوة لالالا فكرتها جميلة وحكياتها اجمل
والله انت ظلمة بلدك ديه لا باديها ولا اي حاجة فيها المهم احنا نحاول نصلح من انفسنا ومن حولينا علي قد ما نقدر

حاسوباتيه يقول...

كلام صعب ومؤثر جدا بصراحه مش عارفه اقولك ايه عن نفسي لسه ما اجوزتش ماعنديش اولاد بس برضو زعلانه قوي من البلد بس كمان بحبها قوي

أدهم يقول...

مامة مازن
هناك منشد قديم (اسمه أبو مازن) كنت أستمع لأناشيده الرائعة التي بث فيها الشعراء همومهم بأوطانهم ذكرتني أنت بأحد مقاطع أنشودة منها ، يقول فيها:سألت خالقي وكلنا سأل لمن تركتنا
سألت خالقي وكلنا سأل
إلي متي ستُطعم الذئاب ما وهبتنا
وأعتقد أن الإجابة على سؤال هذا الشاعر تكمن فينا فقد تركنا الله لأنفسنا المتخاذلة ،التي تنتظر مثل فتاة تنتظر فارسها الجميل الآتي على حصان أبيض ليخلصها مما هي فيه من عذاب زوجة الأب ،واكتفت بالأحلام، هكذا نحن وحتى إذا تمردنا جاء تمردنا وثورتنا أفقية فاستأسدنا على بعضنا وكنا أمام ظالمنا نعام
ياأختاه هوني على نفسك فأنت تحملين نفسك هموم قوم لا يدرون أنهم مهمومون

محمد يقول...

مامة مازن
---------
أشكرك على زيارتك مدونتى الجديدةخبر وتعليق.........................
مازن على ما أتذكر هو الجبل الصغير
وأنتى وكل أم مثلك محبه لأسرتها تبنى عالماوتصنع مستقبلا.
هناك مقوله(الكره الارضيه تدورعلى أطراف أنامل الامهات)
والام ليست فقط الام المنجبه بل كل أنسانه تمتلك هذا الشعور الربانى
(الامومه)
شعرك المنثور أو نثرك الشعرى رائع
ومصر أم مثلك تماما
ذكرت بالقرآن
وزارها المسيح عليه السلام
وتربى فيها موسى عليه السلام
ليس ذلك على سبيل المصادفه
أنها أم عبقريه
تحن على من يحبها
وتقسو على من يهجر مبادئها
تعطى خيرها أو يسرق منها
ولكنها عبر تاريخها صامده
استوعبت من غزها وجعلته جزءا منها
بل أنها غزت نفس من أستعمرها, فهو أستولى على أرضها وهى أستولت على نفسه
ستيتقظ وستقوم
تحياتى لكى
هذا هو لينك مدوناتى
---------------
http://kalamfekalamm-mohamed.blogspot.com/
http://informationtoknow-mohamed.blogspot.com
http://kalamfekalamm.blogspot.com
http://comentonnews.blogspot.com

تحياتى وأحترامى

مامة مازن يقول...

مونىىىىىىىىىىى ياااه والله زمان يا نونو
انتى فين يا بنتى مختفية ليه عموما ربنا معاكى يوفقك دائما
شكرا لرايك حبيبتى واكيد مصر هتبقى احسن واحسن بينا

مامة مازن يقول...

د\ محمود شكرا لك
صلاح جاهين فهمها جدا البلد دى الله يرحمه

مامة مازن يقول...

منى الطيبة شكرا ليكى صديقتى
وهى مصر ايه فعلا غير ناسها الطيبين

مامة مازن يقول...

نونا الجميلة ربنا ميحرمنيش من زيارتك يا نونا احنا بخير الحمد لله ومازال مازن بينط وينط ومازالت مريم بتنط وترسم ههههههههه
ربنا يوفقك يارب

مامة مازن يقول...

استاذ محمد شكرا لك
ويبقى الاحتمال

مامة مازن يقول...

عم جحا شكرا لك
وتبقى مجرد احتمالات

مامة مازن يقول...

اخى الصغير مؤمن شكرا لك
ولرايك وهى كلمات اعتزاز ببلدى وعتاب ليها
شكرا لزيارة المدونة

مامة مازن يقول...

ذكرى الطيبة
ماهو ده اللى احنا كلنا بنحاول نعمله اننا نصلح من نفسنا ومن اولادنا علشان بلدنا برضه

مامة مازن يقول...

الباشمهندسة ازيك نورتى موضوع الاخير لطيف وكوميدى وواقعى شفتى بقى التلاتة
اشكرك لرايك دلوقتى انتى مخطوبة وبتجهزى انتى وخطيبك واكيد بتصدمك الاسعار والاستغلال وقلة اللى فى الايد ربنا يوسع عليكم يارب
بس بكره بقى لما يبقى عندك اولاد هتعرفى صحيح انا قصدى ايه

Kiara يقول...

جميله اوي ياقمر بس المشكله مش في البلد المشكله في الللي بيمشوا البلد

مامة مازن يقول...

استاذ ادهم دائما تعليقاتك موضوعات فى حد ذاتها ربنا يبارك فى اسرتك الطيبة
انا شايله هم ولادى وولاد بلدى بس خايفه عليهم وعلى المستقبل بتاعهم
ربنا ينور طريقنا جميعا

مامة مازن يقول...

اشكرك استاذ محمد مدوناتك الاربعة احسن من بعض الحقيقة
وتعليق حضرتك اكثر من رائع وهو ايضا موضوع فى حد ذاته شكرا جزيلا

مامة مازن يقول...

كيارا العزيزة طبعا عمر المشكلة ابدا ما كانت فى مصر كبلد ابدا وشعب
رسول الله صلى لله عليه وسلم قال ان جندها خير اجناد الارض صدق رسول الله
شهادة من سيد الخلق فى حق ناس البلد دى

غير معرف يقول...

مامة مازن الحبيبة
والله انا بقول ان مابين سطورك
فيه موهبة بدات تظهر وتتجلى
جميلة جدا تلك الاحتمالات
والتى رغم شعورنا بيها بنحبها
واحتمال ياتى يوم ويعتذر لنا
القائمين على امورها
وقرات بوستك اللى فات واقولك
ربنا يبارك فيهم جميعا وعاشت الاسامى
تحياتى

مامة مازن يقول...

اهلا بحضرتك ماما ام مالك نورتى المدونة كلها
ربنا يخليلك انتى كمان كل اللى تحبيهم يارب
ياريت نفسى جدا اسمع اعتذار ولو على استحياء

بـِصَمتـِـ أميرة ــــى يقول...

الله
مااحنا طلعنا شعرا جامدين اهو
الخاطرة دى
فكرتنى بابداعات صلاح عبد الصبور بلا مجاملة ولا نفاق والله
بجد مبدعه
يالله استمرى
وننتظر المزيد

وتقبلى تحياتى
:)
أميرة
(ملكة بحجابى )

غير معرف يقول...

مامة مازن
بصراحة مش قادرة اعبر عن فرحتى بيكى
يارب دايما فى تقدم وابهار للعالم
واتمنى فعلا ان يوصل صوتك للعالم باثره
والله العظيم كلامى مفهوش اى نوع من المجاملة خالص بجد وجع قلبى ومسنى
تقبلى حبى واعجابى الشديدبكى وبافكارك
سلامى لموزه وميرو
ام فرح وهنا

بسنت صلاح الدين يقول...

ايه ده كله ؟؟كلامك والله مؤثر اوى حسيت ان عينيا دمعت على حال البلد و على مصر التى كانت ورغم كل ده مش عارفين ننساها ولا نهجرها ولا حتى نكرهها،عجبتنى اوى فهمتينى يابلدى كل همى العيال حسيت بيها اوى رغم ان لسه بدرى على مايبقى عندى عيال،عاوزين من ده كتير

شمس النهار يقول...

ازيك
خواطرك جميله جدا
تسلم ايدك

معلش مش برد عندي في المدونه لضيق الوقت بس بحاول اتابكم في مدوناتكم
عشان مايفتنيش كتير

MǿиY El-Shreef يقول...

ازيك يامامتي

معلش اتأخرت عليكي بس الموضوع بقى عقد اوي مش عارفه ليه كده

بصي اول حاجه هتدخلي ع الموقع ده

http://www.myflashfetish.com/

هتلاقي فوق في كلمه sign up

ده اللينك بتاعها اهو

http://www.myflashfetish.com/signup.php

هتسجلي وتملي البيانات وبعدين هيقولك خلاص تم وحسابك شغال

ماتعدليش البروفايل وكده

ادخلي ع طول هنا

http://www.mixpod.com/

وسجلي دخول بالميل الي عملتيه والباس

وفي الشريط فوق هتلاقي كلمه بلاي ليست لو وقفتي عليها بالماوس هتنزل ليست الليست دي اختاري منها نيو بلاي ليست

اهو اللينك

http://www.mixpod.com/myspace-mp3players.php

وهتلاقي اشكال كتير لل mp3

اختاري واحد وبعدين هتلاقي بتاع كده بحث يعني

هتكتبي اسم الاغنيه الي انتي عيزاها فيه

وتدوسي سيرش هيطلعلك على طول الاغنيه وهيجبلك ليها كذا اختيار هتختار الي هيعجبك وتدوسي على + هتلاقيها جمب اسم الاغنيه

ولو عايزه اغنيه تاني بحيث تعملي بلاي ليست تقدري تعملي سيرش وتضيفي الاغاني زي ماقلتلك وبعدين

هتلاقي الكلمه دي customize

وتحتها تلت خيارات السكين والكلر والستايل والسيتنج

ظبطي فيهم لو عايزه او لو حابه شكله كده خلاص

انقلي لستيب 3 الي هي سيف بلاي ليست

وهيوديكي لصفحه اكتبي فيها اسم للبلاي ليست ومش لازم تعبي اي فراغات تاني غير اسم البلاي ليست

وبصي تحت هتلاقي سيف وجيت كوود

دوسي هتنقلك لصفحه الكود

انسخيه والزقيه ف جافا سكريبت بوكس ف صفحه التخطيط بتاعتك

بث هو كده

عارفه ان شرحي مريييع

بس لو وقف معاكي هشرح بالصور اوكي :)

مامة مازن يقول...

ميرسى قوى يا اميرة دا كلام كتير وكبير قوى قوى لالالا الموضوع بالنسبة لى ابسط من كده بمراااااااحل
امال بس نقول احنا ايه على كلماتك الرائعة اللى بتحلق بقلوبنا فوق السحاب ربنا يعزك يا اميرة ميرسى كتييير
ونورتى نورتى وفرحتنى زيارتك جدا ميرسى يا حبيبتى

مامة مازن يقول...

ام فرح وهنا عزيزتى وشقيقتى الغالية جدا مكنتش عايزة انشر تعليقك علشان كتير جدا جدا عليا هو بس نشرته علشان هو بيان للحب اللى بينى وبين شقيقاتى اللى هو اكبر نعمه من ربنا انك وام ايه اخواتى دى نعمىة كبيرة جدا من ربنا عسى اوفيها حقها من الشكر ربنا يسعدك يا اختى وشقيقة روحى ويحلى ايامك ويبارك فى البنات ويعينك على تربيتهم زى ما انتى عايزة

مامة مازن يقول...

بسنت العزيزة ام المستقبل بامر الله عنيكى دمعت دلوقتى من فطرة الامومة اللى ربنا خلقها سبحانه وتعالى جوا كل انثى دا خوف مش على نفسك لا دا على من هم اغلى من نفسك ان شاء الله
ربنا يعدلها يا بسنت لاجل العيال

مامة مازن يقول...

اختى شمس النهار انا يزيدنى شرف بس مجرد زيارتك ليا ربى يفرحك ويسعدك وترجعى مصر ا لغالية بالسلامة
تحياتى ليكى اختى العزيزة

مامة مازن يقول...

ميرسى يا مونى ميرسى يا حبيبتى على اهتمامك ربنا يكرمك يارب
شرحك جميل وهروح اعمل شاى كده وامخمخ واحاول بس المرة دى شاى من غير ساندوتش الجبن الرومى عاااااااااا بعمل رجيم عااااااااااااااااا
ادعيلى يامونى اقاوم الاغراءات اللذيذة هههههههههههههههه

هاني مهران يقول...

احتمال اكون مبسوط من القصيدة

واحتمال اكون مندهش من الكتابة

واحتمال اكون مش فاهم انتى بتكتى اى نوع من الابداع




لكن ابداع هايل


تقبلى مرورى

مامة مازن يقول...

شكرا لك استاذ هانى
الموضوع بالنسبة لى لا يمت للابداع بصلة هى بس رسالة من ام بعتها لبلدى وامى مصر

akeed يقول...

كلمات جميلة بجد


تحياتى

مامة مازن يقول...

شكرا لك اخ اكيد

Unknown يقول...

والله انت ظلمة البلد

المشكلة مش في البلد ..لا
اللي مسكين البلد

؟؟؟؟؟؟؟

وبلاش نكمل احسن نروح في داهية

ويبقى التواصل

مامة مازن يقول...

شكرا لك اخ معتز اعلم هذا تمام ا لعلم ولكن كلماتى مجرد رسالة لامى الحبيبة مصر وعتاب بسيط

ليس فقيرا من يحب يقول...

السلام عليكم

هى دى الخواطر اللى بيقولو عليها
جميله جدا كلماتك وخواطرك بس بصراحه البلد مظلومه معانا
كل همى العيال
كل املى العيال كلمات معبرة بجد


تحياتى ليكى ونتواصل دايما باذن الله
فى حفظ الرحمن

UncŁē Sam يقول...

دى اول زيارة ليا للمدونة و بجد كلامك جميل وعجبنى مليان برائة
احنا فينا كل حاجة وعايشين مسلمين ومسحين اغنيا وفقرا وعايشن بنحب بعض
ربنا يخلى امنا مصر وامنا التانية :D

UncŁē Sam يقول...

دى اول زيارة ليا للمدونة و بجد كلامك جميل وعجبنى مليان برائة
احنا فينا كل حاجة وعايشين مسلمين ومسحين اغنيا وفقرا وعايشن بنحب بعض
ربنا يخلى امنا مصر وامنا التانية :D

ديالا يقول...

ماما مازن

بجد حلوه اوي

وبجد كلماتها جميله جدا

تقبلي مروري

مامة مازن يقول...

اهلا بيكى يارونى منورة جدا جدا ربنا يخليكى
فعلا كل همى وكل املى العيال
ربنا يكتب لنا جميعا السعادة وراحة البال

مامة مازن يقول...

اخى الصغير اسلام شكرا لك على زيارتك الولى رغم انها واضح انها ستكون الاخيرة لانك قررت تقفل مدونتك
عموما اشكرك شكرا جزيلا

مامة مازن يقول...

ديالا اهلا بيكى اختى اهلا وسهلا
نورتى دائما تزورينى وانا مقصرة معاكى
معلش هصلح الغلطة دى
نورتينى بجد

حازم النبراوي يقول...

السلام عليكم ورحمة الله وبركاتة

انا حبيت ابلغك انى اذعت موضوعك
"احتمال تكون دى الخواطر اللى بيقولوا عليها"

على الرابط

http://arabfreeradio.blogspot.com/search/label/%D8%A7%D8%AD%D8%AA%D9%85%D8%A7%D9%84%20-%20%D9%83%D8%AA%D8%A8%D8%AA%D9%87%D8%A7%20%28%D9%85%D8%A7%D9%85%D9%87%20%D9%85%D8%A7%D8%B2%D9%86%29%20%D9%82%D8%B1%D8%A3%D9%87%D8%A7%20%28%D8%AD%D8%A7%D8%B2%D9%85%20%D8%A7%D9%84%D9%86%D8%A8%D8%B1%D8%A7%D9%88%D9%8A%29

يا رب يعجبك

مع تمنياتى بالتوفيق ودوام التواصل بيننا

تحياتى وتقديري

حازم النبراوي يقول...

الرابط دة هيكون اسهل لان الرابط اللى بعتة الاول طويل جدااا

الرابط دة اسهل بكتير

http://arabfreeradio.blogspot.com/2009/07/blog-post_27.html

اسف انى زحمت الدنيا بتعليقاتى

مامة مازن يقول...

شكر جزيلا لحضرتك استاذ حازم شكرا جزيلا بجد

ديالا يقول...

حلوه اوي اوي

الدنيا كلها اساسا كلها مبنيه علي الاحتمالات

بس الاكيد ان البوست ده رائع

مامة مازن يقول...

ربنا يكرمك ديالا الاكيد الاكتر ان كلك ذوق ميرسى ليكى بجد

Unknown يقول...

جميلة جداً