هى بقت كده

مادام بقت كده يبقى اقول الكلمة اللى نفسى اقولها
يا لهووووووووووووووووووووووىىىىىىىىىىىىى

حمدين صباحى

ليه حمدين صباحى
*******************

علشان محتاجين انسان مصرى يفكرنا بمصريتنا اللى شوهوها
عايزين واحد يكون فيه الرحمة والعدل.
عايزين قائد وقدوة للاجيال الصغيرة اللى بتتطلع لحد يكون مثل أعلى ليها
عايزين حد يديهم الامل انه واحد من الشعب ده آمن بيه وبقدرات ابنائه وانهم ممكن يعملوا المستحيل
احنا مش عايزين واحد يتمريس علينا بالبلدى كده ويقولنا فى 24ساعة وفى 100يوم
والكلام بتاع السلطات والباباغنوج ده
احنا عايزين برنامج انتخابى واضح المعالم، مفهوم ،آليات تنفيذه واضحة
هياخد وقت وماله بس باذن الله يتحقق
احنا عايزين قائد يفكر الناس بمصريتها الغالية وكرامتها العزيزة وروحها الطيبة
عايزين واحد حاسس بالناس عنده حلم نفسه يحققه
احنا مش عايزين جماعة تحكمنا احنا عايزين مجموعة رئيس وبرلمان قوى وحكومة قويةواصغر موظف فى ابعد مكان عن العاصمة قوى
احنا محتاجين ادارة قوية للدولة وكل واحد يفهم انه له دور فى مصر علشان نحاول نخليها احسن
احنا اخر يوم النهاردة فى الدعاية والصمت الانتخابى من بكرة 


كأم مصرية كل أملى فى الدنيا مستقبل أولادى يكون أحسن
هنتخب باذن الله الاستاذ المحترم المصرى الاصيل/حمدين صباحى


ملحوظة كبيرة قوى:
بالله عليك لو قرأت التدوينة دى وكنت ناوى تقاطع الانتخابات بلاش تقاطع
انتخب اختار واحد من ال13 بس بلاش فلول او اكثرية فى برلمان
وبعد كده اقرا البرنامج لكل واحد واختارلك مرشح 
مش معقول مصر تخسر صوت واحد من ولادها فى وقت هى محتاجاه فيه

حمدين صباحى

نظرا للظروف اللى ما يعلم بيها غير ربنا

وجدت ان حضرتك انسب واحد نفسيا وضميرى وكل حاجة راضية عنه

تستحق صوتى لان صوتى غالى وبيفرق كتير

تصويتى باذن الله لحمدين صباحى

رسالة الى الاخوان

بجد انتوا خنقتونى

انتوا قلتوا ملناش مرشح رئاسة قولتوا واللا مقولتوش قولتوا صح

طب امال خبر خيرت الشاطر ده ايه

مليش علاقة باختياركم انتوا احرار بس انتوا قولتوا معندناش مرشح حتى فصلتوا دكتور عبد المنعم من الجماعة علشان اعلن ترشحه بعد الثورة

مش ملاحظين ان مواقفكم غريبة بتقولوا حاجة وتعملوا عكسها

على فكرة انتوا مبتلعبوش سياسة فير

انتو خنقتونى بجد

مفيش خبر ترشح اى حد خنقنى زى الخبر ده دلوقتى

صراحة انتوا مواقفكوا غريبة جدا من ساعة ما وقفت فى الطابور ولقيت الملقنيين بتوعكم بيلقنوا بالاسماء هنا فى بنها وانا عرفت ان فى بلاوى تنتظرنا لان كده معملناش حاجة مش ده اللى الناس ماتت علشانه

المهم انتوا نكدتوا عليا جدا

المشكلة انى سمعت من ثوانى دخلت منتدى لقيت عضوة توقيعها الصورة ومش عارفة ايه ومرشح رئاسة وبتاع هى الصورة دى معمولة بقى من كام يوم واللجنة الالكترونية اشتغلت ايه ما شاء الله

ملحوظة رفيعة:

مش الاسم اللى اخترتوه اللى خنقنى قوى

اللى خنقنى التصرف بتاعكم اللى بيكمل سلسلة التصرفات اياها

كل عام أنتم بخير

بسم الله الرحمن الرحيم

***********

سنة جديدة

يارب تكون سعيدة *

يا ليتنى كنت ترابا

ياليتنى كنت لا ارى
يا ليتنى كنت لا اسمع
يا ليتنى كنت لا اتكلم


احنا فى هم ما يعلم به الا اللى خلقنا وخلق الكون

هم
هم
هم

يا هم لى رب كبير

الثورة لن تموت

http://thawraneverdie.blogspot.com/

مدونة جديدة تعنى بتوثيق الاحداث من شهود عيان

ياريت اللى عنده مادة يتواصل معهم لنشرها حتى يوثق الشعب بنفسه ويبحث الشعب بنفسه عن الحقيقة

اللهم كن لنا ولا تكن علينا

اللهم آمين

خدنا معاك يا استاذ يوسف

{استاذ يوسف الحسينى كان فى صباح اون اليوم بيقول انا نفسى اروح طرة واضح ان طرة أأمن مكان فى مصر دلوقتى احلى عيشة }

انا حاسيت انه هيبكى
انا فعلا بكيت لما قال كده وقلبى وجعنى جدا

رغم انى شايفه ان توقيت الميدان غلط الا انى مش قادرة ابقى ضدهم كلنا شوفنا بعينا محدش قالنا الناس بتضرب ازاى بتتسحل جثثهم ازاى بتفقأ عينهم ازاى دى طريقة ينفع نتعامل بيها
وافكر ماذا لو كان اخويا مات او فقد نور عينه وماذا لو فقدت زوجى وتيتم اولادى كان هيبقى احساسى ايه
ليه محدش لحق المشكله فى الاول من قبل يوم الجمعة اللى فاتت ومصر كلها عارفة ان المصابين واهالى الشهداء معتصمين طب محدش كلمهم ليه محدش عبرهم ليه
لما انضربوا واتسحلوا الناس ثارت علشانهم ونزلوا تانى الميدان

لو بس يراعوا الآدمية فينا هو ده المطلب الوحيد
احنا مش شوية فراخ بيصطادوهم فى عيونهم
انا فى بنها بعيد عن الميدان حوالى ساعة مواصلات مش بعيد يعنى لكن مينفعش اروح لاسباب كتير مش مجالها دلوقتى
احنا كلمتنا هنقولها فى بنها يوم3يناير لو اتعملت الانتخابات هنورى الاحزاب اللى قرفتنا دى ان كل واحد فينا يفرق قوى وان صوتى مع صوت فلان وفلان ممكن يعمل ايه
انا دورى جاى جاى جاى وسنين اهله سودا اللى هشوفه بيعمل حاجة غلط عند لجنة الانتخاب قف باحترام وادلى بصوتك باحترام ولا تؤثر على حد واللا بالشوز
بالنسبة لمرشحين الرئاسة اصبروا علينا بس احنا الشعب هنعرفكوا شغلكوا يبقى ازاى

دا احنا متغاظين غيظة من بتوع السياسة دخلونا فى دوامات سودة سودة
وادى النتيجة الناس ثارت ثورة ربنا وحدة يعلم نتيجتها ايه
خدوا بالكوا لو اتعمل استفتاء على بقاء المجلس هيطلع بنعم بنسبة كبيييرة جدا المرة دى
الناس خايفة وشايفة المجلس اخر امل ليهم ولو مشى هيتاكلوا علشان كده لو حصل استفتاء لا تتفاجئوا من النتيجة

واخيرا وليس آخرا
الله يخرب بيت اللى مبيقولش الحقيقة
الله ينتقم من اللى بيضلل او بيهول
الله يخرب بيت اللى بيخوفنا او بيخونا
الله ينتقم من اللى عايز يضرنا او يضر بلدنا

يارب

يارب

يارب