حياة بكل ما فيها

كل عام أنتم بخير

2011-12-31T20:42:00.001+02:00

بسم الله الرحمن الرحيم

***********

سنة جديدة

يارب تكون سعيدة *

يا ليتنى كنت ترابا

2011-12-18T13:31:00.002+02:00

ياليتنى كنت لا ارى
يا ليتنى كنت لا اسمع
يا ليتنى كنت لا اتكلم

احنا فى هم ما يعلم به الا اللى خلقنا وخلق الكون

هم
هم
هم

يا هم لى رب كبير

الثورة لن تموت

2011-12-08T19:28:00.001+02:00

http://thawraneverdie.blogspot.com/

مدونة جديدة تعنى بتوثيق الاحداث من شهود عيان

ياريت اللى عنده مادة يتواصل معهم لنشرها حتى يوثق الشعب بنفسه ويبحث الشعب بنفسه عن الحقيقة

الكائن العوكشاوى

2011-11-27T15:00:00.002+02:00

احذروا من الكائن العكشاوى معاه ورق يدين وبلاويهم كلها عنده

هو الوحيد فى مصر اللى معاه الحقيقة الكاملة

يا سلااااااااااااااام

الحقيقة (على رأيه ) انا مش عارفة سايبينه كده ازاى بجد

قولت اشوف الناس متضايقة منه كده ليه لقيته بصراحة

نموذج اولى بالدراسة من اى نماذج بشرية اخرى

فكره عالمى ومعاه ملفات الناس كلها تحس انك بتسمع ضابط امن دولة كبير او واحد سى اى ايه مثلا

بجد تابعوا حتى حلقه واحدة انا مش عارفة اعلامى ازاى

ده طالع يخوف الناس ويخون الناس ويهول ويهلل ووووو

الظريف اللطيف فى الموضوع ان ده منهج قناة مش فكره هو بس

القناة بصراحة عبارة عن خناقة وعاركة كبيييرة

وعلى رايه ودى احسن حاجة قالها فليذهب الجميع الى الجحيم وتبقى مصر

2011-11-25T18:27:00.000+02:00

اللهم كن لنا ولا تكن علينا

اللهم آمين

خدنا معاك يا استاذ يوسف

2011-11-23T11:58:00.002+02:00

{استاذ يوسف الحسينى كان فى صباح اون اليوم بيقول انا نفسى اروح طرة واضح ان طرة أأمن مكان فى مصر دلوقتى احلى عيشة }

انا حاسيت انه هيبكى
انا فعلا بكيت لما قال كده وقلبى وجعنى جدا

رغم انى شايفه ان توقيت الميدان غلط الا انى مش قادرة ابقى ضدهم كلنا شوفنا بعينا محدش قالنا الناس بتضرب ازاى بتتسحل جثثهم ازاى بتفقأ عينهم ازاى دى طريقة ينفع نتعامل بيها
وافكر ماذا لو كان اخويا مات او فقد نور عينه وماذا لو فقدت زوجى وتيتم اولادى كان هيبقى احساسى ايه
ليه محدش لحق المشكله فى الاول من قبل يوم الجمعة اللى فاتت ومصر كلها عارفة ان المصابين واهالى الشهداء معتصمين طب محدش كلمهم ليه محدش عبرهم ليه
لما انضربوا واتسحلوا الناس ثارت علشانهم ونزلوا تانى الميدان

لو بس يراعوا الآدمية فينا هو ده المطلب الوحيد
احنا مش شوية فراخ بيصطادوهم فى عيونهم
انا فى بنها بعيد عن الميدان حوالى ساعة مواصلات مش بعيد يعنى لكن مينفعش اروح لاسباب كتير مش مجالها دلوقتى
احنا كلمتنا هنقولها فى بنها يوم3يناير لو اتعملت الانتخابات هنورى الاحزاب اللى قرفتنا دى ان كل واحد فينا يفرق قوى وان صوتى مع صوت فلان وفلان ممكن يعمل ايه
انا دورى جاى جاى جاى وسنين اهله سودا اللى هشوفه بيعمل حاجة غلط عند لجنة الانتخاب قف باحترام وادلى بصوتك باحترام ولا تؤثر على حد واللا بالشوز
بالنسبة لمرشحين الرئاسة اصبروا علينا بس احنا الشعب هنعرفكوا شغلكوا يبقى ازاى

دا احنا متغاظين غيظة من بتوع السياسة دخلونا فى دوامات سودة سودة
وادى النتيجة الناس ثارت ثورة ربنا وحدة يعلم نتيجتها ايه
خدوا بالكوا لو اتعمل استفتاء على بقاء المجلس هيطلع بنعم بنسبة كبيييرة جدا المرة دى
الناس خايفة وشايفة المجلس اخر امل ليهم ولو مشى هيتاكلوا علشان كده لو حصل استفتاء لا تتفاجئوا من النتيجة

واخيرا وليس آخرا
الله يخرب بيت اللى مبيقولش الحقيقة
الله ينتقم من اللى بيضلل او بيهول
الله يخرب بيت اللى بيخوفنا او بيخونا
الله ينتقم من اللى عايز يضرنا او يضر بلدنا

2011-11-20T22:09:00.001+02:00

يارب

اكسون بنها

2011-11-16T14:03:00.003+02:00

بسم الله الرحمن الرحيم
***********************
شبكة الدراسات الدولية فرع بنها
ما شاء الله تعد اضافة جديدة وممتازة لمدينة بنها
المادة العلمية عندهم ماشاء الله قوية جدا
واتكلم على وجه الخصوص بشان الماتريل بتاعة الاطفال ممتازة جدا وهتبتدى بالطفل من مستواه صعودا بيه لاعلى مستوى باذن الله
وطبعا فى خطط تدريس وتدريب لاى سن بس انا بتكلم عن ما عرفته خصوصا بالنسبة للغة الانجليزية لطفلتى الحبيبة
اكسون يهتم باللغات والكميوتر والسوفت سكيلز {عذرا لانى بكتب مصطلحات انجليزية بالطريقة دى بس المدونة فيها بروبلم:)}

مدير الفرع د/حميد انسان محترم جدا وذوق لن يبخل عليك باى معلومة
خدمة العملاء عندهم اخر احترام حقيقة
خلاف امكانية حصولك على كورسات لاحصر لها عندهم معتمدة من الاتحاد الاوروبى
يمكنك ايضا فى هذه الفترة الانضمام لفريق العمل هناك كخدمة عملاء او تسويق ولست متاكدة ان كانت هناك وظائف شاغرة كمحاضر او مدرس
عموما يمكنك الاستفسار على رقم0133212837
او ارسل ايميل على axon_banha@yahoo.com

الى القائمين على شئون مصر والمصريين

2011-11-13T12:32:00.002+02:00

السلام عليكم ورحمة الله وبركاته

تحية طيبة وبعد،

نظرا لما نلاقيه نحن أبناء الشعب المصرى من اهمال وتهميش وتصغير وتجاهل واللعب بمقدراتنا وكأننا لا قيمة لنا ولا وزن ولا حتى احساس

وجب علينا تنبيه سيادتكم الى اننا عكس ذلك تماما

فاننا رجال ونساء قد تعبنا من استهتاركم بنا على كل المستويات

ونخص بالكلام فى خطابنا هذا فى يومنا هذا مسألة عليكم حلها لانها كقنبلة فتيلها مشتعل حاليا وعلى وشك الانفجار

انها مسألة البطالة

من يجد لنا حل فيها ومن يعيننا عليها غيركم يا اولى الامر

من يرد لنا سنوات عمرنا التى اهدرناها فى تعليم لا نفع منه ولا طائل

من يرد لنا أحلامنا التى ضاعت يوما بعد يوم وعاما بعد عام

لماذا تعلنون عن وظائف ونهرول ساعيين للتقديم فيها وتضربوا بنا وبأوراقنا وباحلامنا عرض الحائط

أما كان أكرم لكم ولنا أن تعلنوها أن لا تعيين ولا عقود ولا شىء بدلا عن ان تستهينوا بنا الى هذا الحد

أعتقد فهمتوا محتوى خطابنا هذا

والى خطاب آخر باذن الله نحملكم فيه مسئولية اخرى من مسئولياتكم ونلف حول اعناقكم امانات اخرى ضيعتموها

ولله الامر من قبل ومن بعد

امضاء شابة من شباب مصر العمر بيجرى بيها وحلمها بمستقبل افضل لاولادها بيجرى هو كمان من بين ايديها

هرتلات(2)

2011-11-10T13:41:00.001+02:00

الهرتلة جميلة بتعبر فيها عن اللى جواك واللى بيسمعك بيبقى مديلك عذر انك بتهرتل فمبيعلقش قوى ويسيبك تهيس براحتك وممكن فى الآخر يقولك ربنا يصلح الحال ومعلش بقى اصلى محتاج انام بدرى علشان الشغل او اصل ورايا محاضرة دلوقتى او معلش ياااه كنت ناسى مشوار ضرورى معلش مضطر أمشى

بصراحة هو كتر خيره أو كتر خيرها انها سمعت بؤين الهرتلة والتنفيس والتهييس دول

ممكن متلاقيش حد تهرتل معاه هنا بقى وهنا بس ييجى دور البلوجر تهيس براحتك يا معلم وطالما انك مؤدب مبتقولش اى حاجة تستدعى صفارة التشفير اياها تيييييييييت يبقى هيس ومراحب واهلين وهلا وغلا والشاى ع النار

********************************************************************************

الجميل فى الموضوع ان الجهود كلها تضافرت علشان تكره الناس فى نفسها وبعضها

المدهش فى الموضوع ان مفيش جدول زمنى لاى شىء فى البلد دى تصدقوا ان بياع الخضار بيبقى عنده جدول زمنى هيشترى الصنف الفلانى امتى ومنين وفى حدود كام ولو غالى هشترى كذا ولو رخيص هكتر شوية وباذن الله هيخلص على يوم كذا وهجيب غيره يوم كذا ولو ماخلص هدى لفلان يبيع لى وووووهكذا عنده فعلا جدول زمنى

يعنى كله بيبقى واضع خطة معينة 123 طيب خطتنا احنا ايه لو فرضنا جدلا ان الفترة الانتقالية اتمدت لابعد من 2013 ده لانى سمعت انها اتمدت لكده لو فر ضنا انها لحد 2015 طيب جدولنا ايه هنعمل ايه ايه الاولويات هنعمل ايه الاول وايه التانى وهكذا

كنت قبل الثورة حاسة ان الدنيا بتضلم جت الثورة والنور جه النور جه وبعدين ييييييييييه ضلمة وعمالين ندور ع الكشاف مش لاقيينه ولله الحمد

*****************************************************************************

اللذيذ برضه فى الموضوع ان كله عايز يزيد مرتبه حالا بالا والمدرسين البشوات مش عاجبهم ياخى جتكم ستين نيله بقالى 9 سنين بحاول اخد جواب اشتغل مدرسة بالأجر مش عارفة اتكسفوا على دمكوا جاتكوا القرف سورى يا جماعة ان كانت الشتومة دى تستوجب التشفير فاليكم ال تييييييييييت

******************************************************************************

الرائع فى الحكاية ان مدرسين دبلوم المعلمين اللى اتلغى من قرون شغالين وفلة يلا ارزاق هنق بقى هى بلدنا كده مش عايزانا هنخليها تعوزنا بالعافية ناس بطالة صحيح

*******************************************************************************

انتخابات مجلس الشعب الجاية اتوقع واتوقع واتوقع انها هتكون مصيبة سودا وكارثة وصدمة

*******************************************************************************

لما بدخل على مواقع الجرائد واقرأ الخبر واقرأ تعليقات الناس بلاقى الناس عندها كمية فجاجة فى الكلام غير عادية ليه كده ليه الوحاشة دى فى فرق والله العظيم بين الادب وقلة الادب فرق بيّن ليه كده عدم الاحترام ده

ما كل واحد يقول اللى هو عايزه ونحترم نفسنا ونحترم بعض

*******************************************************************************

ليه واحد يقول واحد ملحد كل قطيع الغنم يقول ملحد ايه الغم ده شوفته وهو بيقول انا ملحد

********************************************************************************

عماله اقرأ حفل ماسونيين ونيله هى المشرحه ناقصة قتلة

هو احنا ناقصين طقوس وتعاويذ دا احنا متظبطين

ممكن جدا تحصل بلاوى لو الحفلة دى اتعملت ممكن ممكن واحد مش قابل يحصل كده واللى مش قابلين كتير وانا منهم يعمل حاجة تحصل ازمة تستدعى ضربه بالجزمة علشان خاطر الدبلوماسية وان مصر الحبيبة مزارا سياحيا لكل الناس من كل مكان

سورى بقى نو يا معلم جاميه كده غلط انت دخلت كده فى حته بعيد قوى عن السياحة ومصر هتفضل غالية عليا لا لالا انت دخلت فى حته سودة منقطة بكحلى مزركشة بسوااااااااد أصلى

*********************************************************************************

أسعار ملابس الاطفال ليه عاملة كده ليه بجد ليه الغلو والمغالاة والمبالغة وال... مش عارفة اجيب دلوقتى مرادفات تانية للمعنى

لما الاسعار كده فى بنها امال فى القاهرة عاملة ازاى أف بجد

********************************************************************************

لما اتغيرعدلى حسين محافظ القليوبية اللى فات قولت هييييه هييييييييييييه هيييييييييييه ويل يا ويل ويل يا ويل

وسمعت ان اللى جاى عادل زايد دكتوراة من المريكا شيكا بيكا وراجل جامعى قولت خير يا جودعان اكيد هيكون فى فكر وهيساعد المحافظة وبنها حبيبتى هتبقى أحسن علشان هى تستحق فعلا

لكن فلة يا قلة مش عارفة بصراحة هو عمل ايه أو معملش ايه علشان مكونش كذابة او من مروجى الشائعات

لكن بصراحة احوال بنها مش عجبانى خالص خالص سائقين السوزوكى وهى وسيلة المواصلات الرسمية هنا بيسعروا التوصيلة بمزاجهم اى طريق مشاة مليان بالبائعين الرصيف للبائعين والناس بتمشى فى حضن العربيات عادى

فوضى فى المرور اللى جاى من المخالف عادى مفيش عسكرى حتى مفيش تنظيم رغم ان فى طرق بديلة للكثافة الرهيبة اللى بتحصل وقت خروج الطلبة والموظفين

بنها بصراحة محتاجة صحصحة من مسئولينها شوية بنها مركز تجارى هام فى الدلتا ومركز زراعى وكمان فيها مصانع مهمة جدا دا احنا عندنا جامعة يا جدعان

بنها محتاجة اهتمام بجد

انا فاكرة واحنا عيال كان فى محافظ كل بنها كانت بتحبه كان اسمه عادل الهامى انا مش عارفة توفى الله يرحمه واللا موجود

بس بصراحة هو اللى صلح حال بنها اصلا هو اللى ظبط الطرق والمواصلات والتسعيرة والمخابز

وكان بينزل الاسواق على رجله زى اى مواطن لا تشريفة ولا عربيات ولا غيره يروح المخبز يقف فى الطابور يشوف صاحب المخبز بيتعامل ازاى وعيشه يتاكل واللا لأ وهكذا وكان ثورى فى قراراته كانت مواصلات القرى فظيعة اداهم مهلة 40 يوم يغيروا العربيات دى فورا لتتناسب مع ادمية الناس وغيره وغيره

الناس مازالت فاكراه رغم مرور سنييييييييين كتير علشان كان حاسم وحازم وعادل

يا مسهل يارب

******************************************************************************

رئيس الجمهورية اللى جاى ربنا معاه يوفقه ويهديه لما فيه خير البلاد والعباد

******************************************************************************

مش بهرتل دلوقتى خالص انا بعيدة دلوقتى عن الهرتلة ولكنى أؤيد وبشدة الاستاذ حمدين صباحى لرئاسة الجمهورية

تابعوا مواقفه ومقابلاته التليفزيونية واحاديثه هتلاقوه الاقرب لقلوبكم ليه لانه حاسس بقيمتكم

حاسس بقيمة الانسان فينا القيمة اللى اهدروها سنييييييين طويلة بدعيله ربنا معاه هو هيطلع بينا لقدام لو ربنا اذن مش هيبقى فى جدال كتير وتضييع وقت هتبقى مصر كلها على قلب رجل واحد لانه منهم مصرى وهمه هم البلد والناس مبحسش فى كلامه ان انتخبونى انا وبلاش فلان علشان كخه لا كبير وموزون ربنا معاه

******************************************************************************

البوست ده طويل قوى فممكن تكتفى بتعليق ربنا يصلح الحال زى اخوانا فى اول البوست وتريح نفسك:) ؛)

هتقومى تانى

2011-10-13T10:30:00.002+02:00

عارفة انك هتقومى تانى

وقعتى وقعة جامدة واتجرحتى جامد

بس هتقومى تانى

هتلاقى الف والف ايد تتمد وتشيلك يا أمى

هتقومى تانى يا مصر

على قد الاحباط على قد الالم هنعاند ونعاند ولازم تقومى تانى يا مصر

yes we can بعد عمر طويل ان شاء الله

2011-10-05T13:33:00.010+02:00

صحيح نقدر

نقدر نعمل حاجات كتيييير قوى

بس مبنعملش ولا حاجة

انشغلنا وشغلونا بحاجات كتير

ناس كتير كرهت الثورة وبتلومها على كل غلط حاصل

الثورة مش غلط الثورة كانت حلم بعيد واتحقق

الثورة ماتت الله يرحمها

اللى احنا فيه دلوقت أزمة سياسية

صحيح نقدر

نقدر نتوافق ونصلح ونحط مصلحة مصر الاول

ونحط مصلحة الفقير الاول

لكن مبنعملش كده

لان المطامع اكبر من مصلحة البلد ومصلحة الناس اللى قامت الثورة فى الاساس علشانهم

هو انا ليه بجمع ليه بحطنا كلنا فى خندق واحد

لاننا فعلا كلنا فى خندق واحد

كلنا اصحاب البلد دى

صحيح نقدر

نقدر نصلح ونبنى ونعمر ونقضى على البطالة

ونقدر نعلى من غير ما نطاطى

لكن مبنعملش كده لان الحكومة حكومة تسيير اعمال حكومة انتقالية ايا كان الاسم بتاعها

ولاننا مش عارفين الحومة الجديدة اللى هتبقى مع ريس جديد ومجلسين جداد نوفى اخر حاجة دى هتبقى امتى

فبيتهيئلى كده احنا هنقعد كمان شهور طويلة مش عارفين نعمل حاجة

اللى هيشلنى شلل اصلى مفاجىء ومش مترتبله كعادة اى شلل بيجى للواحد من كتر ماهو مضغوط

ان الناس قالت نعم علشان على شهر 9 يبقى كله تمام مجلسين متستفين وريس قيمة ماشاء الله وبعدين هنبتدى تانى يوم نرشح بتوع الجمعية التاسيسية ودستور بقى وهنهيص

ولما كنت تقول لواحد قلت لا

يقولك ليه كده بس دى لا دى يعنى هنقعد سنة ونص من غير كل ما سبق ذكره

طب يا حلو اهو فات نصهم اهوه وهيفوت زيهم واحنا محلك سر

فيبقى yes we can بعد عمر طويل ان شاء الله

نعم بالاخضر ولا بالاسود وصوباع فوشيا

2011-09-25T15:25:00.003+02:00

مش عارفة ليه حاسة انى شربت مقلب جامد قوى بعد نتيجة الاستفتاء بتاع شهر مارس اللى فات

مش عارفة ليه اعتقدت اعتقاد عبيط ان النتيجة هتكون ب لا هل لانى بعد التدقيق والتفكير وايام معرفتش انام فيها قررت انى ادلى بصوتى واقول لا بعد ما قولت هقول نعم

قلت لا علشان نبتدى من الاول نبنى بلد جديد فنصبر عشر سنين علشان نشوف النتيجة واحنا بنساعد فى بنائها

قلت لا علشان كان فى حاجة غامضة بالنسبة لى وحسيت ان فى توجيه غير مباشر للناس انها تقول نعم وانه هيكون اقصر طريق للحلم

يوم الاستفتاء رحت سعيدة الشمس لسعتنى رغم حجابى الجميل لكن مهمنيش

صوباعى بقى فوشى اللون بس مفركتوش قوى علشان يطلع كنت حاسة كانه حسنة ربانى مينفعش اكرهها

حسيت انه قدر ربنا للبلد دى انها تعلى وتقوم وتبقى عظيمة زى ما بحلم بيها دايما

لقيت دائرة خضرا فيها نعم

وسودا فيها لا

قلت مش مهم سودة سودة بس لو طلعتى انتى النتيجة يا حلوة اؤكد لك هتبقى بيضا(ده كنت بكلم الدايرة) ما علينا

هوب النتيجة طلعت

هوب صدمت صعقت وازبهليت

لكن مش مهم احترمت النتيجة وقلت تمام خلاص يبقى خير باذن الله اتفاق شعبى اهوه بقى

اهم حاجة نتفق ونبقى ايد واحدة فى الظروف اللى ما يعلم بيها الا ربنا وحده سبحانه وتعالى

هووووووووب كل الاختلاف الممكن حصل

اللى كنت مش متخيلاه حصل

وهووووووووب دخلنا فى دوامات

وهوووووووب احنا فى اخر سبتمبر يعنى بعدها ب6 شهور ولسه بنظبط قانون الانتخاب

تقوم ماسك نفسك وتقول هوووووووووووووووووووب

علشان الهوووووووووووب متخليش الدمعة تفر

خطة وتمويل وتنفيذ

2011-09-21T17:27:00.000+02:00

بسم الله الرحمن الرحيم

************

الاستاذ /على الفرماوى

نائب رئيس شركة مايكروسوفت او بالظبط كما وصف نائب رئيس شركة من ضمن 5 شركات تابعة لمايكرو سوفت تنسق بين الاربعة الباقيين على ما فهمت منه فى احدى البرامج

حقيقة كنت شاهدته على احدى القنوات من فترة وافتكر وقتها انه ادانى تفاؤل كبير جدا وعنده طاقة ايجابية هائلة

من كام يوم والصبح شاهدت اعادات لبرامج كان فيها وبرده كان عندى احساس بتفاؤل برده بس كنت حاسه انه شايف سلبيات كتير بس بيحاول يوصف حل

هو قال ان لازم يكون فى خطة لعمل كذا ورؤية وتوجه عام وتمويل للفكرة دى وتنفيذ جيد ليها

هو قصده هنا اللى فهمته ان مفيش مستحيل ممكن جدا نطلع لقدام ممكن جدا

وفى رايه اللى بحترمه جدا وحاسة انه قال اللى عايزة اقوله وحسيت انى انا اللى بتكلم لما قال

ميهمنيش قوى المقرر الدراسى ايه بالظبط امريكا مفيهاش مقررات قوية لكن يهمنى من المدرسة 3حاجات

1/انها تعلمنى ازاى اتعلم

2/انها تعلمنى ازاى اتعامل مع المجتمع المحيط بيا

3/انها هى السبيل الوحيد لتكوين صداقات قوية تعيش معايا العمر

دى وجهة نظرى تماما ان من المفترض انى اعرف اتعلم ازاى ادور على معلومتى فين هستفيد ايه لما اعرف هذه المعلومة او تلك نفسى اعمل ايه بالعلم ده امنياتى ايه طموحى ايه وده محور حديث طويل ليا مع بنتى من اول ما دخلت المدرسة هى دلوقتى فى سنة 5

فكرته التانية هى موجودة فى الوزارة على الورق افتكر انه السنة اللى فاتت زارت مدرسة بنتى لجنة من الوزارة من القاهرة وطلبوا اجتماع مع عينة عشوائية من اولياء الامور يوم ما وصلوا علشان يضمنوا ان مفيش حاجة مترتبة

افسم بالله افكار الناس دى لو اتطبقت فعليا كانت كل مدرسة هتكون غير كانت كل مدرسة هتكون مؤسسة فعلية

يلا الله المستعان

المهم هذا الرجل شخصية مصرية محترمة ومتفوقة وفى غيره كتير

واجب نسلط الضوء عليهم علشان يكونوا قدوة لولادنا ونحسسهم انك ممكن تكون زيه ويمكن احسن و الله أعلم

نورت مصر

2011-09-13T10:02:00.003+02:00

السيد / رجب طيب اردوغان

مرحبا بيك فى مصر

حقيقى من كل قلبى اهلا وسهلا بحضرتك ونورتنا فعلا .

هرتلات (1)

2011-09-12T15:47:00.006+02:00

يوم الجمعة اللى فات واللى حصل فيه من مشاكل خلانى أتاكد ان فى نسبة كبيرة بينا عندها جهل بقيمة الوطنوخلانى اتاكد ان البلطجة مش انك تمسك سكينة واللا تشرب بلاوى لا البلطجة الفكرية لا تقل خطورة وان اللى قالوا ان فى ناس مش فاهمة يعنى ايه ديمقراطية وانها كلمة ليها معنى تانى مختلف تماما ولا علاقة لها بالبجاحة وقلة الادب دول شافوا المستقبل
***************************************************************************
اتاكدت اكتر ان الامل بقى قليل قوى وان الشمعة دى فى هوا كتير حواليها واننا لو ما اتلفيناش حوالين الشمعة عمرها ما هتتحول لشعلة وفى نفس الوقت هتطفى خالص
***************************************************************************
بصراحة انا بيعجبنى قوى فكرة الحكم بقضاء عدد ساعات كذا فى خدمة المجتمع ودى فكرة كلنا عارفينها عن بلد زى الولايات المتحدة
والفكرة اللى كانت عجبانى برضه فى فيلم احمد حلمى لما راح لم العيال الصايعين ووداهم الصحرا زرعوها
اللى عاجبنى من دول بقى ودى فكرة انتقامية بالنسبة لى ان العيال دى كلها تتلم وتتاخد على اقرب صحر ويفضلوا يفحتوا فيها لما يبان لهم اصحاب ويتاخدوا هما كمان يفحتوا فى نفس الحتة هل هيزرعوا هيطلعوا ميه هيطلعوا بترول مش مهم المهم تطلع عنيهم علشان يحترموا الورقة المرمية فى الشارع مش يخربوا عربيات الناس وممتلكات البلد
****************************************************************************
فكرة انى عايزة اشتغل فكرة ما راحتش من بالى ابدا لكن تاجلت لظروف الاولاد وتربيتهم صحيح قدمت فى حاجات كتييير من بعد ما اتخرجت صحيح كلها حكومية بس برضه مفيش فايدة ويبقى الامل
***************************************************************************
هو انا عايزة اشتغل ايه وليه وعلشان ايه وبكام وفين وامتى وازاى
انا اصلا كان نفسى فى حتة ارض ابنى عليها بيت وازرع جنينتها خضار وفاكهة وبس كده
حلمى كان فى حياة هادية وحاجة اعملها بايدى
*******************************************************************************
هرتلاتى هتبقى كتير من هنا ورايح لانى هطق من حاجات كتير فاهرتل فى مدونتى وخلاص

الحلم

2011-09-04T20:39:00.003+02:00

الحلم

المشروع القومى

الهدف

الهوية

الماضى

الحاضر

المستقبل

الأمل

التحضر

انسان

كل عام أنتم بخير

2011-08-28T22:30:00.000+02:00

العام الدراسى الجديد

2011-08-27T15:54:00.002+02:00

بسم الله الرحمن الرحيم

وبه نستعين

كانت اخر جملة انهيت بيها البوست اللى فات هى دى:

(انسان يعنى عقل يعنى ايد يعنى قلب يعنى امل جديد لبلده وللانسانية كلها.)

ياترى وزارة التربية والتعليم استعدت ازاى لاول عام دراسى بعد ثورة 25 يناير

اكيد فى استعدادات

اللى يهمنى هنا بصراحة مش الوزارة فى حد ذاتها

التساؤل هنا ياترى السادة المعلمين والمعلمات ومديرين المدارس والوكلاءو الفراشين و الفنيين والاداريين باختصار جحافل الموظفين الخاصين بكل مدرسة هل عملت كل مدرسة اجتماعات على فترات خلال الاجازة يناقشوا خطة عمل جديدة واسلوب جديد لاستقبال التلاميذ وما ينقص المدرسة وما ينقص التلاميذ ويا ترى فى افكار جديدة للارتقاء بالمستوى الفكرى والاخلاقى للتلاميذ وكل مدرسة حسب المرحلة اللى فيها

ياترى فى حد كان قلبه على الاطفال دول حد فكرلهم حد فكر يخلى ساعاتهم فى المدرسة اجمل ساعات يومهم

حد فكر فى اى حاجة جديدة مفيدة للتلاميذ ولنفسهم حتى كمان

بقالى كام يوم عماله بشوف مظاهرة هنا ومظاهرة هناك تخص المعلمين ده غير مجهوداتهم بعد الثورة برضه فى التظاهرات والذى منه

طلباتهم كلها مادية تقريبا( وعايزين كرامة المعلم) وشيلوا الوزير وهنضرب اول العام الدراسى ووو

اى كلام فى اى كلام

يا جدعان فكروا فى مصلحة البلد شوية بلاش مصلحة البلد مصلحة الطلبةالاهم دلوقتى انسوا نفسكم شوية فى مجلس شعب جاى وفى رئيس جديد باذن الله جاى هنشغلهم ونشغلهم بالطلبات دى

خلينا فى العيال اللى مستقبلهم اللى هو مستقبل البلد بين ايديكم

اللى مزعلنى وقاهرنى ان العيال اللى فى المحيط بتاعى فاكرين انهم هيرجعوا المدارس هيلاقوها حاجة تانية الثورة بقى وكده صلحت كل حاجة واهمها التعليم عموما الدراسة لسه 17/9 اتمنى تكون توقعاتى فى غير محلها وانى اكون بهذى بسبب الصيام

بس بجد اتمنى الدراسة الجاية بداية جديدة لمحاولة اعادة بناء الانسان فى بلدى.

تقبل الآخر ، التحضر

2011-08-24T13:42:00.002+02:00

بسم الله الرحمن الرحيم

------------------------

فكرة تقبل الاخر وعدم توجيه الانتقادات للناس كده وخلاص من غير بيان دى كارثة ممكن اكون شخصيا وقعت فيها قبل كده

مش من المفروض اننا نحكم على الناس من مظهرهم الخارجى او الشكلى او التصرف اللحظى بتاعهم

الموضوع محتاج مننا مجهود اكبر لانك اخيرا تقدر تقول رايك فى فلان او فلانه ولكن برضه بعيدا عن الحكم عليهم وتصنيفهم

يعنى مينفعش تقول ده مش متعلم مثلا فيبقى جاهل وغير واعى ابدا ارتباط قد يكون فى ظاهره لبعض الناس انه منطقى ولكن الحقيقة فعلا غير كده

مينفعش مثلا تقول ده متعلم فبالتالى عكس ما سبق تماما برضه ارتباط مش ضرورى

مينفعش تقول ده غنى يبقى اوتوماتيك ابن ناس ومتربى واخلاقه عاليه

او ان فلان حالته بسيطة يبقى مش ابن ناس ولا متربى وغالبا معندوش ذوق ابدا

التابوهات دى وكتيير كتير غيرها عقلنا البشرى صنفها على انها اساسيات الكون والحياة وان الدنيا ماشيه كده لوجود حالات تنطبق عليها المنطقيات دى اللى احنا عملناها منطقيات ومفيش برهان اكيد على وجوبها.

هحتاج اكتر من بوست للموضوع ده بالذات علشان اقدر اوضح وجهة نظرى انك لما تتعامل مع حد اتعامل معاه مجرد من اى افكار اتعامل معاه كما هو فى هذه اللحظة على ان تلتمس له العذر دائما فيما لاتفهمه منه خلال تعاملك معاه وانك تحاول تتحرر من مظهره الخارجى ولا اقصد هنا شكله بس ولكن ما بدر منه من سلوكيات فى اللحظة دى لانك اكيد مش ملم بكل حاجة تخص الشخص ده فتعامل معاه من قلبك ولكن خلى عقلك يقظ

التحضر بقى مرتبط اكيد بفكرة تقبل الاخر دى

يااااااااااه التحضر ايييييييييييييييه دنيا نفسى اسمع الكلمة دى واحسها فى بلدى نفسى قوى قوى قوى

تصدقوا بالله لا اله الا الله كل يوم بعيط بعد برنامج خواطر كل يوم حتى ولادى زهقوا (انا اصلا حنفيه وطلع لها انسان:))المهم بشوف الدول والتحضر والرقى والتعامل والتفكير والفرق الرهيب اللى بينا وبينهم بعيط نفسى نبقى زيهم فى التحضر ده فى معاملة الانسان فى احترام الانسان فى الرحمة بينهم وبين بعض فى العدل فى المساواة فى الحياة الكريمة مش قصدى هنا المستوى الاقتصادى مش قصدى ابدا قصدى كرم الاخلاق وكرامة الانسان وانه يتعامل على انه انسان وثروة وكنز لبلده انسان يعنى عقل يعنى ايد يعنى قلب يعنى امل جديد لبلده وللانسانية كلها

عشت التاريخ وشوفته وهو بينكتب

2011-08-04T00:26:00.003+02:00

بسم الله الرحمن الرحيم

عشت التاريخ اللى هيدرسه احفادى باذن الله

شىء لا يصدقه عقل حاجة من ورا الخيال

كده اقدر اتمسك ببواقى الامل واقول فى امل

بكرة هيبقى احسن لازم هيكون احسن

لو هنبقى دولة قانون يبقى اكيد بكرة احسن

رمضان كريم

2011-08-02T13:57:00.002+02:00

رمضان كريم

كل عام أنتم بخير

بجد وبحق وحقيق انا مش فاهمة حاجة

2011-07-27T00:13:00.002+02:00

سموا الله وادعوا لمصر

بجد وحياة الغاليين انا مش فاهمة حاجة البلد دى بقت عبارة عن لغز كبير جدا وعاملة زى الشريط بتاع زمان لما كان بيسف ايون شريط البلد دى سافف او عاملة زى بكرة الصوف اللى فكها ابنى وكلكعت واتعقدت ميت عقدة وتشابكت معها بقية بواقى الصوف اللى كانت فى نفس الكيس او عاملة زى التوأم بنات خالتى لما فتحوا المطبخ ورموا الرز على المكرونة على ازازة الزيت وعجنوهم ع البلاط وحموا شعر بعض بيهم اه والله او عاملة زى ....خلاص بقى اكيد عندكم مغامرات من النوع ده اكيد يعنى

المهم ان فى الحالة دى محدش بيعرف يفك كلكيعة الصوف او يعدل الشريط وطبعا مفيش عدله للى حصل فى المطبخ

بس ممكن نوصل لاول الخيط ونحاول نفكه وهنوصل للعقدة الاصلية وممكن قوى نقصها ونرتاح ونوصل الخيط ونكمل لف

وكان فى الغالب بنعرف نعدل الشريط لكن بنضطر نقص حته ونلصق الباقى بالاكلادور رغم ان بتبقى فى حته من الغنوة مش موجودة بس بيشغل تانى عادى

وممكن قوى يكون لك جيران غاويين يربوا فراخ فهتديلهم عجن المطبخ ومتحسش بتانيب ضمير قوى

بس سفة الشريط المرة دى وكلكيعة الخيط وعجنة المطبخ غريبة عليا جدا المرة دى مش عارفة اوصل لاى شىء حاسة ان مساحة الغباء عندى بتزيد منين مودى على فين

لا والعسل بقى القضية بتاع بطلان التنحى دى والله العظيم عسل ايه اسكر ده والعسل ده والتلذيق اللى احنا فيه ده

يا خراشى

رغم كل ده مينفعش ما ارفعش ايدى وادعى للبلد دى واهلها المشكلة انى متاكده اننا نستحق افضل من اللى احنا فيه ده الف مرة

انا متاكدة ان ولادى وولاد اخواتى واصحابهم وولاد الجيران كل العيال الصغيرة دى فلذات اكبادنا دى براعمنا الجميلة دى تستحق افضل وافضل بكثير مما نحن فيه نفسى الحال يتصلح علشانهم نفسى قوى يارب

our deepest fear

2011-07-10T16:14:00.000+02:00

بسم الله الرحمن الرحيم

*********

اعجبتنى كثيرا تلك الكلمات التى يقال انها جزء من خطاب نيلسون مانديلا سنة 1994

ولكنها مقطع من كتاب للكاتبة ماريان ويليمسون

واسمحولى ان اضع الترجمة اتمنى انى اكون قدرت اوصل المعنى

Our deepest fear is not that we are inadequate. Our deepest fear is that we are powerful beyond measure. It is our light, not our darkness that most frightens us. We ask ourselves, Who am I to be brilliant, gorgeous, talented, fabulous? Actually, who are you not to be? Your playing small does not serve the world. We were born to make manifest the glory of God that is within us. And as we let our own light shine, we unconsciously give other people

permission to do the same

خوفنا العميق لا يعني أننا غير كافيين(او غير كفؤ). خوف عميق لدينا في أننا أقوياء بطريقة ابعد من المقاييس. إنه نورنا، وليس الظلام الذي يخيفنا أكثر. نسأل أنفسنا، من أنا لكى اكون عبقرى ، رائع ، موهوب، رائع؟ في الواقع ، من نحن لكى لا نكون؟ لعبك الصغير(عملك الصغير)لا يخدم العالم.نحن قد ولدنا لإظهار مجد الله الذي هو في داخلنا. وعندما نتركضوئنا يتالق ، لا ندركأننا نعطي الآخرين الإذن في أن تحذو حذونا.

Listen

Read phonetically

اعادة اعمار مصر

2011-07-07T20:41:00.003+02:00

بسم الله الرحمن الرحيم

*****************

الفكرة مش خالص فى انه اعلان ممتاز من وجهة نظرى

الفكرة ان ده احساسى انك ممكن تحاول تخلى بكرة احلى

الفكرة انك بالتفكير وتحمل المسئولية ممكن تعمل كتيييييير

الفكرة كل الفكرة انك تحاول بجد تغير

ولكن لما حاولنا نغير محالفناش الحظ قوى

التغيير مجاش للاحسن

فى حد بيعاندنا وحاجة معندانا

فى حد مش عايزنا نتحدى الغيوم

فى حد مش عايز شمس البلد دى تطلع يوم مش كل يوم

فى جوايا ايمان ان ممكن الحال يتصلح

هو اعتقاد ضعيف بس ممكن يتحقق

نفسى اغمض عين وافتحها الاقى الثورة دى نجحت

مؤشرات الفشل بتزيد

فى حاجة غلط

فى حاجة مش مظبوطة

فى حاجة مش فاهماها

ايه العمل

صلاح حال البلد دى على صناع القرار

الحسم والحزم

اقصد اتخاذ قرار ببداية العمل فى كذا

التنفيذ على طول مفيش تسويف

ابتدوا فى حاجة الهونا فى مشروع خلونا نبنى نعمر نشتغل

ركزنا فى المحاكمات ولهتنونا فى عجلة الانتاج ونسينا البلد واعادة اعمارها

كذا يبقى كذا

وواحد زائد واحد يساوى اتنين مش احتمال لا يساوى اتنين فعلا

انا عارفة ان فى مليونية بكرة

هيحصل ايه الله اعلم

هتيجى نتيجة الله اعلم

غلط واللا صح الله اعلم

البلد دى ما يعلم بحالها غير الله

ربنا يصلح حالك يا بلادى وحال بلاد المسلمين اجمعين

من اجل الامل اللى ضاع كان تدويرى ع الفيديو ده

خرزانة عايزة خرزانة

2011-06-15T11:22:00.003+02:00

بسم الله الرحمن الرحيم

-----------------------

كيف الحال الدنيا عاملة معاكوا ايه يارب تكونوا فى احسن حال

اقروا معى ومتنسوش تدلونى على بتاع خرزانات

فى حاجات فى الدنيا غريبة وعجيبة كتير ومن ضمنها الحجاب ابو نفخة ده قرف مش عارفة البنات دى ايه قلة معرفة دى واللا جهل واللا غباء واللا ايه لاحول ولا قوة الا بالله خلوا الواحد خرج عن شعوره اسنمة البخت دى اصلا حرام يا ناس

امها فين ابوها فين دول كمان مفيش معرفة

طيب ناس هتقولى ايه اللى نرفزك كده طب ما هو منتشر بقاله فتره

ماهو منرفزنى جدا والله وامبارح بقى لقيت تلاتة ماشيين مع بعض نفش النفشة بنفس لون الطرحة بنفس التكنى كلر على وشهم بنفس الاسكنى جينز حاجة مقرفة والمهم ان لو فكرت تقولهم انتى زى اختى وبنصحك لوجه الله كده مش زى اسلامى خالص ومينطبقش عليه حاجة واحدة بس تخص الزى الاسلامى للمرأة مش بعيد تسمع الواحد كلام يقشعر له البدن او تقولك ابسط حاجة وانتى مالك وتبصلك من فوق لتحت وتمشى (الحمد لله محاولتش اصلا ولا مرة)

المشكلة مش فى كده المشكلة فيا انا مبقتش اعرف اقول ربنا يهدى بقيت اقول حسبى الله ونعم الوكيل على طول وش كده مبفكرش اقول ربنا يهدى بقيت شريرة خالص।

وتحس انك نفسك فى خرزانة من بتوع زمان اللى كان بيمسكها الناظر ياااااه وإدى॥ لسوع.. ومد ع الرجلين لحد ما يفقفقوا علشان تحرم تخرج كده تانى

انا مش عدوانية ولاعايزة الناس تمشى على مزاجى ولا اى حاجة

مؤمنة جدا بالحرية وان محدش يحجر على اختيارات حد

انا ست عادية جدا حجابى عادى بلبس تايير وفستان وعباية وجيب وبلوزة وطرحتى مش مأزعرة ومبينة قفايا

بس بنادى باننا نصحى لنفسنا شوية نمشى عدل وعلى راى المثل امشى عدل يحتار عدوك فيك

عدوك ده ممكن يكون عدو شخصى وممكن يكون عدو لبلدك وممكن يكون عدو لدينك

عدو بلدك عايزك اهبل ومعندكش علم ولا معرفة ومضيع وقتك فى الهبل

وعدودينك عايز يشوفك بتلوثه بتضيعه مش فاهمه مشوه صورته عايزك انت نفسك تكون عدو لدينك

كونى صورة مشرفة للمرأة المسلمة كونى مهذبة مهندمة منمقة كونى محتشمة كونى خجولة اشعرى بالحياء

اتكسفى على دمك يعنى

آه صحيح .... أنا خلصت الicdl

2011-06-02T13:46:00.002+02:00

بسم الله الرحمن الرحيم
*****************
الحمد لله خلصتها ونجحت من غير اعادة اى حاجة
مية% تلات مرات
سبعة وتسعين% مرتين
اربعة وتسعين % مرة
واخر موديول امتحنته itجبت فيه 86الحمد لله
المهم هو مفيش درجات فيها يعنى بتطلع الشهادة انه عديت وخلاص
خلصتها من 3اسابيع الحمد لله
ربنا ينفعنا بيها باذن الله

خبر ب 1200جنية

2011-05-31T19:30:00.004+02:00

بسم الله
ما شاء الله كان وما لم يشأ لم يكن

الخبر التحفة ده حقيقى أتحفنى قوى
طب ده بعد 5سنين طب بعد 5شهور هنعمل ايه يعنى اقصد مادام ماشية بالورقة والقلم حد يقولنا بعد كام شهر سنة هيكون الوضع ايه
طب والتشغيل مش ده من اولويات الحكومة بعد الثورة كما قال د/سمير رضوان واكد عليه فى الوزارتين اللى اتشكلوا بعد الثورة وكان عضو فيهم
احنا عارفين ان الحالة جيم بس بلاش توعدوا الناس بحاجة وييجى عكس توقعاتهم الاحباط وحش
اللى مزعلنى انهم لم ينظروا فى طلبى احنا عايزين دكاترة نفسيين فى الوحدات الصحية ومراكز الشباب وكده يعنى روقونا كده
ها متزعلوناش بقى حد نفش معاه يا جدعان متزعلوناش بقى واهى تبقى من منجزات وانجازات الثورة الا وهى القدرة على فش الغل بعيدا عن ميدان التحرير انتوا عارفين بقى المواصلات وقانون تجريم الاعتصام وكده فوحياة الغاليين تنظروا فى طلبنا احسن احنا مخنوقين اخر تلات حاجات

فى عام الحزن

2011-05-24T14:51:00.002+02:00

فى عام الحزن يا نبينا دموعك طاهره تسقينا
واهل الكفر فى زمنهم شايفهم لسه وسطينا
ندهت وقلت مولانا يارب الكون لاتنسانا
بيقفوا صفوف و رجمونى ونور الحق ويانا
إلاهى حنن الاحجار وطفل جميل من الكفار
يجرى عليك وخير يديك بإذن الواحد الغفار
ملاك ينزل ويجيلهم و قال من غضبه يا ويلهم
طلبت الرحمة من الرحمان وبدموعك بتدعيلهم
رسول الرحمة بتسامح ولو قالو كلام جارح
تقول يارب نجيهم أكيد فيهم واحد صالح
يطاهر نفسى اكون طاهر من الباطن وم الظاهر
ومهما أشوف غضب أو خوف أكون شفاف ومش ظاهر
من الدعوة ماشاء الله ناخد نفحات رسول الله
ولما ميلنا بيعدلنا ويقبلنا باذن الله

د/ مصعب الشاعر

2011-05-24T14:19:00.002+02:00

بسم الله الرحمن الرحيم

*****************

ربنا معاك أحسن من الكل

ربنا يتم شفاك على خير يارب

قلوبنا كلنا معاك بتدعيلك وبترفع معاك توسل لله عز وجل بان يقيم دولة القانون والعدل فى مصر.

مش لاقية جملة او تعبير او كلمة فى اللغة توصف شعورى عند سماعى قصة حضرتك منك شخصيا بالامس على قناة التحرير شعورى بالظبط زى الاستاذ محمود سعد دموع ومفيش كلام .

أنا خوفى ع ولادى

2011-05-09T15:06:00.001+02:00

icdl

2011-05-03T20:26:00.003+02:00

بسم الله الرحمن الرحيم
*****************************
انطلاقا من حاجات كتيييييييير قوى
قررت الحصول على الicdlوالحمد لله امتحنت 4موديول والخامس يوم الخميس باذن الله دعواتكم بقى
بقالى حوالى شهرونصف فيها تدريب واختبار والحمد لله ماشى الحال عال العال
دعواتكم
اما بقى الحاجات الكتيير دى ليها بوست خاص بيها
سلام مؤقت

يا الله

2011-04-27T13:10:00.003+02:00

اللهم يا ولى يا لطيف اللطف الطف بنا بلطفك الغنى

اللهم انا ننتظر فرجك ونراقب لطفك ومنّك وكرمك ونتوكل عليك ففرج عنا والطف بنا

ولا تكلنا الى انفسنا ولا الى غيرك طرفة عين ولا تنفس نفس

واكفنا من كل ذلك يا جبار السموات والارض

لا اله الا الله الكريم

لا اله الا الله الرحمن الرحيم

لا اله الا الله رب السموات والارض ورب العرش العظيم

اخواتى الصغننين طلبة الثانوية العامة

2011-04-22T22:10:00.007+02:00

بسم الله الرحمن الرحيم

-------------------------------

اخواتى الصغننين العسولين خالص طلبة الثانوية العامة

ازيكم .. بتذاكروا طبعا مش كده

ربنا معاكم

اعتبرونى زى اختكم الكبيرة بنت خالتكم بنت عمكم اى حاجة

بنصحكم نصيحة لوجه الله

اللى نفسه يدخل كلية الآداب يفكر شوية

اللى فاكر انه هيفوز بالدراسة الاكاديمية للحاجة اللى بيحبها يراجع نفسه شوية

اللى فاكر انه هيخلص آداب من هنا وهيلاقى وظائف الدنيا تطلب رضاه يمخمخ شوية

فطلاب كلية الآداب اخواتى الصغننين يتعذبون فى اثناء الدراسة وبعد التخرج

اى نعم

العذاب نوعان قبل التخرج وبعد التخرج

ممكن قوى تكون مليت استمارات التنسيق بعد الثانوية العامية واخترت اداب علشان تدرس مثلا المانى او انجليزى مثلا تبص تلاقى طلع لك اول حجر التنسيق الداخلى ان ان ان تش وتلاقى نفسك يا مسكين دخلت كلية اداب اه لكن درست اللى بتحبه نو جاميه ابدا

تانى حجر الدكاترة قمرات فعلا يعنى ولا معقدين ولا حاجة وسهلين اسهال يعنى قصدى سهولة رهيبة قمرات بقولكم

غير الاحجار بقى اللى طول الاربع سنين والله المستعان

المهم العذاب التانى

وده له اقسام متعددة فعلى سبيل المثال لا الحصر عزيزى الطالب

انك ياروحى هتفتكر انك بالعلم اللى درسته ده والعلوم الانسانية الجميلة اللى ملت وجدانك دى هيبقى قدامك اكتر من مجال صحافة بقى وتدريس وترجمة ووظايف ايه وبتاع

اكتر ناس بتتألم قوى من الموضوع ده الناس اللى بيبقى حلمها تشتغل بالتدريس

२- انك هتفتكر انك معاك ليسانس آداب فاذن انت مساوى لبكالوريوس التربية بانواعة عام واساسى ونوعية

نو يا عزيزى انت لست مساوى لهؤلاء فينبغى عليك ضياع سنة اضافية من عمرك فى عمل الدبلومة التربوى حتى تتساوى بهم ويعترف بك مدرسا فى المدارس المصرية

اللى ممكن ينرفزك وينرفز اهلك كلهم فى مدارس ابتدائية وبخاصة فى القرى تعتمد بشكل كبير على خريجين دبلوم معلمين ودبلوم زراعة وغيره لتدريس المناهج التعليمية

******اى انك يا روحى مش مساوى كمان لدبلوم الزراعة وااااااااااااااااااااااو

المهم الكبير بقى

३-انك ملكش نقابة نيهاهاهاهاها (ياريت تقروها بصوت عفاريتى)

بس خلاص فانت بقى يا اخويا ويا اختى ياللى حابين تدرسوا فيها بصراحة الدراسة فيها ممتعة وتحس انك بتشرب تخصصك صافى من غير شوائب عن تجربة انما انصحك خليك عارف مساوئها قبل ما تدخلها

المهم ازيكو دلوقت

العام 2050

2011-04-20T13:22:00.002+02:00

فى هذا العام تحديدا سنبدأ فى جنى ثمار الثورة

جملة يقولها المتفائلون منا

ولله الامر من قبل ومن بعد

خلاص بقى خلى التحقيقات تاخد مجراها

2011-04-13T14:47:00.003+02:00

بسم الله الرحمن الرحيم

------------------------------------

نفوق بقى خلاص كفاية كده

بلاش اعتصامات بقى وبلاش مظاهرات وحياة الغالى عندكم

تعالوا نمشيها قانون

نخلى التحقيقات والقانون هو الحكم بينا

ورقهم دلوقتى فى ايد أمينة

التحقيقات ورا بعض والنطق بالحكم هيبقى ورا بعض

وهيقروا على بعض

وهيجروا بعض وهتبان لبة المواضيع كلها

صبرا قليلا بس

المهم الخطير ايه

مجلس الشعب اللى جاى

لازم نذاكر كويس ونعرف هنعمل ايه

مرشحنا مين

اصله وفصله ايه

برنامجه ايه

الملفات اللى هنديهاله ايه

عايزين منه ايه

منطقتنا او دائرتنا او محافظتنا

او مصر كلها عايزة ايه

يلا نحضر الاوراق والملفات

يلا نحضر الطلبات

مشاكل الدائرة ايه

نحصرها نعدها نرتب اولوياتها

بالارقام والصور والمستندات

لازم كلنا منكبرش دماغنا المرة دى

سبنا الملعب كتير فاضى واستسلمنا ليأسنا

الملعب بتاعنا والكورة كمان

اللى ييجى يلعب باصول اللعبة يا مش عايزينه

لازم نركز قوى فى مجلس الشعب اللى جاى

مش عايزة اقول انتخابات الرئاسة مقدور عليها

ميصحش اقول كده مينفعش اقول كده

بس المجلس اللى جاى أول واكبر واهم مهمة له

الدستور

العقد

مينفعش العقد يبقى مش تمام

او يذلنى ويهنى ويهمشنى

نو

لا

جاميه

اوكيه

نركز بقى

باقى من الزمن اقل من خمس شهور

التدوينة دى أبكتنى قوى

2011-04-05T14:04:00.004+02:00

السلام عليكم ورحمة الله وبركاته

***************************

قلبنا واجعنا ومخنا متاكل وبنفكر ليل ونهار وكرهنا افكارنا السوداوية اللى بتدور جوه نفسنا وبنحاربها

كرهنا الواقع لانه اصبح مرير فعلا

لغبطة بكرهها لانى مبحبش الغموض مش لحبى للفضول ولكن لانى شايفة انى لازم اعرف سكتى ويتنور طريقى علشان اعرف امشى واكمل المشوار

التدوينة دى أبكتنى قوى قوى قوى لان فيها اسئلة بتدور جوانا ومحدش فينا عارفة الاجابة

اؤيد الغاء الدورى

2011-04-03T11:18:00.005+02:00

بسم الله الرحمن الرحيم

---------------------------

من تابع مدونتى قبلا يعرف انى اصلا مليش فى الكورة والرياضة عندى مفهومها اهم واكبر من ابعاد المستطيل الاخضر

اللى حصل امبارح مهزلة وخيبة ووكسة كمان خيبة قوية وشتيمة اتشتمناها كمصريين

هل الموضوع مرتب? هل غضب اعمى? ام هى خيبة وحاطة علينا ?

سؤال يطرح نفسه

الدورى لازم وعن كل بد يتلغى ووقفوا كل نشاط كروى ممكن الغاؤه كعقوبة للجماهير على عدم احترامها لبلدها وللشعب مش للرياضة ولا نفسها لان اللى ظاهر انهم معندهمش احترام اصلا اقل واجب كده

سمعت كده فى سركم ان حسام حسن لما واحد من التوانسة نزل الملعب فى مباراة الذهاب قال ايه لازم ناس تنزل رد ع اللى حصل هناك(تحريض ده واللا ايه)

فين اخلاق الرياضة وزغرطى يا ام فاروق

ايه اهم الايجابيات اللى حصلت فى حياتك من بعد25يناير

2011-03-28T21:22:00.003+02:00

بسم الله الرحمن الرحيم

-----------------------------------

ايه اهم الايجابيات اللى حصلت فى حياتك من بعد 25يناير؟

لازم يكون فى حياتك شىء ايجابى عملته من بعد اليوم ده الى الان

اوتكون ضفت شىء جديد ايجابى مكنتش عملته قبل كده وعملته بعدها

والسؤال ده انطلاقا من مبدأعام عند المصريين دلوقتى ان مصر قبل 25غير مصر بعدها

ياريت اللى يزور المدونة يترك تعليق يجاوب فيه على السؤال من فضلكم

حقيقة بدور على اكتر احساس ممكن من الامل يدخل قلبى

الامل انا بدور على الامل فى عيون الناس وفى كلامهم وفى قلبهم واحساسهم وعقلهم وفى منطقهم وادراكهم للامور

انا بدور على الأمل

45نطرح منهم18يساوى27

2011-03-21T14:27:00.002+02:00

السلام عليكم ورحمة الله وبركاته

-----------------------------

مسألة طرح بسيطة خالص يحلها طفل فى سنة اولى ابتدائى

27مليون مواطن لم يشاركوا فى الاستفتاء رقم كبير قوى ولكل اسبابه الخاصة

بس مادام الرقم الكبير ده شارك وانا شوفت بعينى محدش قالى الاقبال الرهيب اللى محصلش قبل كده

يبقى انا المفروض يتاكد شكى فى ان الارقام اللى قبل كده كلها نخع بالبلدى كده

يعنى اعرف انه اخر انتخابات شارك فيها 17مليون امال الزحمة دى لم نراها ليه قبل كده

عجبى بجد فعلا

انا منتظره الاعلان الدستورى او البيان الدستورى اللى هيقوله المجلس العسكرى وباذن الله واثقة انه خير

ربنا معاكى يا مصر

2011-03-17T15:46:00.004+02:00

شارك

بس هو ده البوست

نعم او لا

مش دى القضية

القضية اننا هنشارك يا بشر

هنشارك بجد

لينا صوت لينا راى لينا قيمة

صوتنا هيفرق صحيح

نعم او لا

قول نعم قول لا

انت وقناعاتك

الجميل اننا هنقول وهنسمع لبعض

الجميل اننا هننزل مطمنين حاسين بالامان

وحاسين بالامانة وان محدش باذن الله هيغير رايى لحسابه

ربنا معانا

خير باذن الله

وطن تايه يا ولاد الحلال - عن التعديلات والاستفتاء بين نعم ولا ومش رايح

2011-03-13T13:53:00.007+02:00

بسم الله الرحمن الرحيم

--------------------

وطن تايه يا ولاد الحلال دى حقيقة فعلا مش عنوان مبالغ فيه

من المفترض حسب الكلام الرسمى على شاشات التليفزيون المصرى الرسمى ان 40مليون مواطن مصرى لهم حق الاقتراع والتصويت باستثناء رجال الشرطة والجيش والقضاء تمام كده طيب الآراء ايه:

ناس بتقول ايوه صح احنا هنوافق اكيد دى خطوة على اول السلم واول الطريق

وناس بتقول لا احنا عايزين دستور كامل دلوقتى ننتظر ونعمل دستور وبعدين الانتخابات ووووو

وناس بتقولك لا منروحش اصلا ونقاطع الاستفتاء اصلا

اولا فكرة نقاطع دى فكرة فاشلة ليه لان كده مش مشاركة ومش ديمقراطية يا اما نعم او لا

انما هقاطع ايه هقاطع دى اصلا فى مستقبل بلد يعنى ايه يعنى هو انت بتقاطع مسحوق غسيل واللا زبدة دنماركى دى مستقبل بلد مش موافق قول لا مش هقاطع الكلمة دى بصراحة فى وسط اللى بيحصل ده كله نرفزتنى جدا والله العظيم واللى نرفزنى برضه بيقولك اصل الرئيس السابق اقترح المواد دى يا نهار بلاك مش هى دى المواد اللى كان عليها الاعتراض العام وارفقت بيها مواد تخصها ايه يعنى هو اللى قال ومينفعش يخطط مستقبل مصر انتوا بتقولوا ايه انتو سامعين نفسكوا طب ما الشعب هو اللى اختار ان المواد دى تتغير يعنى احنا اللى اختارنا مش هو فى ايه متصلوا على النبى كده وطسوا وشكوا بشوية ميه

ثانيا اللى بيقول لا احترم رايه مفيش مشاكل عندى عادى هو ممكن يكون مش موافق على التعديلات بالجملة او مش موافق على مادة بعينها فنظرا لان التصويت تقريبا مش مادة مادة انما على بعض فمن هنا معظم الرفض انما لو كان مادة مادة كنا هنشوف الاغلبية معترضة على ايه انما لو كده صحيح يبقى مش هنقدر نفهم معترضين على ايه بالضبط

على اى حال هو بيشارك والمشاركة فى حد ذاتها ايجابية تحترم فى ظروف صعبة بنمر بيها

ثالثا اللى بيقولوا نعم واللى انا منهم شايفين ان التعديلات دى اولا لو كنا حلمنا بتعديلها ففى افضل التخيلات الممكنة عمرها مكانت هتتعدل اصلا وكمان مكنتش هتتعدل كده

وكمان راينا له قيمة لاننا هننزل بالرقم القومى وكمان الرئيس الجاى ملزم بانه يدعو لجمعية تاسيسية لوضع الدستور خلال6شهور والرئيس مدته 4سنوات انتو متخيلين ويجوز اعادته انتخابه مدتين يعنى يوم مهيطول 8 مش30وبقية التعديلات احنا شايفينها كويسة جدا فى المرحلة دى ومادام الدستور هيتغير بعد انتخاب الرئيس القادم او بمعنى اصح هيدعو لجمعية تاسيسية واعضائها بالانتخاب وكمان مواد اتعدلت لصالح الاشراف القضائى والفصل القضائى فى صحة الطعون الانتخابية يا حالولى لولولى ايه الجمال ده وقانون الطوارئ لا يمد اكثر من 6شهور وايه هنستفتى عليه برضه يا سلام

يعنى تعديلات نراها مناسبه فى المرحلة دى

انا مش بقول رايى صح او راى الموافقين صح ومش بقول اللى بيقول لا غلط

استفتى قلبك وان افتوك شوف انت ايه المناسب لبلدنا مصر فى المرحلة دى وقرر اه او لا

التدوينة دى للناس اللى هتقاطع ارحمونا وارحموا اللى خلفونا واللى خلفوا اللى خلفونا لان التلاتة دول القلق بياكل فيهم

المهم ان من اللى هيقاطعوا دول هيترشحوا للرئاسة دقنى اهيه................

اكملوا انتوا بقى مكان النقط باللى يعجبكوا

ربنا معانا

أنا المصرى كريم العنصرين

2011-03-10T12:30:00.004+02:00

بسم الله الرحمن الرحيم

-----------------------

كلمات لاغنية من اجمل ما غنى فنان الشعب سيد درويش

هو ايامها كان بيحارب الاحتلال واحنا دلوقتى برضه بنحارب الاحتلال لكن بصورة تانية وان كان لايقل بشاعة عن الاحتلال زمان ماهو زمان كانوا مستوليين على البلد وخيرها وبيموتوا ناسها وبيتهيئلى هما برضه عملوا كده

المهم دعوة لاعادة الروح للغنوة دى وتحفيظها لاولادنا فى المدارس الاغنية دى كنت بسمعها واحس بفخرشديد ودلوقتى بسمعها وببكى فخرا ونشوة وحبا للوطن مصر

مع بعض كلماتها اترككم:

أنا المصرى كريم العنصرين
بنيت المجد بين الاهرمين
جدودى أنشئوا العلم العجيب
ومجرى النيل فى الوادى الخصيب
لهم فى الدنيا آلاف السنين
ويفنى الكون وهم موجودين

أكلم مين لما أحب أخاطب الشعب المصرى

2011-03-09T13:56:00.005+02:00

السلام عليكم ورحمة الله وبركاته

--------------------------------

مبقولش غير استرها علينا يارب خليك معانا يارب اصلح حالنا يارب

احنا خايفين جدا احنا دول شريحة كبيرة قوى من مصر الشريحة اللى لو طلبت حاجة دلوقتى تطلب اقراص مهدئة لا غير

رغم حبنا الكبير لوطنا الا اننا حاسين اننا كنا عايشين وطن غريب غير مصر اللى عارفينها فى قلوبنا وعقولنا

احنا خايفين من اللى جوا واللى برا احنا خايفين نتفرم فى وسط كل ده

اى بلد اللى كنا عايشين فيها بلد السلطة واللا راس المال واللا النفوذ واللا الوحشية واللا انسانية بلد التنصت والتلصص واللا بلد الفتن واللا بلد الجوع والحرمان واللا بلد السرقة والسلب البلد اللى كنا فاكرينه فقير وطلع غنى قوى ومسروق بلد ظروفنا كده واللا بلد قتل الطموح انهو بلد كنا عايشين فيها

مين الناس دى مطحونين فعلا فبيدوروا على حقوقهم دلوقت دلوقت حالا فى الظروف الطين دى وفجأة اكتشفوا ان شركتهم او مصنعهم او مؤسستهم او او او وحش وشيطان وعايزين نشيله حالا ولو دى حقوقهم من سنين مقدموش طلب للتذكرة وخلاص ليه وكل حاجة تشتغل وتمشى فين المجدعة يا جدعان ويا جدعات وبتوع الجامعات اللى فجأة مش عاجبهم رئيس الجامعة ولا العمداء طيب اهلا وسهلا وبعدين دا احنا فى ظروف طين والطين الطف شوية

ارحمونا ارحمونا ارحمونا

شوفوا بقى يا كل من عامل مظاهرة واللا قاطع طريق واللا ناصب خيمة وقاعد تحتها

عمر الرحمة مهتجيلكوا من ربنا الا لو رحمتوا انتوا من فى الارض فيرحمكم من فى السماء

واحد زائد واحد يساوى اتنين بالسهولة دى ارحمونا يرحمكم ربنا

النظام وقع خلاص انهار تلاشى فنيتو مش هيرجع تانى البواقى بتفلفص ومحاولات الخراب اللى بتعملها مفقوسة خالص فبلاش نديها فرصة الرئيس السابق تنبأ بفوضى وانتوا ماشاء الله بتحققوا النبؤة والله دا انتوا عسل خالص

ارحموا الجيش اللى ماسك البلد دلوقتى احنا حملنا تقيل احنا بلبلدى كده هم وكبه ادلهوم فرصة ينظموا الصفوف ولما ييجى الرئيس الجديد نشوفه بقى هيعمل ايه فى الطلبات دى كلها مش هنشغله لما ييجى واللا هنحلله كل حاجة قبل ما ييجى لا نصبر على الحلو اللى هيمسك ونشوفه هيعمل ايه

اصبروا يا اهل مصر اعقلوا يا اهل مصر

احنا مستعدين نفحت فى الصخر

2011-03-05T17:32:00.003+02:00

بسم الله الرحمن الرحيم

احنا مستعدين نفحت فى الصخر جملة مصرية بحتة بتتقال فى الظروف الصعبة

احنا مستعدين فعلا نفحت فى الصخر ونستصلح ونزرع ونعمر ونبنى

احنا مستعدين فعلا نفحت فى الصخر علشان مصرنا تاخد مكانتها الجديرة بيها

احنا طاقة كبيرة وحلم كبير وهم كبير

احنا المصريين الجدعان قوى

اقتراح صغنن:

اللا هو مينفعش القصور او الفيلات او اى يكن مسمياتها اللى هتتصادر من ناس( تقريبا رجال اعمال او وزرا سابقين ) مينفعش ناخد منها ونعمل فيها دور للايتام اودور للمسنيين ينفع اعتقد انه ممكن ينفع

طيب ممكن نسكن فيها من هم بلا مأوى ممكن صح

طيب ممكن تبقى فى هيئة رسمية فى الدولة تتلقى اقتراحات الناس واحلامهم ونعرف ايه ممكن تحقيقة من اللى محتاج وقت شوية من اللى عايز تبرعات من اللى عايز عمالة من اللى عايز كذا

الخلاصة :

انى بحبك قوى يا مصر نفسى ملقاش فيكى محتاج نفسى مشوفش يتيم محتاج او ست عجوز محتاجة او مريض مش معاه فلوس علاج

الخلاصة:

انى بحبك قوى يا مصر ونفسى تبقى فى مكانة عالية قوى وان الحلم فيكى يبقى مشروع وممكن يتحقق

بحبك قوى يا مصر ونفسى نعدى الايام الصعبة عليكى وعلينا دى بخير

بحبك يا مصر وشايفاكى بتبسميلى وبتقوليلى حلمك واملك فى مستقبل ولادك هيتحقق بس اصبرى شوية

وانا كمان ببتسم لك وبقولك حاضر يا مصر مفيش عندنا أجمل من الصبر

بحبك يا مصر وعمرى ما فقدت ايمانى بيكى زعلت علشانك لكن عمرى ما زعلت منك

مستعدين نفحت فى الصخر علشانك يا مصر

مستعدين نفحت فى الصخر علشانك يا بلادى

شىء من الراحة&شىء من الهدوء

2011-03-02T22:13:00.004+02:00

بسم الله الرحمن الرحيم

-------------------------

شىء من الراحة شعرت به عندما وجدت اليوم بشرى ببدء رجوع اخوتى من ابناء مصر من تونس الشقيقة فكان طول بقاءهم هناك يؤلمنى ويصعب علىّ يومى أكثر

رؤيتى لوجوههم التعبة تعلوها بسمة الرجوع للوطن تلمس جدار قلبى وتفرحنى راحتهم بقدر ألمى لألمهم .

شىء من الهدوء والأمل هو حلمى لوطنى الغالى الآن.

متنسوش اهلنا على الحدود الليبية التونسية

2011-03-01T20:44:00.004+02:00

بسم الله الرحمن الرحيم
الى كل مسئول يملك امكانية المساعدة فى رجوع ابنائنا على الحدود الليبية التونسية يتفضل فورا ويقوم بمسئوليته رغم انه مش تفضل ده شغله ده عمله دى وظيفته لازم يعملها الناس ع الحدود تعبانه بقالها ايام صحيح كل الصحف والمحطات بتؤكد كرم شعب تونس معاهم وده مش جديد عليهم معروف انهم ناس طيبين بس كده كتير تقلنا عليهم وتقلنا قوى ع المصريين المستنيين هناك حد يقولهم يعملوا ايه هيروحوا بلدهم ازاى ليه التحرك بطىء كده الصينيين مثلا بعتوا خدوا رعاياهم اللى هما فى اخر الدنيا احنا محدش بيجيب الناس دى ليه المطلوب ايه يضربوا عن الطعام ويموتوا وترتاحوا منهم هما بدأوا اضراب عن الطعام كما تقول صحيفه تونسيه ورد ذكرها فى جريدة اليوم السابع يساعدهم كده حرام هتسئلوا عنهم امام الله من فضلكم الناس مرمية فى الطل مناظرهم فى التليفزيون تبكى ارجوكم انا مليش قرابة مباشرة مع حد فيهم هما صعبانين علينا جدا جدا .

نرجوه وحده سبحانه وتعالى ان يسخر لنا المساعدة من عنده عز وجل ويفرغ علينا من لدنه رحمة.

يااااااارب طمن خوفنا

2011-02-17T21:50:00.002+02:00

يارب خليك معانا ملناش غيرك يارب
يارب متنسناش وتم جميلك علينا يارب
يارب بلدى يارب
يارب بلدى يارب
يارب بلدى يارب

صوت الحرية بينادى

2011-02-13T20:11:00.003+02:00

علشان بلدنا وولادنا

2011-02-08T10:11:00.002+02:00

بسم الله الرحمن الرحيم
***************************
السلام عليكم ورحمة الله وبركاته

السلام والتحية الف الف مرة على كل مصر

حاسة انى مش عارفة اكتب حاسة انى مش عارفة اعبر حاسة انى مش عارفة اكتب كلام يفهمكم اللى جوايا
مش عارفة ابتدى بايه مش عارفة اقول وحشتنى الكتابة هنا واللا وحشنى الناس اللى عرفتهم هنا واللا وحشتنى نفسى اللى بلاقيها هنا

مش عارفه همسح الكلام تانى واللا مخى هينظم الكلام اللى فى قلبى ويطلعه
انا فرحانه وزعلانه انا مطمنه قوى وخايفه عندى امل وبرضه خايفه وبرضه عندى امل كبير كبير جدا

انا فرحت بالثورة جدا وانا مصرة انها ثورة هى مش حركة ولا تظاهرة ولا محتجين ولا مؤيدين ولا معارضين ولا اى مسمى تانى غير ثورة

فرحت بيها لدرجة ان كلمة فرحة نفسها متقدرش توصف احساسى فرحت بيها لدرجة ان كلمة الفرح نفسها بقى ليها طعم ومعنى تانى

عيش حرية كرامة انسانية
حرية كرامة عداله اجتماعيه
ده كان الشعار ده كان الطلب ده كان الهدف ده كان الطموح
هوده بس كان الطلب
طلب عادل طلب انسانى طلب سلمى
طلب مفيهوش عنف طلب مفيش فيه اى خراب بالعكس ده كان طلب بيبنى بيبنى انسان بيبنى كيان
طلب بسيط طلب انك تعاملنى انسان طلب انك تقوم بخدمتى لان موقعك بيؤهلك لكده طلب لمصر جديدة طلب لوطن جديد يقوم على الكفاءة مش المكافأة طلب لوطن يشجعنى يشجع ولادى طلب ينمى مهارات ويفجر طاقات
وطن يكتشف ابنى يكتشف بنتى وطن يحترمنى ويحترم ولادى وطن يعتبرنى مواطن لى حقوق وعليا واجبات مش مجرد رقم فى كام مليون نسمة
وطن تعرف تتنفس فيه

علشان اكون صريحة انا كنت بدعى يوم 25 يعدى على خير استر يارب استر يارب استر يارب
كل يوم كان دعايا بيزيد وكل يوم كنت بقول يارب وحياة حبيبك النبى محمد تسترها مع الناس اللى فى وش المدفع دى كنت خايفة جدا على بلدى قبل كل شىء خايفة قوى
وصحيت على جحيم يوم الجمعة 28 كان يوم جحيم ليه كل ده ليه ليه ليه ايه اللى حصل مين اللى باعنا وباعنا ليه ولصالح مين وتمنا بالنسبه له ايه يا سواد يا سواد يا سواد

كل اللى حصل واللى جرىواللى هيحصل بعد كده مفتاحه يوم الجمعة دى المفتاح الحقيقى للرؤية موجود يوم الجمعة دى
بعد الخطاب الاخيرتعاطفت زى ناس كتير جدا وبكيت كمان خلونى اكون صريحة معاكم
حتى اللى حصل يوم الاربعاء قلت انه ناس عادية اتعاطفوا مع اللى حصل وبعدين مش عاجبهم وقف الحال فقالوا يلا نروح نمشى الناس دى خلاص اللى عايزينه هيتعمل وخلاص

وبعدين قعدت اسمع واشوف البرامج واسمع الناس اللى بتشرح الدستوروبتفهم الناس ده كذا وكذا لقيت ان تعديلات الدستور متفصله لشخص بعينه وان فى ايده انه يصلح ويعدل ويعمل وبتاع ويقولك انه هياخد فى المجلس 70 يوم
هنا بس عرفت انهم مفيهموناش
هنا بس عرفت ان الرسالة موصلتش
هنا بس عرفت ان موت الناس لم يؤثر
هنا بس فهمت ان الناس اللى جرحت وسال دمها دى لم تؤثر
هنا بس تاكدت انهم مش معانا ع الخط

ولقيت ان الثورة بتتشوه بتتصبغ بالخيانة والعماله بتتصبغ بالاسود رغم انه بيضا ومنوره زى نور الشمس
بتتشوه ليه مش مخلينا حتى نستمتع بيها ليه حتى مش عايزنا نتشبث بالامل ان مستقبل ولادنا احسن ليه

ليه مش حاسين اننا بقينا فعلا ناس تانية ليه مش واصلهم انها ثورة على الظلم والروتين والمحسوبية والاهمال والسرقة ثورة حتى ع البلطجية
ليه مش فاهمين انها ثورة من القلب القلب اللى يا ما حزن وشال واستحمل
ليه مش فاهمين انها ثورة حتى على نفسنا ليه مش عارفين ومش مقتنعين بقدرتنا على الحياة وعلى البناء
ليه مش مقدرين الطاقة اللى فينا
ليه بيكبتونا ليه بيحبطونا ليه

ايه الارقام العجيبة اللى انا بسمعها دى ايه الملايين والمليارات والدولارات واليورو والحاجات اللى انا بسمعها دى
فين الفلوس دى عملوها امتى حطوها فين جابوها منين كانت جايه لايه وراحت ازاى باعو ايه وخدوا ده بدالها باعونا لمين وفين وازاى

يا لهوى ده فى بيوت اتخربت بسبب تسريح العمالة وبيع الشركات وحتى ما ادهومش تعويض عليه القيمة
وفى الفلوس دى كلها
يا لهوى ده العيال كانوا بيدفعوا مصروفهم علشان نبنى مستشفى 57357 وفى كل الفلوس دى فى البلد
يالهوى يعنى اتبرع ولو بجنيه وفى كل المليارات دى يا لهوى

انا مش عارفة اقول ايه واللا ايه مش عارفه اعيط واللا اصرخ واللا الطم واللا افرح بالثورة
انا مش عارفة اخاف برضه واللا يزيد الامل واللا اروح فين واللا اعمل ايه
انا حاسة ان دموعى مخنوقة فى زورى انا حاسة انى عيانة انا حاسة انى خفيت من كل حاجة وجعانى

انا جوايا كل لخبطة ممكنه
لكن جوايا يقين واحد
ان دى ثورة مش احتجاج

قالوا

2010-04-27T14:06:00.005+02:00

قالوا:

النملة مواطن مثالى ،لأنها تضع مثلا مصلحة الجماعة فوق مصلحة الفرد.

قطرة ماء تساوى حياة

2010-04-20T14:12:00.012+02:00

بسم الله الرحمن الرحيم

دائما وابدا من متطلبات الحمد والشكر لله الحفاظ على النعمة

والماء نعمة غالية قوى قوى قوى لانها باختصار تساوى حياة يعنى الانسان ميقدرش يعيش من غيرها اكثر من 3 ايام وطبعا لازرع ولا حرث من غيرها يعنى با ختصار السبب الاول اللى قامت عليه الحضارة وهو الماء لو مش موجود يبقى مفيش حضارة يبقى مفيش حياة.

اتقفنا يبقى انا لما بعلم ولادى انهم يحافظوا على الماء ده ويستخدموه بحرص يبقى كده بحمد ربنا وبشكره على النعمة دى بشكل من اشكال الحمد .
طب مكافأتى على الحمد والشكر عند الله رب العالمين طب ومكافاتى على ترشيد الاستهلاك كمواطن هى ايه انى متبقاش عندى أزمة

طيب دلوقتى الموضوع ربعه فى ايدى وتلات ارباعه فى ايد الحكومة ازاى يعنى انا دلوقتى بطالب الحكومة انها تحافظلى على المياه دى انا قومت بدورى وعملت ترشيد استهلاك علشان انا وغيري وغيرى نحافظ على نسبة الاستهلاك اللى تخلينا نقدر نحافظ على النسبة المقررة لينا كدولة .

طيب دلوقتى انا بقى لما اسمع تصاعد الازمة بين دول المنبع ودولتى المصب المفروض شعورى يبقى ايه وان دول المنبع متكاتلة ضد دول المصب يبقى المفروض برضه اعمل ايه دلوقتى .

ودول المنبع دول مين بقى " بوروندي ورواندا وتنزانيا وكنيا وجمهورية الكونغو الديمقراطية وأوغندا وإثيوبيا وإرتريا " وتتزعمهم اثيوبيا شوف الزمن .

ودول المصب هى( مصر والسودان)

طيب ايه اللى عامل الخلاف هما 3 نقاط:

1-الإخطار المسبق قبل قيام أي مشروعات .

2-توفير الأمن المائي للدول .

3-التصويت على القرارات بالإجماع وليس بالأغلبية.

ورغم انه فى اتفاقات من اوائل القرن الماضى تنظم الموضوع الا ان كل ده تقريبا كده ملوش لازمة فى الازمة دى ومخزوننا من المياه فى بحيرة ناصر يكفى ل3 سنوات

يعنى مش عارفة نخاف على ايه واللا ايه ونقلق من ايه واللا ايه حسبنا الله ونعم الوكيل يعنى احنا سبنا المكان الوحيد اللى المفروض علاقتنا الدبلوماسية فيه تبقى على احسن ما يكون ورحنا عمالين نجرى يمين وشمال وتطبيع ونيلة ونصالح ناس على ناس ونراضى ناس بلا نيلة

المهم دلوقتى اقروا فى الموضوع زى ما انا هقرا فيه ولازم نتابع كويس عايزين نشوف حكومتنا الموقرة هتعمل ايه فى المصيبة دى (قالوا اللحمة غليت قولنا فى داهية الحمد لله اى اكل بيسد الجوع مبيفرقش معانا المصريين رافعين شعار هنعيش يعنى هنعيش بأمر الله لكن الميه بقى هنعمل فيها ايه دى)

شوفوا بقى هنا فى المحيط هتلاقوا مقالات جيدة وفيها ايضاح جيد جدا للموضوع

وربنا يستر

الوحش

2010-04-18T14:27:00.003+02:00

السلام عليكم ورحمة الله وبركاته

(دى مخلوقات الله السابحة فى الكون)كانت كلمة حماى الله يرحمه ليا لما كان يلاقينى اخاف من حاجة معينة واقصد بالحاجة دى المرعب والمخيف والعوووووو واليع جدا الفأر لا وايه كنت بحكيله انى بخاف يعنى مكنش موجود فعليا
طيب ايه العمل بقى دلوقتى وهو موجود فعليا↓

ايون الفأر دخل عندى فار يا ناس اروح فين واجى منين اعمل ايه طب اسيب البيت واروح عند ابويا لحد ما يطلعوه من البيت واللا ايه طبعا هو صغير جدا يعنى لسه مولود على حد وصف زوجى هو اكيد دخل من الباب لما ميزو افندى كان بيخرج العجلة علشان يلعب فى الفراندة شوية مش قضيتى دخل منين انا قضيتى يخرج دلوقتى يا خرابى بقاله فى بيتى اكتر من 12ساعة دلوقتى معقول معنى كده انه انتخ هنا

لا وايه تلاقيه بيتمرن ملاكمة دلوقتى وفى اعتقادى انه زمانه كبر دلوقتى ومش هيخرج بالساهل ابدا

طب وايه العمل دلوقتى دول حتى عملوا صلح مع القطط

طب وبعدين واصبحوا اكثر ذكاء ودهاء

شوفوا بقى قفلت عليه الاوضه اللى هو فيها وبعدين اشتريتله لزق فئران وظبطهوله مع قطعة طماطم على كرتون مقوى يعنى اتبعت الارشادات تمام وتخيلوا انى عملت كل ده لو حد حكى لبابا لا يمكن يصدق ابدا لكن الظاهر ان الامومة اللى جوايا تغلبت على احساس الخوف اللى عندى وشجعتنى احمى العيال من هذا الوحش المرعب اليع ده

ونظرا لاننا نمنا كلنا امبارح فى اوضه واحدة يعنى الفار انتصر علينا واحتل حته من الشقة لذلك مش هسكت ابدا على الاحتلال ده وهتصل باخويا ينقذنى او اختى الفدائية الصغيرة وتيجى علشان نحرر بيتنا من هذا المعتدى الوحش المرعب اليع

دعواتكم بالنصر

اليابان ☼

2010-04-04T11:08:00.010+02:00

بسم الله الرحمن الرحيم

اليابان معجزة حقيقية ودلالة على الارادة البشرية وان الانسان فيه من العزم والتصميم على انه يكون ويعمل حاجات صح فى حياته

علميا واخلاقيا وماديا واجتماعيا وثقافيا وووو

وكدولة وبلد دلالة على ان ممكن من تحت الرماد تطلع شجرة ويطلع عملاق

بعد ما ضربت بالقنابل النووية فى هيروشيما ونجازاكى من اكتر من 60 سنة شوفوا دلوقتى ايه هى بلد ليها كل الاحترام والحب بلد ممكن تبقى المثل الاعلى اللى نتحاول نتعلم منه

دى فيديوهات حلقة المعجزة اليابانية للدكتور \مصطفى محمود (رحمة الله عليه) وطبعا هى حلقة قديمة بقالها سنييييييييييييييييييين طويلة لكن تحسه بيتكلم بلسان حالنا اليوم

احنا يمكن فاكرينه كويس لكن كتيييييييير من شبابنا المصرى والعربى مش عارفينه اتمنى تعرفوا عنه وتقرأوا له وحتى دوروا على حلقات برنامجه القيم على الانترنت وتشوفوها وقتكم مش هيروح هدر☺

لحظات لا انساها ♥ مازن

2010-03-27T10:23:00.015+02:00

السلام عليكم ورحمة الله وبركاته

الحمد لله والشكر لله على نعمه الكتير قوى التى لا تحصى ولا تعد من ضمن نعمه الكتيييييييييييييييييير قوى قوى قوى عليا انه اراد بحوله وقوته انى أكون أم

أم كلمة ونعمة غالية قوى الحمد لله والشكر لله يارب ارزق كل اللى نفسه فى الذرية ومتحرموش ابدا يارب واجعلها ذرية صالحة يارب

اى ألم جسدى او نفسى قد يصاحب الست الحامل او حتى وقت الولادة نفسه يعتبر لا شىء او تمن بخس للسعادة اللى هتحسها لما تشوف وليدها وتلمسه لاول مرة.

أنا كامرأة لم اشعر بشعور اخر فى الدنيا يوازى جمال لحظة رؤيتى لولادى بعد افاقتى من التخدير(اصل حضرتى بجيبهم قيصرى:) ) اول ما بفوق او بتبتدى الافاقة وابتدى اسمع اصوات وبتبقى مجسمه جدا على فكرة فظيعة وابتدى احاول افتح عنيا وبتبقى كأن شبورة او ضباب كده يا دوبك باين منه ضوء بسيط واسمع زوجى وأمى وبابا وأحاول أتكلم واغيب تانى وافوق تانى واسمع صوتها برده بتعيط واحاول اتكلم واحاول واحاول لحد ما اقول بنتى بنتى وكانت اول كلمة اقولها لا حول ولا قوةالا بالله كلهم ضحكوا طبعا عليها وافتكرونى بهلوس قولت حطوا راسها على خدى وساعتها عيطت والجرح وجعنى قوى لكن كنت سعيدة جدا جدا جدا انا قلت ساعتها لا حول ولا قوة الا بالله لانها حاجة تبين مقدرة عظيمة لخالق عظيم ان يعيش بنى آدم انسان جوا بطنى 9 شهور و بعدين يخرج للدنيا و يتنفس ويحس كله بفضل الله

كنت حاسة كأنى شفت معجزة وهى كده صحيح معجزة الهية سبحان الله كانت جميلة قوى وصغننه قوى صحيح كان وزنها مثالى لكن كانت نونو جدا جدا وقرعة جدا جدا جدا ههههههههههههههه

أما يوم ولادة مازن نفس كل حاجة الا انه فى احساس تانى خالص حسيته اول ما شفته فى حب عجيب ربطنى بيه

صحيح ببقى مرتبطة جدا بالجنين اللى فى بطنى ده فى المرتين وبكلم جنينى ده كانه حاضر بين ايديا لدرجة ان امى كانت بتعتبر ان ده نوع من الهبل برضه ههههههههههههه بس لما شوفت حبيبى ده لاول مرة حسيت ان فى حاجات حلوة كتير قوى جايه فى حياتى صحيح فرحت قوى بميرو لما ولدتها ومازالت صديقتى رقم واحد لكن مازن حسيت ساعتها حاجة تانية يمكن علشان تانى مرة فكنت معتادة ع الالم فنسيته وركزت معاه هو بس مش عارفة

على قد تعبى فيه لكن كنت حاسة بسعادة غامرة وساعتها عرفت يعنى ايه سعادة غامرة يعنى ايه السعادة تغمر الانسان

والحنان اللى حسيته فى حضنه غير عادى كنت حاسه انى غير اى أم كنت سعيدة جدا جدا جدا حتى معتمدتش على اخواتى ربنا يخليهم زى ما كنت معتمدة عليهم اعتماد كلى فى مريم خاصة خلال الاسبوع الاول ربنا يجازيهم كل خير .كنت بقوم بالليل لرضاعته او تغيير ملابسه سعيدة جدا مكنش عندى نفس التوتر اللى كان عندى فى مريم يمكن علشان كنت جربت مرة فالتانية سهلة لكن الاكيد لانه كان هادى يعيط بس لما يكون فى سبب يعنى يا جعان يا هيغير الكادليز يا مغص يا صحى وعايز نور هههههههههه يعنى اللمبة تشتغل يسكت هو كده تمام

ومرت الايام كده رغم اى صعوبة الا انها سهلة مش عارفة ليه .

رغم انه مر ب3 مواقف لحد دلوقتى كل واحد اصعب من التانى مرة عمليه فى عينه الجميلة كانت زرقاء اللون وجميلة خالص (هى بالمناسبة دلوقتى بقت رصاصى كده) ومره عمليه فى بطنه الا انى عمرى ما حطيت فى دماغى انه حسد ولا كذا ابدا بحس انه ربنا سبحانه وتعالى بيعرفنى قيمة النعمة دى قوى وبيبعتلى رسالة انه تخيلى انك معندكيش النعمة دى وانك دايما تحمدى ربنا وتدعى للناس كلها ربنا ميحرمهومش من قرة العين يارب .

هو شمس دنيتى

وقمر حياتى

هو الواد صحيح دلوقتى بشد فى شعرى من شقاوته وجنانه الا ان السمة المميزة له هى الحنان والكلام الجميل يعنى يطلب الحاجة بادب يقول ممكن يا ماما كذا صحيح لحوح بس دايما بادب ومثلا عملتله العصير اللى عاوزه مثلا يشربه وييجى يجيبلى الكوب ويقولى شكرا يا ماما ربنا يسعدك قلبى ساعتها يرفرف واقوله ربنا يسعدك انت يا حبيبى واختك وبابا يارب

لما اتولد فى سعادة كبيرة ملت الدنيا وفى مشاكل كتير لناس اتحلت وفى رزق كتير جه لناس بشهادة الناس دول وش خير علينا كلنا

هو فاكهة اى قعدة (مين يشهد للعريس) بس ده صحيح فعلا والله

فى قعدة تهييس ستاتى خطبتله هنا بنت اختى لكن حاسه انه ميال للست اميرة بنت اختى التانية دايما بيشاكلوا بعض وفى نقار ودايما فى اتفاق برده ودى حاجة قلقانى اصل البت شايفه نفسها ومش هعرف اعمل عليها حما ههههههههههههههههه

علشان أكلمكم على مازن بالذات فى حياتى محتاج اكتر من بوست فاسمحولى بين حين واخر هكتب عنه لانه فعلا اكبر حب فى حياتى وبرتاح نفسيا جدا وبتملى البسمة قلبى قبل وجهى لما اتكلم عنه

ربنا يخليه هو واخته وباباه ويملا حياتهم وحياتكم سعادة ولا يحرمكوش ابدا من اللى بتحبوهم آمين يارب العالمين

من سنة وشهر و14 يوم

2010-03-19T12:36:00.004+02:00

بسم الله الرحمن الرحيم
بالتأكيد الأكيد انكم جميعا وحشتونى جدا جدا لكن الظروف كلها كانت مش تمام حتى هذا الجهاز الذى اكتب اليكم من خلاله تقريبا عليه عفريت

المهم انا كنت بكتب كتير جدا ومكنتش بعرف ارسل حاجة لكن معلش حتى البوست ده كتبته من يومين لكن برضه معرفتش ارسله لان عفريت الجهاز كان حاضر المهم والاهم انه يارب تكونوا بالف الف خير واسيبكم مع البوست ده

وهو احتفالا بمرور سنه وشهر و14 يوم على بداية حياتى فى حياة بكل ما فيها :

من سنة وشهر و14 يوم بالتمام والكمال كانت بدايتى هنا فى المدونة
كنت بجرب مش اكتر كنت عايزة اكلم نفسى بصوت عالى شوية يعنى اغير شوية فى حياتى وكنت عارفة انه هيبقى تغيير ايجابى اكيد باذن الله
ولما ابتديت اقرا مدونات باللغة العربية (لانى مكنتش بقرا الا مدونات باللغة الانجليزيةلناس فى بلاد تانية بعيدة خالص )حسيت ان الدنيا مش سودة قوى يعنى لسه فى امل لان فى ناس لسه بخير وفى تفكير سليم لسه فى دماغ الناس وان لسه فى ناس تعرف الاصول والواجب والعادات والتقاليد وان لسه فى ناس بتحاول تغير وان كانت بتبدى بنفسها او حتى بتصلح من نفسها بس حتى فده حسسنى بالامان وان ممكن ولادى لما يكبروا متبقاش الدنيا وحشة قوى مش هتبقى سودا فى كحلى لا ممكن تبقى ابيض فى اسود عادى وده شىء مريحنى لان ساعتها بامر الله هيختاروا الابيض وغيرهم هيختار الابيض وساعتها هتبقى مساحة الابيض اكتر من الاسود وده مريحنى اكتر واكتر

من سنة وشهر و14 يوم مكنتش اتخيل انى هبقى متغيبة عن المدونة الفترة دى كلها ومكنتش متخيلة كم اللخبطة واللعبكة والشقلبةوالكلكعة والاحباط والاكتئاب ده هيكون فى حياتى وحياة اللى حواليا وبقصد باللى حواليا عائلتى الكبيرة فتلاقى احباطات على مستوى العمل لفلان وفلان وفلان ومشاكل اجتماعية عند فلان وفلان وفلان ومشاكل صحية عند فلان وفلان وفلان وفلان وفلان وفلان وفلان و............

غير الاكتئاب اللى بيلذق فيا طول فترة الشتا والبكاء اليومى لاقل كلمة حتى لو ابنى قالى انتى حبيبتى قوى بيخلينى اعيط يعنى مش ممكن لدرجة ان العيال بقوا كل يوم يقولوا لبعض تعالى نضحك ماما ويعملوا حركات ويغنولى بحب الناس الرايقة علشان اضحك ربنا يخليهم يارب لانهم برضه اصحابى قوى زى اخواتى البنات هما دول الامان الوحيد فى دنيتى وكل ده جوايا ميعرفش عنه حاجة الا اختى الصغيرة هى بس اللى تعرف ان نفسيتى وحشة خالص لانى مينفعش اقول لامى هتفتكر ان انا وجوزى زعلانين ومينفعش اقول لجوزى او حتى ابين لانه هيفتكرنى باتهمه بالتقصير فى حاجة فبريح نفسى من كل ده واعيش على كنبتى المفضلة ويبقى الشاى صديقى فى المرحلة دى ولان اختى لو قعدت اضحك 30 يوم متواصل علشان متحسش بحاجة برضه هتحس ان فى حاجة مش تمام فبقولها لانها هتبقى متفهمه يعنى ايه الاحساس ده هو احنا كده ربنا خلقنا كده واتمنى نفضل كده لحد آخر يوم فى عمرنا

من سنة وشهر و14يوم بدات افهم حاجات كتير وناس كتير بدات ارجع لنفسى اللى كنت نسيتها من فترة وانشغلت عنها بالبيت والولاد وضغوط الحياة ومحاولات ارضاء جميع الاطراف فلقيت ان مش لازم ارضى جميع الافراد المهم انى ارضى اهم الافراد وارضى نفسى

من سنة وشهر و14 يوم لقيت مكان سحرى بخرج منه لعوالم تانية موازية لعالمى ممكن تتقاطع فى نقطة وممكن تفضل موازية لعالمى لكن فى النهاية كل العوالم دى مشابهه كتير لعالمى وفيها كتير من عالمى وبتكمل عالمى وبتثرى هذا العالم الصغير اللى بعيش فيه

متشكرة جدا جدا لكل اخواتى اللى سألوا عليا ربنا يخليكم للى بتحبوهم ويخلي لكم اللى بتحبوهم ولا يحرمكوش ابدا من راحة البال آمين يارب العالمين

ساعات قليلة على عام جديد

2009-12-30T12:32:00.005+02:00

السلام عليكم ورحمة الله وبركاته

تحية طيبة وسلام من القلب

اخباركم ايه جميعا يارب تكون احوالكم كلها بخير واحوال اسركم الكريمة كلها فى احسن حال يارب

اشكر جدا سؤالكم وتساؤلكم عن غيابى وعدم تواجدى بين صحبتكم الكريمة فترة طويلة

بعتبر من احسن الحاجات اللى حصلت فى حياتى عموما وبالاخص 2009 هى المدونة دى اللى خلتنى قرأت لناس وعرفت ناس وحاسة انى عشت مع ناس اصبحوا هم كل اصدقائى الان ويكفينى حتى انها تكون صداقة بالمراسلة على صفحات المدونة .

احلى ورد ابيض ليكم كلكم

صراحة كنت كاتبة كلام تانى فى البوست ده بس مسحته لان كان كلام كئيب ومكتئب ويجيب اكتئاب فخلاص ما علينا احنا ولاد النهاردة .

2009 عادى زى اى سنة مليانة احداث حلوة ع المستوى الشخصى واحداث مش ولابد
وعلى مستوى الوطن مش فاكرة الصراحة حاجة تسر وتعمل بهجة عالية واهو الحمد لله لسه عايشين ومصرين نعيش شعب معندوش دم
وعلى المستوى الدولى فى ايه يسر يا حسرة
ما علينا احنا مش قولنا مش عايزين اكتئاب
2010 اتمنى واتعشم وارجو من الله انه يكون عام جديد وهادى وتنصلح الاحوال وتتغير المفاهيم للصح واتمنى وادعو الله ان ينصر الاسلام والمسلمين فى كل مكان وان يرفع البلاء عن فلسطين وعن العراق وعن مسلمى الصين وعن كل مسلم موحد واقع تحت ضغط حرب او اضطهاد فى اى مكان على ارض الله الواسعة

حبايبى واخواتى اللى موجودين عندى هنا وبقرالكم دايما وكل الناس اللى بتزورنى من آن لآخر وكل الناس اللى مقصرة معاهم اشكركم جزيلا لانكم بكل هذه المصرية وبكل هذه الجدعنة وبكل هذه الانسانية اشكركم لانكم أنتم.

ده كان آخر بوست فى 2009 ولى عودة معاكم فى اول بوست فى سنة 2010 باذن الله
نفسى من زمان اكلمكم على حباية عينى مازن
وده اول بوست باذن الله فى السنة الجديدة

ياااه ما احلى الرجوع اليكم

اسيبكم فى رعاية الله

بلدى الود ودى احضن ترابك بيدى واشيلك جوا عينى اصل انتى غالية عندى

2009-11-19T20:59:00.003+02:00

الحمد لله اننا خسرنا

2009-11-19T13:13:00.003+02:00

بسم الله الرحمن الرحيم

كيف حالكم جميعا اتمنى تكونوا فى احسن حال وتكون النفسية تمام والاعصاب هادية

دى خريطة الوطن العربى

مصر فى قلب الوطن العربى

ودى خريطة مصر

مصر الحلوة ام الدنيا

يمكن نكون مش مقدرين قيمتها كويس يمكن ساعات بنزعل من حاجات فيها لكن مش معنى ذلك انها تبقى عرضه لكل ده

مصر كبيرة كبيرة قوى وعاليه وناسها احسن ناس طيبة وتحمل واخلاص مصر ياما عملت وصانت كل الدول العربية دى كلها مصر سبب انها اقتصاديا ضعيفة دلوقتى هى الحروب اللى دخلتها علشان كل الدول دى مصر الراقية مصر الجميلة يبقى دى اخرة التعامل معاها ومع ولادها

مصر الحرة الابية يقولوا عليها مصرائيل وانها تساوى اسرائيل واننا خونة كده بعد كل كده تساوونا بالعدو الوحيد لنا كده بعد سعينا للسلام نبقى خونة

ماتش كورة يا ناس يعمل كل ده

حسبنا الله ونعم الوكيل فى كل اللى يمس شعرة من مصرى واللا يشتم مصرى

المصرى جدع وطيب وشهم وقادر على التحمل اصعب المواقف والظروف

ولازم يكون فى تصرف دولى يرد لنا حقنا لازم عقوبة دولية او اى حاجة تهدينا

محدش زعلان ع الماتش عادى فينا من العقل اننا نعرف ان الرياضة غالب ومغلوب اللى مزعلنا اللى حصل وبيحصل ليه هى مصر عملت ايه لكل الناس دى بتكرههوها ليه كده يمكن علشان احسن واكيد احسن فعلشان كده بتكرههوها

ربنا يخليكى يا مصر ويعلى مقامك دائما ويبارك فى شعبك المؤمن يارب

اهداء

2009-11-02T12:30:00.008+02:00

السلام عليكم ورحمة الله وبركاته

شكرا لدعمكم الطيب جدا شكرا جزيلا

ربنا يخليكم ويبارك فيكم

تعالوا شوفوا حاجة من ذكرياتى فى مرحلة الجامعة واسمحولى اهديها للى يحبها وكمان عندى اهداء خاص

اهداء لك يا أغلى الناس عندى

الاغنية دى ظهرت وكنا لسه فى الجامعة وكنت ومازلت بحبها جدا لانها معبرة قوى عن احساسى بحبيبى وقتها واللى هو حبيبى برضه دلوقتى وزوجى وابو عيالى ربنا يخليه ويبعد عنه اى شر ويحفظه لينا ويبارك فى كل خطوة يمشيها

ومن هنا برضه بحذره الاكياس والسواطير مفيش اكتر منها بصه يمين شمال ها اوعى ههههههههههههههه

لا ابدا بهزر ربنا يحميه يارب ويبارك فيه وفى اولاده وفى زوجته اللى هى انا واللا بلاش

هى دى الحكاية ودعواتكم بقى

2009-10-26T08:34:00.004+02:00

بسم الله الرحمن الرحيم

اخوتى الكرام اشكر جدا سؤالكم علىّ شكرا جزيلا حقيقة افتقدكم واشعر كأنما شىء من أصل نفسى او شىء من طاقتى الوجدانية مفقود بسبب تغيبى عنكم ولكن لى عذرى.

حقيقة انا فى حالة نفسية سيئة من حوالى شهرين احداث كثيرة حدثت لى ولمن حولى اثرت كثيرا على لاننا تربينا على ان نتحمل ونكتم ما بنا حتى يقضى الله امرا كان مفعولا.ولكن كل هذا يؤثر فينا وفى اجسامنا وعلى حتى مجرد تقبل فكرة الحياة نفسها ومدى اهميتها وما الذى نفعله بالضبط فى هذه الدنيا.

ولكن ما ان يتستعيذ الانسان بالله من الشيطان الرجيم ويتستغفر الله ويلجأاليه ويتستغفره من اى فكرة سيئة قد جالت بنفسه حتى يبدل الله السحابة السوداء بشمس ساطعة تملا نفسه بالايمان والثقة بالله وحاشا الله ان اكون غير ذلك ولكن احيانا قد يتسلل اليأس والحزن الى نفسى فيصيبنى بتلك الخيبة وهى (وماذا بعد ما جدوى كل شىء وهل سينصلح حال تلك الدنيا وهل سأمن على نفسى واولادى فيها)

حتى مشكلة حدثت لاحدى اقربائى سيدة صغيرة تراها تحسبها مازالت فتاة صغيرة تلهو بدميتها ولكنها فى الحقيقة ام لطفلتين لم تفعل فى حياتها ما قد يؤدى بها لتلك المشكلة ولكنها ارادة الله وكلها اختبارات الاهية ليرى فعل الصابرين ولكى يزيدنا الله حسنات بامره سبحانه وتعالى.

اما اولادى فلديهم نزلة برد شديدة عليهم جدا ويزيدها سوء تلك الادخنة اليومية الليلية ولاننا من اهل دلتا مصر فنشعر بها مكثفة تخنقنا فى نومنا واصبحنا اسرى داخل بيوتنا نغلق النوافذ والابواب حتى تهدا قليلا ونعاود فتحها لمجرد حتى تهوية المنزل والغريب اننى اسمع ان وزارة البيئة مثلا تقول ان هناك غرامات وانهم سيجمعون تلك المخلفات من الفلاحين لاستغلالها بدل من حرقها ولكن هيهات كل عام اعتبر شهر اكتوبر هذا شهر النكسة والخيبة لا شهر الفرحة والانتصارات لاننى اعلم جيدا ما سيحدث فيه وما سيحدث لاولادى واولاد الجيران ونحن الكبار معهم من ضيق تنفس ونوبات السعال ونسأل الله ان يشفى كل مريض وحسبنا الله ونعم الوكيل فى كل من يقصر فى مصلحة اولاد هذا البلد.

وزوجى سندى فى هذه الدنيا الصابر القوى الايمان (ما شاء الله لا قوة الا بالله) سيسافر لمدة اسبوعين اسوان لظروف طارئة فاشعر وكان روحى ستسلب منى تلك المدة اشعر اننى لن اقوى حتى على التنفس ولا الكلام ولكن انا ذراعه الايمن كما يقولون وانا مسئولة عن الاولاد وعن هذا البيت فلهذا سأكون بفضل الله اقوى من نفسى حتى يرجعه الله لنا بالف الف سلامه

وايضا بدات مشروع جديد حيث اعمل فى تجارة الملابس الجاهزة والمفروشات من المنزل منذ حوالى 10 ايام وحقيقة الموضوع متعب جدا والمبلغ بسيط حوالى 2000 جنيه ولكن العجلة تدور صحيح انها بطيئة ولكنها تدور بفضل الله ولكنه حقيقة مرهق ومتعب ومطلوب له الصبر ايضا على طلبات الناس التى قد تجدها احيانا عجيبة وغريبة المهم دعواتكم بالتوفيق لان ان كان الموضوع يفوق التحمل سنضطر لتصفيته لغرابة ما نراه فيه ولكننا سنمهل الامر فترة طويلة وليست بقصيرة مع العلم اننا لا ناخذ من ربحه شيئا بل نضيفه على اصل راس المال ومعروف ان هذا النوع من المشروعات يلزمه عام كامل حتى تشعر به وبربحه ودخله اسالكم الدعاء بظهر الغيب بالتوفيق.

احداث كثيرة مرت علىّ انهكت نفسيتى وجسمى حتى اصبح ضغطى ينخفض فجأة واسرع لتناول دوائى حتى استطيع ان اقف على قدمى مرة اخرى او قد تنتابنى نوبة من القىء حتى انهك ويتبدل لونى للاصفر ولا املك الا ان ادعو الله ان يلهمنا الصبر والثبات ويقوى ايماننا ويهيىء لنا من امرنا رشدا وان يتقبلنا فى عباده الصالحين الصابرين وان يعفو عنا ويتقبلنا وان يفرج كرب كل من كان ذا كرب يارب العالمين

سامحونى فكل منا يحمل هما فوق عنقه يسير به اينما كان ولا تنقصكم شكوتى ومشاكلى ولكن الله قادر يخفف عنا ويسدد خطاناويلهمنا الصبر وقوة الايمان.

ممكن اطلب منكم طلب

2009-10-14T16:42:00.004+02:00

------------------السلام عليكم ورحمة الله وبركاته--------------------------

كنت اخبرتكم اخوتى واحبتى فى الله انى سوف اتناقش معكم فى موضوع احضر له ولكنى احاول القراءة فيه اكثر حتى لا آتى بمعلومة مغلوطة او فيها شك او اكتبها باسلوب قد لا يظهر المعنى جيدا وخاصة وانه موضوع له شق دينى كبير ويعتبر هو اساسه

هو ببساطة شديدة موضوع (القوامة) قد لا يعتبر الكثيرين انه موضوع مهم او انه شىء عادى جدا او هو تكليف من الله بالانفاق من قبل الزوج على زوجته اى ان البعض قد يهون من الامر ويجعله بسيط جدا لايحتاج لكلام فيه وقد يعتبره البعض رخصة لتأديب تلك الزوجة وقد يعتبره البعض انه تصريح الهى بالغاء رأى المرأة وجعلها فى مرتبة ثانية بعد الرجل فى حين ان الخطاب الدينى فى كل الاحوال موجه للذكر والانثى

فصراحة انا كما تعلمون جيدا لست من النوع الذى اكرمه الله تعالى بالقدرة على الكتابة فى الموضوعات الدينية بل اننى ولا اخفيكم علما اخاف من الخطأ الذى قد اقع فيه وانا اكتب آية قرآنية فحقيقة اخاف جدا
ولكن ذلك الموضوع البسيط الذى افهمه جيدا واتقبله واستوعب بامر الله ماهيته قد لا تفهمه بعض النساء بل والاكثر كارثية بالنسبة لى هو نظرة بعض الرجال ودعونى اقول كثير منهم الى القوامة فحقيقة نظرتهم لا تنم باى حال من الاحوال عن فهم حقيقى لذلك التكليف الالهى فهو تكليف لا تشريف.

كثير منكم له تلك الميزة وهو كتابة الموضوعات الدينية بسلاسة ووضوح واجادة وهذه حقيقة فعلا مثل الاستاذAKEED وايضا ماما نور وام البنات والعزيزة ام مالك واختنا العزيزة امة الله(موناليزا)
اطلب منكم ان يتبرع احدكم بوقته ومجهوده ويكتب لنا موضوعا عن القوامة ويسمح لى بان اضع رابطا دائما باذن الله لموضوعه
وشكرا جزيلا مقدما
حفظكم الله

السلام عليكم ورحمة الله وبركاته

2009-10-04T14:28:00.002+02:00

--------------------------بسم الله الرحمن الرحيم---------------------------

كيف حالكم جميعا اتمنى ان اموركم كلها تكون بخير
خلصت اجازتى والحمد لله كفاية كده عليا :)
لانى لو سبت نفسى لحالتى اللى مش ولابد ممكن تبقى اجازة على طول وانا مش عايزة كده

المهم اشكركم شكرا جزيلا على كلماتكم الطيبة والمشجعة اللى مش هنشرها لانها كلمات طيبة جدا فى حقى قد لا استحقها فهى كثير جدا على لذلك ساحتفظ بها واشكركم شكرا جزيلا ربنا يرفع معنوياتكم دايما يارب

الدراسة بدأت وبدأ معاها القلق انا قلقانه جدا وواضح ان الدنيا كلها قلقانه ولقيت النهاردة كثير من اولياء امور الطلاب حرصوا على موضوع الكمامة وفرحت جدا لما لقيت فى وعى جامد حتى بين الاولاد الصغيرين دول ولقيت فعلا المدرسات لعبوا ادوارهم كاملة النهاردة من حيث التوجيه والارشاد ولقيت الاطفال دول من باب التقليد اللى مش جايبها هيجيبها لانه حس بخطورة الموضوع فعلا
ربنا يستر ويشفى كل مريض يارب
هو كان لازم الازمة دى يعنى علشان نصحصح فى المدارس يعنى دلوقتى منبهين ع الاولاد محدش يشرب مكان حد هاتوا معاكوا صابونة واغسلوا ايديكم خلوا معاكم دايما مناديل ومتكحوش ولا تعطسوا فى وش حد يعنى كان لازم الازمة دى علشان نراجع نفسنا
كنا زمان عندنا ابلة الحكيمة كانت بتمر ع الفصول ونمد ايدينا وتشوف ضوافرنا وتبص على شعرنا وهدومنا واللى عنده برد تديلة جواب وحدة وياخد علاج ووووو دلوقتى فى تامين صحى وكل حاجة ماشى بس مفيش نفس اهتمام زمان الحكاية بقت هابولى شوية(من ماشية بهبل :))

المهم ربنا معاكى يا مصر ومع ولادك ربنا يعدى الازمة دى على خير احنا ياما عدت علينا ازمات ولان ربنا سبحانه وتعالى واقف جمبنا عدينا كل ده بحوله وقوته

مجرد ما بدات اكتب على الكيبورد الجميل ده( اللى عايز يتغير لان ميزو افندى بوظه من اللعب )ابتديت احس بشوية راحة
لى عودة مرة اخرى باذن الله والمرة اللى جاية هكلمكم عن موضوع غاية فى الاهمية بس سيبونى اقرا اكتر فيه علشان مجبش معلومة مغلوطة او فيها شك
شكرا شكرا لانكم بكل هذه الجدعنة
فى رعاية الله

اسمحولى آخد أجازة

2009-09-25T12:02:00.005+02:00

السلام عليكم ورحمة الله وبركاته

كيف حالكم اصدقائى يارب تكونوا بالف الف خير

اسمحولى آخد اجازة

دى تالت مرة بكتب فيها نفس الموضوع لانى مش عايزة اقلقكم لانى عارفة انكم واحسبكم على خير قلبكم طيب وبتقلقوا من الحاجات المفاجئة دى بس غصب عنى

هفتقدكم جدا جدا فوق ما تتخيلوا مش عارفة هتبقى اجازة قد ايه بس معتقدش ابدا انها اجازة للابد ولا هتبقى طويلة

هتوحشنى كلماتكم الطيبة كلكم

اسيبكم فى رعاية الله ولا تنسونى من صالح دعائكم

مع السلامة

عيد سعيد

2009-09-17T10:44:00.011+02:00

كل عام أنتم بخير

2009-08-20T13:48:00.004+03:00

***********السلام عليكم ورحمة الله وبركاته********************

يارب يبقى رمضان كله بركة وخير وايمان ورضا عليكم جميعا وعلى أمة الاسلام فى كل مكان

اللهم اهدنا ووفقنا لما تحبه وترضاه يارب العالمين

اخواتى واصدقاء مدونتى اللى هما اصدقائى يعنى اللى قلبنا واحد

وفرحنا واحد

وهمنا واحد

وحلمنا واحد

ودعائنا واحد

ورجائنا واحد

اتمنى لكم جميعا الفوز فى رمضان هذا العام يارب نقدر نفوز ببركات الشهر الفضيل ده وننعم برحمة ربنا فيه ومغفرته ونكون من عتقاء النار يارب

استودعتكم عند من لا تضيع ودائعه والقاكم بعد الشهر الفضيل بعون الله

أشكر كرمكم معى خلال الشهور الماضية ومساندتكم المعنوية الرائعة وأشكر جدا كلماتكم الطيبة

ربنا يخليكم ويطرح البركة فى كل ما تلمسه يداكم الكريمة

لا اله الا الله محمد رسول الله

سهل وبسيط

2009-08-15T16:01:00.018+03:00

----------------------------السلام عليكم ورحمة الله وبركاته -------------------------------

كل عام أنتم بخير

ربنا يبلغنا رمضان جميعا ويعينا على الطاعات

ربنا يقدرنا جميعا ويقوينا ونقدر نستغل كل وقت فى الطاعةوالعبادة يارب

شهر القرآن

اللهم انى اسالك بكل اسم هو لك انزلته فى كتابك او علمته احدا من خلقك او استاثرت به فى علم الغيب عندك ان تجعل القرآن الكريم ربيع قلبى و نور بصرى وذهاب حزنى وجلاء همى يارب العالمين

مواضيع كتير قوى حلوة كتبها ناس نحسبهم على خير لكن عند ماما نور وشجرة الدر وعند بسنت موضوعات حلوة هتعجبكم مقترحاتهم باذن الله

رمضان مش شهر الاكل المفروض انه شهر صيام يعنى اقل شهر نستهلك فيه مش العكس سبحان الله

طيب هقولكم شوية حاجات كده خبرات شخصية يعنى

طيب يعنى كوب البلح باللبن ده ازاى اصلا يبقى بعده اكل ده هو وجبة لوحده طب نكتفى بثلاث تمرات وخلاص

وبعدين نقوم لصلاةالمغرب حتى تكون المعدة خدت انذار ان جاى لها اكل والاولاد الصغيرين يقوموا كمان يبتدوا الصلاة مع والديهم حتى ولوكان تقليد وكمان علشان يتعلموا الصبر

طيب ياريت نخلى فى كوب حاجة دافئة وخاصة للناس اللى القولون عندها بعافية شوية ربنا يشفى كل مريض يارب

ولو فى شوربة يكون كويس سواء بخضار او سادة كده تدفى المعدة وتاخد مساحة فمتتمليش معدتنا اكل ونتعب

طيب الناس اللى بتحب المخللات ماهو لازم مخلل حاجة تفتح نفسنا ما انتو عارفين سدة النفس لاحقانا اول باول بقى ههههههههههه ان كان من كذا واللا كذا الحمد لله فبلاش نشتريها من بره مش ضامنين النضافة خالص ومش ضامنين ان مفيش حشرات وقفت عليها وامراض الصيف والعياذ بالله وحشة

طب نعمل ايه بسيطة خالص

نعمل مخلل بيتى سهل وسريع التحضير

مخلل باذنجان: كيلو با ذنجان صغير زى اللى فى الصورة ده وفى اصغر من كده برضه وارفع

هنشيل الطربوش الجميل الاخضر ده زمن الطرابيش راح وراحت ايامه هههههههههه

وهنغسل الكمية كويس وبعدين نحطه فى حله ونسلقه لحد ما يطرى ويستوى

وبعدين هنشيله فى مصفى يتصفى هنكون فى الوقت ده قشرنا ثوم ودقيناه مع ملح وليمون وفلفلايه خضرا اوحمرا مش هتفرق

هيبرد البتشينجان ونقوم فاتحينه من الجنب بالطول بس اوعى يفصل يعنى يبقى شريحتين لا عايزينه ماسك فى بعضه وبعدين نحشيه بالخلطة دى ونرصه فى علبة تلاجة وبعدن نحط عليه شوية خل سيبيه يبات ليلة فى التلاجة ودوقى وادعيلى

مخلل الطماطم

هنجيب طمطم ناشفة زى الحلوة اللى فى الصورة دى ونشيل الباروكه الخضرا بتاعتها دى وبعدين نغسلها وطبعا نجيب كيلو اونص على حسب ما عاوزين وبعدين ننيمها على جنبها ونفطعها شرائح طوليه بس مش للآخر خليهم برضه ماسكين فى جسم الطمطماية وبعدين نجيب نفس الخلطة اللى فوق ونحشى بيها وبرضه نحطها فى علبه ونرش عليها شوية خل صغيرين وفى التلاجة على طول

مخلل الخيار السريع

هنجيب كيلوخيار ونغسله ونقطعة طرنشات عادى خالص وهنجيب برطمان وندوب فيه ماء وملح وبعدين نقشر فصين ثوم تخان كده ونقطعهم حلقات ونحطهم فى البرطمان وبعدين نحط الخيار بيتخلل فى نص يوم يعنى لواتعمل الصبح الساعة 9 يتاكل المغرب عادى وبيبقى احسن طبعا تانى يوم

طيب فى طريقة تانية حلوة برضه وبتعجب الاولاد الصغيرين هنجيب الخيار ونقسمه بالطول ونشيل البذر مع انه مفيد والقشركمان مفيد جدا بس نكتفى باننا نشيل القلب ونخلى القشر وبعدين مكان القلب ده نضع جبن ابيض الاولاد بيحبوا الحاجات الغريبة واهى طريقةعلشان اللى مبياكلوش الجبنه اوالخيار نضحك عليهم يعنى

طيب دى محاولات كده يعنى والكويس فيها ان نتيجتها بتبان فى نفس اليوم غير اى انواع تانية وكمان تكليفتها بسيطة لما بتتعمل فى البيت وكمان لو فى عزومه بتنفع قوى

ربنا يكتر احبابكم يارب

طيب هناكل بقى بس منكتمش نفسنا الاكل فى الصيف بيكبس على النفس واكيد هتحصل ازمة فى علب الفوار فبلاش اصلا نكتر من الهم النم

رمضان شهر جميل كله بركه وخير

لكم منى كل احترام وتقدير.

شوية فضفضة

2009-08-13T14:22:00.012+03:00

بما ان جارى تنفيذ سياسة الاستخدام العادل ومحدش يقول لا مش هينفذوها احنا هنعترض وهنبعت ايميلات والناس فى المنصورة عملوا وقفة احتجاجية و هما هيتراجعوا وبتاع وشاى بالنعناع فبقولكم اوكى ممكن قوى ميحصلش دلوقتى ماشى يمكن الرفض الجماعى ده يغير وقت التنفيذ لكن مش هيغير التنفيذ بيتهيئلى يعنى (فاسمحولى افضفض معاكم شوية
يمكن يغلى عليا الاشتراك ومقدرش فعلا اكمل واخسر بسبب الغباء حاجة بحبها وبقضى على صفحاتها اسعد اوقات يومى وعرفت عن طريقها احسن ناس فكر وذوق ودين واخلاق ولقيت حاجات كنت مفتقداها فى حياتى فعلا من اهمها كلمة اصدقاءمعلش استحملوا رغيى اسفة مقدما على الاطالة)

رأيى اللى فوق ده يدل على انى اتغيرت مبقتش متفائلة زى زمان نسبة احساسى بالامل قلت هى ما انعدمتش بس قلت وقلت كتير كمان

كنت بتفائل لدرجة الهبل والعبط لكن خلاص اتغيرت، البراءة دى واللى لسه كتير من اللى حواليا بيقولوا انها فيا لكن بصراحة انا شايفة ان البراءة دى قلت خلاص وفى طريقها انها تتمحى خالص

كنت فاكرة انى اقدر احقق حلمى كنت فاكرة انى اقدر اعمل حاجة كنت فاكرة انى لما احاول هنجح

طب هقولكم على حاجة طبعا من موضوع سابق لى عرفتوا انى نفسى اعمل مشروع يرحم زوجى من السفر كل يوم لمحافظة تانية للعمل بها واساعده فيه وخاصة ان اولادى الى حد ما كبروا يعنى 8 سنين و4 سنين كبروا شويه برضه وممكن يتحملوا غيابى عنهم 4 ساعات حتى فى اليوم

وليه هعمل انا لان مثلا فاضل معايا كام غويشه كده ما بعتهومش قلت ينفعوا وآخد قرض من الصندوق الاجتماعى باسمى علشان لو جت لزوجى فرصة عمل احسن متبقاش فى حاجة تعرقله وقلت هتبقى فله ونعيش يا ولاد المهم لقيت ايجارات المحلات على شارع رئيسى من 5الاف وطالع وفى الشوارع الجانبية من الف وطالع برضه طيب وهتوضب بكام وهنعمل ايه واذا كان لازم تروح جاهز من كله للصندوق يعنى مش هيدوك قرض علشان مشروع تجارى الا لما تكون مأجر محل ومعاك عقد ب5 سنين ايجار وعامل بطاقة ضريبية وموضب المحل ده تمام وبعد كده يبعتولك حد يعاين ويقدر قيمة المبلغ اللى هيدوهولك وبعدين لازم يكون فى ضمان يعنى عقد بيت حتة ارض وموظفين يضمنوك

لولولولوللولولولولللولى طب ما هو انا لو عندى كل الكلام ده كنت غلبت يعنى انا لو معايا 20 الف مثلا كنت رحت شحت منكوا باسم قرض لا كنت هأجر محل واوضبه واجيب بضاعة كمبيالات واللا شيكات كنت هتصرف يعنى وابتدى بدايه بسيطة واكبر لكن مفيش انى ابتدى يعنى انت بتعجزنى بتقولى هنديكوا قروض تبتدوا بيها تروح تلاقى لازم انت تبتدى واحنا نديك

الكلام ده حصل قبل كده برضه من حوالى 6 سنين روحنا ولقينا كده قلنا خلاص مش مشكلة بكره خير وهييجى التعيين ومش هنرمى الشهادات اكيد هتنفع مرت الايام ونقدم يمين وشمال وملناش نصيب عادى الحمد لله كده فل قوى فى غيرنا حالتهم ضنك والحمد لله ربنا كرمنا فوق الوصف طيب مع تكرار المحاولة اليومين دول هى هى نفس الطريقة ونفس الكلام وطبعا القرض ده مش لله وللوطن ده عليه فوائد لكن متشكرين قوى جدا وميرسى لكل حد عايز يريح الشباب فى مصر

مش قادرين يفهمونا ليه او يحسوا بينا احنا مش عايزين نبقى زى الناس دى ناكل ناكل لما نورم وفى الاخر نرمى الاكل فى الصحرا

ومش عايزين نركب عربيات اخر موديل

حلوة العجلة ام بدال جميلة بتقضى مشاويرنا القريبة احنا عايزين مواصلات آدمية عايزين امان ع الطريق

مش عايزه الرفاهية تبقى للدرجة دى ولو انه من حقنا وعندنا الامكانيات اللى تعيشنا كده وتخلينا البلد الحلم

بس عايزة انى كأم اطمن على مستقبل ولادى نفسى مبقاش خايفة انهم يبيعوا بلدى وكل واحد يبقى حر فى اسهمه يبيع ميبيعش ايه ده فى حد يعمل كده دى بلد تاريخ ناس حضارة فى حد يبيع بلده

نفسى انى مصحاش الصبح الاقى واحد جاى يقولى انا صاحب المنطقة دى انا اشتريتها وفاضل انتى وجيرانك ويكون فى واحد مترجم معاه بيترجملى من العبرية مثلا للعربيه واللا من الفرنسية واللا من الاسبانية

نفسى يعرفوا انى مش عايزة البس حرير واللا مجوهراتى تبقى ماس وزمرد

رغم ان ده من حقى بس انا مش عايزه كده انا عايزه لما انزل اشترى حاجة تلزم بيتى واولادى فلوسى تكفى ملاقيش بنتى نفسها فى فستان مثلا وميزانيتنا لا تسمح رغم انها قنوعة وبسيطة فى اختياراتها واللى بتطلبه

عايزة الاقى اسعار الحاجات على قد الفلوس يعنى مثلا المرتب عشر قروش تبقى الاسعار قريبة ويفيض قر شين للزمن لا ازاى ودى تيجى الاسعار عماله ترتفع والمرتب الحمد لله زى ما هو وطبعا مبيفيضش حاجة فتلاقينى بقى تجيلى حالات اكتئاب واحباط

الرزق على الله اكيد ورزقنا زى ظلنا وزى الموت بيتابعنا فى كل مكان وعندنا ايمان بكده ولله الحمد وعايشين فى فضل الله وكرمه وربنا فعلا صلح حالنا كتير من لاننا صبرنا وقولنا الحمد لله

بخاف افكر فى بكره لانى مش شايفاه

عليه ضباب حاجب رؤيتى

بخاف احلم ببكره لانى مش لاقياه

في حاجة مكتفة خطوتى

مش عارفة اشوف ولا عارفة امشى

طب ايه العمل

ممكن شمسك يا بلدى تطلع تمحى الضباب

طب ولوممكن يا بلدى تفكى خطوتى

عايزة اشوف سكتى وانا ماشية بالعيال

خايفة اتكعبل يا بلدى ويتعوروا العيال

دول هما اللى ليا علشانهم بفتح عيونى

طب ممكن بس شوية نور فى طريقهم

ادينى بس امل لاجل اموت

ادينى بس امل لاجل اموت وانا مطمنة ع العيال

زينجيانج--- الايجور

2009-08-04T10:22:00.012+03:00

------------------------------السلام عليكم ورحمة الله وبركاته--------------------------------------

منذ عدة اسابيع قرأنا وسمعنا عن الايجور وزينجيانج وسمعنا عن المذبحة التى قامت بها قوات الامن الصينية ضد هؤلاء

ولكى اصدقكم القول كانت امى هى من عرفتنى بتلك المأساة وتدعونا للبحث عن بديل لاى منتج قد نشتريه ومكتوب عليه صنع فى الصين

عندما عدت لبيتى سألت نفسى من هم مسلموا الصين اين يستقرون هل موزعون ام متمركزون فى مكان ما وما الذى يدعو لتلك الاحداث هل ارهاب كما يدعون ويلصقون الكلمة والاتهام بكل ما هو مسلم فلأدر محركات البحث لافهم فكثيرا كثيرا ما اسعفت عقلى لفهم ما قد يستعصى عليه

وجدت تكرارا لكلمة تركستان وزينجيانج والايجور من هؤلاء لربما اعلم القليل عن تركستان لكن من هؤلاء

ووجدتنى فعليا لا اعلم شيئا الا قشور خارجية لا ترقى لان تكون معرفة حقيقية حتى تاريخها وخلفيتها فى تاريخنا الاسلامى وجدت نفسى اغفل الكثير والكثير فهذه بعض المعلومات القليلة من الشبكة العنكبوتية كتبتها بترتيب فهمى لها وتخزينها فى عقلى لربما تضيف لكم القليل

تركستان تعنى ارض الاتراك تقع تركستان الشرقية في الترتيب التاسع عشر بين دول العالم من حيث المساحة، وتشكل خمس المساحة الإجمالية للصين، تحدُّها منغوليا من الشمال الشرقي والصين شرقًا وكازاخستان وطاجكيستان شمالاً وغربًا، والهند وباكستان والتبت وكشمير جنوبًا وهى الآن اقليم زينجيانج او شينجيانج تعنى المستعمرة الجديدة

لغتهم هى اللغة الايجورية وهى تنحدر من اللغة التركية ولغات اخرى مختلفة وفيها عرقيات مختلفة واهمها الايجور وهم مسلمين من اصل تركى وايضا الهان وهم تانى عرق فى تكوينها وهناك ايضا روس ومنغوليون

ولكن قامت الصين مؤخرا باعادة تشكيل وتغيير الطبيعة الديموغرافية للمكان (الديموغرافية هى علم السكان، علم احصائي يهتم بتوزيع وتركيب السكان ونموهم والمواليد والوفيات والهجرات والمتغيرات الاجتماعية والاقتصادية والثقافية الى غير ذلك )

فقد كان عدد المسلمين الايجور 8 ملايين نسمة وكانوا يشكلون 90% من اجمالى عدد السكان الآن اصبح اقل من 50% لان الصين عمدت الى توطين ملايين من الهان داخل اقليم زينجيانج بقصد طمس الصبغة الاسلامية عن الاقليم

ماذا يريد الايجور؟

هم يريدون الحفاظ على هويتهم الثقافية فقد كانوا دوما شعبا مستقرا مستوطنا وليسوا بدوا، يعيشون بشكل رئيسي على الزراعة والتجارة .

ونتيجة لهذه السياسات الحكومية، ارتفعت نسبة "الهان" من 7% إلى أكثر من 40%، حسب إحصاءات رسمية.

وبمساعدة الحكومة، صار أتباع "هان" هم المسيطرون على غالبية المصانع والشركات، ولا يقبلون عمالة بها من غيرهم؛ مما اضطر الإيجوريون إلى امتهان أعمال متدنية مثل الخدمة في المنازل.وأصبح الإيجوريون مواطنين من الدرجة الثانية، فهم ممنوعون حتى من مجرد تمثيل هامشي في الهيئات الحكومية، كما لا يُسمح لهم باستخدام لغتهم في المدارس.كما أنهم وضعوا في موقف صعب للغاية؛ فهم بين خيارين إما فقدان ثقافتهم وإما تهميشهم اقتصاديًا، فالمساجد والمدارس الدينية تواجه حملات إغلاق؛ بحجة عدم وجود تراخيص، وتمنع السلطات الشباب دون الـ18 عامًا من الصلاة بالمساجد.

اما بالنسبة لتاريخ دخول الاسلام فيها

كانت بداية وصول الإسلام إلى تركستان- بصفة عامة- في خلافة "عثمان بن عفان" (رضي الله عنه) على يد الصحابي الجليل "الحكم بن عمرو الغفاري"، بيد أن مرحلة الفتح الحقيقية كانت في عهد الخليفة الأموي "عبد الملك بن مروان" على يد قائده الباسل "قتيبة بن مسلم الباهلي" الذي تمكّن في الفترة من (83- 94هـ = 702- 712م) من السيطرة على ربوع التركستان ونشر الإسلام بين أهلها، ثم دانت لحكم العباسيين بعد سقوط الخلافة الأموية. ويعد ذلك العصر الذهبي للدعوة الإسلامية بين الأتراك الشرقيين، فظهر منهم الجنود والقادة والحكام والعظام في العلم النبوي الشريف والحضارة الإسلامية أمثال: البخاري – مسلم – الترمذي – البيهقي – ابن سينا – محمد بن موسى الخوارزمي – الزمخشري – السمرقندي – عبد الله بن المبارك – الفضيل بن عياض – سفيان الثوري.
وفي نهاية العصر الأموي وبداية العصر العباسي الأول في القرن الثالث للهجرة أسلم الخاقان سلطان الترك " ستوق بوغراخان " وسمى نفسه عبد الكريم ، وتبعه في الإسلام أبناؤه وكبار رجال دولته، ومنذ ذلك اليوم أصبح الإسلام دينا رسميا للدولة ، وبقيت تركستان دولة إسلامية مستقلة حوالي تسعة قرون ، ومنذ ذلك الحين جميع أهلها مسلمون

العاصمة ارومتشى

معلومة

1- تحوي أرض تركستان الشرقية أكثر من 8 مليارات طن من احتياطي البترول، وتنتج منه 5 ملايين طن في العام.

2- احتياطي الأراضي التركستانية من الفحم يبلغ نصف احتياطي الصين من الفحم والسعرات الحرارية العالية جدًّا، فضلاً عن التربة الخصبة والأراضي الزراعية الوفيرة والإمكانيات المائية الهائلة.

3- يستخرج من أرض تركستان نحو 118 نوعًا من المعادن من أصل 148 نوعًا تنتجه الصين بأكملها

لذا فهي عصب اقتصاد الصين وعصب صناعاتها الثقيلة والعسكرية، فالصواريخ الصينية النووية، والصواريخ البالستية عابرة القارات تنتج في تركستان الشرقية

مرة اخرى الفت نظركم ان ماهو مكتوب تجميعات من مواقع مختلفة وهى بترتيب فهمى واستيعابى للموضوع( باللون الاسود)

حزنت انى كمسلمة لا اعلم عن هؤلاء شىء

حزنت على الاضطهاد الذى يتعرضون له لانهم فقط مسلمون يريدون الحرية التى ينادى بها العالم كله يريدون ممارسة شعائر دينهم بكل حرية والا تغلق مساجدهم بدعوى انها بدون ترخيص

حزنت لان مدارسهم تغلق كى لا يدرس الدين الاسلامى بها ولا اللغة العربية ولا حتى لغتهم حزنت لاننا جميعا نسيناهم

حزنت لان هناك مستعمرات تبنى وتهجير يتم لكى يتقلص عددهم على ارضهم ويبنتهى وجودهم وايدلوجيتهم وطبيعتهم الديموغرافية تماما كفعلة اسرائيل القبيحة

فتخيلوا بعد المذبحة يعدموا اللى اعتقلوهم كمان يا الله ايه القسوة دى واحتقار الانسان ده دى روح انسان ازاى تعامل بالمعاملة دى ازاى

يارب بحق عزتك وجلالك انصر الاسلام والمسلمين فى كل مكان يارب

احنا فعلا محتاجين نقرأ اكتر ونفهم اكتر ولسه مخلصتش قراءة فى الموضوع ده ومش هخلص الا لما افهم لانى بجد نفسى افهم ليه فى كل مكان بيكرهوا المسلمين كده ليه حسبى الله ونعم الوكيل

.كان نفسى ابقى صبى ترزى

2009-08-02T10:47:00.010+03:00

كنت ناويه والنية محلها القلب يتبعها العمل وكانت نيتى لله انى انفع بيتى فكنت ناويه ونفسى اتعلم خياطة على اصولهاباترون وقص والذى منه وكان ترتيبى انه يكون هذا الصيف لانى هكون فاضيه مفيش مدارس ولا مذاكرة لميرو وكان هيكون عندى وقت فراغ اكتر من العادى

وكان فى مكانين بيعملوا دورات فى الصيف اشمعنى الصيف بس مش عارفة المهم جت حكايةالفقرة المتزحزحة دى

وغيرت خطط كتير كنت ناوياها مع انى قدمت المشيئة والله بس الحمد لله على كل حال كله بامره

كان نفسى اتعلم خياطة علشان الغلا الرهيب اللى بقينا فيه -ملابس الاطفال اسعارها غير عادية بالله عليكم فستان طفلة معصعصة زى ميرو طالعة سنة تالتة شهادة ياناس يا خد كام متر ويتقص ويتنفذ فى كام ساعة وخدوا بالكم ده شغل جملة وفى الف واحد بيشتغل وفى مقصات الكترونية وحاجات كده على احسن مستوى من المفترض انها تساعد الانسان مش تزود اللى هو فيه

طيب الافكار بقى او التصميمات بتاعة لبس الاولاد عادية جدا جدا يعنى مش تصميمات( ايلى صعب) اللبنانى يعنى ده الموضوع بسيط وبعدين مثلا تيجى تتفرج بقى فى مواقع الشوبينج زى macy,s مثلا تلاقى الموديلات بسيطة ورقيقة وطفولية بشياكة وتلاقيها سهلة التنفيذ جدا جدا

شوفوا معايا كده

ايه رايكم بسيطة بشياكة وسهلة التنفيذ فى رايى بس محتاجة معرفة برضه يعنى تقص ازاى الحردة مكان العراوى كمر الشورت الحاجات دى

ف باذن الله مسيرى برضه اتعلم الخياطة واجيبك يا حلوة

وبعدين ايه خلى بالكم هتنفعنى برضه هصلح حاجات هخيط ملاءات للسراير واطرزها كمان يعنى بدل طقم الملاءات ماهو من 100 وطالع لا هنفذوا ويتكلف اقل من نص تمنه اه والله ومفيش فيكى يا مصر اكتر من القماش جميل وخامات مختلفة واشكال والوان عمار برضه امال ايه

فكروا فى احتمالات استخدامها هتلاقوها ممتازة جدا هى بتبتدى من الف وطالع ها ها - ديتها جمعية ب50 جنية برضه وسياسة النفس الطويل ومسيرى اجيبك يا حلوة .

*********************************************************

تعليقى على البوست اللى فات

2009-08-01T12:33:00.006+03:00

كيف حالكم جميعا

اعترف ان البوست اللى فات كان طويل طول رخم جدا ورذل بس كان يهمنى اكتبه لنفسى قبل ما اكتبه ليكم

كنت قرأت فى الموضوع ده كتير ولقيت انى بعمل كده فى حياتى فعلا فقلت طب ما انقل لكم ملمح من ملامح حياتى

عامل الناس بمثل ماتحب ان يعاملوك به

قولتلكم انه مبدأ من مبادئى لكن مقولتلكمش انى ساعات ببقى ضد نفسى ضد المبدأ ده ساعات اقول عامل الناس بمثل ما يعاملوك به

ازاى --- اقولكم

فى حياة كل واحد فينا ناس مبيطمرش فيها بمعنى انك تعامله بالمعروف وهو لأ

تسأل عليه وهو لأ

تعوده وهو مريض وهو لأ

تسأل على ولاده وهما مرضى

تفتحله بيتك وهو لأ

تقف جمبه وهو لأ

تستحمله وهو لأ

تستحمل عياله وهو لأ

تحترم عياله وهو لأ

تشيل عنه وهو لأ

تقضى له مصالح وهو لأ

تحاول تصل رحمك فيه وهو لأ

متشكيلوش همك وهو لأ

هو نقيض اى شىء جيد بتحاول تعمله معاه هو نقيض لاى مبدأ ممكن تكون بتمشى عليه طول حياتك

ورغم كده هو مفروض عليك لانه قريبك عمك مثلا خالك ابن عمتك بنت خالتك اخو مراتك اخو زوجك كده يعنى قرابه لا مفر منها مش صاحب هتقوله مع السلامة شوف مصلحتك لا دى حاجة لا مفر منها مفيش منها مهروب ويا سلام بقى لو يجمعك بيه نفس السكن بتيبقى قمة المهزلة الانسانية.

فبتضطر انك لما تتملى نفسك منه تبعد عنه شويه كده تدى نفسك فرصه تفضى شوية من الكوباية المليانه دى علشان يبقى فى مكان تعبى غيره فيه وهكذا

افضل اقول لنفسى يا بت دا انتى بتعاملى ربنا هتاخدى حسنات بصبرك على الاذى اللى جايلك منه لانك بتراعى صلة الرحم

يا بت هى الدنيا كده لازم يبقى فيها حته وحشة يا بت هما الناس ملائكة دول بشر يعنى فيهم عيوب هو انتى فاكرة نفسك كاملة يعنى طب ما انتى فيكى وفيكى فتلاقينى على طول افضى مكان فى كوبايتى المليانة من ناحيته واستعد لانها تملى من جديد

فى تعليق جالى على الموضوع اللى فات( اللى تشوفه )بتقولى

جميل اووووووى الكلام اللى حضرتك قولتيه والحمد لله ربنا بيعيننى وبقدر اعمل كتير منها بس فى مشكلة صغيرة ان مش كل الناس بتعامل زى مابتحب تتعامل يعنى انا ممكن اعمل كل داااا وفى الاخر يكون اللى فى الجهة المقابلة مش بيقدر دا فاحس ان اللى عملته دا هباء منثور واجى بعد كدا اقول انا بعامل ربنا مش البشر بس انا بشر وبزعل غصب عنى اعمل ايه بئااااا؟

فبقولها انتى رديتى عليا وعلى نفسك انك بتعاملى ربنا هو آه صح بنزعل بس لما تبصى للموضوع من ناحية انك بتعاملى ربنا هتلاقى نفسك هديت وابتسمتى ابتسامة رضا ان جزاءك عنده وحده مش كده واللا ايه

دمتم بكل سعادة

هو احنا بنعامل بعض ازاى

2009-07-27T14:19:00.011+03:00

كيف حالكم جميعا اصدقائى اتمنى لكم كل السعادة والرضا

البوست ده طويل معلش انا عارفة ان الجو حار ومش مستحمل الرغى ده كله بس معلش سامحونى

احب انوه بس فى الاول كده عن دعوات على كذا مدونة يعنى فى دعوة من منى هى امتداد بشكل او بآخر لدعوة دعاء على العنوان ده

http://mona-myownroom.blogspot.com/2009/07/blog-post_24.html

ودعوة ماما نور

http://mamanooor.blogspot.com/2009/07/blog-post_15.html

واقتراح عبد من عباد الله

http://hakawywebalawy.blogspot.com/2009/07/blog-post_17.html

وفى دعوة حلوة جدا برضه شفتها على مدونة بس مش فاكرة حقيقى اسمها ايه هدور واسيبه فى الكومنتس هى هتفطر كام فى رمضان دعوة لانك تودى الاكل جاهز على بيت اللى محتاجة قبل الافطار فى رمضان ان شاء الله

وده بقى اسمحولى موضوعى احتمال بصوت الاستاذ حازم على مدونته راديو العرب الحر

http://http//arabfreeradio.blogspot.com/2009/07/blog-post_27.html

وفى اسئلة طيبة جدا وممتازة ومنتظرين اجاباتها على مدونة akeed

http://akeed.blogspot.com/2009/07/blog-post_12.html

وموضوع ممتاز جدا على مدونة تأثير الفراشة

http://a-butterflyeffect.blogspot.com/2009/07/blog-post.html

كل ده لا ينفى التميز الواضح فى كل موضوع من موضوعاتكم جميعا بس حبيت الفائدة تعم من الموضوعات الجميلة على المدونات الجميلة دى

كفاية كده بقى ابتدى يلا بينا

عامل الناس بمثل ما تحب ان يعاملوك به

اهم مبدأ من مبادىء حياتى هو انا كده بحب اعامل الناس وفى مخى عاوزاهم يعاملونى ازاى ينطبق هذا مع كل من حولى واتعامل معهم يعنى اهلى، اهل زوجى، زوجى، ولادى، حتى الست اللى بتجيبلنا العيش( الله يقويها)

يعنى لو عايزه ولادى يحترمونى لازم احترمهم لو عايزه جوزى يحبنى لازم احبه واعمل كل حاجة توصلنى لكده لو عايزه اهلى يحبونى لازم أبرهم لو عايزه اهل جوزى يحبونى لازم احترمهم واحبهم لوعايزة الست بتاعة العيش تحترمنى يبقى لازم احترمها ومسمعهاش الا كل طيب وهكذا

كل يوم بنتعامل مع كل النوعيات دى من الناس كل يوم ربنا يخلى بشوف ولادى والحمد لله كل يوم وكل ساعة موقف جديد حلو مش حلو مش ده المهم المهم هتصرف ازاى

كل يوم بنتعامل مع ناس مختلفة روحت اتسوقت جبت حاجة اشتريت حاجة بحب جدا اعمل بالحديث ده قال رسول الله صلى الله عليه وسلم (رحم الله رجلا سمحا اذا باع سمحا اذا اشترى سمحا اذا اقتضى )

يعنى لو واحد رافع قضية حتى يرفعها بسماحة مش العكس

طيب هتعامل ازاى هكون حيطة سد واللا هيكون فى مخرج -هكون جامدة واقفة زى اللقمة فى الزور واللا هيكون عندى لين

لا طبعا افضل يكون عندى لين ليه لان الناس شخصياتها مختلفة وطباعها مختلفة ولا يمكن ابدا هكون زى اى حد ولا حد زيى يعنى اهم حاجة اننا نفهم فكرة الاختلاف فى تعاملنا مع الآخر

المهم

هنتعامل ازاى بقى مع الناس اى ناس

اهم حاجة اننا نعرف ان المثل الشعبى بيقول صوابعك مش زى بعض يعنى انا غيرك انت غيرى

يعنى فى ناس يحتاج الموضوع انك تفهمهم رايك بمنطق سليم علشان يفهمك وفى ناس تانية بتفهمها وهى طايرة زى ما بيقولوا ده يبين ان العقول والافهام مختلفة

وفى ناس من شخصيتها الغريبة شوية لازم تدور على حتة هادية فى شخصيته تقرب له من خلالها

وبرضه طبيعة علاقتنا بالناس دى بتحدد نوع التعامل يعنى التعامل مع الاب لازم بالضروروة يكون غير التعامل مع الاخ او الام او الزوج طبيعة العلاقة بتحدد نوع التعامل

طيب علشان ميحصلش خلافات بينا وبين بعض نعمل ايه

اولا كده بلاش اننا نعدد مساوىء الطرف التانى ايا كان وننسى مساوئنا اكيد لينا عيوب برضه واللا ايه

ثانيا جدعنة مننا برضه اننا نعترف بالخطأ يعنى لو غلطت فيها ايه لما اقول لزوجى او زوجتى انا آسف هينقص منى حته ابدا دا انا اكيد هزيد عنده وولادى لما اقولهم معلش يا حبيبى انا اسفة هيكبر على انه يعترف بغلطه ميبقاش عنده عنجهية وغرور

ثالثا لازم نحترم راى بعض متعتبرش ان رايك هو الصح الوحيد وان راى الطرف التانى غلط من اوله لاخره كده بتعمل بينك وبينه جفاء لانك مش مديله مساحة يفضفضلك حتى.

رابعا بلاش التعالى وحياة ابوك احنا كلنا ولاد آدم وحوا واللا ايه ملوش لزوم انت عارف انا مين وبتاع خليك معانا هنا على دكة الانسانية بلاش مدرجات الاكابر دا احنا كلنا اخوات مش كده واللا اتبريت مننا خلاص

خامسا ادى اللى بيكلمك اهتمام يعنى مش تيجى مراتك تكلمك مثلا ترد عليها وانت مازلت بتكتب ايميلك واللا المسج يا تقولها استنينى ثوانى يا اما تسيب اللى فى ايدك وتكلمها انك تبص فى عين اللى بيكلمك بيدى احساس باهميته وانه قبلك حتى فبينتظرك ولو هتخلص السنة الجاية

سادسا اما تيجى تنده على حد قوله باسمه او لو مش فاكر او مش عارفه قوله يا عم الحاج مثلا او يا استاذنا او يا خال يا عمده اى حاجة

يعنى بتشترى من بائع مثلا قوله بكام الطماطم دى يا عمنا هيقولك ب3 يا استاذنا كده هتلاقى يرد عليك زى ما قولتله بالظبط

انده الناس باسماء محببة لقلوبهم بتعمل الفة ومودة رسول الله عليه افضل الصلاة واتم التسليم كان بينده الناس باحب الاسماء اليهم يبقى متعملش زيه ليه وهو القدوة ولله المثل الاعلى.

سابعا لما تلاقى واحد بيعمل حاجة وبيبرع فيها امدحه قوله انت تمام مفيش زيك فى كذا حتى ولو بيصلح بواجير جاز مفيش مانع يعنى من المدح وكمان دايما شجع الناس اللى حواليك واديهم دفعة علشان يعطوك دفعة انت كمان

ثامنا اشكر الناس ودايما ابتسم فى وجههم وافتكر دائما ان( تبسمك فى وجه اخيك صدقة) وافتكر( افشوا السلام بينكم) يعنى لوداخل عمارتكم قول سلام عليكم وابتسم للبواب ،عامل النضافة اللى فى الشارع ابتسمله وقوله الله يقويك كلمة بسيطة بس فرقت معاه كتير واكيد فرقت معاك برضه لانك هتحس انك طيب وان وشك اتفرد على الصبح ويمكن تاخد دعوة حلوة يفرج بيها ربنا هم شايله على كتافك

تاسعا افهم مشاعر الاخرين يعنى بالبلدى اللى يقدر ميتعبش يعنى لو لقيتى جوزك راجع زهقان من شغله وباين على وشه متقوليش ايه ده بقى ده ينفع واحنا منتظرينه طول اليوم ومهيئين البيت وكله تمام لا قدرى انتى تعبه قدرى ارهاقه قدرى مشاعر الضيق اللى عنده من مسئوليات الشغل ورئيسه الرخم والمواصلات الصعب وووووو

عاشرا لو تقدر تقضى مصلحة لحد او تقضى حاجته اتفضل ياريت، رسول الله صلى الله عليه وسلم يقول : ( أحب الناس إلى الله عز وجل أنفعهم للناس، وأحب الأعمال إلى الله سرورٌ تدخله على مسلمٍ ، تكشف عنه كرباً ، أو تقضي عنه ديناً ، أو تطرد عنه جوعاً ، ولو أن تمشي مع أخيك في حاجته أحبُّ إليَّ من أن تعتكف شهراً ) صدق رسول الله

أما بقى التعامل بين الزوجين بالأخص ده فعايزله قاعدة تانية خالص خالص دا فى ياما كتاب ومفكرين ورجال دين وحتى علماء كتبوا وكتبوا وخلصوا اقلام وبرايات وكيبوردات ومفيش فايدة

العلماء قالوا كتير ومن اللى قالوه: [الرجل يستخدم الجانب الأيسر من مخه، أما المرأة فتستخدم الجانب الأيمن من مخها

صفات الجانب الأيسر: الأرقام، التحليل، الترتيب، القرارات، التخطيط.صفات الجانب الأيمن: العاطفة، الخيال، الابداع، التناسق، الألحان، الذوق ،العاطفة في الجانب الأيمن من المخ وهو الجانب الذي تستخدمه المرأة أكثر من الرجل.الرجل يعبر عن عواطفه بالعمل، أما المرأة فتعبر عن عاطفتها بالكلام.

إن الاختلاف الجسدي والعضوي بين الرجل والمرأة له تأثير نفسي على الطرفين الرجل مهيأ للتفكير في حل المشاكل بينما المرأة مهيأة للقيام بالأعمال.]

وبيقولوا برضه ان اللمسة الحانية على جبين المرأة او الطبطبة على ضهرها بتديها صحة وحيوية وبتقيها من امراض كتير سبحان الله اتارى الستات كلها عندها الضغط والقلب وامراض شرايين عافانا الله واياكم

ورجال الدين صوتهم اتنبح وهما عمالين يقولوا المودة والرحمة، امساك بمعروف او تسريح باحسان

والادباء يكتبوا قصص وروايات يمكن المشاعر تبقى ارق واحن والكتاب وعلماء النفس والاجتماع تعبوا وجالهم العصبى وهما عمالين يقولوا المرأة نصف المجتمع المرأة المرأة قيثارة المرأة مش عارفه ايه تعبوا الصراحة.

فى حاجة اخيرة بس عايزة اقولها كمان رسول الله صلى الله عليه وسلم قال( تهادوا تحابوا) يعنى فى علاقتنا بالناس اللى حوالينا لازم يكون فى وجود للهدية يعنى الكلمة الطيبة الحلوة والبسمة الصافية اللى من القلب دى اعتبرها هدية واكيد هتترد لك وخلى معاها كمان هدية بسيطة مش لازم تبقى غالية حلاوتها فى المفاجأة يعنى فاجىء والدتك مثلا فى غير عيد الام بطرحة صلاة واللا حتى علبة كريم لبشرتها الحنينة الطيبة.

قابل صديقك وطلع من جيبك قلم بسيط قوله ابقى افتكرنى يا عم واللا طفل جه يزورك مع اهله مثلا طلع من مكتبتك كتاب واللا اجندة وقلم واعطيهم له ،فاجىء زوجتك بوردة بكلمة حلوة فى وقت مش متوقعاه فيه يعنى تكون بتنشر الغسيل مثلا بتروق البيت تقوم طالع انت فجأة زى بتوع اللبن كده وتقولها بخ اى حاجة بس حسسها باهميتها وانها اساس البيت زيك بالظبط تخيل حياتك من غيرها مش هتلاقى لها طعم

الست كمان لازم تهادى جوزها من وقت للتانى يعنى حاجة بسيطة اسبراى، كريم حلاقة حتى اى حاجة جوز شرابات كده يعنى هههههههههههههههه

المهم اننا دايما نحط الناس فى بالنا احنا مش عايشين لوحدنا محتاجين لبعض نهون على بعض التعب نشجع بعض نشد من اذر بعض

هدوشكم تالت مرة بفيديو هو تقريبا حوالى دقيقتين و17 ثانية انا مش دايما بسمع الاغانىوكأنها بس موجهه للحب بين الرجل والمرأة بحب ساعات اسمع بودن وعقل وفهم اوسع شوية يعنى المقطع ده ممكن حد يفتكروا دلع حبيبة لحبيبها بس انا خدته على انه طلب من انسان لاخوه الانسان علشان لما تلف الايام ويحتاجه يكون الطرف التانى ده عنده قابلية انه يسمعه او يقف جمبه

الفيديو ده هدية منى ليكوا من باب تهادوا تحابوا برضه وعملتوا هدية لزوجى برضه (اصلى مفلسه اليومين دول وماعيش تمن جوز الشرابات هههههههههههه)

آااخ تعبت وتعبتلكوا سلف ايه الرغى ده كله اللى كمل ووصل لحد هنا يبقى كتر الف خيره

مع السلامة

يا جمالك يا اسكندرية

2009-07-24T21:46:00.005+03:00

***************السلام عليكم ورحمة الله وبركاته**************

كيف حالكم جميعا صحبة الخير اتمنى من الله ان تكونوا جميعا بخير وصحة وسعادة
اشكركم جدا كلكم طبعا على كلماتكم الطيبة وتواصلكم الكريم معى بارك الله فيكم جميعا

طبعا بقى عايزين تعرفوا الرحلة وتفاصيلها وكده
طيب نبتدى من فجرالاربعاء لان طبعا مفيش نوم الاطفال ناموا والكبار هما اللى فضلوا صاحيين تقريبا منتظرين الرحلة اكتر من العيال الصغيرة هههههههههههههههه
الرحلة مكانتش كاملة السنة دى لان اهم ركن فيها كان غير موجود وهى امى العزيزة لان ظروف عملها لم تسمح لانها خلصت الاجازات كلها ايام فرح اخويا معلش تتعوض ان شاء الله وكمان اختى الوسطى مكانتش معانا ، لو كان فى عمرنا بقية اكيد هنتجمع السنة الجاية ان شاء الله.
اولا كده كنا عندنا حماس غير عادى قتل الحماس ده ايه حزروا فزروا ؟؟؟؟؟
هه ايه فكروا......خلاص مش عار فين طيب

الاوتوبيس عطل هههههههههههه مش مرة ولا اتنين لا ابدا تلاتة ههههههههههههه وفى الاخر جابولنا غيره
واصبحت الرحلة اللى بنوصلها فى ساعتين ونص تلاته خدت اكتر من 5 ساعات هههههههههههههه
هم يبكى وهم يضحك وبعدين ايه بعد ده كله لقينا الشقق اللى حجزناها على غير المستوى المعتاد خالص low
low يعنى بس ولا همنا حاولنا نبسط الاولاد على قد ما نقدر .
وكانت مفاجأة جميلة ان اخويا وعروسته انضموا لنا تانى يوم عملوا جو ظريف برضه
واختى التانية انضموا على رابع يوم فجأة الساعة 12 بالليل لقينا الموبايل بيرن :ايوه اهلا
ازيكم وحشتونا
وانتوا كمان والله
انتوا بتعملوا ايه
بنتعشى تعالوا كلوا معانا
طب استنوا بقى احنا فى الطريق
انهو طريق
شارع خالد يا بنتى
خالد مين
خالد بن الوليد هههههههه
يا ليلتكوا بيضه يا مجانين ههههههههههه
طيب يلا فى انتظاركم

عموما يعنى هى مكانتش زى كل سنة علشان ماما مكانتش معانا بس حاولنا نعمل ذكريات حلوة .
المهم شوفوا الصور دى بكاميرا موبايل هى مش واضحة قوى بس حلوة برضه.

آخر صورة دى عند بير مسعود تقريبا بيعملوا حاجة جديدة واللودر الاصفر الجميل ظهر معانا يلا مش اشكال.

أعشق حاجة اسمها اسكندرية بجد كل ذكرياتنا فيها حلوة بنرمى كل همومنا فى بحرها بنستنى نروحها نجدد نشاط ونشحن طاقة .

ليا رأى صغنن كده ان اسكندرية محتاجة مننا محافظة عليها محتاجة دعم مادى قوى محتاجة دعاية سياحية اكتر .

اسكندرية عايزة فلوس تتجمل بيها وتتزين وتمشى كل حاجة فيها زى الساعة واتفرجوا بقى على الجمال اللى ممكن يظهر منها اكتر بكتير من كده.

مصر كلها حلوة بجد اتفرج من شباك عربيتك أو اتوبيسك العطلان أو اتفرج من شباك القطار المخلع

هتلاقى جمال وجمال على جمال لكن محتاج تنظيم ،محتاج حفاظ، محتاج تمويل، محتاج وعى.

مصرنا جميلة جدا جدا لا تقل عن اى بلد فى جمالها لكن عيبها الاهمال وعلى رأى المثل (بيت المهمل يخرب قبل بيت الظالم) دى حقيقة اكيد

حبيبتى الاسكندرية اشكرك جدا على انك بتستضيفى الناس دى كلها وبتستحملى الناس دى كلها كتر خيرك يابلد(بس نفسى اعرف لما كل دول المصيفين امال اهل اسكندرية فين؟!!! ههههههههههه)

نشرة اخبار صغننة

2009-07-13T13:07:00.007+03:00

********************* بسم الله الرحمن الرحيم**********************

فى عالم مليىء بالاحباطات المستمرة والتى تكاد تكون يومية

قرر السيد\ محسن والدى الغالى

انه من تاريخ 15 يوليو اجبارى على جميع اعضاء الاسرة الكريمة وازواجهم واولادهم

التجمع عند سيادته من اجل القيام بالرحلة السنوية لمدينة الاسكندرية

وجدير بالذكر ان سيادته يتكفل بالحجز وكل ما لزم من اجل رحلة هنية

وقد نما الى علمنا ان من سيقوم باحضار اى مأكولات او مشروبات يلغى اسمه فورا من كشف الرحلة

وانه يعفينا من تلك الاعباء عملا بمقولته الشهيرة( المليان يدى الفاضى)

وقد صدر الفرمان العائلى الطيب مع تحذيرات شديدة اللهجة( ان البلد هتبقى زحمة وعينكم ع العيال)

ومرفق بالبيان المواعيد الرسمية لبدء الرحلة الميمونة:

التجمع: الثلاثاء

السفر: فجر الاربعاء

العودة: تقريبا الاثنين او الثلاثاء

وممنوع منعا باتا التخلف عن تلك المواعيد والا الرحلة مش هيبقى لها طعم

أنا-----هتوحشينى يا مدونتى العزيزة وهيوحشنى جدا كل اصدقائى اللى عرفتهم عن طريقك خلى بالك منهم كلهم واللى ييجى ترحبى بيه ده بيته هه بلاش بخل وتكسفينى قدام الناس آه خليكى طيبة وأموره كده.

مدونتى----طب ينفع كده تسيبينى ده كده يعنى حوالى 10 ايام طب ما تاخدينى معاكى.

أنا------ما كانش يتعز يا حبيبتشى ما هو لوعندى لاب توب كنت اكيد خدتك معايا خليكى هنا انتى وخلى بالك من نفسك انتى فى قلبى دايما دايما.

اه كمان ابقى نضفى كده متخليييش تراب ولا تاكلى شيكولاته وترمى ورق احسن ازعل واللى جاى بمثاثة هه عارفين نفسكوا يبقى يخلى الورقى فى جيبه محدش يرمى حاجة اه انا بقولكم اهوه.

وبعدين معلش يا مدونتى العزيزة بقى مفيش وقت يا دوبك اوضب البيت قبل ما امشى واحضر الشنط وكده ويارب ما انسى حاجة وآخد الحاجات اللى فى الكشف كلها .

مواااااه يا مدونتى العزيزة تعالى فى حضنى تعالى مواااه.

هو صحيح فرحانه جدا لانى بحب اسكندرية جدا جدا جدا ليها ذكريات طيبة جدا فى قلبى لكن هتوحشونى يا اخواتى واصحابى جدا

معلش هعتبر نفسى مشيت من النهاردة لانى لازم اوضب البيت قبل ما امشى وارتب الشنط وبتاع.

فسلام بقى واقابلكم اكيد اكيد لما نرجع بالسلامة يارب باذن الله .

ملحوظة كمان احنا جدعان قوى ومش هيهون علينا نسيب بابا يعمل كل ده لوحده وان كان حبيبك عسل ما تلهطوش كله ههههههههههههههه

معلش ملحوظة صغننة كمان الاغانى بتاعت المدونة دى اللى مش حاببها ممكن يعملها pause عادى جدا يوقفها واللى نفسها فى غنوة معينة وطلعت حلوة ممكن اضيفها للقائمة ولما تدخل المدونة تختارها وتشغلها عادى فى اكرم من كده بقى انا مش بفرض رايى ولا ذوقى على حد وممكن جدا اللى يعجبنى ميعجبكوش عادى والاختلاف فى الرأى والذوق لا يفسد للود قضية .

كنت عاوزة تقولى ايه يا بت يا ام مازن كنتى عاوزة تقولى ايه .......آه

لا اله الا الله محمد رسول الله

قال رسول الله صلى الله عليه وسلم من قالها اول نهاره لم تصبه مصيبة حتى يمسى ومن قالها اخر نهاره لم تصبه مصيبة حتى يصبح:

(اللهم انت ربى لا اله الا انت عليك توكلت وانت رب العرش العظيم ما شاء الله كان وما لم يشأ لم يكن ولا حول ولا قوة الا بالله العلى العظيم

اعلم ان الله على كل شىء عظيم وان الله احاط بكل شىء علما اللهم انى اعوذ بك من شر نفسى ومن شر كل دابة انت آخذ بناصيتها)

استودعتكم عند من لا تضيع ودائعه استودعتكم عند الله جل وعلا

مع السلامة

احتمال تكون دى الخواطر اللى بيقولوا عليها

2009-07-09T15:11:00.008+03:00

احتمال
احتمال انى احبك
واحتمال برضه اكرهك

احتمال
احتمال اشتاق اليكى
واحتمال ولا حتى اذكرك
واحتمال يحتار امرى فيكى

احتمال
احتمال اشوفك جميلة وحرة وأبية
واحتمال اشوفك قبيحة وعبدة و رديه

احتمال
احتمال ابقى فخورة
واحتمال ابقى مقهورة
واحتمال اتكلم وملقاش لصوتى صدى

احتمال

احتمال تهملى الانسان فيا

واحتمال تقتلى الامل فيا

واحتمال برضه تحنى عليا

احتمال

احتمال اجرى فيكى جرى الوحوش فى البرية

احتمال اجرى واجرى لاجل عيشه انسانية

واحتمال اكون بجرى ورا سراب

واحتمال يكون نفسك فى التراب

يلمنى وترتاحى من همى وشكوتى

احتمال

احتمال يضيع فيكى حلمى

واحتمال يموت فيكى املى

واحتمال يمر عمرى ولسه بحبك انا

احتمال

احتمال أفخر بأمسى

واحتمال ابكى عليه

واحتمال احلم ببكره

واحتمال اخاف منه وعليه

احتمال

واحتمال

مليون احتمال واحتمال واحتمال

لكن الاكيد

انى عمرى ما انكرك او ارفضك او حتى ابيع حقى فيكى

والاكيد

انى احبك واعلم ولادى حبك وارسم معاهم خطوطك يا بلدى

سمعناكى زمان والآن

لكن اسمعينا انتى كمان

بامرنا احنا الشعب الصبور

هنملى عليكى منشور

بامرنا احنا الشعب الطيب اللى لا بلطجى ولا رجل اعمال ولا حتى سياسى:

فوقى يا بلدى

انفضى عنك ترابك ارحمينا اسمعينا خلى خيرك لينا

مستعدين نضحى دلوقتى لاجل العيال

مستعدين ناكلها بدقه لاجل العيال

مستعدين تعذبينا وتبهدلينا لاجل العيال

مستعدين نرمى شهاداتنا وتعب السنين لاجل العيال

مستعدين نستحمل ونستحمل لاجل العيال

فهمتينى يا بلدى

كل همى العيال

فهمتنى يا بلدى

كل املى العيال

راجعى نفسك يا بلدى يمكن عندك اعتذار لينا لسه ما سمعناهوش

راجعى نفسك يا بلدى يمكن تلاقى امل موجود لسه ما عشناهوش